Vaaiga Mamao

E manaomia e alii talavou se nofoaga lea e mafai ai ona latou potopoto faatasi, e ese mai tosinaga faalelalolagi, e fausia ai sootaga e faatotonugalemu-i le talalelei, ma faamalolosia ai lo latou faatuatua i le Tama Faalelagi ma Iesu Keriso. Ia filifili ma le faaeteete se nofoaga e mafai ai ona fausia sootaga ma fatuina ai ni manatuaga mo le olaga atoa. O nei aafiaga e fausia ai le lotogatasi ma le faatuatua, e fesoasoani ai i le autalavou ia faalolotoina lo latou manao e mulimuli i le Faaola.

E ao i taitai o korama, faufautua o korama, ma tagata poto faapitoa o korama ona faaaoga ia mamanu ua otooto atu i lenei taiala e fesoasoani ai e fuafua ma faamaonia ni gaoioiga o tolauapiga e tasi le po pe sili atu mo alii talavou, tusa lava pe o fea e nonofo ai. O tolauapiga e fuafua ma faatulaga e tusa ai ma nei mataupu faavae, metotia, ma faamoemoega, o le a fesoasoani i alii talavou e faataunuu ai o latou tiutetauave faaleperisitua, e tuputupu ae ai i le talalelei a Iesu Keriso, atiae sootaga tumau ma totonugalemu i le talalelei, ma atiae ai faaleagaga, faaleagafesootai, faaletino, ma faaleatamai (tagai Luka 2:52).

O le faaupuga taitai o korama e faasino i le au peresitene o le korama a tiakono, au peresitene o le korama a aoao, o le au epikopo, ma fesoasoani i le korama a ositaulaga. O faufautua ma tagata tomai faapitoa o le Perisitua Arona e le o ni taitai o korama (tagai Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 10.3–10.4, ChurchofJesusChrist.org).