“Ko ʻEku Pīsope Fakaofó,” Ki Hono Fakamālohia ʻo e Toʻutupú, Fēpueli 2023.
Ko ʻEku Pīsope Fakaofó
Ngaahi tā fakatātā ʻa Kevin Fales
Kuo tokoniʻi au ʻe heʻeku pīsopé ʻaki ʻene poupouʻi au mo ʻomi ha ngaahi faingamālie ke u fakamālohia ai hoku ngaahi talēnití.
ʻI heʻene ʻiloʻi naʻá ku tā pianó, naʻá ne ʻeke mai ʻi ha ʻaho ʻe taha pe te u fie ako hono tā e ʻōkaní. Naʻá ku fakakaukau maʻu pē ʻe fakafiefia ke ako ia, ka ko ʻeku pīsopé naʻá ne poupouʻi moʻoni au ke u kamatá. Naʻá ne tokoniʻi au ke u fetuʻutaki mo e tokotaha tā ʻōkani ʻa e uōtí koeʻuhí ke ne lava ʻo tokoniʻi au ke u kamata, pea kuo lele lelei ʻaupito! Ko e taimi kotoa pē ʻoku sio mai ai ʻeku pīsopé ki heʻeku akoakó, ʻokú ne fakahīkihikiʻi au mo fehuʻi mai fekauʻaki mo e taimi te u toe tā ai ʻi he houalotu sākalamēnití.
ʻOku ou ʻilo ʻoku ʻiloʻi ʻe heʻeku pīsopé e meʻa te u malavá, pea ʻoku ou houngaʻia ʻi heʻene poupouʻi maʻu pē aú. Kuó ne tokoniʻi au ke u ako mo tupulaki ʻi ha ngaahi founga naʻe ʻikai ke u mei lava ʻo fai ʻiate au pē.
Aubrey B., Kalefōnia, ʻIunaiteti Siteiti ʻo ʻAmeliká
Naʻá ku feinga ke maheni ange mo ʻeku pīsope foʻoú ʻi heʻene pehē mai, “ʻOkú ke pehē ʻoku lelei e meʻa kotoa, ka ʻoku ngali ʻoku ʻi ai e meʻa ʻoku fehalaaki.”
Naʻá ku fakamatalaʻi ange naʻe tōmui maʻu pē ʻeku ngāue fakaakó. Naʻá ku loto-mafasia, taʻelata, pea fefaʻuhi mo e loto-hohaʻa fakasōsialé.
Naʻá ne pehē, “ʻOkú ke fuʻu fakamātoato.” Naʻá ne akoʻi mai e Fakalelei ʻa Sīsū Kalaisí pea mo e faʻa kātaki mo e ʻaloʻofa ʻa e Fakamoʻuí. Naʻá ne fokotuʻu mai foki ke u talanoa ki heʻeku ongomātuʻá mo fakakaukau ke talanoa ki ha faifaleʻi.
Naʻe kamata ke u sio ki ha tokotaha faifaleʻi. Naʻe ʻikai ke ne fakaleleiʻi fakaʻangataha ʻa e meʻa kotoa pē. Ka koeʻuhí ko ʻeku pīsope ʻofá, ne u maʻu e tokoni ne u fiemaʻú.
Brenna H., ʻIutā, ʻIunaiteti Siteiti ʻo ʻAmeliká