Te Raitaeka n te Taetae ibukin te Maungatabu ni Kabuta

Teuana te aoa i mwaain te tetere n te maungatabu ni kabuta, tebubua mwaitiia taan rabakau ibukin te taetae a ikotaki inanon te ruu ae bubura ni karin aia bitaki ibukn katamaroaan taian marooro n te maungatabu ake a tia n rairaki ao a na rawebwanaeaki nakon 103 taian taetae.

N te tai are e waaki iai te maungatabu, bon anne aia tai ae onoti. E na bon riai n tamaroa, ao e na riai n tamaroa n te moantai. Te raitaeka ae nakoraoi e kainnanoa aron birin te bwanaa, tangin te bwanaa, tiribwarean atongan te taeka, otam iaon te taetae, inanon te tai are ko tibwaua ana namakin ao nanon te tia taetae n te tabo n taetae n te tamnei ae ti te arona are e karaoaki iai te rongorongo.

E riaon te mwaiti ae 800 mwaitiia taan taetae n te aba ao mitinare ake a bane aia tai a raitaeka ibukin tabeua mwakoro n te maungatabu aei. Te katautau tao bon iterana are a kanakoi aia rongorongo mai Salt Lake City, Utah, USA, ao are te iterana a kanakoa aia raitaeka bon mai abaia. Tabeman a ira waakin te rairairi ibukin taian marooro n te maungatabu inanon wiiki i mwaain te maungatabu ni kabuta.

N tain te kanakobwanaa, taan raitaeka, a taneiai ni mwakuri n te tiim ae nakon aman ke onoman kaaina ni katoa tetere bwa a na wareka te rongorongo n te tabo ni kanakobwanaa ae onoti man mabu n Aobitin te Ekaretia ke n taabo ake a tia ni baireaki ni kabuta te aonaaba. Ibukin kabonganaan bwaai n taetae ake a nim n te taninga ibukin ongoraeakinan waaki ake a karaoaki n te Ingiriti, taan raitaeka a mataku ao n tarai raoi aron aia tai n raitaeka ma te tia taetae. A riai taan raitaeka ni kawakin uoua marooro—inanon taetae aika a kakaokoro—a na iangoia ae a na kaai n nako n te tai ae ti teuana.

E taku te tia raitaeka ae Jonas Prasad kaain te Ekaretia ae taetae n Hindi i Bitii a ingainga nanoia ni kan ongora bwanaan te burabeti n aia taetae. Kabwarabwaraakin aron temanna te titita, e taku, “Inanon ririki, ana autinibootaki te Ekaretia ae a tii tauraoi ibukina a karaoaki n te taetae n Ingiriti. E ngae ngke e kabi n taetae, e roko ao e tekateka n rau bwa e na namakina te Tamnei. Ngkai e a rang kukurei n ongora taekan te euangkerio n ana taetae.”