2 Нифай 9:50–52

“Израилын Ариун Нэгэнд ир”

Та ямар нэг зүйлээс маш их аз жаргал хүлээгээд, дараа нь урам хугарч байсан уу? Иаков байнгын сэтгэл ханамж авчрахгүй зүйлд цаг хугацаа, мөнгө үрэхээс зайлсхийхийг номлолынхоо төгсгөлд нифайчуудад зөвлөжээ. Тэрээр тэднийг Есүс Христэд ирж, сайн мэдээний адислалуудыг хүлээн авахыг урьсан. Энэ хичээл зөвхөн Есүс Христийн өгч чадах адислал, сэтгэл ханамжийг эрэлхийлэх илүү их хүслээ мэдрэхэд тань туслах зорилготой.

Боломжит суралцах үйл ажиллагаа

Өл, цангаагаа дарах

Амьдралдаа маш их өлсөж, цангаж байсан үеийнхээ тухай бод.

• Ийм нөхцөл байдалд ямар хоол, унд хамгийн тустай, хамгийн сэтгэл ханамжтай болгодог вэ? Ямар хоол, унд огт тусгүй байдаг вэ? Яагаад?

Бидний биеийн адилаар сүнсэнд ч мөн тэжээл, ханамж хэрэгтэй байдгийг та магадгүй анзаарсан байх.

• Сүнсээ байнгын тэжээл, ханамжаар хангаж чадах зарим арга зам юу вэ?

• Ямар зүйл хүмүүст сэтгэл ханамж авахын тулд хандсан ч сүнслэг байдлын хувьд хоосон мэдрэмж төрүүлэх вэ?

• Яагаад хүмүүс заримдаа мөнхийн сэтгэл ханамжийг өгдөггүй зүйлс рүү ханддаг гэж та бодож байна вэ?

Доорх асуултууд таны амьдралд хэрхэн хамаарах талаар бод.

• Хүслээ хангахгүйгээр аз жаргал, сэтгэл ханамж авахаар ханддаг зүйлс танд бий юү? Амьдралдаа байнгын амар амгалан, аз жаргал мэдрэхэд танд юу тусалсан бэ?

• Та өнөөдөр судлах явцдаа зөвхөн Есүс Христийн санал болгож чадах адислал, сэтгэл ханамжийг мэдрэхэд тань туслах үнэнийг хай.

“Үл мөхөх зүйлс дээр найрла”

Иаков өөрийн хүмүүст нүгэлт үйлдлийг нь сэрэмжлүүлснийг 2 Нифай 9:27–49-өөс судалснаа сана. Иаков сэрэмжлүүлгээ чухал уриалгаар дуусгадаг.

2 Нифай 9:50–52-оос Иаковын уриалгыг олж унш.

• Эдгээр шүлгээс ямар үг, хэллэг та бүхэнд чухал санагдсан бэ? Яагаад?

• Эдгээр шүлэг танд Есүс Христийн бидний төлөө хүсдэг зүйлийн талаар ойлгоход хэрхэн тусалж байна вэ? Эдгээр нь Түүний бидэнд санал болгосон зүйлийн тухай юу заасан бэ?

Эдгээр шүлгээс бид Есүс Христэд ирэхэд бидний сүнс хангалуун болно гэсэн үнэнийг мэдэж авч чадна.

Ойлголтоо гүнзгийрүүлэхийн тулд холбогдох эшлэлийг ашигла

Судалж буй сэдэвтэйгээ холбоотой судрын хэсгүүдийг олж судлах нь судрын агуулгын талаарх ойлголт, талархлаа гүнзгийрүүлэхэд тустай арга байж болох юм.

2 Нифай 9:50–52 дахь сургаалтай холбоотой холбогдох эшлэл олох замаар тус ур чадварыг давт.

Судлах тэмдэглэлдээ дараахтай төстэй бүдүүвч зураг зурж болох бөгөөд 2 Нифай 9:50–52-ыг голын тойрогт бич. Хожим санахыг хүссэн судраа олбол үүнийгээ бусад тойрог дотор бич.

Холбогдох эшлэл олох анхны алхам тань зүүлт тайлбарт дурдсан сэдэв, судрын эшлэлийг үзэх юм. Дараа нь 2 Нифай 9:50–52-оос түлхүүр үгийг олж тогтоон, Судруудын удирдамж-аас хайлт хий.

Хайлт хийж болох зарим үг, хэллэг: ирэх; амийн ус; хангалуун байх; сонсох; найрлах; залбирал; талархал; баясах.

1. Дараахыг хийж гүйцэтгэ.

   • Таны олсон наад захын хоёр холбогдох эшлэл юу байсан бэ?

   • Эдгээр холбогдох эшлэл 2 Нифай 9:50–52 дахь сургаалын ойлголтыг тань хэрхэн гүнзгийрүүлсэн бэ?

Сурч мэдсэн зүйлээ амьдралд хэрэгжүүлэх

Есүс Христийн тухай өнөөдөр олж мэдсэн зүйлсээ мөн эдгээр сургаал таны одоогийн нөхцөл байдлыг хэрхэн адислах тухай бод.

2. Суралцсан зүйлээ сайтар ойлгохын тулд дараах асуултуудын дор хаяж хоёрт нь хариул.

   • Өнөөдөр Есүс Христийн талаар судалж, мэдэрсэн ямар зүйлийг хойшид санахыг та хүсэж байна вэ?

   • Есүс Христийг дагахыг сонгосон нь таны сүнсийг хэрхэн байнгын сэтгэл ханамжтай байлгах вэ?

   • Есүс Христээр дамжуулан амьдралдаа байнгын сэтгэл ханамжийг олохын тулд та ямар тодорхой сонголт хийж болох вэ?

Нэмэлт: Илүү ихийг судлахыг хүсэж байна уу?

2 Нифай 9:50–51. Иаков ирээд “мөнгө төлөлгүйгээр үнэгүй” худалдаж ав гэж хэлсэн нь ямар утгатай вэ?

Бүх хүн санхүүгийн байдлаас эсвэл дэлхийн аливаа бусад шалгуураас үл хамааран Есүс Христийн адислалын саналыг хүлээн авч чадна. Эдгээр адислал нь биет мөнгө шаардахгүй боловч үүнийг хүлээн авахын тулд бид зарим зүйлийг хийх ёстой. Израилын цугларалтын талаар хаанаас илүү ихийг сурч мэдэж болох вэ?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Биднээс хүнд хэцүү зүйлийг, бүр зүрх сэтгэлийн маань хүсэл эрмэлзэлд харшлах зүйлсийг ч гэсэн хүсэх үед Христийн үйл хэрэгт бидний амласан чин үнэнч байдал нь өөрсдийнхөө амьдралыг дээд зэргээр зориулах явдал гэдгийг санаарай. Хэдий Исаиа бидэнд үүнийг “мөнгөгүй, үнэгүйгээр” хүртээмжтэй хэмээн баталдаг ч [Исаиа 55:1], энэ үнэхээр тийм ч гэлээ, Т.С.Элиотын хэлсэн шүлгийн мөрийг ашиглан хэлбэл, бид үүнийг авахын тулд “бүхнээс багагүй” зарлага гаргахдаа бэлтгэлтэй байх ёстой [Т.С.Элиот: Шүлгийн түүвэр дэх “Бяцхан Гиддинг”, 1909–1962 (1963), 209]. (Жэффри Р.Холланд, “Хамгийн агуу хөрөнгө,” 2021 оны 10-р сарын Ерөнхий чуулган)

Тэргүүн Зөвлөлийн ерөнхийлөгч Марион Ж.Ромни (1897–1988) ийн заасан.

Дэлхийн амьдрал дуусаж, бүх зүйл жинхэнэ утгаараа харагдах үед бид сайн мэдээний үр жимс нь амьдралын бүхий л хүчин чармайлтад дүйцэх цорын ганц зорилго хэмээн Их Эзэний мөн Түүний бошиглогчдын бидэнд дахин дахин хэлснийг илүү тодорхой харж, ойлгох болно. Тэднийг эзэмшигч нь жинхэнэ баялаг буюу Их Эзэний үзэлд үнэ цэн бүхий баялгийг олж авна. (Marion G. Romney, in Conference Report, Oct. 1949, 39)

Есүс Христийн бидэнд санал болгосон зүйл нь дэлхийн таашаалаас юугаараа ялгаатай вэ?

Арван хоёр төлөөлөгчийн чуулгын ахлагч Үлиссэс Соарэс ийн заасан.

Газар сайгүй хүмүүс ямар нэгэн зүйлийг эрж хайж байдаг. Үнэндээ тэдний хувьд хайж буй зүйл нь аз жаргал юм. Үнэний хувьд, “тэд үүнийг хаанаас олохыг мэддэггүйн улмаас” (Сургаал ба Гэрээ 123:12) олон хүн аз жаргалгүй байдаг.

Тэд жинхэнэ бөгөөд үүрдийн аз жаргалыг хаанаас олохоо мэдэхгүй тул түр зуурын таашаал өгөх зүйлсээс буюу эд зүйлс худалдан авах, зүй бус зан байдлаар зохисгүй үйлдэл хийн, дэлхийнхнээс нэр төр, сайшаал магтаал эрэлхийлэх эсвэл бие махбодын гоо үзэсгэлэн, дур булаам байдалд анхаарах гэх мэтээс аз жаргалыг эрэлхийлдэг.

Ихэнх тохиолдолд таашаалыг аз жаргалтай андуурдаг. Хүмүүс хэр зэрэг түр зуурын таашаал эрэлхийлнэ, тэр хэрээр илүү аз жаргалгүй болдог мэт санагддаг. Зугаа цэнгэл нь ихэвчлэн богино хугацаанд үргэлжилдэг. (Ulisses Soares, “Paths to True Happiness,” Ensign, Apr. 2018, 14)