“ʻE fēfē haʻaku ongoʻi lelei ange ʻa e Laumālié ʻi he taimi ʻoku ou aʻusia ai ʻa e loto-hohaʻá pe tailiilí?,” Ki Hono Fakamālohia ʻo e Toʻutupú, Fēpueli 2023.
Ngaahi Fehuʻí mo e Talí
“ʻE fēfē haʻaku ongoʻi lelei ange ʻa e Laumālié ʻi he taimi ʻoku ou aʻusia ai ʻa e loto-hohaʻá pe tailiilí?”
ʻOku Finangalo ʻa e ʻOtuá Ke Ke Fiefia
“Ko e taimi ʻe niʻihi ʻoku faingofua ke u matuʻuaki ʻeku loto-hohaʻá pea taimi ʻe niʻihi ʻoku ʻikai ke u lava fai ha meʻa. ʻOku mahuʻinga ke kumi ha founga ke nonga ai. ʻE lava ke ikunaʻi ʻe he ngaahi fakakaukau koví mo fakatupu loto-hohaʻá ʻa e ngaahi fakakaukau lelei mo fakatupulakí. Kae manatuʻi ʻoku finangalo ʻa e ʻOtuá ke ke fiefia, ko ia fakafanongo ki he ngaahi fakakaukau lelei ʻoku haʻu meiate Iá. Te Ne lava ʻo tokoniʻi koe kapau te ke lotu kiate Ia ke maʻu ha mālohi.”
Madi T., 19, ʻĀkenisasi, ʻIunaiteti Siteiti ʻo ʻAmeliká
Maʻu ha Poupou ʻi he ʻOtuá mo e Fāmilí
“Mihiʻi hoʻo mānavá pea manatuʻi ʻoku ʻikai ke ke tuenoa ʻi hoʻo ongoʻi loto-hohaʻá. Fai ha lotu ʻo kole ki he Tamai Hēvaní ke tokoniʻi koe. ʻE lava foki ke tokoni haʻo talanoa mo ha taha hangē ko hoʻo ongomātuʻá. Kumi ha kau poupou ko e kaungāmeʻa mo e fāmili ʻa ia ʻe ʻi ai maʻu pē.”
Jasmine D., 15, Washington, USA
Naʻe ʻOmai ʻe he Tamai Hēvaní ha Tokoni
“ʻI he taimi ʻoku ou loto-hohaʻa aí, ʻoku ou ʻiloʻi ʻoku mahino ki he Tamai Hēvaní ʻa ʻeku ongó. ʻOkú ne tokoniʻi hoku kaungāmeʻá ke nau ʻiloʻi ʻa e taimi ʻoku ou fefaʻuhi ai mo e loto-hohaʻá, pea kuo nau ako e founga ke tokoniʻi ai aú. ʻOku ou lotu loto maʻu pē pea ʻoku ʻomi ʻe he Tamai Hēvaní ʻa e Laumālie Māʻoniʻoní ke tokoniʻi au ke u ongoʻi fiemālie mo loto lahi ange.”
Elsie J., 14, ʻAitahō, ʻIunaiteti Siteiti ʻo ʻAmeliká
Fakaʻatā Ho ʻAtamaí
“ʻI he taimi pē ʻoku ou ongoʻi loto-hohaʻa pe tailiili aí, ʻoku ou lotu ke ongoʻi nonga mo fakahā ki he ʻEikí ʻoku ou fiemaʻu ʻEne tokoní. Pea ʻoku ou feinga leva ke toʻo mei heʻeku fakakaukaú ʻa e ngaahi meʻa ʻokú ne ʻai ke u loto-hohaʻá ʻaki ʻeku hivaʻi ha ngaahi himi pe fanongo ki ha mūsika lelei. ʻOku tokoni ʻeni ke u fakaʻataʻatā hoku ʻatamaí, ongoʻi fiefia ange, pea loto-fiemālie ange ke muimui ki he ueʻi ʻoku ou maʻu mei he Laumālié.”
Nathan M., 18, ʻIutā, ʻIunaiteti Siteiti ʻo ʻAmeliká
ʻOku ʻIkai Te Ke Teitei Tuenoa
“ʻOku ou fefaʻuhi mo e loto-hohaʻá, pea taimi ʻe niʻihi ʻoku faingataʻa ʻaupito ke u ongoʻi ʻa e Laumālié, talanoa ki heʻeku Tamai Hēvaní, mo ongoʻi ʻEne ʻofá mo e fakahinohinó. Neongo ʻoku ou fefaʻuhi mo e loto-hohaʻá mo ongoʻi ʻoku ou tuenoa he taimi ʻe niʻihi, ka ʻoku ou ʻiloʻi ʻoku ʻikai ke u teitei tuenoa. ʻOku tokoniʻi au ʻe he lotú mo hono lau e Tohi ʻa Molomoná. ʻOku ou ʻilo ʻoku tataki maʻu pē kitautolu ʻe he ʻOtuá ki Heʻene māmá mo e ʻofá.”
Cameron K., 12, Nevata, ʻIunaiteti Siteiti ʻo ʻAmeliká