o alii talavou o loo faataamilo i le afi o le tolauapiga

Mataupu Faavae—O Le A

Ia Faatasi ma i Latou.

“Ma ua oo ina o atu auauna ma ua latou galulue i lo latou malosi; na galue foi le Alii o le tovine faatasi ma i latou” (Iakopo 5:72).

Faatasi ai ma mea taua e mamanuina ai le molimau a se alii talavou o loo i ai ana sootaga ma isi o e ua taula i le talalelei. Sootaga lelei i le va o paaga, matua, ma taitai e taua tele i le faalolotoina o le liuaina i alii talavou.

O tolauapiga e saunia ai avanoa e faaalu ai taimi anoa ma alii talavou taitoatasi. A oo ina e iloa loto ma manaoga o alii talavou, o o latou faanaunauga ma atuatuvalega, o a latou taleni ma vaivaiga, o le a latou iloa e te amana’ia i latou. A oo ina latou iloa e te amana’ia i latou, o le a mafai e lau tosinaga taiala ona taitai i latou i le Faaola.

O mea e fai i fafo e maua ai se faatulagaga aoga lea e mafai ai e alii talavou ona avea atili e faapei o le Faaola a o latou galulue faatasi, e ausia tofiga faigata, e maua le fiafia, ma aoao ai e auauna atu i isi. I le avea ai ma taitai ma faufautua o korama, e mafai ona avea oe ma se faataitaiga o le auauna atu a o e siitia isi, faamalolosia sootaga ma isi ma atiina ae le faatuatuaga i alii talavou, ma aapa atu e faaaofia uma mai. Latou te aoao e ala i le matau---ona latou faia ai lea.

Ua ia te outou se avanoa tele e auauna atu ai i alii talavou taitoatasi i auala nei:

• Tatalo mo alii talavou taitasi a o lei faia le tolauapiga ma i aso taitasi i le taimi o le tolauapiga.

• Faaalu se taimi ia iloa ai alii talavou taitasi.

• Ia mautinoa e aofia ai alii talavou taitasi ma lagonaina e alofaina, aemaise i latou o e tauivi, le lava le lagolagoina, pe ua amata ona se ese atu.

• Ia faia ni faatinoga faigofie o le agalelei ma le auauna atu ma valaaulia alii talavou e faia foi le mea lava lena.

• Ia saunia e faasoa atu lau molimau i taimi e lei fuafuaina ma i faatulagaga e fuafuaina.

alii talavou o loo tatalo

Faafesootai i Latou i le Lagi.

“Ona fai mai lea o Eli ia Samuelu, Alu ia, ina taoto: afai e valaau atu o ia ia te oe, e te fai atu ai, Fetalai mai ia, Ieova e, o loo faalogologo atu lau auauna. Ona alu ai lea o Samuelu, ua taoto i lona moega.

“Ua afio mai Ieova, ona tu lea ma valaau, pei ona uluai fai, Samuelu e, Samuelu. Ona tali atu lea o Samuelu, Fetalai mai ia, aua o loo faalogologo atu lau auauna” (1 Samuelu 3:9–10).

O tolauapiga e fatuina ai avanoa tulagaese ma mausali e fesootai atu ai alii talavou i lo latou Tama Faalelagi. E fuafua e taitai ma faufautua o korama aso taitasi e ala ile fesili, “O a avanoa o le a fatuina mo alii talavou taitasi e maua ai ona lava aafiaga faaleagaga?” O se uluai faamoemoega o tolauapiga o le fesoasoani lea i alii talavou taitasi ia liua i le talalelei a Iesu Keriso ma ia ola i ona aoaoga. E ao i alii talavou taitasi ona toe taliu mai le tolauapiga ua iloa le punavai o le taitaiga faaleagaga ma le faaletino.

A o fuafuaina po o a mea e aoao atu i le tolauapiga, mafaufau i le poto ma tomai o le a fesoasoani i alii talavou taitasi e faataunuuina ai o latou tiute faaleperisitua. E maua ai se paleni o avanoa e auauna atu ai i isi ma atiina ae ai faaleagaga, faaleagafesootai, faaletino, ma le faaleatamai (tagai Luka 2:52) Mafaufauina foi gaoioiga e faamamafa ai uiga paia e masani ai ma auga amiotonu o le suesue i tusitusiga paia i aso taitasi, tatalo faaletagata lava ia, salamo, usiusitai, ma le tausiga o le aso Sapati.

E tele ina maua atili e alii talavou ni aoaoga mai talanoaga e uiga i le talalelei nai lo le faalogologo i ni lauga e uiga i le talalelei. Ia faaaoga avanoa uma e tuu atu ai i alii talavou e talanoa atu e uiga i o latou aafiaga. O tolauapiga e mafai ona maua ai avanoa sili mo talanoaga faatalatalanoa ia e mafai ona fesootai atu ai alii talavou i le lagi.

o alii talavou o savavali i le kiona

Tuu Atu i Latou e Taitai

“O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa” (Mataupu Faavae ma Feagaiga 107:99).

E faapei o tagata uma, e mananao foi alii talavou e lagonaina lo latou manaomia. E manaomia ona latou lagonaina lou faatuatuaina o i latou ma tuuina atu ni tofiga ‘anoa. O alii talavou e le manatu mamafa i o latou tiutetauave faaleperisitua e ono lofituina foi i le lalolagi.

E atiina ae e alii talavou ia tomai faaletaitai a o latou faufauina ma taitai ia tolauapiga. E mafai ona fesoasoani ia faufautua i alii talavou e aoao e taitai e ala i le lagolagoina ma taialaina i latou a o fuafuaina e au peresitene o korama le tolauapiga. Fesoasoani ia i latou e aoao pe faapefea ona:

• Auauna Atu.

• Aoao Atu.

• Faamatuu atu.

• Talanoa i mea o faamoemoeina.

• Tulitatao ia tofitofiga.

Mafaufau i le mea na saunoa i ai Elder Jeffrey R. Holland: “Tatou te manatu faatauvaa i lo latou gafatia ma faamasino sese o latou aafiaga” (“E Mafai Ona E Aoao Atu i le Ala a le Faaola” [fonotaga faaleaoaoga i le lalolagi atoa, Nov. 5, 2016], broadcasts.ChurchofJesusChrist.org).

E le gata i au peresitene o korama, e mafai ona tofi isi alii talavou e nafa ma vaega eseese o le tolauapiga. E fesoasoani faufautua o korama e lagolago, aoao atu, ma taiala alii talavou ina ia manuia le faataunuuina o o latou tofiga ina ia aoao ai le autalavou uma e taitai.

E fefautuaai taitai o korama ma le au epikopo ma faufautua o korama a o latou fuafuaina, faatino, ma iloilo le tolauapiga. Latou te faamatuu atu tofitofiga i isi alii talavou i le korama.

E ao i faufautua ona teena le uunaiga e faatino ia tiutetauave o alii talavou.