2 Nephi 1

Paghahanap ng mga Alituntunin ng Ebanghelyo

Isipin kung ano kaya ang madarama mo kung ang isang taong hinahangaan mo ay malapit nang pumanaw at nagbabahagi ng ilang huling payo o tagubilin sa iyo. Alam ni Lehi na malapit na siyang pumanaw, kaya kinausap niya ang kanyang mga anak upang hikayatin silang sundin ang mga kautusan ng Diyos. Ang mga katotohanang itinuro niya ay maaaring pagmulan ng inspirasyon at patnubay para sa iyo. Ang lesson na ito ay makatutulong sa iyo na matukoy ang mga alituntunin na, kapag ginamit, ay gagabay sa iyo sa pagtanggap ng tulong ng Diyos sa iyong buhay.

Ano ang hahanapin

Suriin ang larawan sa ibaba at tingnan kung ilan sa mga nakatagong bagay ang makikita mo sa loob ng susunod na minuto.

• Anong mga bagay ang madali mong nahanap? Alin sa mga ito ang nangailangan ng higit na pagsisikap?

• Paano maaaring nagbago ang kakayahan mong mahanap ang mga nakatagong bagay kung hindi mo alam kung ano ang hahanapin?

• Paano natutulad sa pag-aaral ng mga banal na kasulatan ang aktibidad na ito?

Ang iyong mga karanasan sa mga banal na kasulatan ay mas mapapahusay kapag naghahanap ka ng mga alituntunin habang nag-aaral ka.

Ipinaliwanag ni Elder David A. Bednar ng Korum ng Labindalawang Apostol kung ano ang alituntunin:

Ang isang alituntunin ng ebanghelyo ay isang gabay na nakabatay sa doktrina para sa matwid na paggamit ng kalayaang pumili. Ang mga alituntunin ay nagmumula sa mas malawak na mga katotohanan ng ebanghelyo at nagbibigay ng patnubay at mga pamantayan habang patuloy tayo sa paglakad sa landas ng tipan. (David A. Bednar, “Ang mga Alituntunin ng Aking Ebanghelyo,” Liahona, Mayo 2021, 123)

Ang ilang halimbawa ng mga alituntuning napag-aralan mo noon sa 1 Nephi ay kung tutuparin natin ang ating mga tipan, masasandatahan tayo ng kabutihan at kapangyarihan ng Diyos (tingnan sa 1 Nephi 14:14) at kapag inihalintulad natin ang mga banal na kasulatan sa ating sarili, matututo at makikinabang tayo mula sa mga ito (1 Nephi 19:23).

• Paano mo ibubuod kung ano ang alituntunin?

• Ano ang ilang dahilan kung bakit makatutulong sa ating buhay ang pagtukoy sa mga alituntunin?

Paghahanap ng mga alituntunin

• Ano ang ginawa mo noon na nakatulong sa iyo na makahanap ng mga alituntunin sa mga banal na kasulatan?

• Ano ang naging mahirap para sa iyo nang sikapin mong maghanap ng mga alituntunin?

Ang isang epektibong paraan upang makahanap ng mga alituntunin sa mga banal na kasulatan ay ang magbasa na hinahanap ang mahahalagang salita, parirala, o ideya. Maaaring makatulong sa iyo ang mga sumusunod na tanong para magawa ito:

• Anong mga salita o parirala ang inulit o tila mahalaga?

• Anong mga babala o pangako ang isinama sa mga talatang ito?

• Ano kaya ang pangunahing ideya o mahalagang bagay ang sinisikap na iparating ng may-akda?

• Ano ang binigyang-diin sa iyo ng Espiritu Santo?

Mula sa mga salita, parirala, o ideyang ito, sumulat ng isang pahayag ng katotohanan na makatutulong sa iyong buhay. Matapos magsulat, itanong sa iyong sarili ang mga sumusunod:

• Totoo ba ang alituntuning ito sa lahat ng sitwasyon, panahon, at kultura? Kung hindi, anong mga pagbabago ang kailangan upang maging totoo ito?

• Ang alituntunin bang ito ay maglalapit sa akin at sa iba sa Ama sa Langit at kay Jesucristo?

Ang 2 Nephi 1 ay naglalaman ng ilan sa huling payo ni Lehi sa kanyang mga anak bago siya pumanaw. Ipinaalala niya sa kanila ang kabutihan ng Diyos at itinuro niya ang ilang alituntunin na inaasahan niyang gagabay sa kanila habambuhay.

Basahin ang 2 Nephi 1:1–4 at maghanap ng mga totoong alituntunin. Maaari mong gamitin ang mga naka-bullet na tanong na nakalista sa itaas.

• Ano ang nahanap mo?

Ang isang halimbawa ng alituntuning itinuro ni Lehi ay: mapoprotektahan tayo ng Panginoon sa pamamagitan ng pagsunod sa Kanyang mga babala (tingnan sa 2 Nephi 1:3–4).

Matapos matukoy ang isang katotohanan, makatutulong na isipin kung ano ang ibig sabihin nito at kung paano ito makatutulong sa iyong buhay.

Maaaring makatulong ang ilan sa mga sumusunod na tanong:

• Paano ka naprotektahan ng Panginoon o paano naprotektahan ng Panginoon ang mga taong kilala mo matapos sundin ang Kanyang mga babala?

• Ano ang itinuturo sa iyo ng Kanyang mga babala tungkol sa Kanya at sa nadarama Niya tungkol sa iyo?

Pag-isipang mabuti kung paano ka binabalaan ng Panginoon ngayon at kung paano mo gustong tumugon.

Pagbutihin ang kakayahan mong maghanap ng mga alituntunin

Pagbutihin ang kakayahan mong makahanap ng mga alituntunin sa mga banal na kasulatan sa pamamagitan ng pagsunod sa prosesong ito sa mga aktibidad sa ibaba.

Basahin ang kahit dalawa sa mga sumusunod na scripture passage ng huling payo ni Lehi sa kanyang mga anak. Maaari mo ring panoorin ang “Tinuruan ni Lehi ang Kanyang Pamilya” mula sa time code na 0:39 hanggang 3:35, na matatagpuan sa SimbahanniJesucristo.org, upang marebyu ang mga scripture passage na ito. Gamitin ang proseso ng “Paghahanap ng mga alituntunin“ upang tumukoy ng mga totoong alituntunin.

Tinuruan ni Lehi ang Kanyang Pamilya | 2 Nephi 1:4–29

2 Nephi 1:4–29 | Nagturo si Lehi, isang propeta sa Aklat ni Mormon, sa kanyang pamilya tungkol sa pagsunod sa mga kautusan ng Diyos. Ang mga yaong sumusunod sa mga kautusan ay pagpapalain.

• 2 Nephi 1:13–15, 23

• 2 Nephi 1:16–20

• 2 Nephi 1:24–29

1. Gawin ang sumusunod:

   Pumili ng isang katotohanan mula sa 2 Nephi 1 na sa palagay mo ay lubos na makatutulong sa iyo, at isulat ang sumusunod sa iyong study journal:

   1. Ang alituntuning nahanap mo at ang talata o mga talata kung saan mo ito nahanap

   2. Isang paliwanag kung ano sa palagay mo ang ibig sabihin ng alituntuning ito

   3. Mga paraan na madarama mo na ang katotohanan ay maaaring gumabay sa iyo at magdala ng mahahalagang pagpapala sa iyong buhay

   4. Ang mga natutuhan mo tungkol sa Ama sa Langit at kay Jesucristo mula sa alituntuning ito

Isipin ang ginawa mo upang matukoy at maunawaan ang mga alituntunin sa 2 Nephi 1.

• Paano makatutulong sa iyo ang palaging paghahanap ng mga alituntunin sa iyong personal na pag-aaral ng mga banal na kasulatan?

• Paano ito makaiimpluwensya sa iyong ugnayan kay Jesucristo at sa hangarin mong maging katulad Niya?

Opsiyonal: Gusto Mo Bang May Matutuhan Pa?

2 Nephi 1:13, 23. Ano ang “mga tanikala” na tinutukoy ni Lehi?

“Shake Off the Chains with Which Ye Are Bound”

Elder Marvin J. Ashton delivers a message titled "Shake Off the Chains with Which Ye Are Bound."

All Men Everywhere

Again and again the Book of Mormon teaches that the gospel of Jesus Christ is universal in its promise and effect.

2 Nephi 1:9, 20. Ano ang ibig sabihin ng “uunlad”?

Ang mga pahayag na “uunlad sa lupain” at “itatakwil mula sa harapan [ng Panginoon]” ay kasalungat ng isa’t isa. Ipinapahiwatig nito na ang pag-unlad sa lupain ay matibay na nakaugnay sa pagkakaroon ng presensya ng Panginoon sa ating buhay.

Inilarawan ni Pangulong Dieter F. Uchtdorf, na noon ay nasa Unang Panguluhan, ang pag-unlad na dumarating kapag sinusunod natin ang mga kautusan:

Pananabik na Makauwi

Itinuro ni Pangulong Uchtdorf na ang pagbalik sa Panginoon ay mas magpapabuti ng ating buhay at makatutulong sa atin upang mas mapabuti ang buhay ng iba.

Ang pagsunod sa Tagapagligtas ay hindi mag-aalis ng lahat ng inyong pagsubok. Gayunman, aalisin nito ang mga hadlang sa pagitan ninyo at ng tulong na gustong ibigay sa inyo ng Ama sa Langit. Sasamahan kayo ng Diyos. Ituturo Niya ang inyong tatahakin. Lalakad Siya sa tabi ninyo at papasanin kayo kapag nahihirapan na kayo. (Dieter F. Uchtdorf, “Pananabik na Makauwi,” Liahona, Nob. 2017, 22)