ʻOku ou Faʻa Fai ʻa e Ngaahi Meʻa Kotoa Pē ʻia Kalaisi

Ko e vahevahe ʻe he toʻutupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻá (vakai, Filipai 4:13).

Fakafalala ki he ʻEikí ʻi he Ngaahi Taimi Fakamanavaheé

talavou

Naʻe ʻi ai ha vela lahi naʻe ofi ki hoku ʻapí ʻi Tīsema ʻo e 2021. Naʻe puhi ʻe he matangí ʻa e afí, pea naʻe ʻikai toe lava ʻo mapuleʻi. Naʻá ne kapa ʻa e ngaahi kaungāʻapí mo e ʻū falekoloá.

ʻI he fuofua fanongo homau fāmilí fekauʻaki mo e velá, ne mau ʻi he senitā takimamata ʻi he temipalé. Naʻa mau lotu lahi ke malu homau kaungāmeʻá mo e fāmilí.

Naʻe pau ke mau falala moʻoni ki he ʻEikí. Naʻá ku maʻu ai ʻa e nonga mo e fiemālie ke ʻiloʻi kapau te mau falala kiate Ia, ʻe lava ke mau sai pē, neongo pe ko e hā naʻe hokó. ʻI he pō ko iá, naʻe nonga hifo ʻa e matangí pea lava ʻe he kau tāmate afí ʻo puleʻi ʻa e afí.

Naʻe hao homau falé, neongo naʻe ʻauha ha ngaahi kolo ofi mai. ʻOku ou ʻiloʻi ʻe sai pē ʻa e kakai lelei kotoa pē kuo mole honau ngaahi ʻapí. ʻE tokoniʻi kinautolu ʻe he ʻEikí.

Ne u lava ʻo ongoʻi e ʻofa ʻa e ʻEikí kiate au mo e kotoa ʻEne fānaú. Ko ha meʻa fakaofo ʻa e falala ki he ʻofa ʻa e ʻEikí. Falala ki Hono toʻukupú, pea te ke maʻu ha ngaahi tāpuaki lahi.

Corgan W., Kololato, ʻIunaiteti Siteiti ʻo ʻAmeliká