“Ngaahi Maʻuʻanga Tokoni,” Tohi Fakahinohino ki he Kemi ʻa e Kōlomu ʻo e Lakanga Taulaʻeiki Faka-ʻĒloné (2019)

“Ngaahi Maʻuʻanga Tokoni,” Tohi Fakahinohino ki he Kemi ʻa e Kōlomu ʻo e Lakanga Taulaʻeiki Faka-ʻĒloné

Ngaahi Maʻuʻanga Tokoní

Ngaahi Fatongia ʻo e Kau Taki Fakauōtí mo e Fakasiteikí

Kau Taki Fakauōtí

ʻI he hoko ʻa e pīsopé mo hono ongo tokoní ko e kau palesitenisī ʻo e Lakanga Taulaʻeiki Faka-ʻĒlone ʻi he uōtí, ʻoku nau tokangaʻi ai e ngāue ʻa e ngaahi kōlomú. ʻOku nau tokangaʻi mo fakamālohia e talavou takitaha lolotonga ʻenau ngāue vāofi mo e mātuʻá mo e kau taki kehé. (Vakai, General Handbook (Tohi Tuʻutuʻuni Fakalūkufua): Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 10.3, ChurchofJesusChrist.org.)

ʻOku fakangofua ʻe he kau pīsopelikí ʻa e ngaahi palani kotoa ki he nofo kemi fakauōtí. ʻOku totonu ke fakakakato ʻe he kau taki, ʻetivaisa mo e mataotao faka-kōlomú ʻa e Palani ʻo e Polokalamá mo e ʻEkitivitií pea fealēleaʻaki mo e pīsopelikí fekauʻaki mo e kaveinga, taumuʻa, feituʻu, fakaikiiki ʻo e ʻekitivitií mo e taimi-tēpile ʻo e nofo kemí.

ʻOku fakangofua foki ʻe he kau pīsopelikí ʻa e patiseti mo e ngaahi palani ki he hao mo e malu ʻa e nofo kemí, ʻo kau ki ai ʻa hono fili ʻo e kakai lalahi ke takí pea mo hono fili ʻo e tuʻunga ʻulungaanga mo e vala ki he kemí. ʻE lava foki ke fakaafeʻi ʻe he kau pīsopelikí ha kau tangata mei he uōtí, kau ai e ngaahi tamai ʻo e kau talavoú, ke tokoni ʻi hono poupouʻi e nofo kemi faka-kōlomu ʻa e Lakanga Taulaʻeiki Faka-ʻĒloné.

Kau Taki Fakasiteikí

ʻOku fakangofua ʻe he kau taki lakanga fakataulaʻeiki faka-siteikí ʻa e ngaahi palani kotoa ki he nofo kemi ʻa e Lakanga Taulaʻeiki Faka-ʻĒlone ʻa e siteikí. ʻE lava ke tokoni ʻa e kōmiti faka-siteiki ʻo e Lakanga Taulaʻeiki Faka-ʻĒloné mo e kōmiti faka-siteiki ʻo e Lakanga Taulaʻeiki Faka-ʻĒloné-Kau Finemuí ʻi hono palani ʻo e ngaahi ʻekitivitī ko ʻení (vakai, General Handbook (Tohi Tuʻutuʻuni Fakalūkufua), 29.3.9).

ʻOku totonu ke fakakau ʻa e kau talavou mei he siteikí ʻi hono palaniʻi mo hono taki ʻo e ngaahi nofo kemi faka-siteikí ʻi he lahi taha ʻe malavá. ʻE lava ke fakaafeʻi ʻe he kau taki lakanga fakataulaʻeiki faka-siteikí e kau tangata mei he siteikí, ʻo kau ai e ngaahi tamai ʻa e kau talavoú, ke tokoni ʻi he palani mo e poupou ki he ngaahi nofo kemi fakasiteiki ʻa e Lakanga Taulaʻeiki Faka-ʻĒloné.

Vakaiʻi ʻo e Nofo Kemí

ʻOku mahuʻinga ʻa hono vakaiʻi ʻo e nofo kemí ki he ola lelei ʻi he kahaʻú. ʻOku totonu ke fakataha ʻa e kau taki faka-kōlomú mo e kau ʻetivaisa faka-kōlomú ʻi he fakaʻosinga ʻo e nofo kemí ke vakaiʻi ʻa e ngaahi ʻekitivitī ʻi he nofo kemí. Fakatefito e ngaahi vakaiʻi ko ʻení ʻi hono aʻusia ʻo e ngaahi kaveinga ʻo e nofo kemí mo e founga ke fakatupulaki ai e tuʻunga lelei ʻo e aʻusiá ʻi he kahaʻú.

Fakakaukauʻi e ngaahi fehuʻi ko ʻení lolotonga hono vakaiʻí:

Naʻe ongoʻi ʻe he kau talavoú ʻa e Laumālié? Feituʻu fē? Taimi fē?
Naʻe hokohoko lelei ʻetau ngaahi ʻekitivitií ʻo hangē ko ia ne palaní? Ko e hā hono ʻuhingá?
Ko e hā ha meʻa ne mei lelei ange?
ʻOku ʻi ai nai ha ngaahi palopalema ʻoku fie maʻu ke tau fakaleleiʻi?
Naʻe aʻusia nai ʻe he kau talavoú ʻenau ngaahi taumuʻá? Ko e hā hono ʻuhinga?
Ko e hā kuo hoko ʻi he moʻui ʻa e kau talavoú ko ha ola ʻo e nofo kemí?
Ko e hā te tau lava ʻo fai ke hokohoko atu ʻa hono fakatupulaki e ngaahi aʻusia lelei ne tau maʻú?

Fakakaukau ke fakaafeʻi e kau mēmipa ʻo e kōlomú ke fakakaukau ki heʻenau ngaahi aʻusiá. Poupouʻi kinautolu ke vahevahe mo honau fāmilí mo e kaungāmeʻá ʻa e meʻa ne nau akó. ʻI he ngaahi ʻekitivitī ʻa e toʻu tupú, ʻe lava ke hoko atu hoʻo tānaki ki he ngaahi taukei naʻe ako ʻe he kau talavoú ʻi he nofo kemí. ʻE lava ke mou aleaʻi foki ʻa e ngaahi tokāteline ne akoʻi ʻi he nofo kemí ʻi he ngaahi fakatahaʻanga faka-kōlomu ʻi he ʻaho Sāpaté. Kapau ne ola lelei hoʻomou ngaahi ʻekitivitií, fakakaukau ke vahevahe ia mo e niʻihi kehé.

Fakaʻaongaʻi e meʻa naʻá ke ako mei he vakaiʻi naʻá ke fakahokó ke fakalakalaka hoʻo nofo kemi hokó.

Faiʻanga Kemi ʻa e Lakanga Fakataulaʻeiki faka-Siteikí

ʻOku palani ʻa e faiʻanga nofo kemi faka-siteiki ʻa e Lakanga Taulaʻeiki Faka-ʻĒloné ʻi he malumalu ʻo e fakahinohino ʻa e kau palesitenisī fakasiteikí pea fakahoko ʻe he kau palesitenisī fakasiteiki ʻo e Kau Talavoú pe niʻihi kehe ne ui ke tokoní.

ʻE lava pē ke ʻaho taha ʻa e faiʻanga nofo kemi ʻa e lakanga fakataulaʻeikí, nofo kemi pō kakato, pe nofo kemi ʻi ha ngaahi ʻaho pea fakahingoa ʻaki ha hingoa mei he folofolá, hangē ko e Nofo Kemi Hilamaní, Kemi Saioné, mo ha ngaahi hingoa kehe.

Fakapapauʻi ʻoku taki, palani mo tataki ʻe he kau talavoú e ngaahi nofo kemi ʻa e lakanga fakataulaʻeikí. Hili ʻa e fakafekauʻaki mo e Kau Fitungofulu Fakaʻēliá, ʻe lava ha ngaahi siteiki lahi ʻo kemi fakataha ʻi ha faiʻanga kemi. Fakapalanisi e ngaahi ʻekitivitī fakalaumālié, fakasōsialé mo e fakaʻatamaí mo e ngaahi ʻekitivitī ngāue tokoni ʻi he ngaahi nofoʻanga kemi ko ʻení.

Hangē ko ʻení:

ʻE lava ke kau atu ʻi he ngaahi ʻekitivitī fakalaumālié ʻa e ako folofolá, ako mei he Malangaʻaki ʻEku Ongoongoleleí, ako maʻuloto e folofolá, fealēleaʻaki fakakulupu īkí, ngaahi houalotu fakamoʻoní, pe ngaahi faingamālie faiako ki he kau talavoú.
ʻE lava ke kau atu ʻi he ngaahi ʻekitivitī fakaʻatamaí ʻa e ʻuluaki tokoní, ngaahi taukei ki he moʻuí, founga moʻui ʻa e ʻuluʻakaú, ngaahi haʻi kehekehé, pe ngaahi taukei kehé.
ʻE lava ke kau atu ʻi he ngaahi ʻekitivitī fakatuʻasinó ʻa e kakaú, sipotí, kaká, fana ngahaú, pe ngaahi meʻa kehe ʻoku saiʻia ʻa e kau talavoú ke fakahokó.
ʻE lava ke kau atu ʻi he ngaahi ʻekitivitī fakasōsialé ʻa e ako kau ki he malu ʻi he ʻinitanetí, ako fakatakimu‘á, ngāue ʻofa ʻoku ʻikai palaniʻí, pe taukei fetuʻutakí.
ʻE lava ke kau atu ʻi he ngaahi ʻekitivitī ngāue tokoní ʻa hono ngaohi ke fakaʻofoʻofa e feituʻu nofoʻanga kemí, fakatahatahaʻi e ngaahi naunau tokoni ʻofa fakaetangatá, pe ako ʻo ha ngaahi taukei ke tokoniʻi ʻaki e niʻihi kehé.

ʻE lava ke vahe ki he uooti takitaha ke nau palani mo tokangaʻi ha ngaahi ʻekitivitī pau. Fili ha feituʻu faiʻanga kemi pe fale ʻe lava ke fakahoko ai e ngaahi ʻekitivitī kuo mou palaní. ʻE lava ke hoko e ngaahi ʻekitivitī fakakulupú ko ha ngaahi faingamālie ki he kau pīsopé ke feohi mo e kau talavou mei honau takitaha uooti.

Fili ha Ngaahi Taumuʻa ki he Nofo Kemí

ʻI hoʻo fealēleaʻaki mo e kau taki toʻu tupú pea fili e ngaahi taumuʻa ki hoʻomou nofo kemí, fehuʻi loto ʻi he faʻa lotu: “Ko e hā ʻoku finangalo e Tamai Hēvaní ke aʻusia ʻe he kau talavoú ʻi heʻenau moʻuí ko ha ola ʻo e nofo kemi ko ʻení?” ʻOku totonu ke hoko ʻa e talí ko hoʻo taumuʻa pea mo ha tataki ʻo ha ngaahi faituʻutuʻuni kehe.

ʻOku ʻuhinga ʻa e nofo kemi ʻa e lakanga fakataulaʻeikí ke tokoni ki he kau talavoú ke langa ha ngaahi fakamoʻoni mālohi ki he ʻEiki ko Sīsū Kalaisí pea faivelenga ʻi honau ngaahi fatongia ʻo e lakanga fakataulaʻeikí. ʻOku totonu ke vahevahe tatau ʻa e ngaahi faingamālie ke tokoni ki he niʻihi kehé pea tupulaki fakalaumālie, fakasōsiale, fakatuʻasino, mo fakaʻatamai (vakai, Luke 2:52; General Handbook (Tohi Tuʻutuʻuni Fakalūkufua), 10.2.1.3; 20.2.6).

Kumi ha ngaahi founga ke fakakau kotoa ai e kau talavoú ʻi he ngaahi fatongia mo e ngāue ʻo e nofo kemí (vakai, General Handbook (Tohi Tuʻutuʻuni Fakalūkufua), 4.2.6).

Fekumi ki he ngaahi faingamālie mahuʻingamālie te ne langaki ʻa e ongoʻi fakatokouá mo e uouangatahá. ʻOku totonu ke ongoʻi ʻe he talavou takitaha ʻoku fie maʻu ia mo ʻaonga.

ʻE lava ke ueʻi fakalaumālie e taumuʻa hoʻo nofo kemí ʻe he:

Kaveinga ʻo e kōlomu ʻo e Lakanga Taulaʻeiki Faka-ʻĒloné.
Ngaahi ngafa mo e fatongia ʻo e lakanga fakataulaʻeikí.
Kaveinga fakataʻu ʻo e toʻu tupú.
Ko ha potufolofola.
Ko ha fakamatala mei ha palōfita pe ʻaposetolo.
Ko e tohi tufa Ki Hono Fakamālohia ʻo e Toʻu Tupú
Ko e polokalama ʻa e Fānaú mo e Toʻu Tupú.

Ngaahi ʻEkitivitī Teuteuʻangá

ʻE lava ke kamata e ngaahi ʻekitivitī ki he nofo kemí kimuʻa pea ke mavahé. Fakakaukau ke mou palani ha ngaahi ʻekitivitī te ne fakatupulaki ʻa e tuʻunga mateuteú, akó, mo e fakatuʻamelie ki he nofo kemí.

Te ke lava ʻo:

Fakahoko ha ʻekitivitī teuteuʻanga maʻá e kau talavoú mo honau fāmilí ʻa ia ʻe vahevahe ai ʻe he kau taki faka-kōlomú ʻa e kaveingá mo e fakaikiiki ʻo e nofo kemí.
Fakahoko ha ʻekitivitī ke palani mo fokotuʻutuʻu hoʻo nofo kemí.
Faʻu ha menu ʻo e meʻatokoni ki he nofo kemí ke ʻi loto pē ʻi he patisetí mo kau ai ha ngaahi founga ngaohi meʻatokoni moʻui lelei.
Ako ʻa e ngaahi founga ke maluʻi ai e ʻātakaí, hangē ko hono tokangaʻi ʻo e vevé, maluʻi ʻo e maʻuʻanga vaí, mo hono maluʻi ʻo e ngaahi feituʻu fakanatulá. ʻAi ke maʻa ange e ngaahi nofoʻanga kemí ʻi hoʻomou mavahe mei aí mei hoʻomou aʻu ki aí.
Akoako fakaʻaongaʻi e naunau nofo kemí mo e feimeʻatokoni ʻi tuʻá.
Ako e ngaahi taukei ke moʻui ʻi he maomaonganoá.
Faʻu ha palani moʻui lelei te ne tokoniʻi koe ke teuteu fakatuʻasino ki he nofo kemí. ʻE lava ʻo kau heni ha ngaahi ʻekitivitī hangē ko e fononga laló, heka pasikalá, pe ngaahi ʻekitivitī kehe fekauʻaki mo e moʻui leleí.

Malú mo e Mateuteu ki he Meʻa Fakatuʻupakeé

Ko e taha ʻo e ngaahi fatongia mahuʻinga taha ʻi he nofo kemí ko hono tokangaʻi ʻo e kau talavoú ke nau malu fakalaumālie, fakamōlale, fakaeloto, mo fakatuʻasino. ʻOku totonu ke fenāpasi e ngaahi ngāue mo e fengāueʻaki kotoa pē pea mo e ngaahi tuʻunga moʻui ʻa e Siasí (vakai, Ki Hono Fakamālohia ʻo e Toʻu Tupú pea mo e tohi malu fakataʻu ʻa e Kau Palesitenisī ʻUluakí) mo muimui ʻi he ʻulungaanga faka-Kalaisí.

ʻIkai ngata aí, ʻe lava ke fokotuʻu ʻe he kau takí ha ngaahi tuʻunga moʻui mo ha fakahinohino pau ki he nofo kemí, ke fakapapauʻi ʻa e tuʻunga malú mo faʻu ha ʻātakai ʻe fie maʻu ke aʻusia ai e ngaahi taumuʻa ʻo e nofo kemí. ʻOku totonu ke mahino ki he toʻu tupú ko e kau ko ia ki ha ʻekitivitií, ʻoku ʻikai ko ha totonu ia ka ko ha faingamālie ia ʻe lava pē ke fakataʻeʻaongaʻi ʻo kapau te nau fakahoko ha ʻulungaanga taʻefeʻunga pe te nau ʻai ha meʻa ʻe tuʻu fakatuʻutāmaki kiate kinautolu pe ki he niʻihi kehé. ʻOku totonu ke fakahoko ʻe he kau takí mo e kau ʻetivaisá ʻa e ngaahi fie maʻu ko ʻení ki he mātuʻá mo kinautolu ʻoku kaú pea ke nau fealēleaʻaki fakataha fekauʻaki mo e founga ke fakaleleiʻi ʻaki ha hohaʻa.

ʻOku fie maʻu ha tokolahi pau ʻo e kau taki kakai lalahi ʻe kau ʻi he nofo kemi takitaha. ʻOku totonu ke ʻoua toe siʻi hifo he toko uá ʻa e kau taki kakai lalahi ʻi he ʻaho ʻekitivitī takitaha. Ko e ngaahi ʻekitivitī ʻoku lahi angé ʻe fie maʻu ke tokolahi ange e kau taki kakai lalahí. ʻOku totonu ke fakaʻehiʻehi e kau taki kotoa pē mei he ngaahi tūkunga ʻe nofo tokotaha ai mo ha toʻu tupu, tukukehe kapau ʻoku ʻi ha feituʻu ʻe lava ha kau taki kakai lalahi ʻo sio atu kiate kinaua.

ʻI hono palani ʻo ha ʻekitivitī nofo kemi, manatuʻi ʻoku lelei ange ʻa e tuʻunga malu ʻo e tokotaha kotoa ʻi he ʻi ai ha toko taha pe lahi ange ʻo e kau taki kakai lalahi kuo nau aʻusia ʻa e ʻekitivitī totonu ko iá.

Lipooti leva ki he kau taki lakanga fakataulaʻeikí ha faʻahinga palopalema pe lavea lahi ʻe fie maʻu ha ngāue lahi ange ki ai ʻi he ʻuluaki tokoní. ʻOku poupouʻi e tokotaha kotoa pē ʻoku kau ʻi he nofo kemí, tautautefito ki he kau taki kakai lalahí, ke nau tokanga ki ha faʻahinga fakaʻilonga pē ʻo e ngaohikoviá mo e tuenoá. ʻOku totonu ke lipooti ʻe kinautolu te nau ʻilo ki ha ngaohikovia fakaesino, fakasekisuale, pe fakaeloto ʻa e meʻa ʻoku hokó ki he kau taki maʻu mafai totonú pea fetuʻutaki ki he pīsopé ʻi he taimi pē ko iá.

ʻOku totonu ke mateuteu e kau talavoú mo e kau takí ki he ngaahi fie maʻu fakatuʻasino ki he nofo kemí. Fakasiʻisiʻi e fakatuʻutāmakí ʻaki e talangofua ki he ngaahi tuʻutuʻuni mo e ngaahi lao fakalotofonua kotoa pē ʻi homou feituʻú. Fakapapauʻi ʻe faingamālie ʻa e fefonongaʻakí mo e fetuʻutakí ʻi he taimi kotoa pē. Kapau ʻe lava, fakaafeʻi ha neesi, toketā, pe niʻihi fakafoʻituitui kehe ʻoku taukei ʻaupito ʻi he ʻuluaki tokoní ke kau ʻi he nofo kemí. ʻAve mo ha nāunau ʻuluaki tokoni. Tauhi ha lisi ʻo e ngaahi tuʻasila mo e fika telefoni ʻo e mātuʻa takitaha pe tauhi fānau ʻo e kau talavoú, falemahaki ofi tahá mo e fika fetuʻutaki ki he ngaahi meʻa fakatuʻutāmakí, hangē ko e kau polisi fakalotofonuá, tāmate afí, pe meʻalele ʻave fakavavevave ki he falemahakí (ambulance service).

Kimuʻa ʻi he nofo kemí, ʻaʻahi ki he mātuʻa ʻa e kau talavoú pea feinga ke ʻiloʻi e ngaahi fie maʻu makehe ʻa e talavou takitaha—kau ai e ngaahi fie maʻu fakameʻatokoní, fakafaitoʻó, mo fakaelotó. Tokanga ki hono siofi e ʻulungaanga ʻo e toʻu tupú peá ke tokoni ʻi he taimi ʻe fie maʻu aí. ʻOku ʻikai tali ʻa e tōʻonga fakapoʻulí, pauʻú, angaʻulí, pe talanoa mo e ʻulungaanga taʻefakaʻapaʻapá. Feinga ke mahino kiate koe mo ke tali e fatongia ke palani e malu mo e lelei ʻa e toʻu tupu ʻokú ke tokangaʻí. ʻIloʻi, talanoaʻi, mo teuteu ha ngaahi founga ke fakasiʻisiʻi ai ha fakatuʻutāmaki ʻi he nofo kemí. Vakaiʻi ʻa e ngaahi vahe ʻo e General Handbook (Tohi Tuʻutuʻuni Fakalūkufua) ʻoku lisi atu ʻi laló, tohi fakataʻu ʻa e Palesitenisī ʻUluakí fekauʻaki mo e tuʻunga malú, ngaahi fakahinohino ki hono maluʻi ʻo e toʻu tupú, mo e safety.ChurchofJesusChrist.org ki ha fakamatala lahi ange.

ʻOku totonu ke mātuʻaki tokanga ʻaupito e kau taki kakai lalahí mo e kau taki toʻu tupú ʻi hono palaniʻí koeʻuhí ke muimui e ngaahi nofo kemi kotoa pē ʻi he ngaahi tuʻutuʻuni ʻa e Siasí. Ako ʻa e ngaahi fakahinohino ʻi he safety.ChurchofJesusChrist.org pea mo e ngaahi konga ko ʻeni ʻo e General Handbook (Tohi Tuʻutuʻuni Fakalūkufua):

Fakahā mo Fakakau ʻa e Mātuʻá

ʻOku totonu ke fakamālohia ʻe he lēsoni ʻoku ako ʻe ha talavou mei he nofo kemí ʻa ia mo tāpuekina hono fāmilí. ʻI hoʻo teuteu ki he nofo kemí, te ke lava ʻo fakaafeʻi e mātuʻá ke vahevahe ʻenau ngaahi fiemaʻu mo e ʻamanaki fakalaumālie ki honau ngaahi fohá. ʻIloʻi ʻenau ngaahi fakakaukau ki he ngaahi ʻekitivitī mo e taukei ʻe lelei ki honau fāmilí. Mahalo ʻoku ʻi ai ha mātuʻa ʻe niʻihi ʻoku nau maʻu ha pōtoʻi ngāue pe taukei ke vahevahe. Fakahā ki he mātuʻá e ngaahi ʻaho, feituʻu, fakamole, kaveinga mo e ngaahi ʻekitivitī ki he nofo kemí. Fakahā ki he mātuʻá mo e kau talavoú ʻa e tuʻunga taau ʻo e valá mo e ʻulungaanga ʻoku fie maʻú (vakai, 1 Tīmote 4:12).

Kimuʻa ʻi he nofo kemí, kole ki he mātuʻa pe tauhi fānau ʻo e tokotaha takitaha ʻoku kau maí ke fakafonu pea tānaki mai ha Fakangofua ʻa e Mātuʻá pe Tauhi Fānaú mo e Fakangofua Fakafaitoʻo ki he talavoú. ʻE lava ke maʻu e foomu ko ʻení ʻi he safety.ChurchofJesusChrist.org. ʻOku totonu ke ke tuku atu ha fakamatala fakaikiiki ʻo e nofo kemí mo e ngaahi ʻekitivitií koeʻuhí ke ʻiloʻi ʻe he mātuʻá ʻa e meʻa ʻoku nau fakangofua honau fohá ke kau ki aí. (Vakai, General Handbook (Tohi Tuʻutuʻuni Fakalūkufua), 20.6.13.)

Ngaahi Fakakaukau ki he Ngaahi ʻEkitivitī ki he Nofo Kemí

Ngaahi ʻekitivitī fakalaumālie, fakasōsiale, fakatuʻasino mo fakaʻatamai ke fakakaukauʻi ʻi hoʻo palani ʻa e nofo kemí:

Fakalaumālie

Fakaʻaongaʻi ʻo e mītia fakasōsialé ko ha meʻangāue fakafaifekau.
ʻIkai fakaʻaongaʻi ʻa e mītia fakasōsialé ʻi ha vahaʻa taimi
Ngaahi fehuʻi kau ki he Tohi ʻa Molomoná
Ngaahi vaʻinga ʻo e ngaahi tuʻunga moʻuí
Ngaahi fakataha lotu faeasaiti
Ngaahi fakataha lotu pongipongi
Ngaahi houalotu fakamoʻoní
Teuteu ke ngāue fakafaifekau
Ngaahi ʻulungaanga fakaʻaho

Fakasōsiale

Ngaahi vā fetuʻutaki fakafāmili
Fetuʻutaki mo e niʻihi kehé
Malu ʻi he ʻinitanetí
Ngaahi ngāue tokoni
Ngāue ʻofa mo tokoni ʻikai tomuʻa palaniʻi
Ako fakatakimu‘a

Fakaesino

Vaʻinga kickball
Kaka mo hifo ʻi he moʻungá
Heka pasikala he moʻungá
Lova triathlon
Lova ʻi he ngaahi fakafeʻātungia
Vaʻinga tolo frisbee
Volipolo
Soka
Ngaahi sipoti ʻi he vaí
Kakau
ʻAʻalo pōpao
ʻAʻalo vaka
Heka vaka he vaitafé
Folau vaka-lā iiki
Fononga lalo
Fononga lalo mo ha kato
Fononga lalo mo ha kato ʻi ha maile ʻe 50 (80-km)
Fononga faka-paionia
Heka pasikala
Ngaahi sipoti faka-faʻahitaʻu momokó
Uku mamaha
Taumātaʻu
Fononga lalo ʻi he sinoú
Nofo kemi ʻi he faʻahitaʻu momokó

Fakaeʻatamaí

Ngaahi taukei faka-moʻungaʻi tangatá
Ngaahi Taukei ʻo e Moʻui ʻi Tuʻá
Taukei ʻi he tuʻu fakasiokālafi ʻo ha feituʻu
Tā fefie
Feimeʻatokoni ʻi he ʻōvani Tenimaʻaké
Tafu afi
Nonoʻo fakapona
Malu mei he velá
Fakahaofi moʻui
Moʻui ʻi ha meʻa fakatuʻupakeé
Ko e maluʻi ʻo natulá
Founga moʻui ʻa e ʻuluʻakaú
Fekumi koloa ngāue ʻaki ʻa e kāpasá
Taukei folau tahí
Taukei faitā ʻi tuʻá
Ngaahi ngāue mei he letá
Tā-tongitongi ʻo e papá
Ko e feimeʻatokoni ʻi tuʻá
Taukei ke moʻui ʻi he toafá
Fana polo
ʻUluaki Tokoni Fakafaitoʻó

ʻE lava ke maʻu ha ngaahi fakakaukau ʻekitivitī lahi ange ʻi he ChurchofJesusChrist.org/youth/activities. ʻOku ʻi ai ha ngaahi kaati ʻekitivitī ki he ngaahi fakakaukau ʻoku fakaʻilongaʻi atu ʻi he vahe ko ʻení, ʻi he saiti ki he Ngaahi ʻEkitivitī ʻa e Toʻu Tupú.