Ngaahi Tefitoʻi Moʻoni—Ko e Hā

ʻI Ai mo Kinautolu

“Pea naʻe hoko ʻo pehē naʻe ʻalu ʻa e kau tamaioʻeikí ʻo nau ngāue ʻaki honau tūkuingatá; pea naʻe ngāue foki ʻa e ʻEiki ʻo e ngoue vainé fakataha mo kinautolu” (Sēkope 5:72).

ʻOku kau ʻi he ngaahi meʻa ʻokú ne fakamālohia e fakamoʻoni ʻa ha talavoú ʻa hono vā fetuʻutaki mo e niʻihi kehe ʻoku nau faivelenga ʻi he ongoongoleleí. ʻOku mahuʻinga ʻa e vā fetuʻutaki lelei mo e toʻú, mātuʻá, mo e kau takí ki hono fakaloloto ʻo e ului ʻa e kau talavoú.

ʻOku ʻomi ʻe he ngaahi nofo kemí ha ngaahi faingamālie ke ʻi ai ha taimi mahuʻingamālie mo e talavou takitaha. ʻI hoʻo ʻilo lahi ange ki he loto mo e holi ʻa e kau talavoú, ʻenau ngaahi taumuʻá mo e manavasiʻí, honau ngaahi talēnití mo e vaivaiʻangá, te nau ʻiloʻi ʻokú ke tokanga ange. ʻI heʻenau ʻilo ʻokú ke tokanga angé, ʻe lava ʻo tataki nautolu ʻe hoʻo ivi takiekiná ki he Fakamoʻuí.

Ko hono fakahoko ʻi tuʻá ko ha feituʻu ʻaonga ia ke lava ai e kau talavoú ʻo hoko ʻo tatau ange mo e Fakamoʻuí ʻi heʻenau ngāue fakataha, ikunaʻi ʻa e ngaahi ngāue faingataʻa kuo vahe angé, fiefia, mo ako ke ngāue fakaetauhi ki he niʻihi kehé. ʻI hoʻo hoko ko ha taki faka-kōlomu mo ha ʻetivaisá, te ke lava ʻo hoko ko ha sīpinga ʻo e ngāue fakaetauhí ʻi hoʻo hiki hake e niʻihi kehé, fakamālohia e ngaahi vā fetuʻutakí, fakatupulaki ʻa e loto-falalá ʻi he kau talavoú mo alanima atu ke fakakau ʻa e tokotaha kotoa. ʻOku nau ako ʻaki ʻenau sió—pea fakahoko leva.

ʻOku ʻi ai ha faingamālie lahi ke tokoni ki he talavou takitaha ʻi he ngaahi founga ko ʻení:

• Lotua e talavou takitaha kimuʻa pea fai e nofo kemí mo e ʻaho takitaha ʻo e nofo kemí.

• Tuku ha taimi ke ke ʻiloʻi ʻa e talavou fakafoʻituitui takitaha.

• Fakapapauʻi ʻoku fakakau ʻa e talavou takitaha mo ne ongoʻi ʻoku ʻofaʻi, tautautefito kiate kinautolu ʻoku faingataʻaʻia, siʻi ʻa hono tokoniʻí pe kamata ke hē atu.

• Fakahoko ha ngaahi ngāue ʻofa faingofua mo ha ngāue tokoni pea fakaafeʻi e kau talavoú ke fai ʻa e meʻa tatau.

• Mateuteu ke vahevahe hoʻo fakamoʻoní ʻi ha taimi pē pea ʻi he ngaahi meʻa kuo ʻosi palaniʻí.

Fakafehokotaki Kinautolu mo Langi.

“Ko ia, naʻe pehē ai ʻe ʻIlai kia Samuela, ʻAlu ʻo tokoto hifo: pea ʻe pehē, kapau te ne ui koe, te ke pehē, ʻE [ʻEiki] ke ke folofola mai; he ʻoku ongoʻi ʻe hoʻo tamaioʻeikí. Ko ia naʻe ʻalu ʻa Samuela ʻo tokoto ʻi hono potú.

“Pea naʻe hāʻele mai ʻa Sihova, ʻo tuʻu, ʻo ui ʻo hangē ko ia naʻe faí, Samuela, Samuela. Pea naʻe toki tali ʻe Samuela ʻo pehē, Ke ke folofola mai; he ʻoku ongoʻi ʻe hoʻo tamaioʻeikí.” (1 Samuela 3:9–10).

ʻOku fakatupu ʻe he ngaahi nofo kemí ha ngaahi faingamālie makehe mo tuʻuloa ke fakafehokotaki e kau talavoú mo ʻenau Tamai Hēvaní. ʻOku palani ʻa e kau taki mo e kau ʻetivaisa faka-kōlomú ʻi he ʻaho takitaha ʻi hono fai ʻo e fehuʻi, “Ko e hā ʻa e ngaahi faingamālie te tau faʻu ki he talavou takitaha ke ʻi ai haʻane aʻusia fakataautaha fakalaumālié?” Ko e taumuʻa tefito ʻo e nofo kemí ke tokoniʻi ʻa e talavou takitaha ke hoko ʻo ului ki he ongoongolelei ʻo Sīsū Kalaisí mo moʻui ʻaki hono ngaahi akonakí. ʻOku totonu ke foki ʻa e toʻutupu takitaha mei he nofo kemí kuó ne ʻilo lahi ange ki he maʻuʻanga tataki fakalaumālie mo fakatuʻasinó.

ʻI hoʻo palani e meʻa ke akoʻi ʻi he nofo kemí, fakakaukau ki he poto mo e taukei ʻe tokoni ki he talavou takitaha ke fakakakato e ngaahi fatongia ʻo e lakanga fakataulaʻeikí mo teuteuʻi ia ke hoko ko ha faifekau faivelenga, husepāniti angatonu, mo ha tamai ʻofá. ʻOange ha ngaahi faingamālie ʻoku vahevahe tatau ke tokoni ki he niʻihi kehé pea ke tupulaki fakalaumālie, fakasōsiale, fakatuʻasino mo fakaʻatamai (vakai, Luke 2:52). Fakakaukau foki ki he ngaahi ʻekitivitī ʻoku fakamamafa ki he ngaahi tōʻonga māʻoniʻoní mo e tauhi totonu ki he ako fakaʻaho ʻo e folofolá, lotu fakataautaha, fakatomala, talangofua, mo tauhi ʻo e ʻaho Sāpaté.

ʻOku lahi ange e meʻa ʻoku maʻu ʻe he kau talavoú mei he ngaahi fepōtalanoaʻaki ʻo e ongoongoleleí, mei he fanongo ki ha ngaahi ako kau ki he ongoongoleleí. Fakaʻaongaʻi lelei ʻa e faingamālie kotoa pē ke tuku ki he kau talavoú ke nau talanoa fekauʻaki mo ʻenau ngaahi aʻusiá. ʻE lava ke maʻu ʻi he nofo kemí ha ngaahi faingamālie ki ha ngaahi talanoa angamaheni te ne lava ʻo fakafehokotaki e kau talavoú mo e langí.

Tuku Ke Nau Taki

“Ko ia, tuku ke akó ni ʻo ʻilo ʻe he tangata kotoa pē ʻa hono fatongiá, pea ke ngāue ʻi he lakanga kuo fakanofo ia ki aí, ʻi he faivelenga kakato” (Tokāteline mo e Ngaahi Fuakava 107:99).

Hangē ko e kakai kotoa pē, ʻoku fiemaʻu ʻe he kau talavoú ke nau ongoʻi ʻoku fiemaʻu kinautolu. ʻOku fie maʻu ke nau ongoʻi hoʻo falala kiate kinautolú pea vahe ange ha ngaahi ngāue ʻoku mahuʻingamālie. ʻOku meimei ke ongoʻi lōmekina e kau talavou ʻoku ʻikai ʻi ai haʻanau ngaahi fatongia ʻi he lakanga fakataulaʻeikí ʻi he māmaní.

ʻOku fakatupulaki e ngaahi taukei fakatakimuʻa ʻa e kau talavoú ʻi heʻenau palani mo tataki e ngaahi nofo kemí. ʻE lava ke tokoni e kau ʻetivaisá ki he kau talavoú ke ako ke tataki ʻaki hono poupouʻi mo fakahinohino ʻi he palani ʻe he kau palesitenisī faka-kōlomú ʻa e nofo kemí. Tokoniʻi ke nau ako e foungá:

• Ngāue Tokoni.

• Faiako.

• Vahe e Ngāué.

• Fakafetuʻutaki ʻa e ngaahi fiemaʻú.

• Muimuiʻi e ngaahi ngāue ne vahé.

Fakakaukau ki he lea ʻa ʻEletā Sefilī R. Hōlani: “ʻOku tau taʻe tokaʻi ʻenau tuʻu malavá pea ʻafaʻi ʻenau aʻusiá” (“You Can Teach in the Savior’s Way” [fakataha ako fakatakimuʻa fakamāmanilahi, 5 ʻo Nōvema 2016], broadcasts.ChurchofJesusChrist.org).

ʻIkai ngata pē ʻi he kau palesitenisī faka-kōlomú, ʻe lava ke vahe ki ha kau talavou kehe ke nau fatongia ʻaki e ngaahi tapa kehekehe ʻo e nofo kemí. ʻOku tokoni ʻa e kau ʻetivaisa faka-kōlomú ki hono poupouʻi, akoʻi mo fakahinohinoʻi ʻo e kau talavoú ke nau lavameʻa ʻi hono fakahoko ʻenau ngaahi ngāue kuo vahe angé ke ako ʻa e talavou takitaha ke taki.

ʻOku fealēleaʻaki e kau taki faka-kōlomú mo e kau pīsopelikí mo e kau ʻetivaisa faka-kōlomú ʻi heʻenau fakahoko mo vakaiʻi e tuʻunga lelei ʻo e nofo kemí. ʻOku nau vahevahe e ngaahi ngāue ki he kau talavou kehe ʻi he kōlomú.

ʻOku totonu ke tekeʻi ʻe he kau ʻetivaisá ʻa e fiemaʻu ko ia ke fakamahaloʻi pē e ngaahi fatongia ʻo e kau talavoú.