“Tupulaki ʻi he Ngaahi Akonaki ʻa Sīsū Kalaisí,” Liahona, Fēpueli 2023.
Maʻá e Ngaahi Mātuʻá
Tupulaki ʻi he Ngaahi Akonaki ʻa Sīsū Kalaisí
Siʻi Ngaahi Mātuʻa,
ʻOku faingataʻa ʻa e moʻuí, ʻo aʻu pē ki he kau faivelengá. Ka te ke lava ʻo fakaʻaongaʻi ʻa e ngaahi fakamatala ʻi he makasini ko ʻení ke akoʻi ki hoʻo fānaú ʻe lava ke tau maʻu ʻa e fiefia ʻoku tuʻuloá ʻo kapau te tau langa ʻi he ngaahi akonaki ʻa Sīsū Kalaisí.
Ngaahi Fealēleaʻaki ʻi he Ongoongoleleí
Muimui ʻi he “Ngaahi Fakaʻilonga Hala” Fakalaumālié
ʻI he fakamatala ʻa ʻEletā Lenilani ʻi he peesi 4, ko e hā ha niʻihi ʻo e ngaahi fakaʻilonga hala kuo ʻomi ʻe he ʻEikí ke tokoniʻi kitautolu ke tau aʻusia hotau ikuʻanga taʻengatá? Aleaʻi mo ho fāmilí e ngaahi founga ʻokú ke muimui ai ki he ngaahi fakaʻilonga hala ko ʻení.
Ko ha Kolo ʻo ha Kāingalotu Talitali Loto-māfana
ʻOku tau maʻu ʻa e uiuiʻi fakalangi ke tānaki fakataha ʻa ʻIsileli mo tokoniʻi e fānau kotoa ʻa e ʻOtuá ke nau ongoʻi ʻEne ʻofa kiate kinautolú. Fakamatalaʻi fakanounou ʻa e talanoa ʻi he peesi 8 fekauʻaki mo ha uooti naʻá ne tokoniʻi ha kau kumi hūfanga tokolahi. Ko hai ʻe lava ke tokoni ki ai ho fāmilí?
Tokoni ʻi ha Ngaahi Founga Taʻeʻamanekina
ʻOku ʻikai ke tokoniʻi maʻu pē kitautolu ʻe he Fakamoʻuí ʻi he founga ʻoku tau ʻamanaki ki aí. Lau ʻa e fakamatala ʻi he peesi 14 fekauʻaki mo e ngaahi founga kehekehe naʻá Ne fakahaofi ai ʻEne kau ākongá mei he ngaahi matangí. Ko e hā ha niʻihi ʻo e ngaahi mana kuo fakahoko ʻe he Fakamoʻuí maʻa hoʻo fāmilí, pea kuo hoko mai ha niʻihi ʻo e ngaahi meʻá ni ʻi ha ngaahi founga taʻeʻamanekina?
Nonga mo e Loto-falala ʻOku Tuʻuloá
Lau e fakamatala ʻa ʻEletā Kaiungu he peesi 40 fekauʻaki mo e mahuʻinga ʻo hono ʻilo e finangalo ʻo e ʻEikí pea tali faivelenga iá. Mou aleaʻi fakafāmili ʻa hono ʻuhinga ʻo e fakavaivaiʻi ho lotó ki he ʻOtuá. Ko e hā ʻe lava ke fai ʻe he ʻOtuá ʻi heʻetau moʻuí ʻi he taimi ʻoku tau fai ai ʻa e meʻa ʻokú Ne kole mai ke tau faí?
Fiefia Fakafāmili ʻi he Haʻu, ʻo Muimui ʻIate Aú
Faitāpuekina ʻe he Ngaahi Monūʻiá
ʻI he Mātiu 5, ʻoku akoʻi ʻe he Fakamoʻuí ki Heʻene kau ākongá ha fono māʻolunga ange ke nau moʻui ʻaki kae lava ke nau hoko ʻo hangē ko Iá.
-
Lau ʻa e ngaahi monūʻiá ʻi he Mātiu 5:1–12. Talanoa fekauʻaki mo e ʻulungaanga takitaha mo e talaʻofa ʻoku fekauʻaki mo iá.
-
Hiki ʻa e hingoa ʻo e tokotaha takitaha ʻi ha laʻipepa kehekehe.
-
ʻOange ki he tokotaha takitaha ha laʻipepa, fakapapauʻi ʻoku ʻikai ke nau maʻu ʻa e laʻipepa ʻoku tohiʻi ai honau hingoá.
-
Tuku ke tā ʻe he tokotaha kotoa pē ha fakatātā ʻo ha taimi naʻe fakahaaʻi ai ʻe he tokotaha ʻi heʻenau laʻipepá ha taha ʻo e ngaahi monūʻiá. Hiki ha sētesi fekauʻaki mo ia. Hangē ko ʻení, “Ko Hená ko ha tokotaha faʻa fakalelei koeʻuhí he naʻá ne vahevahe mo hono tehiná.”
-
Kumi ʻa e tāpuaki ʻoku fekauʻaki mo e monūʻia ko iá pea hiki ia ʻi he konga ki lalo ʻo e pēsí.
-
Taufetongi ʻi hono vahevahe ʻo e meʻa naʻe tohí.
Fealēleaʻaki: ʻOku ʻomi fēfē kiate kitautolu ʻe he moʻui ʻaki e founga naʻe akoʻi ʻe Sīsū Kalaisí ha fiefia ʻoku tuʻuloá? ʻE tokoniʻi fēfē kitautolu ʻe he Tamai Hēvaní mo e Fakamoʻuí ke tau fakatupulaki e ngaahi ʻulungaanga ko ʻení?