2 Нифай 5

Аз жаргалтай хүмүүний ёсоор амьдрах нь

Ах нараасаа холдон салсны дараа Нифай болон түүнийг дагаж явсан хүмүүс шинэ суурин байгуулжээ. Нифайн хүмүүс цэцэглэн хөгжиж, аз жаргалтай амьдралаар амьдарсан. Энэ хичээл суралцагчдад аз жаргалтай хүмүүний ёсоор амьдрахын тулд юу хийхээ олж мэдэхэд тусалж чадна.

Боломжит суралцах үйл ажиллагаа

Аз жаргалтай хүмүүсийн амьдрал

• Хүнийг юу аз жаргалтай болгодог вэ?

• Таны бодлоор жирийн өсвөр насны хүүхэд ямар хариулт өгөх вэ?

• Аврагч хэрхэн хариулна гэж та бодож байна вэ?

Эхний асуултад хэрхэн хариулахаа бод. Аз жаргалын талаарх таны үзэл бодол жирийн өсвөр насны хүүхэд, Аврагч хоёрын хэрхэн хариулах байсны алинтай нь илүү ойр байна вэ? Аз жаргалыг Аврагчийн харах өнцгөөр харах нь таны амьдралд ямар нөлөө үзүүлж болох вэ? 2 Нифай 5-ыг судалж, аз жаргалтай байхын тулд юу хийж чадахаа хайж ол.

2 Нифай 5 бүлэгт Лихайн гэр бүл нифайчууд, леменчүүд гэж хуваагдсан тухай дэлгэрэнгүй өгүүлдэг. Лемен, Лемүел хоёрыг Нифайг алахаар төлөвлөж байх үед Их Эзэн Нифайд ах нараасаа холдож салахыг анхааруулсан (2 Нифай 5:1–5-ыг үзнэ үү). Нифай Их Эзэнд дуулгавартай байж, “Бурханы илчлэлт хийгээд сануулгад итгэсэн” (2 Нифай 5:6) хүмүүстэй явж, шинэ суурин байгуулсан.

Леменчүүд уг нутагтаа үлдэж, Их Эзэний эсрэг боссон. “Тэд түүний дэргэдээс тусгаарлагдсан” (2 Нифай 5:20). Энэ бүлэгт дурдсан хараал нь Бурханаас салах байв (2 Нифай 5:20–24-ийг үзнэ үү). Леменчүүдийн арьсны өнгө өөрчлөгдсөн нь энэхүү хараалын тэмдэг буюу дохио байв. Уг тэмдгийн мөн чанар бүрэн тайлагдаагүй байна. Энэ тэмдэг эхэндээ леменчүүдийг нифайчуудаас ялгадаг байсан. Хожим нь нифайчууд, леменчүүд бүгд ёс бус явдал, зөв шударга байдал бүхий үеийг дамжин өнгөрүүлсэн учраас энэ тэмдэг нь леменчүүдийн Бурханы өмнө хэрхэн зогсож байгааг илэрхийлэх ач холбогдол бүхий шалгуур байхаа больсон байв.

2 Нифай 5:27-г уншиж, Нифай байгуулсан шинэ сууринаа хэрхэн тодорхойлсныг анзаар.

• Аз жаргалтай хүмүүний ёсоор амьдрах нь юу гэсэн утгатай гэж та бодож байна вэ?

• Аз жаргалтай хүмүүний ёсоор амьдрахад ямар саад бэрхшээл тохиолдож болох вэ?

Нифайчуудыг аз жаргалтай хүмүүний ёсоор амьдрахад хүргэсэн зүйл юу гэдгийг ойлгохын тулд бүлгийн эхэнд байх шүлгүүдийг унш.

2 Нифай 5:10–17, 26-г уншаад, олж мэдсэн зүйлээрээ дараах мэдэгдлийг гүйцээ.

Аврагчийг дагаж, аз жаргалтай хүмүүний ёсоор амьдрахад надад … тусалж чадна.

• Аз жаргалтай хүмүүний ёсоор амьдрахад юу танд тусална гэж та бодож байна вэ?

• Та ийм төрлийн үйл ажиллагаанд хэр их оролцдог вэ?

Энэ өгүүлбэрийг дуусгах гурван боломжит арга бол “Бурханы хуулиудад дуулгавартай байх”, “Ажил”, “Ариун сүм” юм. Дараах үйл ажиллагаанууд нь эдгээр тус бүрийг илүү гүнзгийрүүлэн судлах болно.

Дараах үйл ажиллагаануудын нэгийг хийнэ үү.

Үйл ажиллагаа 1. Бурханы хуулиудад дуулгавартай байх

• Таны амьдарч буй газарт ямар ямар хууль тогтоомж байдаг вэ?

• Эдгээр хуулийг байнга дагаж мөрдөх эсвэл мөрдөхгүй байх нь ямар үр дүнд хүргэх вэ?

• Энэ харьцуулалт нь Бурханы хуулиудтай юугаараа төстэй эсвэл ялгаатай вэ?

Нифай болон түүний дагагчид Их Эзэний тушаалуудыг дагасан (2 Нифай 5:10-ыг үзнэ үү). Төгс эзэмших сургаалын судрын хэсгийн Мозая 2:41-ийг уншаад, Хаан Бенжамин Бурханы зарлигуудыг сахих талаар хүмүүст юу ойлгуулахыг хүссэнийг олж мэд. Та магадгүй энэ эш татсан эшлэлийг 2 Нифай 5:10-тай холбож болох юм.

1. Дараах асуултуудад хариул.

• Бурханы хуулиудыг дуулгавартай дагах нь биднийг аз жаргалтай байхад хэрхэн тусалдаг гэж та бодож байна вэ?

• Есүс Христ дуулгавартай байдлын жишээг хэрхэн харуулсан бэ?

• Бурханы ямар тушаал танд илүү их аз жаргал авчирдаг вэ?

Үйл ажиллагаа 2. Ажил хөдөлмөр ба бие даах чадвар

Цаасан дээр эсвэл судлах тэмдэглэл дээрээ шаргуу хөдөлмөрөөс гарах үр өгөөжийн жагсаалт бичихэд багахан хугацаа зарцуул.

2 Нифай 5:11, 15, 17-г уншаад нифайчуудын ажилласан янз бүрийн арга зам, тэдний хөдөлмөрийн үр дүнг тодорхойл.

• Та юу олж мэдсэн бэ?

Өсвөр үеийнхний бат бөх байдлын төлөө товхимол (2011) дахь “Ажил хөдөлмөр ба бие даах чадвар”-ыг уншиж, ажил хөдөлмөрийн зарчмын талаар юу сурч мэдсэнээ хар.

2. Дараах асуултуудад хариул.

• Таны олж мэдсэн ажлын ашиг тус юу вэ? (Эдгээрийг жагсаалтдаа нэмэх талаар бодож үз.)

• Та эдгээр ашиг тусаас алиныг нь мэдэрсэн бэ?

• Ажил хөдөлмөр нь Есүс Христтэй илүү адил болоход хэрхэн тусалж болох вэ?

Үйл ажиллагаа 3. Ариун сүм

• Та ариун сүмийн талаар юу бодож эсвэл мэдэрдэг вэ?

2 Нифай 5:16-г уншаад, нифайчуудын ариун сүмийн талаар юу сурч мэдсэнээ хар.

• Нифай болон түүний хүмүүс ариун сүм барихад яагаад ийм их хүчин чармайлт гаргасан гэж та нар бодож байна вэ?

• Их Эзэн яагаад Өөрийн хүмүүсээс ариун сүм барихын тулд золиос гаргахыг хүсдэг байсан мөн хүссээр байгаа гэж та нар бодож байна вэ?

Ерөнхийлөгч Рассэлл М.Нэлсон ариун сүмүүдийн зорилго, адислалын талаар дараах зүйлийг хэлсэн. Та “Ариун сүм ба таны сүнслэг байдлын суурь” видеоны цагийн код 4:27-оос 5:55 хүртэл үзэх эсвэл дараах мэдэгдлийг уншиж болно.

Ариун сүм ба таны сүнслэг байдлын суурь

Ерөнхийлөгч Нэлсон хэрхэн ариун сүмийн ёслолууд болон гэрээнүүд бидний сүнслэг суурийг хүчирхэгжүүлдэг тухай заахдаа Солт Лэйк ариун сүмийн суурьд хийгдэж буй ажлыг дурдав.

Биднийг итгэл, сүнслэг хүч чадлаа бэхжүүлэхэд ариун сүм голлох байр суурьтай байдгийн учир нь ариун сүмийн амин зүрх бол Аврагч ба Түүний сургаал юм. Сүнс болоод удирдамжаар дамжуулан ариун сүмд заагддаг бүх зүйл Есүс Христийн талаарх бидний ойлголтыг нэмэгдүүлдэг. Түүний амин чухал ёслолууд ариун нандин санваарын гэрээнүүдээр дамжуулан биднийг Түүнтэй холбодог. Улмаар биднийг гэрээгээ сахих үед Тэрээр Өөрийн эдгээгч, хүчирхэгжүүлэгч хүчийг бидэнд хүртээдэг. Ай, ирэх өдрүүдэд Түүний хүч бидэнд ямар их хэрэгтэй гээч.

Бидэнд “хэрэв [бид] бэлтгэгдэх аваас, [бид] эмээх нь үгүй хэмээн амласан.” Энэхүү баталгаа өнөөдөр гүн гүнзгий утга учрыг агуулдаг. Урьд өмнө тохиож байгаагүй өнөөдрийн сорилт бэрхшээлийг үл харгалзан Есүс Христ дээр сууриа тавьдаг, Түүний хүчээр хэрхэн зэвсэглэхээ мэддэг хүмүүс энэ эрин үеийн өвөрмөц түгшүүрт эрсдэх нь үгүй хэмээн Их Эзэн тунхаглажээ. (Рассэлл М.Нэлсон, “Ариун сүм ба таны сүнслэг байдлын суурь,” 2021 оны 10-р сарын Ерөнхий чуулган)

3. Дараах асуултуудад хариул.

• Ерөнхийлөгч Нэлсоны мэдэгдлээс танд ямар сэтгэгдэл төрсөн бэ?

• Ариун сүмд очих нь Есүс Христ дээр үндэс сууриа илүү сайн тавихад хэрхэн туслах вэ? Танд бодож олсон туршлага байвал хуваалцаж болно.

• Ариун сүм танд эсвэл өөрийн тань таньдаг хэн нэгэнд хэрхэн агуу аз жаргал авчирсан бэ?

Нэмэлт: Илүү ихийг судлахыг хүсэж байна уу?

Аз жаргалыг амьдралдаа урихын тулд бид өөр юу хийж болох вэ?

Далын ахлагч Клаудио Р.М.Коста ийн заасан.

Биднийг хүчирхэгжүүлж, итгэл, гэрчлэлээ нэмэгдүүлэх тэрхүү жижиг зүйлсийг хийхэд аз жаргал оршдог гэдгийг бид сурдаг. Бидний өдөр тутмынхаа амьдралд хийдэг жижиг зүйлс:

Бид өглөө, орой бүр залбирахдаа Их Эзэний биднийг сонсдог, адисалж, уучилж, туслахад үргэлж бэлэн байдгийг мэдрэх үедээ баяртай байдаг. Бид амьдралдаа Ариун Сүнсний өдөөлтийг мэдэрч, амьдралын чухал шийдвэр гаргах мөчид Сүнсийг мэдэрснээрээ аз жаргалтай болдог. … Товчхондоо, бид өдөр бүр хийсэн жижиг зүйлээсээ л аз жаргалыг мэдэрч, бидний төлөө санаа тавьдаг хайрт Бурханы зарлигуудыг сахиснаараа бүрэн дүүрэн аз жаргалтай байдаг. (Claudio R. M. Costa, “Fun and Happiness,” Liahona, Nov. 2002, 92–93)

2 Нифай 5:20–21. Леменчүүд дээр ямар зүхэл ирсэн бэ?

Нифайн өдрүүдэд леменчүүд дээр ирсэн зүхэл нь “тэд Их Эзэний дэргэдээс тусгаарлагдах болно … тэдний алдсын улмаас бөлгөө” (2 Нифай 5:20–21-ийг үзнэ үү). Энэ нь Их Эзэний Сүнс тэдний амьдралаас авагдсан гэсэн утгатай. Леменчүүдийг наманчилж, сайн мэдээгээр амьдарсан үед “Бурханы зүхэл тэднийг цаашид дагасангүй” (Aлма 23:18).

Мормоны Номд мөн нифайчуудаас тусгаарлагдсаны дараа леменчүүд дээр арьс нь харлах тэмдгийг буулгасан тухай өгүүлдэг. Уг тэмдгийн мөн чанар, харагдах байдал бүрэн тайлагдаагүй байгаа. Энэ тэмдэг эхэндээ леменчүүдийг нифайчуудаас ялгадаг байсан. Хожим нь нифайчууд, леменчүүд бүгд ёс бус явдал, зөв шударга байдал бүхий үеийг дамжин өнгөрүүлсэн учраас энэ тэмдэг нь леменчүүдийн Бурханы өмнө хэрхэн зогсож байгааг илэрхийлэх ач холбогдол бүхий шалгуур байхаа больсон байв.

Бидний өдрүүдэд бошиглогчид хар арьс нь тэнгэрлэг буруушаалт эсхүл зүхлийн тэмдэг биш гэдгийг баталсан. Сүм Нифайн сургаал болох Их Эзэн “хар ба цагаан, боол ба чөлөөт, эр болон эм, түүнд ирэх хэнээс боловч үл татгалздаг” (2 Нифай 26:33) гэснийг баримталдаг. Ерөнхийлөгч Рассэлл М.Нэлсон

“Их Эзэн ижил тэгш боломжийн талаарх нэн чухал сургаалаа Өөрийн бүх хүүхдэд онцлон хэлсэн. …

“… Итгэлтэй хүмүүс гэрээт зам дээр гарч, хайрт Гэтэлгэгчдээ ирэхэд соёл, хэл яриа, хүйс, яс үндэс зэргийн ялгаа чухал байхаа больдог” хэмээн тунхагласан” (“President Nelson Remarks at Worldwide Priesthood Celebration” [2018 оны 6-р сарын 1], newsroom.ChurchofJesusChrist.org).

“Бурханы өмнө эзлэх байр суурийг тань арьсны өнгөөр тодорхойлдоггүй гэдгийг би баталж байна. Бурханд таалагдах эсвэл үл таалагдах нь таны арьсны өнгө биш харин Бурханд болон Түүний зарлигуудад үнэнч байхаас шалтгаална” (“Бурхан ялах болтугай,” 2020 оны 10-р сарын Ерөнхий чуулган, 94).