2 Nephi 5

Namuhay nang Maligaya

Dalagitang nakangiti

Matapos mahiwalay sa kanyang mga kapatid, si Nephi at ang mga sumunod sa kanya ay nagtatag ng bagong komunidad. Ang mga tao ni Nephi ay umunlad at namuhay nang maligaya. Ang lesson na ito ay makatutulong sa iyo na matuklasan kung ano ang maaari mong gawin upang mamuhay nang maligaya.

Mga Posibleng Aktibidad sa Pag-aaral

Maligaya

• Ano ang nagpapaligaya sa isang tao?

• Sa iyong palagay, paano sasagot ang karaniwang tinedyer?

• Sa iyong palagay, paano sasagot ang Tagapagligtas?

Isipin kung paano mo sasagutin ang unang tanong. Aang pananaw mo ba sa kaligayahan ay mas malapit sa isasagot ng karaniwang tinedyer o sa isasagot ng Tagapagligtas? Ano ang maaaring maging epekto sa iyong buhay ng pagtingin sa kaligayahan tulad ng pagtingin ng Tagapagligtas dito? Habang pinag-aaralan mo ang 2 Nephi 5, alamin kung ano ang maaari mong gawin upang maging maligaya.

Idinedetalye ng kabanata 2 Nephi 5 ang paghihiwalay ng pamilya ni Lehi at naging mga Nephita at mga Lamanita. Nang planuhin nina Laman at Lemuel na patayin si Nephi, binalaan ng Panginoon si Nephi na humiwalay sa kanyang mga kapatid (tingnan sa 2 Nephi 5:1–5). Sinunod ni Nephi ang Panginoon at lumisan siya kasama ng mga “naniwala sa mga babala at paghahayag ng Diyos” (2 Nephi 5:6) at nagtatag siya ng bagong komunidad.

Ang mga Lamanita ay nanatili sa lupain at naghimagsik laban sa Panginoon. Sila ay “nahiwalay mula sa kanyang harapan” (2 Nephi 5:20). Ang sumpang binanggit sa kabanatang ito ay pagkawalay sa Diyos (tingnan sa 2 Nephi 5:20–24). Ang pagbabago ng balat ng mga Lamanita ay marka o tanda ng sumpa. Ang katangian ng tanda na ito ay hindi lubusang nauunawaan. Noong una, dahil sa tanda ay nakilala ang mga Lamanita mula sa mga Nephita. Kalaunan, nang ang mga Nephita at Lamanita ay kapwa dumanas ng mga panahon ng kasamaan at kabutihan, ang tanda ay hindi na naging indikasyon ng katayuan ng mga Lamanita sa harapan ng Diyos.

Basahin ang 2 Nephi 5:27 at pansinin kung paano inilarawan ni Nephi ang bagong komunidad na itinatag niya.

• Ano sa palagay mo ang ibig sabihin ng namuhay nang maligaya?

• Anong mga hamon ang maaaring makaharap sa pamumuhay nang maligaya?

Tingnan ang mga naunang talata sa kabanata upang magkaroon ng kaalaman tungkol sa ginawa ng mga Nephita na humantong sa pamumuhay nila nang maligaya.

Basahin ang 2 Nephi 5:10–17, 26 at kumpletuhin ang sumusunod na pahayag gamit ang malalaman mo:

ay makatutulong sa aking sundin ang Tagapagligtas at mamuhay nang maligaya.

• Ano pa sa palagay mo ang makatutulong sa iyo para mamuhay ka nang maligaya?

• Gaano kadalas kang nakikibahagi sa ganitong mga uri ng mga aktibidad?

Ang tatlong posibleng paraan upang makumpleto ang pangungusap na ito ay “Ang pagsunod sa mga batas ng Diyos,” “Ang pagtatrabaho,” at “Ang templo.” Sa mga susunod na aktibidad, tutuklasin ang bawat isa sa mga ito nang mas malaliman.

Mangyaring gawin ang isa sa mga sumusunod na aktibidad.

Aktibidad 1. Pagsunod sa mga batas ng Diyos

• Ano ang ilan sa mga batas sa inyong komunidad?

• Ano ang magiging bunga ng patuloy na pagsunod o hindi pagsunod sa mga batas na iyon?

• Paano natutulad o naiiba ang paghahambing na ito sa mga batas ng Diyos?

Sinunod ni Nephi at ng kanyang mga tagasunod ang mga kautusan ng Panginoon (tingnan sa 2 Nephi 5:10). Basahin ang doctrinal mastery passage na Mosias 2:41 at alamin ang nais ni Haring Benjamin na maunawaan ng kanyang mga tao tungkol sa pagsunod sa mga kautusan ng Diyos. Maaari mong i-cross-reference ang talatang ito sa 2 Nephi 5:10.

icon, isulat

1. Sagutin ang mga sumusunod na tanong:

• Sa iyong palagay, paano nakatutulong sa atin ang pagsunod sa mga batas ng Diyos upang maging maligaya tayo?

• Paano nagpakita ng pagsunod si Jesucristo?

• Ano ang ilan sa mga kautusan ng Diyos na nagdulot sa iyo ng higit na kaligayahan?

Aktibidad 2. Pagtatrabaho at pag-asa sa sariling kakayahan

Sa isang papel o sa iyong study journal, gumawa sandali ng listahan ng mga sasabihin mo na mga pakinabang ng pagtatrabaho at pagsisikap.

Basahin ang 2 Nephi 5:11, 15, 17 at tukuyin ang iba’t ibang trabahong ginawa ng mga Nephita at ang mga resulta ng kanilang mga pagpapagal.

• Ano ang nalaman mo?

Basahin ang “Pagtatrabaho at Pag-asa sa Sariling Kakayahan” sa buklet na Para sa Lakas ng mga Kabataan (2011) upang malaman kung ano ang matututuhan mo tungkol sa alituntunin ng pagtatrabaho.

icon, isulat

2. Sagutin ang mga sumusunod na tanong:

• Ano ang mga karagdagang pakinabang ng pagtatrabaho na nakita mo? (Maaari mong idagdag ang mga ito sa iyong listahan.)

• Alin sa mga pakinabang na ito ang naranasan mo?

• Paano makatutulong sa isang tao ang pagtatrabaho upang maging higit na katulad siya ni Jesucristo?

Aktibidad 3. Ang templo

buhay-pamilya

• Ano ang naiisip o nadarama mo tungkol sa mga templo?

Basahin ang 2 Nephi 5:16 at tingnan kung ano ang matututuhan mo tungkol sa templo ng mga Nephita.

• Sa iyong palagay, bakit napakatindi ng pagsisikap ni Nephi at ng kanyang mga tao na itayo ang templo?

• Sa iyong palagay, bakit iniutos at patuloy na iniuutos ng Panginoon sa Kanyang mga tao na magsakripisyo para sa pagtatayo ng mga templo?

Sinabi ni Pangulong Russell M. Nelson ang sumusunod tungkol sa layunin at mga pagpapala ng mga templo. Maaari mong panoorin ang video na “Ang Templo at ang Inyong Espirituwal na Pundasyon” mula sa time code na 4:27 to 5:55 o basahin ang pahayag sa ibaba:

Pangulong Russell M. Nelson

Ang templo ang sentro sa pagpapalakas ng ating pananampalataya at espirituwal na katatagan dahil ang Tagapagligtas at ang Kanyang doktrina ang pinakasentro ng templo. Ang lahat ng bagay na itinuturo sa templo, sa pamamagitan ng mga tagubilin at ng Espiritu, ay nakadaragdag sa nauunawaan natin tungkol kay Jesucristo. Ang Kanyang mahahalagang ordenansa ang nagbibigkis sa atin sa Kanya sa pamamagitan ng mga sagradong tipan ng priesthood. Pagkatapos, kapag tinupad natin ang ating mga tipan, pagkakalooban Niya tayo ng Kanyang nagpapagaling at nagpapalakas na kapangyarihan. At, talagang kakailanganin natin ang Kanyang kapangyarihan sa mga darating na araw.

Ipinangako sa atin na “kung [tayo] ay handa [tayo] ay hindi matatakot.” Ang pangakong ito ay may matinding implikasyon ngayon. Ipinahayag ng Panginoon na sa kabila ng mahihirap na hamon sa buhay ngayon, ang mga nagtayo ng kanilang pundasyon kay Jesucristo, at natutuhan kung paano gamitin ang Kanyang kapangyarihan, ay hindi kailangang sumuko sa mga hindi pangkaraniwang problema ng panahon ngayon. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 93–94)

icon, isulat

3. Sagutin ang mga sumusunod na tanong:

• Ano ang tumimo sa iyo mula sa pahayag ni Pangulong Nelson?

• Paano makatutulong sa iyo ang pagpunta sa templo upang mas maitayo ang iyong saligan kay Jesucristo? Maaari kang magbahagi ng karanasan kung may maiisip ka.

• Paano nagdulot ng mas malaking kaligayahan ang templo sa iyo o sa kakilala mo?

Opsiyonal: Gusto Mo Bang May Matutuhan Pa?

Ano pa ang maaari nating gawin upang maanyayahan ang kaligayahan sa ating buhay?

Itinuro ni Elder Claudio R. M. Costa ng Pitumpu:

Elder Claudio R. M. Costa

Nalaman natin na ang kaligayahan ay nasa paggawa ng maliliit na bagay na nagpapaunlad sa atin, na nagpapaibayo ng ating pananampalataya at patotoo. Maliliit na bagay na ginagawa natin sa ating pang-araw-araw na buhay, gaya ng:

Masaya tayo kapag nagdarasal tayo tuwing umaga at gabi, kapag nadarama natin na naririnig tayo ng Panginoon at laging handang magpala, magpatawad at tumulong sa atin. Masaya tayo kapag nadarama natin ang mga panghihikayat ng Espiritu Santo sa ating buhay—kapag nadarama natin ang Espiritu kapag kailangan nating gumawa ng mahahalagang desisyon sa buhay. … Sa madaling salita, naliligayahan tayo araw-araw sa ating buhay sa maliliit na bagay na ginagawa natin, at ganap tayong liligaya habang sinusunod natin ang mga kautusan ng mapagmahal na Diyos na nangangalaga sa atin. (Claudio R. M. Costa, “Tuwa at Kaligayahan,” Liahona, Nob. 2002, 92–93)

2 Nephi 5:20–21. Ano ang sumpang sumapit sa mga Lamanita?

Noong panahon ni Nephi, ang sumpa sa mga Lamanita ay sila ay “itatakwil mula sa harapan [ng Panginoon] … dahil sa kanilang kasamaan” (2 Nephi 5:20–21). Ibig sabihin, ang Espiritu ng Panginoon ay inalis sa kanilang buhay. Nang tanggapin kalaunan ng mga Lamanita ang ebanghelyo ni Jesucristo, “ang sumpa ng Diyos ay hindi na sila sinundan pa” (Alma 23:18).

Nakasaad din sa Aklat ni Mormon na ang tanda ng maitim na balat ay dumating sa mga Lamanita matapos humiwalay sa kanila ang mga Nephita. Ang katangian at anyo ng tanda na ito ay hindi lubusang nauunawaan. Noong una, dahil sa tanda ay nakilala ang mga Lamanita mula sa mga Nephita. Kalaunan, nang ang mga Nephita at Lamanita ay kapwa dumanas ng mga panahon ng kasamaan at kabutihan, ang tanda ay hindi na naging indikasyon ng katayuan ng mga Lamanita sa harapan ng Diyos.

Pinagtitibay ng mga propeta sa ating panahon na ang maitim na balat ay hindi tanda ng hindi pagkagusto o sumpa ng langit. Tinatanggap ng Simbahan ang turo ni Nephi na ang Panginoon ay “wala[ng] tinatanggihan sa mga lumalapit sa kanya; maitim at maputi, alipin at malaya, lalaki at babae” (2 Nephi 26:33). Ipinahayag ni Pangulong Russell M. Nelson:

“Binigyang-diin ng Panginoon ang Kanyang mahalagang doktrina ng pantay na pagkakataon para sa Kanyang mga anak. …

“… Ang mga pagkakaiba sa kultura, wika, kasarian, lahi, at nasyonalidad ay nawawalan ng kabuluhan sa pagpasok ng matatapat sa landas ng tipan at sa paglapit sa ating pinakamamahal na Manunubos” (“President Nelson Remarks at Worldwide Priesthood Celebration,” Hunyo 1, 2018, newsroom.ChurchofJesusChrist.org).

“Tinitiyak ko sa inyo na ang katayuan sa harap ng Diyos ay hindi batay sa kulay ng inyong balat. Ang pagsang-ayon o hindi pagsang-ayon ng Diyos ay nakasalalay sa inyong katapatan sa Diyos at sa Kanyang mga kautusan at hindi sa kulay ng inyong balat” (“Hayaang Manaig ang Diyos,” Liahona, Nob. 2020, 94).