Metotia—Pe Faapefea

Fefautuaai Faatasi

O taitai ma faufautua o korama e fefautuaai faatasi o le a valaaulia ai musumusuga mai le Agaga Paia e iloatino ai pe mafai faapefea e le tolauapiga ona faafetaia’ia manaoga o alii talavou ma o latou aiga. Pe a fefautuaai faatasi taitai o korama ma faufautua o korama, latou te aoao ai e fatufatu se siosiomaga e valaaulia ai musumusuga.

O fefautuaa’iga aoga e sili ona ausia pe a:

• Faaaloalogia ia ki o le perisitua. E tatau i faufautua o korama ona tuu atu ia taitai au peresitene o le korama. E ao ona latou aoao atu i latou e faapea o ki o le au peresitene ua latou umia o ni peresitene o korama e faatagaina ai i latou e maua musumusuga mo le manuia o la latou korama.

• O le faaaofia ai e faamuamua. E sili ona solo lelei ia musumusuga pe a taufai saili e tagata uma ma pe a lagona e tagata uma o loo faatauaina o latou manatu. E siitia e le faufautua matua le talanoaga e ala i le faalogologo ma le toto’a ma uunaia ia manatu faaalia ma aitia mai isi. A oo ina faaaloalogia ia ‘aitia mai isi, o le a avea taunuuga o ni o latou lava. (Tagai Mataupu Faavae ma Feagaiga 88:122; Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 4.2.5, ChurchofJesusChrist.org.)

A o outou fefautuaai faatasi, ia faailoa ni sini patino mo le tolauapiga ma pe o le a fesoasoani faapefea le tolauapiga i alii talavou taitoatasi. Fefautuaai e uiga i ituaiga o gaoioiga o le a fesoasoani e faataunuu ai nei sini ma pe o le a e fatuina faapefea ia faatulagaga o le a valaaulia ai le Agaga.

Faailoa Manaoga o Tagata Taitoatasi ma Punaoa i le Lotoifale

E faateleina le lotogatasi o le korama pe a nofouta ia taitai ma faufautua o le korama i manaoga ma mea e fiafia i ai alii talavou taitoatasi ma tulaga o lona aiga. E mafai ona iloa manaoga, mea e fiafia i ai, ma punaoa i le Iloiloga o Taleni ma Mea e Fiafia I Ai i luga o le ChurchofJesusChrist.org

E mafai ona fesoasoani aufono a le uarota ma le autalavou o le uarota e faailoa ai manaoga ma mea e fiafia i ai alii talavou ma o latou aiga. Ia ua’i faapitoa atu i tuafafine i le aufono a le uarota, aemaise i latou atonu o ni tina o alii talavou. (Tagai i le Tusitaulima Aoao 7.5.2.)

Faaaoga Punaoa o le Lotoifale

O le a fesoasoani le autalaga o punaoa e ono i ai i taitai o korama e fuafua ai gaoioiga o le tolauapiga. E mafai ona e tuufaatasia se lisi o:

• Tagata matutua i le eria e i ai tomai faapitoa, taleni, poto masani faapolofesa, po o ni malamalamaaga patino i luitau atonu o feagai ma se alii talavou.

• O masini e anaina e le Ekalesia po o tagata o le au paia po o isi i le nuu e naunau e faaaoga e le autalavou, e pei o masini mo tolauapiga, o mea fagota, mea e fai ai taaloga, paopao, ma vaa.

• O fale ma fanua lata ane, e pei o paka faalenuu ma setete, o nofoaga e fai ai taaloga i le vai, ma fanua mo tolauapiga.

• I nofoaga e mafai ai, o tagata ua aoaoina faafomai e mafai ona fesoasoani ne’i i ai se faalavelave faafuasei.

E mafai e taitai o le siteiki ona mafaufau e atinae nei lisi i le tulaga faalesiteki ina ia mafai ai ona saunia punaoa e sili atu mo autalavou uma a le siteki.

Fuafuaga ma le Kalena

Fuafuaga

O le mea e fai ai a outou tolauapiga a korama o le Perisitua Arona e faalagolago i le mea tou te i ai ma manaoga. E masani lava, e faia tolauapiga i se nofoaga i fafo i se nofoaga saogalemu e ese mai le aiga. E tatau ona faia le tolauapiga i se nofoaga toafilemu lea e mafai ai e alii talavou ona lagona le Agaga, faasoa molimau, aoao tomai, ma maua le fiafia. I eria lea e faigata ai pe faasa ai ona tolauapi i le po atoa, o le fuafuaina o se tolauapiga i le ao e mafai ona avea o se isi fuafuaga lelei. O tolauapiga i le ao e mafai ona faia i se nofoaga e latalata i fale o alii talavou.

E mafai foi ona fuafua ia tolauapiga i soo se taimi o le tausaga. Ia mautinoa e mafaufau i le tau, le vaitau, ma le ituaiga o tolauapiga e mananao alii talavou e oo i ai. O mea e faatagaina ai, e tatau i alii talavou ona faia se tolauapiga se tasi e tele aso e fai ai i le tausaga (tagai Tusitaulima Aoao, 10.2.1.3). E masani lava, o tolauapiga e le silia ma le lima aso, e le tatau ona faia i le aso Sapati, ma e masani foi e le faia i se aso Gafua.

E le gata i lea, e fautuaina foi isi gaoioiga e tolu e oo i le ono e moea, pe a faatagaina i tulaga e i ai (tagai Tusitaulima Aoao, 20.6.12). Ia mulimulita’ia tulafono uma i le lotoifale mo tolauapiga e moea.

Kalena

E manaomia se taimi ia lava e fuafua ai ni aafiaga e fetaui ma sini ma faamoemoega. O le fuafuaina o tolauapiga i se tulaga faaletausaga e faateleina ai le maualuga o le lelei o tolauapiga e ala i le tuuina atu o le taimi i taitai e lagolago ai alii ma faailoa ma faaaofia ai aiga. O le vave fuafuaina e lava ai le taimi e tapenapena ai faaletino, aoao tomai mo le tolauapiga, ma fai soo se suega tupe e tatau ai e tusa ai ma aiaiga faavae a le Ekalesia.

O Elemene Taua mo le Fuafuaina o Tolauapiga

1. Tatalo ma fefautuaai faatasi.

2. Fuafua faaletausaga.

3. Faatutu ni sini patino mo le tolauapiga.

4. Fuafua faatulagaga e fatu ai ni sootaga faaleagaga.

5. Fuafua mo le fausiaina o le lotogatasi o le korama.

6. Fai se lisi o punaoa o maua.

7. Faufautua i le autalavou e faataunuu galuega faatino.

8. Aoao faamasani i tomai faaletaitai.

9. Tuuina atu le auaunaga.

10. Taulima i latou e i ai Manaoga Faapitoa.

11. Faamautinoa le saogalemu.