Մոսիա 3.19

Հանել բնական մարդուն

Երբևէ հուսահատվե՞լ եք ձեր սխալներից կամ Աստծո բոլոր պատվիրանները պահելու անկարողությունից: Բենիամին թագավորը մեր անկատար էությունը նկարագրել է որպես «բնական մարդ»: Նա ուսուցանում էր, որ մենք կարող ենք հաղթել նրան Հիսուս Քրիստոսի Քավության միջոցով: Այս դասի նպատակն է օգնել ձեզ ստանալ Փրկչի օգնությունը՝ ձեր մեղսավոր էությունը հաղթելու համար:

Մեր մեղսավոր էությունը

Առաջին Նախագահությունից նախագահ Դալին Հ. Օուքսը հետևյալ պատմությունն է պատմել․

Մի իմաստուն չերոկի՝ Միացյալ Նահանգների բնիկ ցեղերից մեկի ներկայացուցիչը, իր թոռանը կյանքի մասին առակ էր պատմում: «Իմ ներսում սարսափելի պայքար է ընթանում երկու գայլերի միջև», ասում էր պապը: «Մեկը չարն է՝ լի բարկությամբ և նախանձով, ինքնախղճահարությամբ և վշտով, ագահությամբ և ստով։ Մյուսը բարին է՝ լի բարությամբ և կարեկցանքով, խոնարհությամբ և ճշմարտությամբ, սիրով և ուրախությամբ։ Այդ պայքարը տեղի է ունենում մեզանից յուրաքանչյուրի մեջ»։ «Ո՞ր գայլը կհաղթի», - հարցրեց թոռը (Դալլին Հ. Օուքս, «Ընտրություններ», Երիտասարդներին զորացնելու համար, սեպտեմբեր 2021, 13, պատմությունը հարմարեցվել է Շայնե Մ. Բոուենի «Կամքի ազատություն և պատասխանատվություն» ելույթից, New Era, սեպտեմբեր 2012, 8):

• Եթե պապիկի տեղում լինեիք, ինչպե՞ս կպատասխանեիք ձեր թոռնիկի հարցին:

• Ինչպե՞ս եք ձեր մեջ նկատել «երկու գայլերի» միջև այս պայքարը:

Նախագահ Օուքսի պատմության մեջ թոռան հարցին, թե որ գայլը կհաղթի, պապիկը պատասխանել է այսպես. «Նա, որին սնում ես»:

Որպես նեփիացիներին ուղղված վերջին ուղերձ՝ Բենիամին թագավորն ուսուցանում էր ճշմարտություններ, որոնք նրան էր բացահայտել հրեշտակը մեր մեղսագործ էության մասին, և այն մասին, թե դա ինչպես է ազդում Աստծո հետ մեր հարաբերությունների վրա:

Կարդացեք Մոսիա 3.19 հատվածը և փնտրեք, թե ինչպես էր Բենիամին թագավորը նկարագրում այն մարդուն, որը պատմության մեջ պատկերված առաջին գայլի նման հատկանիշներ ունի:

Մոսիա 3.19 հատվածը վարդապետության սերտման հատված է:  Վարդապետության սերտման հատվածները կարող եք նշել աչքի ընկնող ձևով, որպեսզի հեշտ գտնեք դրանք: Հաջորդ դասին դուք հնարավորություն կունենաք որևէ հարցի կամ իրավիճակի համար կիրառել այդ հատվածում ուսուցանված վարդապետությունը:

• Ի՞նչ բացահայտեցիք:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Բենիամին թագավորի նկարագրած բնական մարդը յուրաքանչյուրիս մեջ ինչ-որ չափով կենդանի է և առողջ: Բնական տղամարդը կամ կինը ապաշխարող չէ, մարմնական և զգայական է, բավականություններով տարվող և շվայտ, հպարտ է ու եսասեր (Դեյվիդ Ա. Բեդնար, «Մենք հավատում ենք մաքրաբարո լինելուն», Լիահոնա, մայիս 2013, 42):

• Ըստ ձեզ՝ բնական մարդն ինչո՞ւ է Աստծո թշնամի:

• Ի՞նչ կարող է նշանակել մեր բոլորի ներսում «սնել» բնական տղամարդուն կամ կնոջը:

Մտածեք, թե ձեր կյանքում ինչպես եք նկատում բնական տղամարդու կամ կնոջ մոտեցումները կամ վարքագծերը: Ուսումնասիրությունը շարունակելիս փնտրեք ուսմունքներ, որոնք կարող են օգնել ձեզ այդ մոտեցումներն ու վարքագծերը հաղթահարելու ձեր ջանքերում:

Հաղթել բնական մարդուն

Կրկին կարդացեք Մոսիա 3.19 հատվածը՝ այս անգամ փնտրելով, թե ինչ էր ուսուցանել Բենիամին թագավորը բնական մարդուն հաղթելու ձևերի մասին:

• Ի՞նչ սովորեցիք այս հատվածից, որը կարող է օգնել ձեզ հաղթել բնական մարդուն:

Մոսիա 3.19 հատվածից սովորում ենք, որ ենթարկվելով Սուրբ Հոգու հորդորներին՝ մենք կարող ենք հաղթել բնական մարդուն և դառնալ սրբեր Հիսուս Քրիստոսի Քավության միջոցով:

1. Պատասխանեք հետևյալ հարցերին.

   • Ըստ ձեզ՝ Հիսուս Քրիստոսն ինչպե՞ս կարող է օգնել մեզ Իր Քավությամբ հանել բնական մարդուն և դառնալ սուրբ:

   • Ըստ ձեզ՝ ի՞նչ է նշանակում ենթարկվել Սուրբ Հոգու հորդորներին: Ըստ ձեզ՝ այդպես վարվելն ինչպե՞ս կարող է օգնել ձեզ հաղթել բնական մարդուն:

Օգտագործեք խաչաձև հղումներ՝ ձեր ընկալումը խորացնելու համար

Խաչաձև հղումների օգտագործումը սուրբ գրությունների ուսումնասիրության հմտություն է, որը կարող է օգնել խորացնել ձեր ընկալումը սուրբ գրությունների տվյալ հատվածի վերաբերյալ: Կիրառեք հմտությունը՝ գտնելով խաչաձև հղումներ, որոնք խորացնում են Մոսիա 3.19 հատվածի ուսմունքների մասին ձեր ընկալումը:

Խաչաձև հղումները կարող եք գտնել՝ որոնելով «բնական մարդ» արտահայտությունը կամ Մոսիա 3.19 հատվածից այլ հիմնաբառեր Gospel Library հավելվածում: Կարող եք փնտրել նաև Մոսիա 3.19 հատվածի էջատակի ծանոթագրություններում նշված սուրբ գրությունների հղումներից կամ թեմաներից մի քանիսը:

Սուրբ գրությունների ստորև ներկայացվող հատվածներից մի քանիսը կամ բոլորը ուսումնասիրելու մեկ այլ տարբերակ.

• Գաղատացիս 5.16–17

• Մոսիա 27.25–26

• Ալմա 22.13–14

• Եթեր 12.27

• Վարդապետություն և Ուխտեր 11.12–13

2. Պատասխանեք հետևյալ հարցերին.

   • Այս վարժության համար առնվազն ի՞նչ երկու խաչաձև հղում եք օգտագործել:

   • Այդ խաչաձև հղումներն ինչպե՞ս են ընդլայնել Մոսիա 3.19 հատվածի ուսմունքների մասին ձեր ընկալումը կամ գնահատանքը:

   • Ի՞նչ սովորեցիք այն մասին, թե ինչպես կարող է Փրկիչն օգնել մեզ հաղթել բնական մարդուն և դառնալ սուրբ:

Կիրառեք այն ձեր կյանքում

3. Կատարեք հետևյալը․

   Այժմ, երբ ավելին իմացաք, թե ինչ է նշանակում Փրկչի Քավությամբ հանել բնական մարդուն և դառնալ սուրբ, մտածեք, թե ինչպես կարող եք կիրառել այս ուսմունքները ձեր կյանքում: Ի՞նչ եք ոգեշնչված անել կամ դադարել անել: Ձեր մտքերն ու տպավորությունները գրանցեք ձեր օրագրում:

Ընտրովի. ցանկանո՞ւմ եք ավելին իմանալ

Ինձ համար ինչո՞ւ է կարևոր ձգտել հանել բնական մարդուն:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Այսպիսով, մահկանացու կյանքի փորձության ճշգրիտ բնույթը կարելի է ամփոփել հետևյալ հարցի մեջ․ արդյո՞ք ես կարձագանքեմ բնական մարդու հակումներին, թե կենթարկվեմ Սուրբ Հոգու հորդորներին և կհանեմ բնական մարդուն ու կդառնամ սուրբ՝ Տեր Քրիստոսի Քավությամբ (տես Մոսիա 3.19): Դա փորձություն է: Բնական մարդու ամեն ախորժակ, ցանկություն, հակում և մղում կարելի է հաղթահարել Հիսուս Քրիստոսի Քավության շնորհիվ և դրա միջոցով։ Մենք այստեղ ենք՝ երկրի վրա, որպեսզի զարգացնենք աստվածանման հատկանիշներ և սանձենք մարմնական բոլոր կրքերը: (Դեյվիդ Ա. Բեդնար, «Մենք հավատում ենք մաքրաբարո լինելուն», Լիահոնա, մայիս 2013, 43):

Իսկ եթե ես հուսահատությո՞ւն եմ զգում, որ բնական մարդուն հաղթելու իմ ջանքերն անօգուտ են:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Միայն [սատանան] կասեր. «Չես կարող փոխվել: Դու չես փոխվի: Փոխվելը չափազանց երկարատև ու չափազանց դժվար է: Կանգ առ: Հանձնվիր: Մի՛ ապաշխարիր: Դու այնպիսին ես, ինչպիսին կաս»: Դա, ընկերս, հուսահատությունից ծնված սուտ է: Մի՛ ընկիր այդ ծուղակը (Ջեֆրի Ռ. Հոլլանդ, «Ինչպես փոխվել», Լիահոնա, փետրվար 2017, 60):

Կիրակնօրյա Դպրոցի գերագույն նախագահությունից եղբայր Բրեդլի Ռ. Վիլկոքսն ուսուցանել է.

Աստված մեզ սիրում է, ինչպիսին որ կանք, բայց նաև չափազանց շատ է սիրում մեզ, որպեսզի թողնի մեզ այսպիսին մնալ: Մահկանացու կյանքի նպատակը զարգանալն է ու Տիրոջը նմանվելը: Քրիստոսի քավության նպատակը փոփոխությունն է: Քրիստոսը կարող է ոչ միայն հարություն տալ, մաքրել, մխիթարել և բժշկել մեզ, այլև այդ ամենի միջոցով փոխակերպել մեզ, որ ավելի շատ նմանվենք Իրեն (Բրեդլի Ռ. Վիլկոքս, «Արժանավորությունը չի ենթադրում անթերիություն», Լիահոնա, նոյեմբեր 2021, 61):