“Ngāue Fakaetauhi ʻOsikiavelenga,” Liahona, ʻOkatopa 2023.
Ngaahi Tefitoʻi Moʻoni ʻo e Ngāue Fakaetauhí
Ngāue Fakaetauhi ʻOsikiavelenga
Te tau lava ʻo fakahoko ha liliu lahi ʻi heʻetau ngāue fakaetauhi ʻosikiavelengá.
ʻOku ʻikai ko ha hingoa ʻilolahia ʻa Tikiko ia ʻi he Fuakava Foʻoú, ka ko ha sīpinga ia ʻo e ngāue fakaetauhí mo e ngāue ‘osikiavelengá. Neongo naʻe ʻikai ke faʻa ʻilonga ʻene ngāué, ka naʻe hoko ʻene faivelengá ke lava ai ʻe Paula ʻo fai ʻene ngāue mahuʻingá. Naʻe fetuku ʻe Tikiko ʻa e ʻū tohí ki he Kāingalotu ʻi ʻEfesō mo Kolosé pea fakafiemālieʻi mo fakalotolahiʻi kinautolu (vakai, ʻEfesō 6:21–22; Kolose 4:7–8). Naʻá ne fononga ki ha ngaahi feituʻu kehekehe, hangē ko Kalisi mo ʻEfesō, ke tokoni ki he ngāué, ʻo fakatauʻatāinaʻi ʻa e kau taki hangē ko Taitusi mo Tīmoté ke tokoni kia Paula (vakai, 2 Tīmote 4:12). Naʻe ui ʻe Paula ʻa Tikiko “ko e kāinga ʻofeina mo e faifekau angatonu ʻi he ʻEikí” (ʻEfesō 6:21).
ʻOku kau ʻi he ʻosikiavelengá ʻa e vilitakí, tautautefito ki he fehangahangai mo e fakafepakí. ʻOku tokoni ʻetau ʻosikiavelengá ke ʻafioʻi ʻe he ʻEikí te Ne lava ʻo falala mai kiate kitautolu koeʻuhí he ʻikai ke tau foʻi, ʻo aʻu ki he taimi faingataʻá. ʻOku mahino naʻe falala ʻa Paula kia Tikiko ke ne fai ha ngaahi ngāue mahuʻinga koeʻuhí ko ʻene ʻosikiavelengá. ʻOku tatau pē ia mo hono tuku mai ʻe he ʻEikí ha ngaahi ngāue mahuʻinga kiate kitautolú. Te tau vilitaki nai ʻi heʻetau feinga ke tāpuekina ʻa kinautolu kuó Ne kole mai ke tau ngāue fakaetauhi ki aí?
Ko Hono Fakatupulaki ha Loto ʻoku ʻOsikiavelengá
ʻE lava ke lahi ha ngaahi ʻuhinga ʻoku tau fehangahangai ai mo e fakafepakí ʻi he taimi ʻoku tau ngāue ai ke tokoniʻi ha niʻihi kehé. Ka ʻoku falala mai ʻa e ʻEikí ke tau vilitaki ʻi hono fai hotau lelei tahá, ʻo aʻu ki he taimi ʻoku faingataʻa aí.
Ko ha ngaahi fakakaukau ʻeni ki he founga te tau lava ai ʻo fakatupulaki ʻa e ʻulungaanga faka-Kalaisi ʻo e ʻosikiavelengá:
-
“ʻI heʻeku fakatokangaʻi kuo tohoakiʻi au mei hoku ngaahi fatongia lakanga fakataulaʻeikí ʻe ha ngaahi meʻa fakamānako kehe pea fiemaʻu ʻe hoku sinó ke mālōloó, ʻoku ou fakalotolahiʻi au ʻaki ʻa e ngaahi lea ko ʻení: ʻManatuʻi Ia.’ Ko e ʻEikí ʻa hotau faʻifaʻitakiʻanga haohaoa ʻo e faivelenga ʻi he ngāue lakanga fakataulaʻeikí.”1
-
Manatuʻi naʻe ui ʻe he ʻEikí ha kau taki ke nau tokoni ki hono fai ʻEne ngāué. ʻOku ʻikai ʻuhinga ʻa e ngāue fakaetauhi ʻosikiavelengá ke ke ngāue toko taha pē. Fekumi ki ha tokoni mei he ʻEikí mo hoʻo kau taki fakalotofonuá.
-
Lotua ha tataki fakalaumālie ki ha founga te ke lava ai ʻo fakatupulaki hoʻo ʻosikiavelengá ke lahi angé. ʻOku mahino ki he Tamai Hēvaní he ʻikai ke faingofua maʻu pē ʻa e ngāué koeʻuhí ko e ngaahi pole ʻo e moʻuí, pea ʻokú Ne tuʻu mateuteu ke tokoniʻi mo ueʻi fakalaumālie kitautolu.
-
Manatuʻi ʻoku ʻofa ʻa e ʻEikí ʻi he ngāué pea ʻoku ʻikai ke hoko ʻi he taimi pē ko iá ʻa hono aʻusia ʻo e ʻosikiavelenga lahi angé. ʻE tupulaki hoʻo ʻosikiavelengá ʻi he toutou ngāue faivelengá mo e faʻa kātakí.
Ngāue Fakaetauhi ʻOsikiavelenga
-
ʻOku ʻikai ʻuhinga ʻa e ʻosikiavelengá ke vilitaki ʻi ha founga ʻe ongoʻi taʻefiemālie ai ʻa e kakaí. Fakaʻapaʻapaʻi ʻa e ngaahi fakaʻamu ʻa e niʻihi ʻokú ke ngāue fakaetauhi ki aí. Manatuʻi neongo ʻoku tokosiʻi ha kakai ʻoku nau saiʻia hono fakamālohiʻi ke nau feohí, ka ko e meimei taha kotoa pē ʻoku nau fiemaʻu ke tokolahi ange ʻa e ngaahi kaungāmeʻa moʻoni ʻi heʻenau moʻuí.
-
ʻOku kau ʻi he ngāue ʻosikiavelengá ʻa e fakahaaʻi ʻokú te loto ʻaki ʻa e ngāue fakaetauhí ka ʻoku ʻikai ko hono toki tala atu ʻi he taimi kotoa pē ʻa e meʻa ke faí.
-
ʻOku kau ʻi he ʻosikiavelengá ʻa e fanga kiʻi ngāue iiki, ka ʻoku fai fakamātoató. ʻOku ʻikai fiemaʻu ia ke fai fakahāhā ʻa e ʻosikiavelenga ʻi he ngāue fakaetauhí.
-
Ko e taha ʻo e ngaahi founga lelei taha ki he ngāue fakaetauhi ʻosikiavelengá ko e feohi mo e niʻihi ʻokú ke ngāue fakaetauhi ki aí pea fakalaulauloto ki he founga te ke lava ai ʻo feau ʻenau ngaahi fiemaʻú. ʻEke pē kiate koe, ko e hā ha tokoni te u houngaʻia ai kapau naʻá ku ʻi he tūkunga tatau? ʻE tokoni hoʻo foua ʻa e foungá ni ke ke fakafelāveʻi ai mo e niʻihi ʻokú ke ngāue fakaetauhi ki aí ke fakakaukauʻi lelei ange hoʻo ngāue tokoní pea mo fakataautaha.