“Ko e ʻuhinga ki he hā ʻa Sīsū ʻi Heʻene folofola, ‘Ko ia ke haohaoa ʻa kimoutolú’?,” Ki Hono Fakamālohia ʻo e Toʻutupú, Fēpueli 2023.
ʻAi Hangatonu
Ko e ʻuhinga ki he hā ʻa Sīsū ʻi Heʻene folofola, “Ko ia ke haohaoa ʻa kimoutolú”?
Naʻe folofola ʻa e Fakamoʻuí, “Ko ia ke haohaoa ʻa kimoutolu he ʻoku haohaoa ʻa hoʻomou Tamai ʻoku [ʻi] he langí” (Mātiu 5:48). ʻOku ʻikai ko ha fakaafe ʻeni ke haohaoa hoʻo meʻa kotoa pē ʻe faí. Ko ha fakaafe ke mahino lelei ange ʻa e palani ʻa e Tamai Hēvaní pea muimui kiate Ia.
ʻI he Fuakava Foʻoú, ʻoku ʻuhinga ʻa e foʻi lea faka-Kalisi ko e haohaoá ki he kakato, fakakātoa, pe tupulaki kakato, hili ʻenau aʻusia ha taumuʻa aofangatukú. ʻOku fakaafeʻi kitautolu ʻe Sīsū Kalaisi ke tau feinga ki he faʻahinga haohaoa ko iá. Pea ko Ia pē te Ne lava ʻo tokoniʻi kitautolu ke tau aʻu ki aí.
ʻOku finangalo ʻetau Tamai Hēvaní ke tau maʻu ʻa e haohaoa fakatuʻasino mo fakalaumālie ʻokú Ne maʻú. Pea te tau maʻu leva ai ha fiefia kakato ʻo hangē ko Iá. ʻE lava ke fakahaohaoaʻi kitautolu ʻi he Toetuʻu mo e feilaulau fakalelei ʻa Sīsū Kalaisí.
ʻOku ʻafioʻi ʻe he Tamai Hēvaní he ʻikai lava ke tau haohaoa ʻi he moʻuí ni. Ka ʻi Heʻene palaní, te tau lava ʻo fili ke tui kia Sīsū Kalaisi, fai ha ngaahi fuakava, feinga ke tauhi e ngaahi fekau ʻa e ʻOtuá, pea fakatomala ʻi he taimi ʻoku tau vaivai aí. Pea te Ne lava leva ke tāpuakiʻi kitautolu ʻi he moʻuí ni pea—ʻi he taimi, hili ʻa e moʻui ko ʻení—ʻokú Ne ʻai ke tau haohaoa.