Mosias 26

“Kung Magtatapat Siya ng Kanyang mga Kasalanan … at Magsisisi”

isang kabataang nakikipag-usap sa kanyang bishop o branch president

Paano tayo matutulungan ng pagsisisi sa ating pang-araw-araw na buhay? Bakit natin kailangang ipagtapat ang ating mga kasalanan bilang bahagi ng ating pagsisisi? Bilang mataas na saserdote sa Simbahan ng Tagapagligtas, nais ni Alma na tulungan ang mga nakagawa ng mabibigat na kasalanan. Binigyan siya ng Panginoon ng malinaw na tagubilin tungkol sa dapat niyang gawin. Layunin ng lesson na ito na tulungan kang maunawaan ang mapagmahal at mapagpatawad na katangian ng Ama sa Langit at ni Jesucristo at kung bakit dapat tayong magsisi sa ating mga kasalanan.

Ano ang gagawin mo?

Kunwari ay narinig mong binanggit ng isang tao ang mga sumusunod na tanong at alalahanin tungkol sa pagsisisi:

• Hindi ako sigurado kung sulit na magsisi.

• Bakit kailangan kong ipagtapat ang aking mga kasalanan? Bakit kailangang ipagtapat ang ilang kasalanan sa isang priesthood leader?

• Napakarami kong kasalanan kaya hindi na ako mapapatawad ng Panginoon.

Isipin sandali kung may kakilala ka na maaaring mayroon ng alinman sa mga alalahaning ito.

• Ano ang iba pang mga tanong o alalahanin na maaaring mayroon ang isang tao tungkol sa pagsisisi?

Pag-isipan kung aling isa o dalawa sa mga tanong o alalahaning ito ang magiging pinakamakabuluhan na pagtuunan mo sa pag-aaral mo ng lesson na ito. Humingi ng patnubay sa Ama sa Langit upang matulungan kang makahanap ng mga sagot at madagdagan ang iyong pag-unawa tungkol sa pagsisisi.

Mga Problema sa Simbahan

Matapos palayain ng Panginoon si Alma at ang kanyang mga tao mula sa pagkaalipin, sumama sila sa mga Nephita at sa mga tao ni Limhi sa Zarahemla. Doon, itinalaga ni Haring Mosias si Alma bilang pinuno ng Simbahan. Ang ilang tao sa ilalim ng pamamahala ni Alma ay gumagawa ng mabibigat na kasalanan at hindi nagsisisi (tingnan sa Mosias 26:1–6). Sila ay dinala sa harapan ni Alma, ngunit hindi malaman ni Alma kung ano ang nararapat gawin.

Basahin ang Mosias 26:13–15, 19–24, 28–31 at hanapin ang tagubilin na ibinigay ng Panginoon kay Alma.

• Ano ang sinabi ng Panginoon na dapat gawin ng mga tao upang matanggap at mapatawad Niya?

• Ayon sa talata 23, bakit ang Tagapagligtas ang nararapat magpasiya kung sino ang mapapatawad at makatatanggap ng buhay na walang hanggan?

• Ano pa ang natutuhan ninyo tungkol sa Tagapagligtas mula sa mga talatang ito?

Kung magsisisi tayo

Maaaring natukoy mo ang mga alituntuning tulad ng sumusunod: Kung ipagtatapat natin ang ating mga kasalanan at magsisisi tayo nang taos sa ating puso, patatawarin tayo ng Panginoon. Kapag madalas tayong magsisi, patatawarin tayo ng Panginoon.

• Ano ang ibig sabihin ng ipagtapat ang ating mga kasalanan?

• Sa palagay mo, ano ang ibig sabihin ng “[magsisi] nang taos sa [iyong] puso” (Mosias 26:29)?

• Paano nakakaapekto sa iyong saloobin tungkol sa pagsisisi ang kaalaman na mapagpatawad ang Panginoon?

Ang mga alituntuning ito ay makatutulong sa mga tanong at alalahanin tungkol sa pagsisisi mula sa simula ng lesson.

icon, isulat

1. Pumili ng dalawa sa apat na alalahanin at sagutin ang mga kaukulang tanong:

Alalahanin A: Hindi ako sigurado kung sulit na magsisi.

• Anong mga banal na kasulatan at alituntunin mula sa Mosias 26, o iba pang mga banal na kasulatan, ang maaari mong ibahagi na makatutulong sa alalahaning ito?

Alalahanin na si Alma mismo ay nakagawa noon ng mabibigat na kasalanan sa kanyang buhay at nagsisi at tumanggap ng kapatawaran sa pamamagitan ng Tagapagligtas na si Jesucristo (tingnan sa Mosias 11:5–7; 18:1–3; 26:15, 20).

• Ano sa palagay mo ang maaaring ibahagi ni Alma sa isang taong may ganitong alalahanin?

Isiping mabuti ang naranasan mo o ng mga kakilala mo nang bumaling kayo sa Tagapagligtas na si Jesucristo sa pamamagitan ng pagsisisi.

Alalahanin B: Bakit kailangan kong ipagtapat ang aking mga kasalanan? Bakit kailangang ipagtapat ang ilang kasalanan sa isang priesthood leader?

Sinabi ng Panginoon kay Alma na ang mga nagkasala ay kailangang “magtapat ng kanyang mga kasalanan sa iyo [kay Alma, na kanilang priesthood leader] at sa akin [ang Panginoon]” (Mosias 26:29).

• Dahil alam na ng Panginoon ang ating mga kasalanan, bakit mahalagang ipagtapat natin ang mga ito sa Kanya? Paano nito mapagpapala ang ating buhay?

Basahin ang mga sumusunod na pahayag mula sa buklet na Para sa Lakas ng mga Kabataan at mula kay Elder C. Scott Grow, emeritus General Authority Seventy, at maghanap ng mga kaalaman kung kailan at bakit dapat tayong magtapat sa bishop o branch president.

Elder C. Scott Grow

Ang bishop ay may karapatan sa paghahayag mula sa Espiritu Santo tungkol sa mga miyembro ng kanyang ward, pati na sa iyo. … Matutulungan ka [niya] na magsisi sa paraang hindi kayang ibigay ng iyong mga magulang o iba pang mga lider. …

[Kung hindi tayo magtatapat,] pinapasan [nating] mag-isa ang bigat ng kasalanan, sa halip na hayaang alisin ng Tagapagligtas ang pasanin. (C. Scott Grow, “Bakit Ko Kailangang Magtapat at Ano ang Kailangan Kong Ipagtapat sa Bishop Ko?” Liahona, Okt. 2013, 28–29)

• Paano makatutulong ang pahayag na ito sa isang taong may mga alalahanin tungkol sa pagtatapat sa kanilang priesthood leader?

Alalahanin C: Napakarami kong kasalanan kaya hindi na ako mapapatawad ng Panginoon.

• Paano makatutulong ang mga salita ng Panginoon sa Mosias 26:29–30 sa alalahaning ito? (Maaari mo ring pag-aralan ang 1 Timoteo 1:15; 1 Juan 1:9; o Doktrina at mga Tipan 18:10–12; 58:42–43.)

• Anong mga salaysay sa banal na kasulatan tungkol sa Tagapagligtas ang naglalarawan ng Kanyang damdamin tungkol sa mga taong nagsisikap na magsisi at sa Kanyang kahandaang magpatawad?

Alalahanin D: Ikaw ang bahala

Mag-isip ng isa pang makatotohanang alalahanin o tanong na posibleng mayroon ang isang tao tungkol sa pagsisisi. Pag-aralan ang “Magsisi, Pagsisisi” o “Pagtatapat, Magtapat” sa Gabay sa mga Banal na Kasulatan (scriptures.ChurchofJesusChrist.org), at maghanap ng mga katotohanan na maaaring makatulong. Maaari mo ring pag-aralan ang mga kaugnay na banal na kasulatan sa “Magsisi, Pagsisisi” o “Pagtatapat, Magtapat” sa Gabay sa mga Banal na Kasulatan (ChurchofJesusChrist.org). Maaari ding makatulong na pag-aralan ang “pagsisisi” sa buklet na Para sa Lakas ng mga Kabataan at pag-isipan ang nalalaman mo tungkol sa Panginoon na maaaring makatulong.

Ano ang nangyari?

Basahin ang Mosias 26:34–37, at alamin ang nangyari nang sundin ni Alma ang mga tagubilin ng Panginoon.

Isulat sa iyong study journal kung ano ang maaaring gusto mong alalahanin o gawin dahil sa lesson na ito. Maaaring kasama sa pagninilay na ito kung paano mo gustong alalahanin ang kahandaan ng Panginoon na magpatawad o kung paano mo gustong sikaping ipagtapat at pagsisihan ang sarili mong mga kasalanan.

Opsiyonal: Gusto Mo Bang May Matutuhan Pa?

Paano tayo maaaring tuksuhin ni Satanas na huwag ipagtapat ang ating mga kasalanan?

Itinuro ni Sister Linda S. Reeves, dating Tagapayo sa Relief Society General Presidency:

Sister Linda S. Reeves

Kapag nagkakasala tayo, madalas ay tinatangka tayong kumbinsihin ni Satanas na ang di-makasariling bagay na dapat gawin ay protektahan ang iba mula sa pinsalang hatid ng kaalaman ng ating mga kasalanan, pati ang pag-iwas sa pag-amin sa ating bishop, na maaaring magpala ng ating buhay sa pamamagitan ng kanyang mga susi sa priesthood bilang hukom sa Israel. Gayunman, ang katotohanan ay ang di-makasarili at nais ni Cristo na gawin natin ay ang magtapat at magsisi. Ito ang dakilang plano ng pagtubos ng Ama sa Langit. (Linda S. Reeves, “Ang Dakilang Plano ng Pagtubos,” Liahona, Nob. 2016, 88)

Mosias 26:32. Ano ang ibig sabihin ng hindi na ibibilang sa mga tao ng Panginoon?

Iniutos ng Panginoon kay Alma na kung hindi magsisisi ang mga tao ng kanilang mga kasalanan, “siya rin ay hindi ibibilang sa aking mga tao” (Mosias 26:32). Basahin ang sumusunod na pahayag upang malaman kung paano kumikilos ang mga priesthood leader sa mga parehong sitwasyon ngayon at kung bakit:

Kapag ang isang miyembro ay nakagawa ng mabigat na kasalanan, siya ay tinutulungan ng bishop o stake president na magsisi. Bilang bahagi ng prosesong ito, maaari niyang lagyan ng restriksyon o limitahan ang ilang mga pribilehiyo ng pagiging miyembro ng Simbahan sa loob ng ilang panahon. Sa ilang sitwasyon, maaaring kailanganin niyang bawiin ang pagkamiyembro ng isang tao sa loob ng ilang panahon.

Ang pagbibigay ng restriksyon o pagbawi sa pagkamiyembro ng isang tao ay hindi nilayong maging parusa. Sa halip, ang mga aksyon na ito ay kinakailangan kung minsan upang matulungan ang isang tao na makapagsisi at magkaroon ng pagbabago ng puso. Binibigyan din ng mga ito ang isang tao ng panahon para makapaghanda sa espirituwal upang panibaguhin at tuparing muli ang kanyang mga tipan. (Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 32.2, ChurchofJesusChrist.org)