Մոսիա 11-17

«Ապաշխարել և դառնալ դեպի Տերը»

Մենք սովորաբար փորձում ենք մեր սիրելի մարդկանց նախազգուշացնել այն որոշումների մասին, որոնք կարող են ցավ և տառապանք բերել: Տերն Աբինադիին ուղերձով ուղարկեց Նոյ թագավորի և նրա ժողովրդի մոտ, որպեսզի վերջիններս ապաշխարեն և խուսափեն տառապանքից, որը կարող էր գալ նրանց մեղսավոր արարքների հետևանքով: Այս դասը կօգնի ձեզ մեծացնել ուսանողների ցանկությունը՝ ընդունելու Տիրոջ մարգարեներին և գործելու նրանց կողմից փոխանցված Տիրոջ հրավերների համաձայն:

Տերը նախազգուշացնում է վտանգի մասին

Ենթադրենք՝ հենց նոր ձեզ տեղեկացրել են, որ ձեր ընկերներն ու հարազատները վտանգի մեջ են:

• Նախազգուշացնող ուղերձը նրանց հաղորդելու ի՞նչ տարբեր միջոցներ կան:

Տերը մեզ նախազգուշացնելու բազմաթիվ եղանակներ ունի: Մտածեք հետևյալ եղանակների շուրջ.

• Խորհուրդ ծնողներից

• Ուղղորդում մարգարեներից և Եկեղեցու այլ ղեկավարներից

• Սուրբ գրությունների, եկեղեցու կամ սեմինարիայի ուսմունքներ

• Մտքեր կամ զգացողություններ Սուրբ Հոգուց

• Այլ եղանակներ

Մտածեք, թե որքանով եք կարողանում խուսափել մեղքից և վտանգից՝ ելնելով նրանից, թե ինչպես եք որոշում արձագանքել Տիրոջ նախազգուշացումներին:

• Ո՞ր եղանակներն են առավել դժվար ընդունելի: Ինչո՞ւ։

• Ի՞նչ է ասում Տիրոջ մասին այն հանգամանքը, որ նա մեզ դիմում է տարբեր միջոցներով:

Այսօր ուսումնասիրության ընթացքում կենտրոնանալու եք հետևյալ ճշմարտության վրա. Տերը մեզ հետ խոսում է Իր մարգարեների միջոցով, որպեսզի հրավիրի մեզ ապաշխարել և դառնալ դեպի Իրեն:

Տերն ապաշխարության կոչ արեց Նոյին և նրա ժողովրդին

Հիշեք, որ Զենիֆը մի խումբ մարդկանց Զարահեմլայից դեպի Նեփիի երկիր առաջնորդեց: Նախքան մահանալը Զենիֆը թագավորությունը շնորհեց իր որդի Նոյին (տես Մոսիա 9–10): Նոյը և նրա ընտրած քահանաները ամբարիշտ կյանքով ապրեցին: Նրանք ստով և շողոքորթ խոսքերով մարդկանց ստիպեցին մեղանչել (տես Մոսիա 11.7, 11):

Կարդացեք Մոսիա 11.2, 14–15, 19 հատվածները և փնտրեք, թե Նոյը և իր ժողովուրդն ինչ մեղքեր գործեցին: (հատված 19-ում նկարագրվում է նրանց արձագանքը լամանացիների հարձակումից պաշտպանվելուց հետո:) Կարող եք դիտել նաև «Ալման պատմում է Նոյ թագավորի ամբարշտության մասին| Մոսիա 11–12, 17» տեսանյութը (2:26), որը հասանելի է այստեղ՝ ChurchofJesusChrist.org.

• Նոյի և նրա ժողովրդի ընտրություններն ինչպե՞ս են համեմատվում այսօրվա մարդկանց ընտրությունների հետ:

• Որո՞նք են նրանց ապրելակերպի մի քանի հնարավոր հետևանքները:

Տերը կանչեց Աբինադի անունով մի մարգարեի, որպեսզի նրա միջոցով Նոյին և նրա ժողովրդին ուղերձ ուղարկի՝ օգնելու նրանց տեսնել իրենց արարքների հետևանքները:

Աբինադիի ուղերձը կարդացեք Մոսիա 11.20–25 հատվածներում և փնտրեք այն հետևանքները, որոնց մասին նախազգուշացնում էր Տերը: Հատված 20-ում «վայ» բառը տխրություն կամ ցավ է փոխանցում:

• Ի՞նչ հետևանքներ գտաք, որոնց մասին Տերը նախազգուշացնում էր մարդկանց:

Ուշադրություն դարձրեք «եթե նրանք չապաշխարեն» և «եթե այս ժողովուրդը չապաշխարի» արտահայտություններին: Կարող եք նշել այս բառերը և մտածել, թե այս արտահայտություններից ինչ կարող եք սովորել Տիրոջ մասին:

Կարդացեք Մոսիա 11.26–29 հատվածները և փնտրեք, թե Նոյ թագավորն ու մյուսներն ինչպես արձագանքեցին Աբինադիին:

Տեսնենք ապաշխարությունը որպես Տիրոջ սիրո պարգև

Մտածեք տարբեր հրավերների մասին, որոնք Տերը մեր օրերում տվել է մեզ ապաշխարելու և փոխվելու համար: Կարող եք վերանայել Տիրոջ մարգարեի որևէ վերջին ելույթ և փնտրել, թե ինչ նախազգուշացումներ է նա տվել:

• Աբինադիի ժամանակաշրջանի մարդկանց արձագանքը և մեր օրերում մարդկանց արձագանքը մարգարեներին ի՞նչ նմանություններ կամ տարբերություններ ունեն: Նրանք ինչո՞ւ կարող էին այդպես արձագանքել:

Խորհեք, թե անձամբ ինչպես եք կատարում Աստծուն լսելու ձեր պարտականությունը, հատկապես, երբ Նա Իր մարգարեների միջոցով նախազգուշացնում է ձեզ մեղքի և դրա հետևանքների մասին:

Տասներկու Առաքյալների Քվորումից երեց Դ. Թոդ Քրիստոֆերսոնը բացատրել է, թե ինչպես կարող ենք դիտարկել մարգարեների միջոցով տրվող ապաշխարելու հրավերը:

Երկար տարիներ ինձ վրա մեծ տպավորություն է գործել և նաև զգացել եմ մարգարեների մեծ սերը, երբ նրանք նախազգուշացրել են մեղքի մասին։ Նրանք չեն ցանկանում դատապարտել։ Նրանց իրական ցանկությունն արտացոլում է Աստծո սերը. իրականում դա է Աստծո սերը: Նրանք սիրում են նրանց, ում մոտ իրենց ուղարկում են՝ ով և ինչպիսին էլ նրանք լինեն։ Ինչպես Տերը, Նրա ծառաները ևս չեն ցանկանում, որ որևէ մեկը տառապի մեղքի և սխալ ընտրությունների պատճառով (Դ. Թոդ Քրիստոֆերսոն, «Աստծո սերը», Լիահոնա, նոյեմբեր 2021թ., 17):

• Մարգարեների մասին այս ճշմարտության ըմբռնումը ինչպե՞ս կարող է ազդել նրանց հրավերներով գործելու ձեր ցանկության վրա:

Տերը գթասրտորեն ժամանակ տվեց ժողովրդին, որ դառնան դեպի Իրեն և ապաշխարեն իրենց մեղքերը: Սակայն, երբ Աբինադին երկու տարի անց վերադարձավ, նրանք կրկին բարկացած էին ու փորձում էին մեղադրել նրան (տես Մոսիա 12.1, 9, 19):

Աբինադին համարձակ վկայեց, որ քահանաները չէին սովորեցնում մարդկանց հնազանդվել Աստծու պատվիրաններին (տես Մոսիա 12.33–37, 13.12–25): Նա նաև վկայեց, որ Հիսուս Քրիստոսը գալու է փրկելու բոլոր մարդկանց, և որ փրկությունը միայն Փրկագնման միջոցով է հնարավոր (տես Մոսիա 15.1, 19): Երբ Աբինադին ավարտեց Հիսուս Քրիստոսի մասին վկայությունը, նրա կյանքը կրկին վտանգված էր: Բայց այս անգամ վտանգված էր նաև քահանաներից մեկի՝ Ալմայի կյանքը:

Կարդացեք Մոսիա 17.1–4 հատվածները և գտեք, թե Նոյն ու Ալման ինչպես պատասխանեցին Աբինադիի վկայությանը Քրիստոսի մասին:

1. Պատասխանեք հետևյալ հարցին.

   • Ի՞նչ կարող ենք հասկանալ այս ծայրահեղ տարբեր պատասխաններից:

Երեք օր բանտում անցկացնելուց հետո Աբինադիին կրկին բերեցին Նոյ թագավորի մոտ։ Նոյն ասաց, որ մահվան կդատապարտի Աբինադիին, եթե վերջինս պատրաստկամություն չցուցաբերի մերժելու իր ուսուցանած ճշմարտությունները (տես Մոսիա 17.5–8):

Կարդացեք Մոսիա 17.9–10, 13 հատվածները և փնտրեք Աբինադիի պատասխանը իր վկայությունը մերժելու թագավորի պահանջին: Կամ կարող եք դիտել «Աբինադին դատապարտվում է մահվան իր հավատքի համար | Մոսիա 16–17» տեսանյութը (4:28), որը հասանելի է այստեղ՝ ChurchofJesusChrist.org:

2. Պատասխանեք հետևյալ հարցերին.

   • Ի՞նչ եք սովորում Աբինադիի օրինակից:

   • Դա ինչպե՞ս կարող է ազդել Տիրոջ և Նրա մարգարեներին արձագանքելու ձեր մոտեցման վրա:

Ընտրովի. ցանկանո՞ւմ եք ավելին իմանալ

Մոսիա 11.20, 25: Աբինադիի ուղերձում նշված զգացողություններից ի՞նչ կարող ենք սովորել Տիրոջ մասին:

Վայ կամ տխրություն. Տերը նախազգուշացնում է մեղսավոր կյանքից եկող տխրության կամ ցավի մասին: Աստված ցանկանում է, որ երջանիկ լինենք (տես 2 Նեփի 2.25): Երբ մենք մեղանչում ենք, Նա ցանկանում է, որ խոնարհաբար ապաշխարենք և զղջանք մեր արարքների համար (տես 3 Նեփի 20.9):

Հնագույն ժամանակներում, երբ ինչ-որ մեկը «քրձով ու մոխրով» ապաշխարում էր, ցույց էր տալիս իր մեղքերի համար զգացած մեծ տխրությունը և խոնարհությունը: Մանրամասների համար կարող եք դիտել «Քուրձը» կարճ տեսանյութը (0:32), որը հասանելի է այստեղ՝ ChurchofJesusChrist.org.

Բարկություն. մենք գիտենք, որ Աստված «չի գրգռվում հեշտորեն, չարը չի մտածում» (Ա Կորնթացիս 13.5, Մորոնի 7.45) և «երկայնամիտ է եւ բազումողորմ» (Սաղմոս 145.8): Աստծո դեմ միտումնավոր ապստամբող և ամբարշտությունը, պղծությունն ու անառակությունը ընտրող մարդիկ բարկացնում են Աստծուն: Աստծո բարկությունը պատճառ չի դառնում, որ Նա կորցնի վերհսկողությունը: Նա պարզապես նախազգուշացնում է մարդկանց արարքների հետևանքների մասին և շարունակում է յուրաքանչյուրին հրավիրել ապաշխարելու:

Նախանձություն. նախանձ բառը կարող է թարգմանվել որպես «զգայուն և խորը զգացողություններ ունեցող» (Սուրբ գրքերի ուղեցույց, «Նախանձ, նախանձություն»): Այլ կերպ ասած՝ Աստված խորապես հոգ է տանում մեր մասին և հրավիրում է մեզ նույնպես լիովին հնազանդվել Իրեն:

Ո՞րն է մարգարեի դերը:

Մարգարեն այն «անձն է, որը կանչվել է Աստծո կողմից և խոսում է Նրա անունից» (Սուրբ գրքերի ուղեցույց, «Մարգարե»): Սուրբ գրքերի ուղեցույցում նայեք, թե ուրիշ ինչ է ասվում մարգարեների մասին: Կարող եք դիտել նաև ստորև ներկայացվող տեսանյութը, որում մի խումբ երեխաներ խոսում են նախագահ Ռասսել Մ. Նելսոնի և քույր Ջոյ Դ․ Ջոնսի հետ՝ Նյու Յորք նահանգի Պալմիրա շրջանում գտնվող Սմիթների ընտանիքի գերանաշեն տնակում։