Moзая 14–16

Их Эзэн Есүс Христээр гэтэлгэгдсэн нь

Хэдий хаан Ноа Абинадайг хорооход бэлэн байсан ч Абинадай Бурхан хүргүүлэх захиасыг нь хэлж дуусгахыг түүнд зөвшөөрнө гэдгийг мэдэж байв. Ноа ба түүний санваартнууд Есүс Христ бол бидний Гэтэлгэгч гэдгийг заахын тулд бүх бошиглогчийг Бурхан дууддаг гэсэн захиасыг сонсох хэрэгтэй байв. Энэ хичээл танд Есүс Христ биднийг нүгэл ба үхлээс гэтэлгэж чадах Цорын ганц нэгэн гэдгийг мэдэхийн ач холбогдлыг ойлгоход тусалж чадна.

Есүс Христийн нэр цол ба үүрэг

Бидний амьдралын тодорхой нэгэн үед Есүс Христийн нэр цол, үүрэг бүр нь бидний хувьд онцгой утга учиртай байж болно. Жишээлбэл: Зөвхөн Түүний тусалж чадах тусламж хэрэгтэй үед бид Есүс Христийг “Их Эзэн Бүхнийг Чадагч Бурхан” (Мозая 11:23) гэдэгтэй санал нийлдэг.

Есүс Христийн тухай бидэнд заадаг судруудаас Түүний нэр цолын жагсаалтыг гаргахад нэг минут зарцуул.

• Та Есүсийн олон нэр цолын алийг нь мэдэхэд илүү их тустай гэж бодож байна вэ? Яагаад?

Бидний Гэтэлгэгч Есүс Христ

Абинадайн хаан Ноад болон түүний санваартнуудад хүргэсэн захиас Есүс Христийн тухай байв. Тэр бид зөвхөн Есүс Христийн гэтэлгэлээр аврагдах боломжтой (Мозая 13:33; 16:15-ыг үзнэ үү) хэмээх үнэнийг заасан. Та Абинадайн үгийг судлах явцдаа Гэтэлгэгч Есүс Христийн үүргээс юу сурч мэдэж болохыг хайж ол.

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Есүс Христийг дүрсэлсэн нэр цолоос хамгийн чухал нь Гэтэлгэгч хэмээх нэр юм. … Гэтэлгэх гэдэг үг нь өр төлбөр буюу хүлээсэн үүргээ төлж барагдуулах гэсэн утгатай юм. Гэтэлгэх гэдэг нь бас аврах, өр төлбөрийг төлж чөлөөлөх гэсэн утгатай. Хэрэв хэн нэгэн алдаа гаргасныхаа дараа түүнийгээ залруулбал бид түүнийг өөрийгөө гэтэлгэлээ гэдэг. Эдгээр утга тус бүр нь Есүс Христийн Өөрийн Цагаатгалаар дамжуулан гүйцэлдүүлсэн агуу Гэтэлгэлийн янз бүрийн хэлбэрийг харуулж байна. Тэдгээрийн нэгийг толь бичигт “нүгэлтний төлөө золиос хийж, түүнийг нүглээс болон нүглийн шийтгэлээс чөлөөлөх” гэж тодорхойлжээ. (Д.Тодд Кристоффэрсон, “Гэтэлгэл” 2013 оны 4-р сарын Ерөнхий чуулган, 128).

• Та Есүс Христийн Гэтэлгэгч гэдэг нэр цолоос юу сурч мэдэж болох вэ?

• Энэ ойлголт таны амьдралд хэзээ хамгийн их тус болно гэж та бодож байна вэ? Яагаад?

Есүс Христ бол Гэтэлгэгч нь гэдгийг ойлгосноор амьдралд нь ашиг тус хүргэнэ хэмээн бодож буй хэн нэгний талаар бод.

Судлах асуулт 1: Есүс Христ намайг гэтэлгэхийн тулд юу хийсэн бэ?

Абинадай Христийг гэрчилсэн олон бошиглогчийн нэгний жишээ болгон Исаиаг ярьсан. Тэрээр Бурхан Өөрөө “хавчигдан мөн зовоогдох” (Мозая 13:35) биднийг унаж бүдрэн, төөрөлдөхөөс аврахын тулд дэлхий дээр ирнэ гэдгийг харуулахын тулд Исаиагийн сургаалыг уншсан.

Мозая 14-ийг уншаад, Есүс Христ таныг нүгэл ба үхлээс чөлөөлөхийн тулд хийхэд бэлэн байсан төлөөсийг ойлгоход туслах үг, хэллэгийг хайж ол.

• Та бодсон хүнтэйгээ эдгээр шүлгээс ямар үг, хэллэгийг хуваалцах вэ?

Судлах асуулт 2: Би хэрхэн Есүс Христийн гэтэлгэлээр дамжуулан адислагдаж болох вэ?

Хэрэв Есүс Христ бидний Гэтэлгэгч болох үүргээ биелүүлээгүй байсан бол амьдрал ямар байх байсныг та төсөөлж байна уу? Есүс Христ байгаагүй бол таны амьдрал ямар байх байсан талаар цаг гарган бод.

Moзая 15:19; 16:4–7-г уншаад, Христийн гэтэлгэлгүйгээр амьдрал ямар байх байсан талаарх Абинадайн зүйрлэлийг хайж ол.

Moзая 15:20–25; 16:8–10-ыг уншаад, бид Гэтэлгэгчийн ачаар ямар ямар адислалд хөөрөн баясаж болохыг хар.

• Таны бодсон хүн эдгээр шүлгээс Есүс Христийн талаар юу мэдээсэй гэж та хүсэж байна вэ?

Судлах асуулт 3: Есүс Христ яагаад судруудад заримдаа Эцэг хэмээн нэрлэгддэг вэ?

Бурханы Хүү ба Эцэг болохын хувьд Есүс Христийн гүйцэтгэх үүргүүдийн тухай Абинадай заасан. Эцэг гэдэг нь хэн нэгэнд амьдрал бэлэглэгч юм. Есүс Христ бидэнд үхэшгүй байдал, мөнхийн амьдралыг өгч чадах учраас бидний эцэг шиг билээ. Энэ нь Есүс Христ болон Тэнгэрлэг Эцэг хоёр нэг хүн гэсэн үг биш юм. Мозая 15:1–9-ийг уншаад, яагаад Есүс Христийг бидний Мөнхийн Эцэг хэмээн нэрлэж болох шалтгааныг олж мэд.

Арван хоёр төлөөлөгчийн чуулгын ахлагч Жэффри Р.Холланд ийнхүү тайлбарласан.

Абинадайн зааснаар Христ “Бурханы хүчээр бий болгогдсон” (Moзая 15:3) учраас Эцэгийн хүч Түүнд байдаг. Тэрхүү тэнгэрлэг угсаанаас гадна Христ тэнгэр, газрыг бүтээсэн Бүтээгчийн хувьд Эцэгийн үүргийг гүйцэтгэдэг (Moзая 15:4-ийг үзнэ үү), Тэрээр бидний сүнслэг дахин төрөлтийн, мөн авралын эцэг болж, Тэнгэрлэг Эцэгт хүндэтгэлтэй ханддаг учраас Эцэгийнхээ хүслийг Өөрийнхөө хүслээс дээгүүр тавьдаг. (Jeffrey R. Holland, Christ and the New Covenant: The Messianic Message of the Book of Mormon [1997], 183–184)

• Ямар нөхцөлд Есүс Христ Эцэг мөн Хүү болдог вэ?

• Есүс Христийн тухай мэдэх нь таны бодсон хүнд яагаад тустай байж болох вэ?

1. Бодсон хүндээ Есүс Христийг бидний Гэтэлгэгч гэх захиасыг бич. Захиасанд судрын тодорхой үг хэллэгийг эсвэл шүлгийг ашигла. Гэтэлгэгчийн талаарх гэрчлэлээ оруул.

Нэмэлт: Илүү ихийг судлахыг хүсэж байна уу?

Мозая 14. Есүс Христ зовж шаналсан учраас надад ямар адислал ирдэг вэ?

Арван хоёр төлөөлөгчийн чуулгын ерөнхийлөгч М.Рассэлл Баллард ийн заасан.

Хэдийгээр Түүний амьдрал цэвэр ариун, нүглээс ангид байсан ч Тэрээр—таны, миний, бид бүгдийн, энэ дэлхий дээр амьдарч байсан бүх хүний төлөө эцсийн төлөөсийг төлсөн юм. Түүний оюун санаа, сэтгэл, сүнслэг байдлын зовлон шаналал агуу их байсан учраас Түүний сүв бүрээс цус шүүрч байлаа (Лук 22:44; Сургаал ба Гэрээ 19:18-ыг үзнэ үү). Гэсэн хэдий ч Есүс Өөрийн хүслээр зовсон бөгөөд ингэснээр бид бүгдээрээ Түүнд итгэснээр цэвэршигдэх боломжтой болсон. … Их Эзэний Цагаатгал байгаагүй бол эдгээр адислалын аль нь ч бидэнд боломжгүй бөгөөд бид Бурханы оршихуйд амьдрахуйц зохистой мөн бэлэн байж чадахгүй байх байсан. (M. Russell Ballard, “The Atonement and the Value of One Soul,” Liahona, May 2004, 84–85)

Мозая 15. Яагаад Бурханы төлөвлөгөөнд Гэтэлгэгч хэрэгтэй вэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Түүний төлөвлөснөөр, дэлхийн амьдралд бид сүнслэг байдлын хувьд өсөж хөгжихөд хэрэгтэй эсэргүүцэлтэй тулгарснаар нүгэл үйлдэн бохирдох байв. Бид мөн бие махбодын үхэлд харьяалагдах байлаа. Тэнгэрлэг Эцэг маань биднийг үхэл, нүглийн савраас суллахын тулд Аврагчийг өгөхөөр төлөвлөсөн байв. Түүний Амилуулалт бүх хүнийг үхлээс гэтэлгэж, цагаатгагч золиос нь бидний өсөлт хөгжилд түлхэц өгөх үүднээс тавьсан нөхцөлийг биелүүлсэн тохиолдолд бүх хүнийг нүглээс цэвэршүүлэх төлөөсийг төлөх байлаа. Есүс Христийн Цагаатгал бол Эцэгийн авралын төлөвлөгөөний гол цөм мөн. (Даллин Х.Өүкс, “Агуу төлөвлөгөө,” 2020 оны 4-р сарын Ерөнхий чуулган, 114)

Яагаад Есүс Христ Тэнгэрлэг Эцэгийн өмнөөс ярьдаг вэ?

1916 онд Тэргүүн зөвлөл, Арван хоёрын чуулга Эцэг, Хүү хоёрын тухай дөрвөн үнэнийг заасан. Эдгээрийн нэг нь Есүс Христ “эрх мэдлийн тэнгэрлэг томилолтоор” Эцэгийнхээ өмнөөс ярьж буйд анхаарлаа хандуулсан (Ensign, Apr. 2002, 17-г үзнэ үү). Энэ нь Есүс Христ Бурханы ажлыг хийхдээ Эцэгээ төлөөлөх эрхтэй гэсэн үг юм.

Арван хоёр төлөөлөгчийн чуулгын ахлагч Брүс Р.Макконки (1915–85) ийн заасан.

[Есүс Христ] бол эрх мэдлийн тэнгэрлэг томилолтоор Эцэг юм. Өөрөөр хэлбэл Эцэг-Элохим Хүүдээ эрх мэдлээ залгамжилж, Түүнд Өөрийн хүч, эрх мэдлийг өгч, Түүнтэй нэн тэргүүний, жинхэнэ Эцэг хэмээн үзэн ярих эрхийг олгосон гэсэн үг юм. (Bruce R. McConkie, The Promised Messiah: The First Coming of Christ [1978], 63)