“Punaoa,” Taiala mo Tolauapiga a le Korama o le Perisitua Arona (2019)

“Punaoa,” Taiala mo Tolauapiga a le Korama o le Perisitua Arona

Punaoa

O Matafaioi a Taitai o Uarota ma Siteki

Taitai o le Uarota

I le avea ai o le au peresitene o le Perisitua Arona i le uarota, o le epikopo ma ona fesoasoani e vaavaaia le galuega a korama. Latou te vaavaaia ma faamalolosia alii talavou taitoatasi, a o galulue vavalalata ma matua ma isi taitai. (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai 10.3, ChurchofJesusChrist.org.)

O au epikopo e faamaoniaina fuafuaga uma mo tolauapiga a uarota. E tatau i taitai o korama, faufautua, ma tagata tomai faapitoa ona faamaea le Fuafuaga o Mea e Tupu ma le Gaoioiga ma fefautuaai faatasi ma le au epikopo e uiga i le faamoemoega, sini, nofoaga, auiliiliga o gaoioiga, ma le faatulagaga o taimi o le tolauapiga.

O le au epikopo foi e faamaoniaina le paketi ma fuafuaga mo le saogalemu ma le malupuipuiga mo le tolauapiga, lea e aofia ai le filifilia o taitai matutua talafeagai ma fuafuaina tulaga faatonuina o le tolauapiga mo le amio ma laei. E mafai foi e le au epikopo ona valaaulia alii mai le uarota, e aofia ai tama o alii talavou, e fesoasoani e lagolagoina tolauapiga a le korama o le Perisitua Arona.

Taitai o le Siteki

O taitai perisitua o le siteki e faamaoniaina fuafuaga uma mo tolauapiga a le Perisitua Arona. O le komiti o le Perisitua Arona a le siteki ma le komiti o le Perisitua-Tamaitai Talavou a le siteki e mafai ona fesoasoani i le fuafuaina o nei gaoioiga (tagai Tusitaulima Aoao, 29.3.9).

E tatau ona faaaofia ia alii talavou mai le siteki i le fuafuaina ma le taitaiga o tolauapiga a le siteki i le tele e mafai ai. E mafai e taitai perisitua a le siteki ona valaaulia alii mai le siteki, e aofia ai tama o alii talavou, e fesoasoani e fuafua ma lagolagoina tolauapiga a le korama o le Perisitua Arona i le siteki.

Iloiloina o le Tolauapiga

E taua tele le iloiloina o le tolauapiga mo le manuia i le lumanai. E tatau ona feiloai taitai o korama ma faufautua o korama i le faaiuga o le tolauapiga e iloilo ia gaoioiga o le tolauapiga. Ia taulai atu nei iloiloga i le ausiaina o faamoemoega o le tolauapiga ma pe faapefea ona faaleleia atili le tulaga maualuga o aafiaga i le lumanai.

Mafaufau i fesili nei i le taimi o le iloiloga:

Pe na lagonaina e alii talavou le Agaga? O fea? O anafea?
Pe na lelei le gasologa o a tatou gaoioiga e pei ona sa fuafuaina? Aisea pe aisea foi na le lelei ai?
O le a se mea na semanu e sili atu ona lelei?
Pe o i ai ni faafitauli e manaomia ona tatou foiaina?
Pe na ausia e alii talavou a latou sini? Aisea pe aisea foi na le ausia ai?
O a mea na tutupu i olaga o a tatou alii talavou o se taunuuga o le tolauapiga?
O le a se mea e mafai ona tatou faia e atiina a’e ai aafiaga lelei sa tatou maua?

Mafaufau e valaaulia tagata o korama e toe tomanatu i o latou aafiaga. Uunaia i latou e faasoa mai mea sa latou aoaoina ma o latou aiga ma uo. E ala i gaoioiga a le autalavou, e mafai ona e faaauau pea ona faaopoopo i tomai na aoaoina e alii talavou i le tolauapiga. E mafai foi ona e talanoaina aoaoga faavae na aoaoina i le tolauapiga i sauniga po o fonotaga a korama i le Aso Sa. Afai sa manuia a outou gaoioiga, mafaufau e faasoa atu i isi.

Faaaoga mea na e aoaoina e ala i la outou iloiloga e faaleleia atili le isi a tou tolauapiga.

Nofoaga mo Tolauapiga a le Au Perisitua o le Siteki

O nofoaga mo tolauapiga a le Au Perisitua Arona a le Siteki e fuafuaina i lalo o le taitaiga a le au peresitene o le siteki ma faataunuuina e le au peresitene o Alii Talavou a le Siteki po o isi e tofia e fesoasoani.

O nofoaga mo tolauapiga a le au perisitua e mafai ona avea o se tolauapiga i le aso, se tolauapiga e moea, po o se tolauapiga mo ni nai aso ma e mafai ona tuu i ai se igoa e fesootai i se mau, e pei o le Tolauapiga a Helamana, Tolauapiga a Siona, ma isi mea faapena.

Ia mautinoa e taitai e alii talavou, fuafua, ma taitai le tolauapiga a le au perisitua. A maea ona faamaopoopo faatasi ma o latou Fitugafulu Eria, e mafai foi ona soofaatasi ma ni siteki mo se tolauapiga. Ia aofia ai se paleni o gaoioiga faaleagaga, faaagafesootai, faaletino, faaleatamai, ma faaleauaunaga i nei tolauapiga.

Mo se faataitaiga:

O gaoioiga faaleagaga e mafai ona aofia ai le suesue i tusitusiga paia taitoatasi, aoao mai le Tala’i La’u Talalelei, taulotoina o mau, talanoaga faavaega toalaiti, faeasaite, sauniga molimau, po o avanoa faafaiaoga mo alii talavou.
O gaoioiga faaleatamai e mafai ona aofia ai fesoasoani muamua, auala e faasaoina ai, saienisi o laau, noanoaina o faapona, po o isi tomai.
O gaoioiga faaletino e mafai ona aofia ai le aau, taaloga, fe’a’eiga, fanafana ‘aū, po o isi mea e ono fiafia i ai alii talavou
O gaoioiga faaagafesootai e mafai ona aofia ai le aoao e uiga i le saogalemu i le initoneti, aoao faaletaitai faamasani, o faatinoga eseese o le agalelei, po o tomai faalefesootaiga.
O gaoioiga faaleauaunaga e mafai ona aofia ai le faamatagofieina o le nofoaga o le tolauapiga po o fale ma le fanua, tuufaatasia o pusa mo fesoasoaniga i tagata, po o le aoaoina o tomai e faaaoga i le auaunaga mo isi.

E mafai ona tofi uarota taitasi e fuafua ma vaaia se aofaiga patino o gaoioiga. Filifili se nofoaga mo le tolauapiga po o se fale e mafai ona faatino ai ituaiga o gaoioiga ua outou fuafuaina. O gaoioiga e faataape ai e mafai ona maua ai avanoa mo epikopo e fegalegaleai ai ma alii talavou mai a latou lava uarota.

Fuafua ia Sini mo Tolauapiga

A o e fefautuaai ma taitai o le autalavou ma filifili sini mo la outou tolauapiga, fesili ifo ma le agaga tatalo ia te oe lava: “O le a le mea e finagalo le Tama Faalelagi ia tupu i olaga o alii talavou o se taunuuga o lenei tolauapiga?” O le tali e tatau ona avea foi ma a tou sini e avea o se taiala mo isi faaiuga.

O tolauapiga a le au perisitua e tatau ona fesoasoani ai i alii e fausia ni molimau malolosi i le Alii o Iesu Keriso ma faalauteleina ai o latou tiute o le perisitua. E tatau ona e tuuina atu se paleni o avanoa e auauna atu ai i isi ma ia atiina ae ai faaleagaga, faaleagafesootai, faaletino, ma le faaleatamai (tagai Luka 2:52; Tusitaulima Aoao, 10.2.1.3; 20.2.6).

Vaavaai mo auala e faaaofia alii talavou uma i tiutetauave ma tofiga o le tolauapiga (tagai Tusitaulima Aoao, 4.2.6).

Sue ni avanoa ‘anoa o le a fausia ai le usoga faauso ma le lotogatasi. E tatau i alii talavou uma ona lagona e manaomia ma aogā i latou.

O le faamoemoega o la outou tolauapiga e ono mafai ona musuia i :

Le autu a le Korama o le Perisitua Arona.
Tiute ma tiutetauave o le perisitua.
Le autu faaletausaga a le autalavou.
I se mau.
Se faamatalaga mai se perofeta po o se aposetolo.
O le tamaitusi Mo Le Malosi o le Autalavou .
Polokalama a Tamaiti ma le Autalavou.

Gaoioiga Sauniuni

E mafai ona amata gaoioiga mo le tolauapiga ae tou te lei tuua mo le tolauapiga. Mafaufau e fuafua gaoioiga lea e faaleleia ai le faasauniuni, faateleina ai le aoaoina, ma atiae ai le tulimatai atu mo le tolauapiga.

E mafai ona e:

Faia se gaoioiga sauniuni mo alii talavou ma o latou aiga lea e faasoa atu ai e taitai o korama le autu ma auiliiliga o le tolauapiga.
Fai se gaoioiga e fuafua ai ma faatulaga le tou tolauapiga.
Fatu se lisi o meaai mo le tolauapiga e lavatia i le paketi ma ia aofia ai ni fua o meaai maloloina.
Aoao auala e puipui ai le siosiomaga, e pei o le taulimaina o lapisi, puipuia o mea e maua ai le vai, ma e faasaoina o eria o le natura. Ia tuua le vaega e fai ai le tolauapiga ua sili atu ona mama nai lo le mea sa outou o mai o i ai.
Faataitai le faaaogaina o masina o le tolauapiga ma le kuka i fafo.
Aoao tomai e ola ai le vao.
Fai se fuafuaga o le malosi atoatoa lea o le a fesoasoani ai ia te oe e saunia faaletino mo le tolauapiga. E mafai ona aofia ai gaoioiga e pei o savaliga sopo, tietie uila, po o isi gaoioiga e fesootai ma le malosi atoatoa.

Saunia mo le Saogalemu ma Faalavelave Faafuasei

O se tasi o au tiutetauave aupito sili ona taua i le tolauapiga o le tausia o le saogalemu faaleagaga o alii talavou, amio, lagona, ma faaletino. O amioga ma fegalegaleaiga uma e tatau ona ogatusa ma tulaga faatonuina o le Ekalesia (tagai Mo Le Malosi o le Autalavou ma le tusi faaletausaga o le saogalemu mai le Au Peresitene Sili) ma faaalia ai amioga faaKeriso.

E le gata i lea, e mafai e taitai ona seti tulaga faatonuina faapatino ma taiala mo le tolauapiga ia mautinoa ai le saogalemu ma fatu ai le siosiomaga e tatau ai e ausia ai sini o le tolauapiga. E tatau i autalavou ona malamalama o le auai ai e le o se aia tatau ae o se avanoa e mafai ona toe faaleaogaina pe afai latou te faia ni amioga le talafeagai pe latou te tuu foi i latou lava po o isi i se tulaga lamatia. E tatau i taitai ma faufautua ona faailoa atu nei mea ua faamoemoeina i matua ma i latou e auai, ma e ao ona latou fefautuaai faatasi i auala e talanoaina ai ni popolega e ono tulai mai.

E manaomia le lava o le aofai o taitai matutua mo tolauapiga taitasi. Ia le itiiti ifo ma le toalua tagata matutua e tatau ona i ai mo gaoioiga taitasi. O gaoioiga tetele e ono manaomia ai le faaopoopo o taitai matutua. O taitai uma, e tatau ona aloese mai i tulaga e taitoasi ai ma se talavou sei vagana e iloa manino atu e taitai matutua o lata ane.

Pe a fuafuaina se gaoioiga o le tolauapiga, manatua o le saogalemu o tagata uma e matuai faaleleia atili pe a le itiiti ifo i le toatasi se taitai matua e i ai le poto masani i lena gaoioiga patino.

Ia vave lipoti atu i taitai perisitua soo se mea e tupu po o se manuaga ogaoga e manaomia ai le tele o togafitiga nai lo le fesoasoani muamua autu. O tagata uma e auai i le tolauapiga, aemaise lava o taitai matutua, ua fautuaina ina ia mataalia i soo se faailoga o le sauaina ma tuulafoaiina. O i latou e silafia sauaga faaletino, faalefeusuai, po o le faalelagona e tatau ona lipoti atu le mataupu i pulega faaletulafono tatau ma faafesootai vave le epikopo.

E ao ona saunia alii talavou ma taitai matutua mo manaoga faaletino o le tolauapiga. Faaitiitia tulaga lamatia e ala i le usitaia o tulafono o le lotoifale ma tulafono o la outou eria. Ia mautinoa o avanoa i taimi uma ia femalagaaiga ma fesootaiga. Afai e mafai, valaaulia se tausima’i, fomai po o se isi tagata e i ai tomai taua o le fesoasoani muamua e auai i le tolauapiga. Aumai sapalai o le fesoasoani muamua. Ia i ai se lisi o tuatusi ma numera o telefoni mo vaaiga o fomai ma tagata e faafesootai i faalavelave faafuasei, e pei o matua o alii talavou taitoatasi po o e e vaaia i latou, o nofoaga faafomai e lata ane, ma e e faafesootai mo faalavelave faafuasei, e pei o le ofisa o leoleo, tineimu, ma taavale a le falemai.

A o lei faia le tolauapiga, talanoa i matua o alii talavou ma ia iloa manaoga tulaga ese o alii talavou taitasi—e aofia ai manaoga o meaai, faafomai, ma faalelagona. Ia mataitu ma le mataalia amioga ma mea e fai soo pe a manaomia. O talanoaga ma amioga leaga, o taufaasese, ma isi [talanoaga ma amioga] le lelei, le mama, pe le migao e le taliaina. Malamalama ma talia le tiutetauave e fuafua mo le saogalemu ma le soifua manuia o le autalavou i lau tausiga. Faailoa mai, talanoa e uiga i, ma saunia auala e faaitiitia ai tulaga lamatia i le tolauapiga. Iloilo vaega o le Tusitaulima Aoao o loo lisi atu i lalo, le tusi a le Au Peresitene Sili mo le saogalemu, taiala mo le puipuiga o le autalavou, ma le safety.ChurchofJesusChrist.org mo nisi faamatalaga.

E ao i taitai matutua ma le autalavou ona fuafuaina ma le faaeteete ina ia ogatusa tolauapiga uma ma aiaiga faavae o le Ekalesia. Suesue ia taiala i le safety.ChurchofJesusChrist.org ma vaega nei o le Tusitaulima Aoao:

Faailoa Atu ma Faaaofia ai Matua

O mea e aoaoina e se alii talavou i le tolauapiga e tatau ona faamalosia ai o ia ma faamanuiaina ai lona aiga. A o e sauni mo le tolauapiga, e mafai ona e valaaulia matua e faasoa atu poo a manaoga faaleagaga ma faamoemoega o ia i latou mo o latou atalii. Sue po o a ni a latou ‘aitia mo gaoioiga ma tomai e mafai ona faamanuiaina ai o latou aiga. Atonu o nisi o matua o loo i ai le atamai ma tomai e faasoa mai. Faailoa i matua ia aso, nofoaga, tau e totogi, autu, ma gaoioiga mo le tolauapiga. Faailoa i matua ma alii talavou ia tulaga faatonuina o ofu ma amio o loo manaomia (tagai 1 Timoteo 4:12).

A o lei faia le tolauapiga, fai atu i matua taitoatasi e faatumu ma tuuina mai se Fomu Faatagaga a Matua po o le Tagata o Loo Vaaia ma le Tulaga Faasoifua Maloloina mo tamaitai talavou taitoatasi. E mafai ona maua le fomu i le safety.ChurchofJesusChrist.org. E tatau ona e saunia faamatalaga auiliili e uiga i le tolauapiga ma gaoioiga ina ia mafai ai ona tuuina mai e matua le faatagaga mo o latou atalii e auai ai. (Tagai i le Tusitaulima Aoao, 20.6.13.)

Manatu mo Gaoioiga o le Tolauapiga

O gaoioiga faaleagaga, faaagafesootai, faaletino, faaleatamai e mafaufau i ai a o e fuafuaina le tolauapiga:

Faaleagaga

Faaaogaina o faasalalauga faaagafesootai e fai ma faatufugaga faafaifeautalai
Anapogi mai faasalalauga faaleagafesootai
Fesili o le Tusi a Mamona
Taaloga masani
Faigalotu faalefaeasaite
Faigalotu i le taeao
Sauniga molimau
Sauniuniga mo le misiona
Amio masani i aso taitasi

Faaleagafesootai

Sootaga faaleaiga
Fesootaiga ma isi
Saogalemu o le initoneti
Galuega faatino faaleauaunaga
Faatinoga eseese o le agalelei ma le auauna atu
Aoaoga faaleautaitai

Faaletino

Polo e kiki ma tamoe pei o le peisipolo
Pe’a i le papa ma le sau i lalo e faaaoga ai le maea
Tietiega uila i le mauga
Afeleti faatafatolu
Obstacle course
Lu’i i le ipu faatifa
Volipolo
Soka
Taaloga i le vai
Feausiga
Aloga paopao
Aloalo
Faatafeaga i vai galugalu
Faafolau vaa laiti
Savaliga sopo
Atofaafafa
50-maila (80-km) ma le ato faafafa
Sailiga faapaionia
Tolauapiga i Uila
Taaloga i le taumalulu
Maulu i le sami
Fagotaga
Savaliga i le kiona
Tolauapiga i le Taumalulu

Faaleatamai

Tomai Faaaunuua i le vao
Tomai e faasaoina ai i fafo
Gaoioiga e faaaoga ai le faafanua
Telega laau
Kukaina i le ogaumu u’amea tafu
Si’oina o le afi
Nonoaina o faapona
Saogalemu mai afi
Laveai soifua
Ola i tulaga faafuasei
Faasaoina o le siosiomaga i fafo
Saienisi o laau
Gaioioiga e sailia ai oloa natia
Faatautaiga i luga o le vai
Puega ata i fafo
Galuega i pa’u anagata
Vaneina o laau
Kuka e faia i fafo
Faasaoina i le Vao
Fanafanaga faamatai’a
Fesoasoani muamua

E mafai ona maua ‘aitia mo gaoioiga faaopoopo i le ChurchofJesusChrist.org/youth/activities. O manatu o loo faasesega atu i lenei vaega e i ai kata o gaoioiga i luga o le saite lenei o Gaoioiga a le Autalavou.