2023
ʻI ha Tuʻunga Mālohi
‘Okatopa 2023

“ʻI ha Tuʻunga Mālohi,” Liahona, ʻOkatopa 2023.

Maʻá e Ngaahi Mātuʻá

ʻI ha Tuʻunga Mālohi

Ko ʻEletā Lāsolo M. Nalesoni mo e kau taki kehe ʻo e Siasí ʻi he konifelenisi ʻi Matakasikaá

Ko ʻEletā Lāsolo M. Nalesoni mo e kau taki kehe ʻo e Siasí ʻi ha konifelenisi fakatakimuʻa ʻo e lakanga fakataulaʻeikí ʻi Matakasikā, 2011.

Siʻi Ngaahi Mātuʻa,

ʻI heʻetau ako ʻi he Fuakava Foʻoú ʻi he māhina ní, ʻoku tau laukonga ai ki he anga hono “fokotuʻu ki he tuʻunga [ʻo e Siasí] ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi [pē]” (ʻEfesō 2:20). ʻOku fakamoʻoni ʻa Palesiteni Tāleni H. ʻOakesi ki he “founga fakalangi ko iá, ʻa ia ʻoku tataki ai ʻe he ʻEikí Hono Siasí ʻi he ʻahó ni” (peesi 7).

Ngaahi Fealēleaʻaki ʻi he Ongoongoleleí

Kau Palōfita Moʻuí

Aleaʻi fakafāmili ʻa e meʻa ne mou ako mei he konifelenisi lahí ʻi he māhiná ni. Vahevahe ha ngaahi lea mei he fakamatala ʻa Palesiteni Tāleni H. ʻOakesi fekauʻaki mo e kau palōfita ʻo onopōní mo e ngaahi kī ʻo e lakanga fakataulaʻeikí (peesi 4). Ko e hā ha ngaahi tāpuaki ʻokú ke maʻu ʻi hoʻo muimui ki he faleʻi ʻa e kau palōfita mo e kau ʻaposetolo ʻi he ʻaho ní?

Ko e Tui ke Mamata ki he Ngaahi Maná

Fakaafeʻi ha mēmipa ʻo e fāmilí ke ne lau leʻolahi ʻa e Mātiu 9:20–22, ʻa ia ʻokú ne fakamatalaʻi ʻa hono tokoniʻi ʻe Kalaisi ʻa e fefine naʻe “ʻi he ʻau ʻa e totó.” Te tau fakatupulaki fēfē ʻa e tui ke mamata ki he ngaahi maná? Ko e hā ʻa e ʻuhinga naʻe fakahoko ai ʻe Kalaisi ʻa e ngaahi maná? (vakai, peesi 43).

Founga ke Hoko ai ʻo Anga Faka-Kalaisí

ʻOku akoʻi ʻe ʻEletā Lini G. Lōpinisi ʻa e founga te tau lava ai ʻo muimui ki he fakaafe ʻa e Fakamoʻuí ke hangē ko Iá ʻaki hono fakakau ʻa e ngaahi ʻulungaanga faka-Kalaisí ʻi heʻetau moʻuí (vakai, peesi 10). Te ke lava ʻo vahevahe ha niʻihi ʻo ʻene ngaahi sīpingá, hangē ko e ʻinisēkite ulo ko e ekiakí (fireflies) pe ko ha faʻē ʻokú ne fafanga ha kiʻi tamasiʻi siʻisiʻi, ke tokoniʻi hoʻo fānaú ke nau ʻilo ʻa e founga ke fakatupulaki ai ʻa e ngaahi ʻulungaanga faka-Kalaisí ʻi heʻenau ngaahi fengāueʻaki fakaʻahó.

Fiefia Fakafāmili ʻi he Haʻu, ʻo Muimui ʻIate Aú

Tauhi ʻa e Tuí

2 Tīmote 4

ʻI he ofi ke ngata ʻene moʻuí, naʻe talaange ʻe he ʻAposetolo ko Paulá kia Tīmote, “Kuó u tau ʻa e tau lelei, kuó u lavaʻi ʻa e fakapuepué, kuó u tauhi maʻu ʻa e tuí” (2 Tīmote 4:7). ʻAhiʻahi fakahoko ʻa e ʻekitivitī ko ʻení ke ako fekauʻaki mo hono “tauhi ʻo e tuí”:

Kimuʻa ʻi ha Efiafi ʻi ʻApi

  1. ʻInitaviu ha kakai matuʻotuʻa ange kuo nau faivelenga ʻi he ongoongoleleí. ʻE lava pē ko ha ngaahi kui pe kāingalotu ʻeni ʻi hoʻo uōtí pe koló.

  2. ʻEke kiate kinautolu ha ngaahi fehuʻi ʻokú ke mahuʻingaʻia ai pe ngaahi fehuʻi hangē ko ʻení: Ko e hā ha ngaahi faingataʻa naʻá ke foua pea ikunaʻi? Naʻe ʻi ai nai haʻo aʻusia naʻe fiemaʻu ai ha loto-toʻa ki hono moʻui ʻaki ʻo e ongoongoleleí? Ko e hā naʻe tokoni lahi taha ki hoʻo kei mateakiʻi hoʻo tui kia Sīsū Kalaisí?

  3. Hiki pe lekooti ʻenau ngaahi fakamoʻoní mo e ngaahi aʻusiá.

Lolotonga ʻa e Efiafi ʻi ʻApí

  1. Vahevahe mo hoʻo fāmilí ʻa e ngaahi fakamoʻoni naʻá ke fanongo ki aí mo e ngaahi lēsoni naʻá ke akó.

  2. Ko e hā naʻe akoʻi atu ʻe he kakai ko ʻení fekauʻaki mo hono ikunaʻi ʻo e ngaahi faingataʻá ʻi he tuí?

Fealēleaʻakí: Te ke lava fēfē ‘o tauhi hoʻo tuí ʻi he kotoa hoʻo moʻuí, neongo ʻa e ngaahi faingataʻá?