“Ngaahi Maʻuʻanga Tokoni maʻá e Toʻutupú mo e Fānaú,” Liahona, Fēpueli 2023.
Ngaahi Tefitoʻi Meʻa Mahuʻinga ʻo e Ongoongoleleí
Ngaahi Maʻuʻanga Tokoni maʻá e Toʻutupú mo e Fānaú
ʻOku ʻa e ngaahi mātuʻá ʻa e tefitoʻi fatongia ke akoʻi ʻenau fānaú fekauʻaki mo Sīsū Kalaisi mo ʻEne ongoongoleleí. ʻOku maʻu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha ngaahi houalotu, ngaahi polokalama, mo ha ngaahi maʻuʻanga tokoni kehe ke tokoni ki he ngaahi mātuʻá ʻi heʻenau ngaahi feingá. ʻE lava ke tokoniʻi fakataha ʻe he mātuʻá, kau taki ʻo e Siasí, mo e ngaahi kaungāmeʻá ʻa e fānaú kotoa mo e toʻutupú ke nau haʻu kia Kalaisi.
Tā ʻo e fānau Palaimelí naʻe fai ʻe Ben Johnson
Palaimeli
Ko e Palaimelí ko ha houalotu ia ʻa e Siasí maʻá e fānau māhina ʻe 18 ki he taʻu 11. ʻI he Palaimelí, ʻoku ako ʻa e fānaú fekauʻaki mo Sīsū Kalaisi mo ʻEne ongoongoleleí ʻo fakafou ʻi he ngaahi lēsoní, hivá, mo e ngaahi ʻekitivitií. ʻE lava ke tokoni e Palaimelí ki he fānaú ke nau ongoʻi e ʻofa ʻa e ʻOtuá kiate kinautolú.
Ngaahi Kōlomu ʻo e Lakanga Taulaʻeiki Faka-ʻĒloné mo e Ngaahi Kalasi ʻa e Kau Finemuí
ʻI Sānuali ʻo e taʻu ʻoku hoko ai e taʻu 12 ʻo e fānaú, te nau hiki leva mei he Palaimelí ki he ngaahi kōlomu ʻo e Lakanga Taulaʻeiki Faka-ʻĒloné (maʻá e fānau tangatá) pe ngaahi kalasi ʻa e Kau Finemuí (maʻá e fānau fefiné). ʻOku hokohoko atu hono fakamālohia ʻe he toʻutupú ʻenau ngaahi fakamoʻoní mo tokoniʻi e niʻihi kehé ʻi heʻenau ngaahi kōlomú mo e kalasí.
Polokalama ʻa e Fānaú mo e Toʻutupú
ʻI he kei talavou ʻa Sīsuú, naʻe “tupulaki ʻa e potó [ʻiate Ia] mo e lahí, pea naʻe ʻofeina ia ʻe he ʻOtuá mo e tangatá” (Luke 2:52). ʻOku tokoni ʻa e polokalama ʻa e Fānaú mo e Toʻutupú ki he kau mēmipa kei talavou ʻo e Siasí ke nau muimui ki he sīpinga ʻa Kalaisí. ʻOku nau ako mo tupulaki ʻi he tapa kotoa pē ʻo ʻenau moʻuí—fakalaumālie, fakasōsiale, fakatuʻasino, mo fakaʻatamai.
ʻŪ Makasini ʻa e Siasí
Ko e makasini ʻa e Siasí maʻá e fānaú ko e makasini Kaumeʻá. Ko e makasini Ki Hono Fakamālohia ʻo e Toʻutupú ko ha makasini ia maʻá e toʻutupú. ʻOku kau ʻi he ngaahi makasini ko ʻení ha ngaahi talanoa, ngaahi akonaki, mo ha ngaahi ʻekitivitī naʻe tohi pē maʻá e fānaú mo e toʻutupú.
Tohi Fakahinohino ʻo e Ki Hono Fakamālohia ʻo e Toʻutupú
ʻOku akoʻi ʻe he For the Strength of Youth: A Guide for Making Choices (Ki Hono Fakamālohia ʻo e Toʻutupú: Ko ha Fakahinohino ki Hono Fakahoko ʻo e Ngaahi Filí) ʻa e toʻutupú fekauʻaki mo e ngaahi moʻoni ʻo e ongoongoleleí. ʻOkú ne akoʻi kiate kinautolu ʻa e founga ke fakahoko ʻaki ʻa e ngaahi fili ʻe tokoni kiate kinautolu ke muimui ʻia Sīsū Kalaisí. ʻOku kau foki ai ha ngaahi tali ki ha ngaahi fehuʻi ʻe ala maʻu ʻe he toʻutupú fekauʻaki mo e founga hono moʻui ʻaki ʻo e ongoongoleleí.
Gospel Library
ʻOku lahi ha ngaahi maʻuʻanga tokoni fakakomipiuta ʻi he Gospel Library, kau ai ʻa e ngaahi vitioó, hivá, ngaahi talanoa fakafolofolá, mo e ngaahi ʻekitivitií. ʻOku kau foki ai ha ngaahi maʻuʻanga tokoni ke tokoni ki he mātuʻá mo e kau takí ʻi hono akoʻi ʻo e ngaahi tefitoʻi moʻoni ʻo e ongoongoleleí. ʻOku maʻu ʻa e ngaahi maʻuʻanga tokoni ko ʻení ʻi he ChurchofJesusChrist.org pea mo e polokalama Gospel Library.
Ngaahi Konifelenisi ʻa e KFT
ʻOku fakaafeʻi ʻa e toʻutupú ke nau kau atu ki he ngaahi konifelenisi ʻa e Ki Hono Fakamālohia ʻo e Toʻutupú (KFT) ʻi he kamataʻanga ʻo e taʻu ʻoku hoko ai honau taʻu 14. ʻOku kau ʻi he ngaahi meʻa ko ʻení ha ngaahi ʻekitivitī mo ha ngaahi kalasi ʻe tokoni ke fakamālohia ʻa e tui kia Sīsū Kalaisí mo tokoniʻi ʻa e toʻutupú ke nau tupulaki fakalaumālie, fakasōsiale, fakatuʻasino, mo fakaʻatamai.