“Beretitenti Paul V. Johnson,” Riaona, Meei 2024.
Unimwaane Paul V. Johnson
Beretitenti ni Kabuta n te Reirei n Tabati
Man ana mwakuri bwa te tia reirei n te tieminari ma te ruaiwa n ririki are e kabanea ni beku bwa ana kamitina te Ekaretia ibukin te reirei, e bati ana taneiai te Beretitenti ni Kabuta n te Reirei n Tabati ae boou ae Beretitenti Paul V. Johnson n reiakinan te euangkerio. Ma te kabanea ni kakawaki n bwai are e a uotia nakon weteana ae boou aio, e taku, bwa “tangiraia Tamau are i Karawa ao te Tia Kamaiu ao tangiraia kairake ao aomata nako naba.”
E bungiaki Beretitenti Johnson n Tuun 24, 1954, i Gainesville, Florida, USA, irouia ana karo aika Vere Johnson ma Winifred Johnson. Ngke e tuai ririki, a mwaing ana karo mai Logan, Utah, USA, are te tabo are a kaikawaia iai ma tarina ma mwaanena ake itiman.
E reke kinaakin neiere e riki bwa buuna, Jill Washburn, ngke e anaaki bwa e na takakaro n ana tiim ana kauarinan i Monticello, Utah, iroun te kouti ngkoa are e mwaing nako ikekei mai Logan. A bon tia ni kaitibo mai i mwaina Paul ma Jill, ma ngkai a riki bwa rao ao n kaekaea te uoote ae ti teuana ao te kiraati n te tieminari. E kokorea ana reta Titita Johnson nakoina ngke e beku bwa te mitinare ae bwanin ana tai i Norway.
A mareaki n Aokati 18, 1976, n te Logan Utah Tembora. Iai 9 natiia ao 43 tibuia.
Te utu ae te Johnson a kaitarai kangaanga aika a bati, man buan natiia te aine n aorakina te kaentia nakon te ikakorakora ma kangaanga n kaineti ma marurungiia. Ma e taku Beretitenti Johnson bwa taneiai akanne a katea raoi bannan ana taratara ibukin ana kainibaire te Atua. “I taku bwa e karikai, n arou n tia reirei, n ingainga n kan buokiia kairake n kamatoai baia nakon te Tia Kamaiu ao Tamaia are i Karawa,” e taku.
E reke ana beebwa ae bubura ae te degree n te zoology n 1977 ao te beebwa ae te master degreei n te reitaki i nanon 1978, man te Kuura n Reirei ae Utah. E reke ana beebwa n taokita n te angareirei mai Utah State University n 1989.
E kamatoaaki Beretitenti Johnson bwa te Mataniwi ni Kabuta n te Itingaun n Eberi 2005 ao e a tia ni beku bwa te membwa nte Beretitentii n te Itingaun man Aokati 1, 2021. E a tia ni beku naba bwa te kauntira n te Beretitentii n Aonon Europe, kauntira n te Beretitentii n Aonon Chile, kauntira n te beretitentii n te titeiki, ao te bitiobi.
E na anganaki kateimatoana n riki bwa te itingaun, ni moa man Aokati 1, 2024, ngkana e moana nakoana n weteana ae boou.