Mosias 5:1–5

Wala nang Hangarin pang Gumawa ng Masama

Kung minsan, maaaring madama natin na kailangan nating gumawa ng mga pagbabago o pagbutihin ang isang bagay na ginagawa natin. Ganito ang nadama ng mga tao ni Haring Benjamin matapos makinig sa mga sinabi niya tungkol kay Jesucristo at kung saan Niya tayo inililigtas. Ang lesson na ito ay makatutulong sa iyo na madagdagan ang iyong hangaring magbago o patuloy na magbago sa tulong ng Panginoon.

Pagiging katulad ni Jesucristo

Tingnan ang mga sumusunod na bagay at pag-isipan kung paano nagbabago ang isang bagay at nagiging iba.

• Ano ang nagpabago sa mga bagay na ito?

• Ano ang mga dahilan ng pagbabago ng mga tao?

• Paano natutulad o naiiba ang pagbabago ng Panginoon sa ating puso sa pagbabago ng mga bagay na ito?

Isipin kung gaano mo nadarama na angkop sa iyo ang sumusunod na pahayag:

• Gusto kong tulungan ako ng Panginoon na magbago para maging mas mabuti.

Maglaan ng isa o dalawang minuto upang pag-isipan kung bakit ganoon ang nadarama mo. Maaaring kabilang dito ang pag-iisip ng mga paraan kung paano ka natulungan ng Panginoon noon.

Habang pinag-aaralan mo ang Mosias 5, alamin ang mga dahilan kung bakit gusto mong humingi ng tulong sa Panginoon para sa pagbabago at pagpapakabuti.

Pagkakaroon ng pagbabago ng puso

Matapos magsalita si Haring Benjamin sa kanyang mga tao, gusto niyang malaman kung sila ay “naniwala sa mga salitang kanyang sinabi sa kanila” (Mosias 5:1).

Basahin ang Mosias 5:1–5 upang malaman kung paano sila tumugon. Maaari mo ring panoorin ang video na “Nakipagtipan ang mga Tao ni Haring Benjamin” mula sa time code na 0:00 hanggang 1:37, na matatagpuan sa ChurchofJesusChrist.org.

Kumpletuhin ang sumusunod na chart batay sa natutuhan mo.

Paano nagbago ang mga tao	Ano ang dahilan ng pagbabago ng mga tao
Paano nagbago ang mga tao	Ano ang dahilan ng pagbabago ng mga tao

Batay sa Mosias 5:1–5, kumpletuhin ang sumusunod na parirala.

Kapag nagbago ang ating puso sa pamamagitan ng Espiritu ng Panginoon, tayo ay …

Maaaring makatulong na itala ang katotohanan o mga katotohanang natukoy mo sa iyong mga banal na kasulatan.

Mahalagang maunawaan na bagama’t ang mga tao ni Haring Benjamin ay “wala nang hangarin [o pagnanais] pang gumawa ng masama” (Mosias 5:2), hindi ibig sabihin nito na hindi na sila muling nagkasala. Sa halip, binago ng Panginoon ang kanilang puso upang taos-pusong maghangad na gumawa ng mabuti at iwasan ang kasalanan.

1. Sagutin ang kahit dalawa sa mga sumusunod na tanong.

   • Tulad ng mga tao ni Haring Benjamin, kailan ka nagkaroon ng matinding hangaring “patuloy na gumawa ng mabuti”? Ano ang nakatulong upang madama mo ang ganito?

   • Sa iyong palagay, bakit laging hindi ganito ang nadarama ng marami sa atin?

   • Ano sa palagay mo ang magagawa ng isang tao upang madama nang mas madalas ang ganito?

Unawain ang pagbabago

Maaari mong markahan sa Mosias 5:3 ang pariralang “sa pamamagitan ng walang hanggang kabutihan ng Diyos.” Upang tunay na maunawaan ang pagbabagong nangyari sa mga tao ni Haring Benjamin, kailangan nating maunawaan kung paano tayo matutulungan ni Jesucristo na magbago.

Ipinaliwanag ni Sister Wendy W. Nelson:

Ang Tagapagligtas ang tanging tunay at buhay na tagapagdala ng pagbabago. Siya ang pinagmumulan ng lahat ng pagbabago. … Ilalabas Niya ang pinakamagandang katangian ninyo, kapag bumaling kayo sa Kanya. Tunay ngang sasagipin Niya ang lahat ng pinakamagandang katangian ninyo na nasa kaibuturan ng inyong pagkatao. …

… Mahal Niya kayo. Mahal Niya ang inyong mga pagsisikap na magbago.

Nais Niya na magbago kayo, sa paglipas ng panahon, lubusang iwinawaksi ang likas na tao, magkaroon ng pagbabago ng puso, ng pagbabago ng pagkatao. Si Jesus ang Cristo ay ginawa ang lahat ng ginawa Niya upang makapagbago kayo! Siya ang Tagapagligtas ninyo at Tagapagligtas ko!

At habang masigasig tayong nagsusumamo upang magamit sa ating buhay ang kapangyarihan ng Kanyang walang-hanggan at nagbabayad-salang sakripisyo, ang Kanyang huling pagpapagaling ay magdudulot sa bawat isa sa atin ng pinakadakilang pagbabagong hinahangad natin. (Wendy W. Nelson, “Change: It’s Always a Possibility!” [Brigham Young University devotional, Abril 7, 1998], 10, speeches.byu.edu)

2. Sagutin ang mga sumusunod na tanong:

   • Ayon kay Sister Nelson, ano ang magagawa ni Jesucristo upang matulungan tayong magbago?

   • Ano ang natutuhan mo tungkol sa iyong responsibilidad na magbago?

Isipin ang isang taong kilala mo na nagbago sa tulong ni Jesucristo. ChurchofJesusChrist.org

• Paano tinulungan ng Panginoon ang taong ito?

• Anong mga pagsisikap ang ginawa ng taong ito upang magbago?

• Sa inyong palagay, bakit humahantong ang mga pagbabagong ito sa mas malaking kagalakan?

Gawing permanente ang pagbabago

Upang tapusin ang iyong pag-aaral, isipin ang iyong buhay at ang iyong kasalukuyang pagsulong tungo sa pagiging katulad ng Ama sa Langit at ni Jesucristo. Pag-isipan ang nadarama mong ipagagawa sa iyo ng Espiritu Santo dahil sa natutuhan at nadama mo.

Opsiyonal: Gusto Mo Bang May Matutuhan Pa?

Ang pagbabago ba ng puso at hangarin ay nangyayari kaagad o nangangailangan ng panahon?

Ipinahayag ni Brother Bradley R. Wilcox ng Young Men General Presidency:

Ang pagtalikod sa kasalanan at maabot ang puntong “wala nang hangarin pang gumawa ng masama kundi ang patuloy na gumawa ng mabuti” [Mosias 5:2] ay habambuhay na pagsusumikapan.

Ang buhay ay tulad ng isang paglalakbay sa isang malayong lugar. Hindi natin mararating ang ating patutunguhan gamit ang isang tanke lang ng gasolina. Kailangan nating punuin nang paulit-ulit ang tanke. Ang pagtanggap ng sacrament ay gaya ng pagtigil at pagpapagasolina sa mga gasolinahan. Habang tayo ay nagsisisi at nagpapanibago ng ating mga tipan, nangangako tayo na handa nating sundin ang mga kautusan, at ipagkakaloob sa atin ng Diyos at ni Cristo ang Banal na Espiritu. Sa madaling salita, tayo ay nangangakong magpapatuloy sa ating paglalakbay, at nangangako ang Diyos at si Cristo na pupunuin Nila ang tanke. (Bradley R. Wilcox, “Ang Pagiging Karapat-dapat ay Hindi Pagiging Walang Kamalian,” Liahona, Nob. 2021, 61–62)

Itinuro ni Sister Becky Craven ng Young Women General Presidency:

Hindi sinasabi sa mga banal na kasulatan na naging perpekto kaagad [ang mga tao ni Haring Benjamin]; sa halip, ang kanilang hangaring magbago ay naghikayat sa kanila na kumilos. Ang ibig sabihin ng pagbabago ng kanilang puso ay paghuhubad ng likas na tao at pagsunod sa Espiritu habang nagsisikap sila na maging higit na katulad ni Jesucristo. …

Kapag pinagsama ang ating pagsisikap at ang kakayahan ng Tagapagligtas na baguhin tayo, nagiging mga bagong nilikha tayo. (Becky Craven, “Panatilihin ang Pagbabago,” Liahona, Nob. 2020, 58)

Ano ang tungkuling ginagampanan ng Espiritu Santo sa pagtulong sa atin na magbago?

Ipinaliwanag ni Brother Brian K. Ashton, na noon ay nasa Sunday School General Presidency:

Ang proseso ng pagpapabanal ay hindi lang tayo nililinis, kundi binibigyan din tayo ng mga kailangang espirituwal na kaloob o banal na katangian ng Tagapagligtas at binabago ang likas nating pagkatao, upang tayo ay “wala nang hangarin pang gumawa ng masama” [Mosias 5:2]. Tuwing tinatanggap natin ang Espiritu Santo sa ating buhay sa pamamagitan ng pananampalataya, pagsisisi, mga ordenansa, paglilingkod na tulad ng kay Cristo, at iba pang mabubuting gawain, nagbabago tayo at unti-unting nagiging katulad ni Cristo. (Brian K. Ashton, “Ang Doktrina ni Cristo,” Liahona, Nob. 2016, 108)