Ngaahi peesi fakalotofonu
ʻOku ʻOmi Fakataha ʻe hono Fakatapui ʻo e Falelotú ʻa e Kakai ʻo e ʻOtu Motu Māsoló ʻi he Fiefia
Naʻe hoko ʻa hono fakatapui ʻo ha ʻapisiasi foʻou ʻi he Motu ko ʻEpei ʻo e Motu Kuasaliní, ke fakatahaʻi ai ʻa e kakai ʻo e fuʻu ʻēlia lahi ko ia ʻo e Pasifikí ʻi ha kātoanga fakafiefia ʻi he ʻOtu Motu Māsoló, Mōnite 16 ʻOkatopa 2023.
Naʻe hoko ʻa hono fakatapui ʻo e Siteiki Senitā foʻou ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Kuasalini ʻo e ʻOtu Motu Māsoló ʻi ʻEpei, ke fakatahatahaʻi mai ai ha kāingalotu ʻe toko 500 tupu ʻo e Siasí mo e ngaahi kaungāmeʻa, ʻa ia ne nau kau fiefia atu ki he polokalama ko ʻeni ne fuoloa ʻenau tatali ki aí.
Naʻe tokangaʻi ʻe ʻEletā Selemi R. Siaki, ko ha Fitungofulu Taki Māʻolunga mo e Tokoni Ua ʻi he Kau Palesitenisī Faka-ʻĒlia ʻo e Pasifikí, ʻa e polokalamá peá ne fai ʻa e lotu fakatapuí.
ʻE hoko ʻa e ʻapisiasi foʻou ko ʻení ko ha tefitoʻi senitā fakalotu mo fakakolo maʻá e Motu Kuasaliní, ko ha motu hakau feo ʻoku sikuea maile ʻe 1,125. Ko e motú ko e taha ia ʻo e ngaahi vai lahi taha ʻo e māmaní, ʻoku ʻi ai ha fanga kiʻi motu iiki ʻe 100 ʻa ia ko e konga fonuá ʻoku sikuea maile pē ʻe 5.6.
Naʻe kau fakataha mo ʻEletā Siaki ʻa e Palesiteni ʻo e Siteiki Kuasaliní, ko Sēmisi Jelke ʻi he polokalama makehé, fakataha mo e kau taki fakalotofonua ʻo e Siasí mo e kau ʻaʻahi naʻe kau ai ʻa e Matāpule ʻEiki ʻo e Fonuá ko “Irojlaplap” Maikolo Kapua.
Naʻe pehē ʻe ʻEletā Siaki naʻe “hāsino” ʻa e laumālie ʻo e uouangatahá mo e tui kia Sīsū Kalaisí ʻi heʻene aʻu atu mo Matāpule Kapua ki he ouau fakatapuí. Hili ha hiva tukufakaholo faka-Māsolo naʻe fai ʻe ha kuaea ʻo e kakai fefine fakalotofonuá, naʻe fai ʻe Palesiteni Seleki ha lea talitali. Naʻe lea leva ʻa Matāpule Kapua fekauʻaki mo ʻene ʻofa ki he Tamai Hēvaní, “pea mo e fiefia ʻoku maʻu ʻe he taha kotoa ʻi he taimi ʻoku fakataha kotoa mai ai ʻEne fānaú.”
Naʻe fakamoʻoni ʻa ʻEletā Siaki ʻi heʻene leá ki he “mālohi mo e fiefia ʻoku maʻu ʻi he taimi ʻoku tau lotu fakataha ai ʻi hotau ngaahi falelotú.”
Naʻe pehē ʻe ʻEletā Siaki, “Ko e tēpile sākalamēnití ʻa e tefitoʻi taumuʻa ʻo ʻetau lotú, ʻa ia ko Sīsū Kalaisi. ʻOku ou fakamoʻoni atu ʻe lava ʻe kinautolu kotoa pē ʻoku haʻu ki he tēpile sākalamēniti ko iá aʻi he fakatomala fiefiá, ʻo teuteu pea maʻu ha lekomeni temipale ke nau ō ki he Fale ʻo e ʻEikí.”
Ko e temipale ofi taha ke ʻalu ki ai ʻa e kāingalotu ʻo e ʻOtu Motu Māsoló ʻoku lolotonga ʻi Laʻie, Hauaiʻi, USA. Naʻe pehē ʻe ʻEletā Siaki, kuo fanongonongo ke langa ha temipale ʻi ha ʻaho ʻi he kahaʻú ʻi Talaua ʻi Kilipati, ʻa ia ʻe ofi ange ia ki he fononga ʻa e kāingalotu mateaki ko ʻení.
Naʻe pehē ʻe ʻEletā Siaki, naʻe nofotaha ʻa e lotu fakatapuí ʻi he hoko ʻa Sīsū Kalaisi ko e fakavaʻe ʻo e Ongoongoleleí, “Ko Ia ʻa e fungani makatuliki ʻo e meʻa kotoa pē ʻoku tau ʻi ai mo fakahokó. Naʻe tāpuekina e ngaahi konga kotoa ʻi he falé ke nau ngāue lelei, pea ʻe tokoni ʻa e kakai naʻe haʻu ki aí ke tauhi ia pea nau ongoʻi ʻa e Laumālie ʻo e ʻEikí, ʻo toe lahi ange ai ʻa e melinó mo e fiefiá.”
Naʻá ne hoko atu ʻ o pehē, “Naʻe tāpuakiʻi foki mo e kakaí, ke nau maʻu ha malu lahi ange mei he ngaahi ʻahiʻahi ʻa e filí. Naʻa nau toe monūʻia foki ke hokohoko atu ʻenau hoko ko ha kolo uouangataha ʻi heʻenau moihū ki he Tamai Hēvaní pea mo e Fakamoʻui ko Sīsū Kalaisí.”