“Ko e Hā e Fekauʻaki ʻo e Tomuʻa Fakanofó mo e Tauʻatāina ke Filí?,” Liahona, ʻOkatopa 2023.
Haʻu, ʻo Muimui ʻIate Au
Ko e Hā e Fekauʻaki ʻa e Tomuʻa Fakanofó mo e Tauʻatāina ke Filí?
Naʻe tomuʻa fakanofo ʻa e Fakamoʻuí mo e kau taki kehé ʻi he maama fakalaumālié, ki honau ngaahi misiona ʻi he māmaní.
Tā fakatātā ʻa Jim Madsen
Naʻe fakahā ʻe Paula ki he kakai ʻEfesoó naʻe fili kinautolu ʻe he ʻOtuá ke nau hoko ko Hono kakai, “ʻo fakatatau ki heʻene fili ʻa kitautolu ʻiate ia ʻi he teʻeki ai fakatupu ʻa māmaní” (ʻEfesō 1:4). Naʻe fili pe tomuʻa fakanofo ʻe he ʻOtuá ʻi he maama fakalaumālié, ʻa e kakaí ke nau fakahoko ha ngaahi misiona pau ʻi heʻenau moʻuí. ʻOku ʻuhinga nai ia ʻoku ʻikai uesia ʻetau moʻuí ʻe heʻetau ngaahi filí?
Ko e Fatongia ʻo e Tomuʻa Fakanofó
Naʻe tomuʻa fakanofo ʻa e kau palōfitá mo e Fakamoʻuí kimuʻa pea fanauʻi kinautolú (vakai, Selemaia 1:5; Fakahā 13:8; 1 Nīfai 10:7–8; ʻĒpalahame 3:22–23), pea “ʻoku fekauʻaki ʻa e tokāteline ʻo e tomuʻa fakanofó mo e kāingalotu kotoa ʻo e Siasí.”1 Ka ʻoku ʻikai ʻuhinga ia kuo mahino te tau maʻu ha ngaahi tāpuaki. ʻI he tafaʻaki ʻe tahá, ʻoku talaʻofa mai ha ngaahi tāpuaki pau ʻo fakatatau mo ʻetau tui ki he ʻOtuá mo e talangofua ki Heʻene ngaahi fekaú.
Ko e Fatongia ʻo e Tauʻatāina ke Filí
Kuo foaki mai ʻe he ʻOtuá kiate kitautolu ʻa e tauʻatāina ke filí, “ko e ivi malava mo e faingamālie ia ʻoku foaki mai ʻe he ʻOtuá ke tau fili mo ngāue maʻatautolu.”2 ʻOku ʻafioʻi ʻe he ʻOtuá ʻa e meʻa te tau malavá pea ʻokú Ne ʻafioʻi ʻa e ngaahi nunuʻa ʻo ʻetau ngaahi ngāué. Ka ko e meʻa pē ia ʻatautolu ke tau fili ʻa e hala ʻo e tuʻunga fakaākongá ʻa ia te ne tataki kitautolu ke tau foki ange ai kiate Iá.
“ʻOku ʻikai fakapapauʻi ʻe he tomuʻa fakanofó ʻe maʻu ʻe he niʻihi fakafoʻituituí ha ngaahi uiuiʻi pe ngaahi fatongia pau. ʻOku hoko mai ʻa e ngaahi fatongia peheé ʻi he moʻuí ni tuʻunga ʻi hono fakaʻaongaʻi ʻo e tauʻatāina ke filí ʻi he angatonú, ʻo hangē tofu pē ko e hoko mai ʻa e tomuʻa fakanofó tuʻunga ʻi he angatonu ʻi he maama fakalaumālié.”3