“ʻI he Faingataʻa Ange ke Ngāueʻi e Ngaahi Taumuʻá,” Ki Hono Fakamālohia ʻo e Toʻutupú, Fēpueli 2023.
ʻI he Faingataʻa Ange ke Ngāueʻi e Ngaahi Taumuʻá
Kapau te ke fokotuʻu ha ngaahi taumuʻa pea ʻikai aʻusia kinautolu, ko e fakamatala ko ʻení maʻau.
Kuó ke fokotuʻu nai ha taumuʻa ke kamataʻi ʻa e taʻu foʻoú pea ongoʻi vēkeveke moʻoni ke fai ia … ʻi he ʻaho ʻe taha? Pea hoko mai mo e ʻaho 3 ʻo Sānualí, pea ʻikai. Kuo ʻosi hoʻo taumuʻá. Sai ange ke tatali ki he taʻu kahaʻú pea toe kamata foʻou. [Kiʻi fakamatala: ʻOua tokanga ki ai. Kuo tau aʻusia kotoa ia.] Ko ha fanga kiʻi tokoni ʻeni ke tokoni atu ke ke tauhi maʻu ki hoʻo ngaahi taumuʻá!
Fakahinohino ki he Fokotuʻu-Taumuʻá
-
Ngaahi tā fakatātā ʻa Bárbara Tamilin
Lotua e meʻa ke tukutaha ki ai e tokangá. ʻOku ʻafioʻi ʻe he Tamai Hēvaní ʻa e founga ʻoku fiemaʻu ke ke fakalakalaka aí. Tafoki kiate Ia! Fakakaukau ki he meʻa te Ne fiemaʻu maʻaú, pea tokanga ki he ngaahi fakakaukau pe ongo ʻoku haʻu ki ho ʻatamaí.
-
Fili e ngaahi taumuʻa ʻokú ke mahuʻingaʻia aí. Ngāueʻi ha meʻa ʻokú ke ʻosi saiʻia ai, pe ʻahiʻahi ha meʻa foʻou. Tatau ai pē, fili ha meʻa ʻoku ngali fakafiefia!
-
Fokotuʻu ha ngaahi taumuʻa pau.
-
Taumuʻa ʻikai fuʻu leleí: Sai ange ʻi he pasiketipoló.
-
Taumuʻa leleí: Akoako fakahū tuʻo 1,000 ʻi he aʻu ki he fakaʻosinga ʻo e māhiná.
-
-
Faʻu ha palani.
-
Hangē ko ʻení: Te u fakahū ʻi he miniti ʻe 30 ʻi he ʻaho Mōnité, Pulelulú, mo e Falaité ʻi he tuku ʻa e akó. [Kiʻi fakamatala: ʻOku lelei ange ʻa hono fili ha taimí ʻi he pehē “ʻi ha ʻi ai haʻaku taimí,” koeʻuhí ko hono moʻoní—mahalo he ʻikai ke ke tuku ha taimi kae ʻoua kuó ke vaheʻi ha taimi.]
-
-
Tupulaki fakalaumālie, fakasōsiale, fakatuʻasino, mo fakaʻatamai. Vakaiʻi e ngaahi fakakaukau ki he taumuʻá ʻi he tohi fakahinohino ʻa e toʻutupú pe ʻi he childrenandyouth.ChurchofJesusChrist.org.
-
Fakakaukauʻi ho ʻuhingá. [Kiʻi fakamatala: Mahalo he ʻikai ke fuʻu fakalotolahi e fakakaukau “koeʻuhí ne talamai heʻeku faʻeé”.] Ko e hā ʻokú ke fie ngāueʻi ai e taumuʻa ko ʻení? Te ne tokoniʻi nai koe ke ke hoko ʻo tatau ange mo e Fakamoʻuí? Te ne tokoniʻi nai koe ke ke hoko ko e tokotaha ʻokú ke fie aʻusiá?
ʻOkú Ke Fuʻu Femoʻuekina Nai?
Mahalo kuó ke ʻosi fai ia ka ʻoku fiemaʻu ke ke fai maʻu pē ia: ʻOkú ke ʻosi ngāue ʻi ha ngaahi meʻa lahi he ʻaho kotoa pē. Hiki he taimí ni ha taha ʻo e ngaahi meʻa ko iá mo e founga te ke fakalakalaka aí. Ko ha taumuʻa moʻoni ʻeni!
Fakakaukau siʻisiʻi: ʻOku ʻikai fiemaʻu ha taimi lahi ki he ngāueʻi e ngaahi taumuʻá. Mahalo te ke kamata ʻaki hano tuku mavahe ha miniti ʻe 5 he ʻaho ke ngāue ai ki ha meʻa. [Kiʻi fakamatala: Falala mai. ʻE ngalingali ke ke fakahoko ange ai ia.]
ʻOku Fuʻu Faingataʻa Nai Hoʻo Ngaahi Taumuʻá?
Faʻa kātakiʻi pē koe. Ko ha konga ʻo e moʻuí ʻa e toutou feingá. Kapau te ke hala ha ʻaho, toe ʻahiʻahi ʻapongipongi. Te ke lavaʻi ʻeni!
Lotua ha tokoni! ʻOku ʻafioʻi ʻe he Tamai Hēvaní ʻa e meʻa ʻoku fiemaʻu ke ke fai ke ke lava ai ʻo aʻusia hoʻo taumuʻá. Falala kiate Ia.
Toe fakakaukauʻi hoʻo taumuʻá: Kapau kuó ke fokotuʻu ha taumuʻa ʻoku fuʻu faingataʻa, feinga ke fokotuʻu ha fanga kiʻi taumuʻa iiki ʻe tokoni atu ke ke aʻu ki ai. [Kiʻi fakamatala: Kapau ʻokú ke fie akoako tā ʻukulele ʻi he ʻaho kotoa pē, mahalo ʻe kamata ʻaki ha miniti ʻe 15 kae ʻikai ko ha houa ʻe taha.]
Kiʻi Tokoni ki he Taumuʻá
Ngaahi fakakaukau ke tokoni atu ke ke aʻusia hoʻo ngaahi taumuʻá
-
Fakaʻaongaʻi hoʻo telefoní. Muimuiʻi hoʻo ngaahi taumuʻá ʻo fakaʻaongaʻi ha polokalama ʻi hoʻo telefoní hangē ko e Gospel Living app. Te ke lava foki ʻo feinga ke liliu e screensaver pe lea fufū hoʻo telefoní ki he hingoa hoʻo taumuʻá ke tokoni atu ke ke manatuʻi ia.
-
Fakaʻaongaʻi hoʻo sioʻatá. Fakapipiki hoʻo ngaahi taumuʻá ki hoʻo sioʻata he falekaukaú ke tokoni atu ke ke manatuʻi kinautolu ʻi he taimi kotoa pē ʻokú ke fufulu ai ho nifó.
-
Fakaʻaongaʻi ha hina. ʻI he taimi ʻokú ke ngāue ai ki ha taumuʻa faingataʻá, tohiʻi mata iiki ʻa e “ikuná” ʻi ha fanga kiʻi laʻipepa pe vaʻakau ʻaisipoloka ʻo faʻo ʻi he hiná. ʻI he taimi ʻokú ke loto-foʻi aí, lau fekauʻaki mo e ngaahi meʻa naʻe ngāue leleí.
-
Vahevahe hoʻo taumuʻá. Talaange ki ha taha ʻa e meʻa ʻokú ke ngāue ki aí. Kole ange ke nau ʻai ke ke haʻisia ki hoʻo fili ʻoku faí.