Mosias 21–24, Bahagi 1

Paghahanap sa mga Layunin ng Panginoon para sa Ating mga Pagsubok at Paghihirap

Paano mo ipaliliwanag sa isang tao kung bakit tinutulutan ng Panginoon na makaranas tayo ng mga pagsubok at paghihirap? Inilarawan sa Mosias 21–24 ang mga karanasan ng mga tao ni Limhi at ng mga tao ni Alma, na kapwa nakaranas ng mahihirap na hamon. Layunin ng lesson na ito na tulungan kang makadama ng ibayong tiwala sa Ama sa Langit at kay Jesucristo kapag dumaranas ka ng mga pagsubok at paghihirap sa iyong buhay.

Pagdadala ng mga pasanin

Isipin kunwari na ang iyong mga pagsubok, pasanin, at paghihirap ay kinakatawan ng mga bato na kailangan mong pisikal na dalhin sa isang bag o backpack.

• Ano ang ilan sa mga pagsubok o pasanin na maaaring maranasan ng mga tinedyer na maaaring maging parang mabibigat na bato sa loob ng backpack?

• Anong mga bagay ang maaaring itanong ng mga tao tungkol sa mga pasaning dala nila?

Pag-isipan sandali ang ilan sa mga pagsubok at pasanin na kasalukuyan mong kinakaharap o naranasan sa iyong buhay. Pag-isipang ilista ang mga ito sa iyong study journal. Maaari mong isama ang mga tanong, alalahanin, o hangarin na nauugnay sa iyong mga pagsubok at pasanin.

Sa pag-aaral mo ngayon, alamin ang mga katotohanan na makatutulong sa iyo na mas maunawaan kung bakit maaaring tinutulutan ng Panginoon na maranasan mo ang mga pagsubok na ito.

Ang mga tao ni Limhi at ang mga tao ni Alma

Sa Mosias 21–24, nalaman natin ang tungkol sa dalawang grupo ng mga tao na nakaranas ng malalaking pagsubok at paghihirap. Ang unang grupo ay nakatira sa lupain ng Nephi at pinamumunuan ng anak ni Haring Noe na si Limhi. Ang pangalawang grupo ay nakatira sa lupain ng Helam at pinamumunuan ni Alma.

Ang sumusunod ay maikling buod ng mga pangyayari na may kaugnayan sa pagkabihag ng bawat grupo:

Ang mga tao ni Limhi

Matapos tanggihan ang mga turo at babala ni Abinadi, ang mga Nephita, na pinamumunuan na ngayon ni Haring Limhi, ay dinalang bihag ng mga Lamanita sa lupain ng Nephi at kinailangang magbayad ng malaking buwis (tingnan sa Mosias 19:15). Tulad ng ipinropesiya ng propetang si Abinadi (tingnan sa Mosias 12:5), sapilitang pinaglingkod ng mga Lamanita ang mga tao ni Limhi at pinatawan sila ng mabibigat na pasanin (tingnan sa Mosias 21:3).

Ang mga tao ni Alma

Pagkamatay ni Abinadi, si Alma at ang kanyang mga tagasunod ay tumakas patungo sa mga Tubig ng Mormon, kung saan sila bininyagan (tingnan sa Mosias 17:1–4; 18:1–14). Kalaunan ay tumakas sila para sa kanilang kaligtasan at nagtayo sila ng isang matwid na pamayanan sa lupain ng Helam (tingnan sa Mosias 18:32–34; 23:1–4, 19–20). Kalaunan, ang mga tao ni Alma ay natuklasan at dinalang bihag ng mga Lamanita (tingnan sa Mosias 23:25–29, 36–37). Si Amulon, na isa sa masasamang saserdote ni Noe, ay nabigyan ng kapangyarihan na pamahalaan sila at nagsimulang usigin si Alma at ang kanyang mga tao (tingnan sa Mosias 24:8–9).

Bakit tinutulutan ng Panginoon ang mga pagsubok

Basahin ang mga sumusunod na scripture passage, at hanapin ang mga turo na makatutulong sa iyo na maunawaan kung bakit tinutulutan ng Panginoon na makaranas tayo ng mga pagsubok at paghihirap. Maaari mong markahan ang mga salita at parirala na pinakanapansin mo.

• Mga tao ni Limhi: Mosias 21:5–16

• Mga tao ni Alma: Mosias 23:21–24; 24:8–14

1. Sagutin ang mga sumusunod na tanong:

   • Anong mga pagkakatulad at pagkakaiba ang nakita mo sa dalawang grupo ng mga tao at sa naranasan nila?

   • Anong katibayan ang nakita mo sa mga salaysay na ito tungkol sa pagmamahal at pagmamalasakit ng Panginoon sa mga tao?

   • Ano ang natutuhan mo tungkol sa dahilan kung bakit tinutulutan ng Panginoon na dumanas ang mga tao ng mga pagsubok at paghihirap?

Inihahayag ng mga salaysay na ito ang ilang katotohanan kung bakit tinutulutan ng Panginoon na makaranas ang mga tao ng mga pagsubok. Maaaring napansin mo rin ang mga sumusunod:

• Tinutulutan ng Panginoon na makaranas tayo ng mga pagsubok upang tulungan tayong maging mapagpakumbaba at mas umasa sa Kanya (tingnan sa Mosias 21:5–14).

• Ang ilang pagsubok at paghihirap ay dumarating dahil sa pagsuway (tingnan sa Mosias 21:15).

• Ang ating mga pagsubok ay makapagbibigay sa atin ng mga pagkakataong hangarin at madama ang kapangyarihan ng Panginoon sa ating buhay (tingnan sa Mosias 21:15–16; 24:14).

• Pinapahirapan ng Panginoon ang Kanyang mga tao at sinusubok Niya ang kanilang tiyaga at pananampalataya (tingnan sa Mosias 23:21).

Inaakala ng maraming tao na ang salitang pagpapahirap (tingnan sa Mosias 23:21) ay kasingkahulugan ng pagpaparusa. Ipinaliwanag ni Elder Lynn G. Robbins ng Pitumpu na, “Ang salitang chasten o pahirapan ay mula sa salitang Latin na castus, na ibig sabihin ay ‘malinis o dalisay,’ at ang chasten o pahirapan ay nangangahulugang ‘dalisayin’ [tingnan sa Merriam-Webster’s Collegiate Dictionary, 11th ed. (2003), “chasten”]” (“Ang Tapat na Hukom,” Liahona, Nob. 2016, 97). Pag-isipan sandali kung paano ka maaaring dinadalisay ng Panginoon sa pamamagitan ng iyong mga pagsubok at paghihirap.

2. Sagutin ang kahit dalawa sa mga sumusunod na tanong:

   • Paano maiimpluwensyahan ng pag-unawa sa mga katotohanang ito ang paraan ng pagtugon mo sa iyong mga pagsubok?

   • Anong mga karanasan ang nakatulong sa iyo na makita ang mga layunin ng Panginoon sa pagtutulot na maranasan mo ang mga pagsubok?

   • Ano ang natutuhan mo ngayon na makatutulong sa iyo na mas maunawaan ang mga pagsubok na nararanasan mo?

Opsiyonal: Gusto Mo Bang May Matutuhan Pa?

Ano ang maaari kong gawin kung sa pakiramdam ko ay hindi makatarungan ang mga pagsubok sa akin?

Panoorin ang video na “Ang Lahat Kong Iniibig, ay Aking Sinasaway at Pinarurusahan” (mula sa time code na 6:33 hanggang 9:37). Pag-isipan kung paano mo magagamit ang karanasan ni Elder Brown sa maaaring nangyayari sa iyong buhay.

Maaari ba akong umunlad mula sa bawat pagsubok na kinakaharap ko?

Sinabi minsan ni Elder Orson F. Whitney (1855–1931) ng Korum ng Labindalawang Apostol:

Walang nasasayang sa dinaranas nating [pasakit] o pagsubok. Nakatutulong ito sa ating edukasyon, sa pagkakaroon ng mga katangiang tulad ng pagtitiyaga, pananampalataya, katatagan at pagpapakumbaba. Lahat ng ating dinaranas at lahat ng ating tinitiis, lalo na kapag buong pagtitiyaga natin itong tiniis, ay nagpapatatag sa ating pagkatao, nagpapadalisay sa ating mga puso, nagpapalawak sa ating kaluluwa, at ginagawa tayo nitong mas sensitibo at mapagkawanggawa, mas karapat-dapat tawaging mga anak ng Diyos … at sa pamamagitan ng kalungkutan at pighati, pagpapakahirap at pagdurusa natin nakakamit ang edukasyon na siyang pakay ng ating pagparito at gagawin tayo nitong higit na katulad ng ating Ama at Ina sa langit. (Orson F. Whitney, tulad ng sinipi sa Spencer W. Kimball, Faith Precedes the Miracle [1972], 98)

Ano ang magagawa ko upang maging mga pagpapala ang aking mga pasanin?

Isipin kung paano nagiging para sa ating espirituwal at temporal na kabutihan ang mga pasanin natin sa buhay.

Si Pangulong Henry B. Eyring ng Unang Panguluhan ay nagbigay ng payo na makatutulong sa atin kapag dumaranas tayo ng mga pagsubok:

Maaaring makatwiran ninyong pag-isipan kung bakit pinahihintulutan ng mapagmahal at lubos na makapangyarihang Diyos na maging napakahirap ng ating mortal na pagsubok. Ito ay dahil nalalaman Niyang kailangan nating umunlad sa espirituwal na kalinisan at lakas upang magawa nating mamuhay sa Kanyang piling bilang mga pamilya magpakailanman. Upang maging posible ito, binigyan tayo ng Ama sa Langit ng isang Tagapagligtas at ng kapangyarihang pumili para sa ating sarili sa pamamagitan ng pananampalataya na sundin ang Kanyang mga kautusan at magsisi at pagkatapos ay lumapit sa Kanya. …

Kapag iniisip ninyo kung gaano kasakit ang makakaya ninyong pagtiisang mabuti, alalahanin Siya. Pinagdusahan Niya ang pinagdurusahan ninyo upang malaman Niya kung paano kayo maiaangat. Maaaring hindi Niya alisin ang inyong pasanin, pero bibigyan Niya kayo ng lakas, kapanatagan, at pag-asa. Alam Niya ang daan. Ininom Niya ang mapait na saro. Tiniis Niya ang pagdurusa ng lahat. (Henry B. Eyring, “Sinubok, Napatunayan, at Pinino,” Liahona, Nob. 2020, 97)