“Fehangahangai mo e Loto-mafasiá,” Ki Hono Fakamālohia ʻo e Toʻutupú, Fēpueli 2023.
ʻOku ou Faʻa Fai ʻa e Ngaahi Meʻa Kotoa Pē ʻia Kalaisi
Ko e vahevahe ʻe he toʻutupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻá (vakai, Filipai 4:13).
Fehangahangai mo e Loto-mafasiá
ʻI he kamataʻanga ʻo e ngaahi taʻu siʻi kuohilí, naʻá ku fakatokangaʻi naʻe fakaʻau ke fakautuutu ange ʻeku loto-mafasiá, ʻikai ha uʻá, pea mole ʻeku holi ki he ngaahi meʻa naʻá ku faʻa saiʻia aí. Ke mahino angé, naʻá ku loto-mamahi. He taimi kotoa pē. Ka ko e kovi tahá, naʻá ku ongoʻi mavahe mei he Tamai Hēvaní.
Naʻá ku maʻuhala ʻo fakakaukau naʻe tupu mei heʻeku taʻe tāú pea kapau te u toe anga māʻoniʻoni ange, te u toe fiefia pē. Ka ʻi he hili ha taʻu ʻe taha ʻo ʻeku feinga ʻiate au pē ke fakaleleiʻi e meʻa kotoá, naʻá ku ongoʻi liʻekina. Ko e fē ʻa e melino ne talaʻofa mai naʻá ku fekumi ki aí? Naʻe ʻi ai ha ngaahi taimi naʻe ʻikai ke u fie moʻui. Faifai, pea fakatokangaʻi ʻe heʻeku ongomātuʻá naʻe ʻi ai ha meʻa naʻe fehalaaki. Naʻá ku sio ki ha taha palōfesinale pea maʻu mo ha faitoʻo, ka naʻe ʻikai ha liliu.
ʻOku fakamatala ʻa ʻAlamā ʻi he ʻAlamā 36:18–20, naʻá ne tautapa atu ki he Fakamoʻuí ʻi heʻene mamahí. Naʻá ne pehē, “ʻOiauē, ko e fiefia, mo e maama fakaofo kuó u vakai ki aí; ʻio, naʻe fonu hoku laumālié ʻi he fuʻu fiefia naʻe tatau hono lahí mo hoku mamahí!” ʻI heʻeku lau e ngaahi leá ni ʻi ha pō ʻe taha, naʻe ʻikai ke u lava taʻofi ʻeku ongoʻi meheká. Kuo tuʻo lahi ʻeku tautapa ke maʻu ha fakafiemālie ʻi he lotú. Naʻá ku tangi mo fehuʻi loto pē, “Ko e hā naʻe ʻikai ke u maʻu ai ʻa e fiefia ne maʻu ʻe ʻAlamā ko e Siʻí?”
Naʻe hoko fakakongokonga mai e talí, ʻo haʻu taha taha e fakakaukaú. Ko e taha ko ha fakatātā: ko ha tāvalivali ʻo e Fakamoʻuí ʻi Ketisemani, ʻoku tokoto ʻi he kelekelé ʻi he loto-foʻi moʻoni pea meimei lōmekina ʻe he fakapoʻulí. Naʻá ku ʻiloʻi ʻi he mahino kakato ange naʻá Ne ʻafioʻi lelei ʻa e kavenga naʻá ku fuesiá, pea he ʻikai te Ne tuku ke u fuesia toko taha ia.
Naʻe ʻikai hano taimi kuo fakaleleiʻi e meʻa kotoa ʻiate ia pē, ka kuó u fakalakalaka ʻaupito ʻi he tokoni fakapalōfesinale mo e ʻaloʻofa mei he ʻEikí. ʻOku ʻikai mole maʻu pē ʻa e loto-mafasiá. Ka neongo ia, ʻoku mahino kiate au he taimí ni ʻe fakafetongi ʻeku mamahí ʻaki ʻa e fiefiá, ʻi he moʻuí ni pea mo e moʻui ka hokó.
Anna B., Kalefōnia, ʻIunaiteti Siteiti ʻo ʻAmeliká