“Ko e Fokotuʻutuʻu ʻo e Siasi ʻo Sīsū Kalaisí,” Liahona, ʻOkatopa 2023.
Ngaahi Tefitoʻi Meʻa Mahuʻinga ʻo e Ongoongoleleí
Ko e Fokotuʻutuʻu ʻo e Siasi ʻo Sīsū Kalaisí
Ko e ʻEiki ko Sīsū Kalaisí, tā fakatātaaʻi ʻe Del Parson
Ko Sīsū Kalaisi ʻa e ʻulu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOkú Ne tataki fakalaumālie ʻa e kau palōfitá mo e kau ʻaposetoló ke nau tataki ʻa e Siasí ʻi he ʻahó ni, ʻo hangē ko ia naʻá Ne fai ʻi he kuonga ʻo e Fuakava Foʻoú. ʻOku tokoniʻi kinautolu ʻe he kau taki kehe ʻo e Siasí.
Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi ia ʻa e Fakamoʻuí. ʻOku “fokotuʻu ki he tuʻunga ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē” (ʻEfesō 2:20). ʻOku ʻuhinga ʻeni ko Ia ʻa e konga mahuʻinga taha ʻo e fakavaʻé. ʻOkú Ne tataki ʻa e Siasí ʻo fakafou ʻi he kau palōfita mo e kau ʻaposetolo kuó Ne fili ke nau hoko ko e kau taki.
Ko e Kau Palesitenisī ʻUluakí
Ko e Palesiteni ʻo e Siasí ʻa e palōfita ʻa e ʻOtuá ʻi he māmaní he ʻahó ni. Ko ia ʻa e ʻAposetolo pulé pea ko ia toko taha pē ʻi he māmaní ʻokú ne maʻu ʻa e fakahā ke tataki ʻa e Siasí hono kotoa. ʻOku ueʻi ia ʻe he ʻEikí ke ne ʻiloʻi pe ko e ongo ʻAposetolo fē ʻe ui ke hoko ko hono ongo tokoní. ʻOku nau hoko ko e Kau Palesitenisī ʻUluakí. Ko e toko tolú ni ko e kau palōfita, kau tangata kikite, mo e kau tangata maʻu fakahā.
Kōlomu ʻo e Kau ʻAposetolo ʻe Toko Hongofulu Mā Uá
ʻOku hoko foki mo hono kotoa ʻo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā. ʻOku uiuiʻi ʻa kinautolu ke nau hoko ko ha kau fakamoʻoni makehe ʻo Sīsū Kalaisi. ʻOku nau fononga ʻi he funga ʻo e māmaní ke akoʻi mo fakamoʻoni kiate Ia. (Vakai, Tokāteline mo e Ngaahi Fuakava 107:23, 33.)
Ngaahi Kōlomu ʻo e Kau Fitungofulú
ʻOku toe ui foki ʻa e kau mēmipa ʻo e Kau Fitungofulú ke nau hoko ko e kau fakamoʻoni ʻo Sīsū Kalaisi (vakai, Tokāteline mo e Ngaahi Fuakava 107:25). ʻOku nau tokoni ki he Kōlomu ʻo e Toko Hongofulu Mā Uá ʻi hono akoʻi ʻo e ongoongoleleí mo langa hake ʻo e Siasí ʻi he funga ʻo e māmaní.
Faitā ʻa Machiko Horii
Kau Taki Fakalotofonuá
Kuo uiuiʻi foki ʻe he ʻOtuá hoʻo kau palesitenisī fakasiteikí pe fakavahefonuá, kau pīsopelikí pe kau palesitenisī fakakoló, mo e kau palesitenisī ʻo e kōlomu ʻo e kaumātuʻá mo e Fineʻofá. Te nau lava ʻo tokoniʻi koe ke ke ako mo moʻui ʻaki ʻa e ongoongoleleí. Te ke lava ʻo ako fekauʻaki mo ha niʻihi ʻo e ngaahi uiuiʻi ko ʻení ʻi he fakamatala ki he Ngaahi Tefitoʻi Meʻa Mahuʻinga ʻo Māʻasi 2022, “Ko e Ngāue ʻi he Ngaahi Uiuiʻi Faka-Siasí.”