Ngaahi Founga—Founga Fakahokó

Fealēleaʻaki Fakataha

ʻE fakaafeʻi ʻe he fealēleaʻaki fakataha ʻa e kau taki faka-kōlomú mo e kau ʻetivaisá ha ueʻi fakalaumālie mei he Laumālie Māʻoniʻoní ke ʻiloʻi e founga ʻe aʻusia ai ʻe he kemí e ngaahi fiemaʻu ʻa e kau talavoú mo honau ngaahi fāmilí. ʻI he fealēleaʻaki fakataha ʻa e kau taki faka-kōlomú mo e kau ʻetivaisa faka-kōlomú, te nau ako ke faʻu ha ʻātakai ʻokú ne fakaafeʻi ha ueʻi fakalaumālié.

Ko e taimi lelei taha ʻoku aʻusia ai e faleʻi leleí ʻi he taimi:

• ʻOku fakaʻapaʻapaʻi ai e ngaahi kī ʻo e lakanga fakataulaʻeikí. ʻOku totonu ke tuku ai ʻe he kau ʻetivaisa faka-kōlomú ke taki e kau palesitenisī faka-kōlomú. ʻOku totonu ke nau akoʻi ai kiate kinautolu ʻoku fakamafaiʻi kinautolu ʻe he ngaahi kī fakapalesitenisī ʻoku nau maʻu ko ha kau palesiteni fakakōlomú ke nau maʻu ha ueʻi fakalaumālie ki he lelei ʻenau kōlomú.

• ʻOku mahuʻinga ʻa e kau kotoa ki aí. ʻOku maʻu lelei taha ʻa e ueʻi fakalaumālié ʻi he fekumi ki ai e tokotaha kotoa pea ʻi he taimi ʻoku ongoʻi ai he tokotaha kotoa ʻoku fakamahuʻingaʻi ʻenau fakakaukaú. ʻOku fakatupulaki ʻe he tokotaha ʻetivaisa matuʻotuʻá ʻa e fealēleaʻakí ʻaki ʻene fanongo tokanga mo poupouʻi ʻa e fakamatala mo e ngaahi fakakaukau mei he niʻihi kehé. ʻI hono fakaʻapaʻapaʻi e fakakaukau ʻa e niʻihi kehé, te nau ongoʻi fatongia ʻaki ʻa e olá. (Vakai, Tokāteline mo e Ngaahi Fuakava 88:122; General Handbook (Tohi Tuʻutuʻuni Fakalūkufua): Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 4.2.5, ChurchofJesusChrist.org.)

ʻI hoʻomou fealēleaʻaki fakatahá, fakatokangaʻi ʻa e ngaahi taumuʻa pau ki he kemí mo e founga ʻe tokoni ai e kemí ki he talavou fakafoʻituitui takitaha. Fai ha faleʻi fekauʻaki mo e faʻahinga ʻekitivitī ʻe tokoni ke aʻusia ai e ngaahi taumuʻa ko ʻení mo e founga te mou faʻu ai ha ngaahi feituʻu te ne fakaafeʻi ʻa e Laumālié.

ʻIloʻi ʻa e Ngaahi Fiemaʻu Fakafoʻituituí mo e Ngaahi Maʻuʻanga Tokoni Fakalotofonuá

ʻOku tupulaki e uouangataha ʻa e kau taki mo e kau ʻetivaisa faka-kōlomú ʻi heʻenau ongoʻi ngofua e ngaahi fiemaʻu mo e meʻa ʻoku mahuʻingaʻia ai ʻa e kau talavoú mo e ngaahi tūkunga ʻo honau fāmilí. ʻE lava ke ʻiloʻi ʻa e ngaahi fiemaʻú, meʻa ʻoku mahuʻingaʻia aí mo e ngaahi maʻuʻanga tokoní ʻi he Savea ʻo e Talēnití mo e Meʻa ʻOku Mahuʻingaʻia aí ʻi he ChurchofJesusChrist.org.

ʻE lava e ngaahi fakataha alēlea ʻa e uōtí mo e toʻu tupú ʻo tokoni ke ʻilo ai e ngaahi fiemaʻu mo e ngaahi meʻa ʻoku mahuʻingaʻia ai ʻa e kau talavoú mo honau ngaahi fāmilí. Tokanga makehe ki he kau fafine ʻi he fakataha alēlea faka-uōtí, tautautefito kiate kinautolu ko ha ngaahi faʻē ʻa e kau talavoú. (Vakai, General Handbook (Tohi Tuʻutuʻuni Fakalūkufua), 7.5.2.)

Fakaʻaongaʻi e Ngaahi Maʻuʻanga Tokoni Fakalotofonuá

ʻE tokoni ki he kau taki faka-kōlomú hano lisi e ngaahi maʻuʻanga tokoni ʻe ala maʻú ki hono palani ʻo e ngaahi ʻekitivitī kemí. Te ke lava ʻo fakatahatahaʻi ha lisi ʻo e:

• Kakai lalahi ʻi he ʻēliá ʻoku ʻi ai honau taukei makehe, talēniti, aʻusia fakapalofesinale, pe fakakaukau pau ki he ngaahi pole ʻoku fehangahangai mo ha talavou.

• Naunau ʻoku maʻu ʻe he Siasí pe ko e mēmipa pe niʻihi kehe ʻi he koló ʻoku nau loto ke fakaʻaongaʻi ʻe he toʻu tupú, hangē ko ha naunau kemi, naunau toutai, naunau sipoti, ngaahi pōpao mo ha vaka.

• Ngaahi naunau fakatuʻasino ofi mai pē, hangē ko ha ngaahi paʻake fakafonua pe fakasiteiti, ngaahi faiʻanga sipoti ʻi he vaí, mo ha ngaahi faiʻanga kemi.

• ʻO ka fie maʻu, ʻe lava e niʻihi fakafoʻituitui ʻoku taukei fakafaitoʻó ʻo tokoni ʻi ha fakatamaki.

ʻE lava ke fakakaukau e kau taki fakasiteikí ke faʻu e ngaahi lisi ko ʻení ʻi he tuʻunga ʻo e siteikí koeʻuhí ke ʻi ai ha maʻuʻanga tokoni lahi ange maʻá e toʻu tupu kotoa ʻo e siteikí.

Palani mo e Tohi Māhina

Palaní

ʻE makatuʻunga ʻa e feituʻu te mou fakahoko ai ʻa e kemi fakakōlomu ʻa e Lakanga Taulaʻeiki Faka-ʻĒloné ʻi he feituʻu ʻoku mou ʻi aí mo e ngaahi fiemaʻú. ʻOku angamaheni ʻaki hono fakahoko e ngaahi kemí ʻi tuʻa ʻi ha feituʻu malu mavahe mei ʻapi. ʻOku totonu ke fai ʻa e nofo kemí ʻi ha feituʻu ʻe ala ongoʻi ai ʻe he kau talavoú e Laumālié, vahevahe ʻenau ngaahi fakamoʻoní, ako ha ngaahi potoʻi ngāue mo fiefia. ʻI he ngaahi feituʻu ʻoku faingataʻa pe tapu ai e nofo kemi pō kakató, ʻe lava ke hoko hono palani ha nofo kemi ke fai ʻi tuʻá ko ha founga lelei ia ʻe taha. ʻE lava ke fakahoko e ngaahi nofo kemi lolotonga ʻa e ʻahó ʻi ha feituʻu ofi ki he ʻapi nofoʻanga ʻo e kau talavoú.

ʻE lava ke palani ʻa e ngaahi nofo kemí ki ha faʻahinga taimi pē ʻo e taʻú. Fakapapauʻi ke vakaiʻi e anga ʻo e tuʻu ʻa e ʻeá, faʻahi taʻú, mo e faʻahinga nofo kemi ʻe fie fakahoko ʻe he kau talavoú. ʻI he ngaahi tūkunga ʻe lava aí, ʻoku totonu ke fakahoko ʻe he kau talavoú ha nofo kemi laka hake he ʻaho ʻe tahá ʻi he taʻu (vakai, General Handbook (Tohi Tuʻutuʻuni Fakalūkufua), 10.2.1.3). Ko e angamahení, ʻoku ʻikai toe laka hake ʻi he ʻaho ʻe nimá ʻa e nofo kemí, pea ʻoku ʻikai totonu ke kau ai ha ʻaho Sāpate, pea ʻoku ʻikai faʻa fai ia ʻi ha ʻaho Mōnite.

ʻIkai ngata aí, ʻoku poupouʻi atu ke fakahoko tuʻo tolu ki he ono ha ngaahi ʻekitivitī pō kakato, kapau ʻe faingamālie (vakai, General Handbook (Tohi Tuʻutuʻuni Fakalūkufua), 20.6.12). Muimui ʻi he ngaahi tuʻutuʻuni fakalotofonua kotoa pē ki he ngaahi nofo kemi pō kakató.

Tohi Māhina

ʻOku fie maʻu ha taimi feʻunga ke palaniʻi ha ngaahi aʻusia ʻokú ne feau e ngaahi kaveinga mo e taumuʻa mahuʻingamālié. ʻOku fakatupulaki e tuʻunga lelei ʻo e ngaahi nofo kemí ʻi hono palani fakataʻú, ʻi hono maʻu ʻe he kau takí ha taimi feʻunga ke poupouʻi e kau talavoú pea ke fakahoko ki he ngaahi fāmilí mo fakakau mai kinautolu. ʻI hono tomuʻa palaniʻi kimuʻá, ʻoku nau maʻu ai ha taimi ke mateuteu fakatuʻasino, ako e ngaahi taukei ki he nofo kemí, mo tānaki ha paʻanga pē ʻe ala fiemaʻu ʻo fakatatau ki he tuʻutuʻuni ʻa e Siasí.

Ngaahi Meʻa Mahuʻinga ki he Palani ʻo e Nofo Kemí

1. Lotu mo fealēleaʻaki fakataha.

2. Palani fakataʻu.

3. Fokotuʻu ha ngaahi taumuʻa pau ki he kemí.

4. Palani e ngaahi feituʻu ke faʻu ai ha ngaahi fakafehokotaki fakalaumālie.

5. Palani ki hono langa hake ʻo e uouangataha faka-kōlomú.

6. Faʻu ha lisi ʻo e ngaahi maʻuʻanga tokoni ʻoku ala maʻú.

7. Tokoniʻi ʻa e toʻu tupú ki hono fakahoko ʻo e ngaahi ngāué.

8. Akoʻi e ngaahi taukei fakatakimuʻá.

9. Fai ha ngāue.

10. Tokoniʻi ʻa kinautolu ʻoku faingataʻaʻia fakaesinó.

11. Fakapapauʻi ʻa e malú.