Haʻu, ʻo Muimui ʻIate Au

Malakai

Naʻe Fakataumuʻa Fēfē Nai e Ngaahi Feilaulau Fakakuongamuʻá kia Sīsū Kalaisí?

ʻŪ tā fakatātā ʻa Denis Freitas

Naʻe fakatokanga ʻa Malakai fekauʻaki mo hono fai ha ngaahi feilaulau ʻuli ki he ʻEikí. Naʻe tuʻutuʻuni ʻe he ʻEikí “ha feilaulau maʻa” (Malakai 1:11) pea he ʻikai fakaʻuliʻi Hono keinangaʻangá (vakai, Malakai 1:12).

Naʻe pau ke maʻa e ngaahi feilaulaú koeʻuhí ne nau “fakamahinoʻi e founga kuo tuku mai ʻe he ʻOtuá ke tau foki ai ki Hono ʻaó—ʻa Sīsū Kalaisi mo ʻEne Fakaleleí.”¹ Ke ʻohake ha meʻa ne siʻi hifo aí ko ha manuki ia ki he haohaoa mo e feilaulau ʻa Kalaisí.

Fakakaukau ki he meʻa ʻe lava ke akoʻi mai ʻe he faʻahinga feilaulau ʻe fā ko ʻeni ʻi he Fuakava Motuʻá fekauʻaki mo e founga ke haʻu ai kia Kalaisí:

• Feilaulau tutú: ʻOku fakataipe ʻe ha feilaulau monumanu kakato ʻa e haʻisia ke tukulolo ki he ʻOtuá (vakai, Levitiko 1).

• Feilaulau ʻo e kakanoʻi manú pe meʻatokoní: Ko hano foaki ʻo e koané, uainé mo e meʻa fakanamuleleí fakataha mo e melino kotoa pē mo e feilaulau tutú (vakai, Levitiko 2).

• Feilaulau fakamelinó: Ko ha feilaulau monumanu naʻe fai ʻe ha taha ʻoku melino mo e ʻOtuá, ʻo fekumi ki ha melino lahi ange (vakai, Levitiko 3).

• Feilaulau maʻá e angahalá: Ko ha feilaulau monumanu ke fakalelei maʻá e angahalá pea maʻu ha vā fetuʻutaki mo Sihova (vakai, Levitiko 4 mo e 5).

Naʻe fakaʻilongaʻi ʻe he Fakalelei ʻa e Fakamoʻuí ʻa e ngataʻanga ʻo e ngaahi feilaulau ko ʻení. Ka neongo ia, ʻoku totonu ke loto-fiemālie e kāingalotu ʻo e Siasi ʻo e ʻEikí ke feilaulauʻi ʻa e meʻa kotoa pē maʻá e ʻEikí. ʻOku tau fakahoko fēfē he ʻahó ni ʻa e fono ʻo e feilaulaú? (Vakai, 3 Nīfai 9:19–20.)

Maʻuʻanga Fakamatalá

1. Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Motuʻá 2022, 80.