Ngaahi Taumuʻa—ʻUhingá

Langaki ʻa e tuí pea Fakaloloto ʻa e Uluí

“ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino, mo e ivi fakafiemālie, mo tatau maʻu pē ʻo e Laumālie Māʻoniʻoní” (Russell M. Nelson, “Fakahā maʻá e Siasí, Fakahā ki Heʻetau Moʻuí,” Ensign pe Liahona, Mē 2018, 96).

He ʻikai lava ke fakamālohiʻi ʻa e ngaahi aʻusia fakalaumālié, ka ʻe tokoni ʻa e ngaahi nofo kemí ke faʻu ha feituʻu mavahe mei he ngaahi hohaʻa ʻo e moʻuí ʻa ia ʻe faingofua ange ai ke ongoʻi ʻe he kau talavoú ʻa e Laumālié, tupulaki ʻenau tui kia Kalaisí, pea fai ha ngaahi tukupā ke muimui ʻiate Ia.

Palani ha ngaahi ʻekitivitī te ne fakatupu ha ngaahi fepōtalanoaʻaki pe ngaahi meʻa ʻe tokoni ki he kau talavoú ke nau hoko ʻo ului kakato ange ai ki he ongoongolelei ʻo Sīsū Kalaisí. ʻE lava ke tokoni e kau ʻetivaisá ki he kau talavoú ke ʻiloʻi ʻa e Laumālié ʻi heʻenau vahevahe ʻenau ngaahi aʻusia fakataautahá pea fakamoʻoni ki he moʻoní. Fakaʻatā e kau talavoú ke ʻi ai haʻanau taimi fakalongolongo fakafoʻituitui ke fakalaulauloto, fakakaukau pea tohi ʻi heʻenau tohinoá; ko e taimi ʻeni ʻoku faʻa akoʻi, fakahinohino mo fakafiemālieʻi ai kinautolu ʻe he Laumālié. ʻI he ngaahi aʻusia fakalaumālie ʻa e kau talavoú, fakakaukau ki he founga ke tokoniʻi ai kinautolu ke ʻiloʻi ʻa e meʻa ʻoku hokó.

Manatuʻi kapau ʻoku tupulaki e tui mo e ului ʻa ha talavou ʻe tokotaha pē, naʻe ola lelei ʻa e nofo kemí. Naʻe ngāue fakaetauhi e ʻEikí ki he kakaí tahataha, pea ʻe lava pē ke faʻu e nofo kemi takitahá ke tokoniʻi ha toko taha pē.

Poupouʻi ʻa e Ongo Fakatokouá mo e Uouangataha Faka-kōlomú

“Pea naʻá ne fekau kiate kinautolu ke ʻoua naʻa ʻi ai ha fakakikihi ʻiate kinautolu ka ʻoku totonu ke nau sio ki muʻa ʻi he loto pē taha, ʻo maʻu ʻa e tui pē taha mo e papitaiso pē taha, pea ke taha honau lotó ʻi he uouongataha mo e feʻofoʻofani” (Mōsaia 18:21).

ʻOku ʻomi ʻe he nofo kemí ha ngaahi faingamālie ke fakatupulaki ai e ongo fakatokouá mo e uouangataha fakaʻiunití. Kapau ʻoku ongoʻi ʻe kinautolu ʻoku mou tokoniʻí ha ʻofa mo ha falala tatau, ʻoku ngaʻunu ki muʻa ʻa e ngāue ʻa e ʻEikí.

ʻI hoʻo palani e ngaahi ʻekitivitī nofo kemí, fekumi ki he ngaahi founga ke ngāue fakataha ai e kau talavoú, ikunaʻi e ngaahi ngāue faingataʻá fakakulupu, paotoloaki e vā fetuʻutakí mo fakatupulaki ʻa e fetauhiʻaki mateakí. ʻE lava ke poupouʻi ʻe he kau ʻetivaisá e kau taki toʻu tupú ke fakamahuʻingaʻi ʻa e uouangatahá ʻi he ʻekitivitī takitaha.

Fakatupulaki e Taukeí, Loto-vilitakí, mo e Fatongiá

Ngaahi Taukeí

“Pea ke fai ʻeni kotoa koeʻuhí ke ʻaonga ki he siasi ʻo e ʻOtua moʻuí, pea koeʻuhí ke fakatupulekina ʻe he tangata kotoa pē ʻa hono talēnití, koeʻuhí ke lava ʻe he tangata kotoa pē ʻo maʻu mo ha ngaahi talēniti kehe, ʻio, ʻo liunga teau” (Tokāteline mo e Ngaahi Fuakava 82:18).

Palani ha ngaahi ʻekitivitī ke fakatupulaki e taukei mohu fakakaukaú, langaki e loto-vilitakí mo fakamālohia e fatongia fakataautahá. Fakakaukau ki he ngaahi ʻekitivitī te ne lava ʻo akoʻi ʻa e ngaahi taukeí hangē ko ha fetuʻutaki mo e niʻihi kehé, fakaleleiʻi ʻo e ʻapí mo e meʻalelé, ʻuluaki tokoní, feimeʻatokoní mo e ngaahi meʻa kehé. ʻOku fie maʻu e kau talavoú ke nau fakatupulaki e ngaahi taukei ke tokoniʻi kinautolu ke teuteu ki honau kahaʻú.

Kumi ha ngaahi founga ke tokoniʻi e kau talavoú ke tupulaki ʻenau loto-falalá ʻaki hono ʻoange e ngaahi faingamālie ke ako mo akoako e ngaahi taukei foʻou ʻoku hoko moʻoní. ʻI heʻenau ngāue ke fakalakalaka e ngaahi taukei foʻoú, akoʻi kinautolu ʻoku ngali he ʻikai ke nau poto lelei leva ʻi he ngaahi taukei foʻoú taʻe akoako mo toutou fakahoko.

Loto-vilitaki

“Ko e hā ʻoku tau fie maʻu ai ha faʻahinga tui [mālohi] peheé? Koeʻuhí he ʻoku faingataʻa e kahaʻú. ʻE tātātaha ke faingofua pe manakoa he kahaʻú ke te hoko ko ha mēmipa faivelenga ʻo e Siasí. ʻE siviʻi kitautolu taki taha” (Russell M. Nelson, “Fehangahangai mo e Kahaʻú ʻi he Tui,” Ensign pe Liahona, Mē 2011, 35–36).

Ko e loto-vilitakí ko e malava ia ke fakaakeake mei ha meʻa pe fakafenāpasi ngofua mo e liliú pe pole fakataautahá. Palaniʻi ha ngaahi aʻusia te ne fakatupulaki ʻa e loto-vilitakí. ʻOku totonu ke falala e kau talavoú kiate kinautolu pē—te nau lava ʻo takiekina e ngaahi ikuʻanga ʻo ʻenau moʻuí ʻi he fakahā, ngāue, ngāue fakataha, fakakaukau, ʻilo mo e taukei. ʻI he tōʻonga ko iá, ʻoku nau nofotaha ai ʻi he meʻa te nau lava ʻo fakahokó kae ʻikai ko e nofotaha ʻi he meʻa he ʻikai ke nau lava ʻo puleʻí.

ʻI he ngāue ʻa e kau talavoú ʻi he ngaahi tūkunga faingataʻa fakatuʻasinó, ʻoku nau fakatupulaki ai ʻa e malava ke ngāue mo e ngaahi fakakaukau kehekehe ke ako ki he founga ʻo e hoko atu e moʻuí hili e ngaahi fakafeʻātungiá. Naʻa nau houngaʻia ʻi he ngaahi meʻa faingofua fakafiefia ʻo e moʻuí. ʻOku nau fakatupulaki ha tui mālohi ʻe lava ke nau ngaʻunu ai ki muʻa ʻi he tokoni ʻa e ʻOtuá, ʻo aʻu pē ki he uhouhonga ʻo e ngaahi faingataʻa makehe ʻo e moʻuí.

Fatongia

“ʻOku ʻikai kamata ʻa e ʻOtuá ʻaki hono fehuʻia ʻetau tuʻunga malavá, ka ʻi heʻetau fakaʻataʻatā kitautolú pea fakahaaʻi ʻetau tuʻunga malava ʻo fakahoko ha meʻá, te ne fakalahi leva hotau tuʻunga malavá” (Neal A. Maxwell, “It’s Service, Not Status, That Counts,” Ensign, July 1975, 7).

ʻOku hoko ʻa e nofo kemí mo e ngaahi ʻekitivitī kehé ko ha feituʻu ʻe lava ai ʻa e kau talavoú ʻo ako e fatongiá ʻo fakafou ʻi he ngaahi aʻusia moʻoni. ʻOku tupulaki e kau talavoú ʻi heʻenau tali ʻa e fatongiá mo fakakakato e ngaahi ngāue kuo vahé.

ʻI hono palani e ngaahi ʻekitivitií, ʻe lava ʻa e kau ʻetivaisá ʻo tokoni ke ʻilo e ngaahi fatongia te ne lava ʻo vahe ki he kau talavoú. ʻOku totonu ke fakahinohinoʻi ʻe he kau ʻetivaisá e kau palesitenisī faka-kōlomú ʻi heʻenau vahe mo muimuiʻi e ngaahi ngāué. ʻOku mahuʻinga ʻa hono muimuiʻi ʻo e ngāué ki hono akoʻi ʻo e fatongiá. Tokoniʻi e kau taki toʻu tupú ʻi heʻenau kumi e ngaahi faingamālie ke fakakau ai e talavou kotoa pē. Fakaʻatā e kau talavoú ke taki.

ʻOku akoʻi ʻe hono fakakakato ʻo e ngaahi meʻa faingataʻá ʻa e fatongia fakataautahá. ʻOku ʻomi ʻe he ngaahi aʻusia ʻi tuʻá ha ngaahi faingamālie lahi ki he kau talavoú ke fakahoko ai e ngaahi meʻa faingataʻá. ʻOku tokoni ʻa e kau taki faka-kōlomú mo e kau ʻetivaisa faka-kōlomú ki he kau talavoú ke ikunaʻi ha ngaahi meʻa lahi ange ʻi he meʻa ʻoku nau tui te nau ala fakahokó ʻaki hono fakalotolahiʻi, ʻofaʻi mo e loto-vekeveke lolotonga e ngāué. ʻOua ʻe toʻo ʻa e meʻa faingataʻá; tokoniʻi pē kinautolu ke lavaʻi ia. Poupouʻi kinautolu ʻi he ngaahi fatongia foʻoú ke nau tupulaki ai.