“Unimwaane Gregorio E. Casillas,” Riaona, Meei 2024.
Unimwaane Gregorio E. Casillas
Mataniwi ni Kabuta n te Itingaun
E bungiaki Gregorio Enrique Casillas i Tijuana, Baja California, Mexico, n Aokati 26, 1975. E maeka ikekei ni karokoa are e beku bwa te mitinare ae bwanin ana tai n te Mexico Tampico Mition.
E kabaeaki ma Alma Angelina Obeso Gonzalez n te San Diego California Tembora n Tuun 1999. Boni kaaro aika teniman natiia.
I mwaain ae a mare naaka uoman aikai, a maeka 100 te maire (161 km) te raroa i nanon ana tai ni kamatebwai teuanne i Tijuana ao neienne i Mexicali. I nanon namwakaina i mwaain mareakiia, a tataro ao a karaoa aia aki mamatam bwa a kan ataia bwa a na maeka iaara ao ni waakina katean aia utu. E uringnga Unimwaane Casillas ngke e karekea ana namakin mairoun te Tamnei ae Raoiroi.
“I uringnga are ngke ti karaoa ara aki mamatam, n ongo ana taeka te Uea ngke e kangai, ‘Ngkana am maunga bon La Rumorosa [te maunga ae bubura ae mena i marenan kaawa aika uoua], N na kamaunaa,’” e taku Unimwaane Casillas.
E taku bwa e a tia te Uea ni kaitiaka kawaia te taanga aei bwa a na mena i Mexicali ngke e a tii butimwaeaki naba n te iuniwetiri anne n akea kantaningaakina bwa ataein te reirei ae kaweaki man te reirei teuana.
I Mexicali, “ti kaitibo ma aomata are ti riai ni kaitibo ma ngaiia. Ao ti karaoi nakoara n taabo ake ti kinnanoaki iai bwa ti na beku,” e taku.
Te taneiai aei e katea te banna ibukin maiuia ni kabane. “Ngkana ti karimoa moa te Atua, ao a na bane n nakoraoi bwaai ni kabane,”e taku Unimwaane Casillas. “E bon kainnanoa te onimaki ae tau ae na iriannaki ma te kakamwakuri teutana, ao ngkanne e karabaaba baina te Uea ni kakabwaiaira.”
E reke ana beebwa ae bubura ae te degree Unimwaane Casillas i aon te civil engineering. man te Universidad Autónoma de Baja California. E reke ana beebwa ae te Master ibukin tararuaan te bitineti mai Xochicalco Iuniwetiri. E a tia ni mwakuri bwa te tia tararua iaon mwakuri ni karikirake ibukin taabo ni kateitei ao n te tai ae e aki maan nako e riki bwa te manatia n te tabo ni kateitei n aonon te tembora ibukin te Ekaretia i aon te Aono ae Mexico.
E a tia ni beku Unimwane Casillas bwa te Itingaun n te Aono, te beretitenti n te mition n tararua iaon te Mexico City South Mition, beretitenti n te titeiki, bitiobi, kauntira ae rietaata, beretitenti n te kooram n unimwaane, te beretitenti irouia Ataeinimwaane n te Uoote.