“ʻOku Fiemaʻu Nai Ke Tau Haohaoa he Taimí Ni?” Ki Hono Fakamālohia ʻo e Toʻutupú, Fēpueli 2023
Lea Fakaʻosí
ʻOku Fiemaʻu Nai Ke Tau Haohaoa he Taimí Ni?
Ngaahi tā fakatātā ʻa Emily E. Jones
Naʻe hiki e folofolá ke faitāpuekina mo fakalotolahiʻi kitautolu, pea ko e moʻoni ʻoku nau fai ia. Ka ʻokú ke fakatokangaʻi nai e faʻa ʻasi hake he taimi ʻe niʻihi ha potufolofola ʻo fakamanatu mai ʻoku tau kiʻi tōnounou? Hangē ko ʻení: “Ko ia ke haohaoa ʻa kimoutolu … he ʻoku haohaoa ʻa hoʻomou Tamai ʻoku [ʻi] he langí” (Mātiu 5:48). ʻI he fekau ko iá, ʻoku tau fie foki ai ʻo pūlou e kafu hotau mohengá. Hangē ʻoku taumamaʻo e taumuʻa fakasilesitiale ia ko iá. Ka ko e moʻoni he ʻikai teitei ʻomi ʻe he ʻEikí ha fekau ʻokú Ne ʻafioʻi he ʻikai ke tau lava ʻo tauhi.
Naʻe kole mai ʻe Molonai, “ʻIo, haʻu kia Kalaisi, pea hoko ʻo haohaoa ʻiate ia.” “ʻOfa ki he ʻOtuá ʻaki homou iví, ʻatamaí, mo e mālohí kotoa pē, pea ʻe … tupu ʻi heʻene ʻaloʻofá ʻa hoʻomou haohaoa ʻia Kalaisí” (Molonai 10:32; tānaki atu hono fakamamafaʻí). Ko hotau ʻamanaki leleiʻanga pē ki ha haohaoa moʻoní, ko ʻetau maʻu ia ko ha meʻafoaki mei he langí—ʻoku ʻikai ke tau lava ʻo “ngāueʻi” ia.
Tukukehe pē ʻa Sīsū, ko ia lolotonga ʻetau ʻi he moʻui fakamatelié, tuku ke tau feinga ke hokohoko atu ʻetau fakalakalaká pea tau fakaʻehiʻehi mei heʻetau loto-fiehaohaoá, pehē ki he niʻihi kehé.
Kapau te tau vilitaki, ʻe toki fakaʻosi mo kakato hotau fakaleleiʻí, ʻi ha taimi he taʻengatá—ʻa ia ko e fakaʻuhinga ia ʻa e Fuakava Foʻoú ki he haohaoá.