Alma 23

Sila “Kailanman ay Hindi Nagsitalikod”

Isipin ang maraming puwersa sa mundo ngayon na naghahangad na sirain ang iyong pananampalataya at hilahin ka palayo sa Panginoon. Ano ang magagawa mo para manatiling matatag at maiwasan itong mangyari? Maaari tayong matuto mula sa mga halimbawa ng libu-libong Lamanita na “nagbalik-loob sa Panginoon“ at “kailanman ay hindi nagsitalikod“ (Alma 23:6). Ang layunin ng lesson na ito ay tulungan kang hangarin na mas lubos na magbalik-loob sa Panginoon at tukuyin ang anumang balakid sa pagbabalik-loob na iyon.

Pagiging matatag

Kung maaari, tumayo gamit ang isang paa sa loob ng 30 segundo. Isipin kung gaano kahirap manatiling nakatayo kung may taong tumulak sa iyo habang nakatayo ka gamit ang isang paa.

Ngayon, tumayo sa dalawang paa at isipin kung gaano mas madaling manatiling nakatayo kung may taong tumulak sa iyo.

Kung minsan, inihahambing ng mga banal na kasulatan ang katapatan sa Panginoon sa pananatiling matatag (tingnan sa Mosias 4:11; Alma 1:25) at ang pagtalikod sa Panginoon sa pagbagsak (tingnan sa 2 Nephi 18:15; Helaman 5:12).

• Ano ang ilang dahilan kung bakit tumatalikod ang mga tao kay Jesucristo at sa Kanyang Simbahan?

Pagnilayan ang mga sumusunod na tanong:

• Kung ipagpapatuloy mo ang paraan ng pamumuhay mo ngayon, sa palagay mo ba ay mas mapapalapit ka sa Panginoon at sa Kanyang Simbahan o magsisimula kang tumalikod? Bakit?

• Ano ang nalalaman mo tungkol sa Panginoon at sa Kanyang Simbahan kaya ayaw mong tumalikod?

Habang pinag-aaralan mo ang tungkol sa mga taong “kailanman ay hindi nagsitalikod” (Alma 23:6), maghanap ng mga kaalaman at humingi ng patnubay sa iyong buhay sa pamamagitan ng panalangin sa Ama sa Langit at sa inspirasyon ng Espiritu Santo.

Nagbalik-loob sa Panginoon

Pagkatapos ng kanyang pagbabalik-loob, ipinahayag ng hari ng mga Lamanita ang kalayaang pangrelihiyon sa lupain upang ligtas na maipangaral ng mga anak ni Mosias ang ebanghelyo.

Basahin ang Alma 23:3–5, at alamin ang naging epekto ng pangangaral sa mga tao.

Kung minsan, inuulit ng mga banal na kasulatan ang mga parirala na mahalagang maunawaan natin. Basahin ang Alma 23:6–13, 15, at maghanap ng mga parirala na nagsasaad kung bakit “kailanman ay hindi nagsitalikod” ang libu-libong taong ito na nagbalik-loob (talata 6). Maaari mong markahan ang mga inulit na parirala.

Ang isang katotohanan na matututuhan natin mula sa mga talatang ito ay kapag nagbalik-loob tayo sa Panginoon at ibinaba natin ang ating mga sandata ng paghihimagsik, lagi tayong mananatiling tapat sa Kanya.

1. Sagutin ang mga sumusunod na tanong:

   • Ano ang ibig sabihin ng “nagbalik-loob sa Panginoon”? (Alma 23:6). (Kung makatutulong, maaari mong pag-aralan ang “Pagbabalik-loob, Nagbalik-loob” sa Gabay sa mga Banal na Kasulatan).

   • Bakit mahalagang magbalik-loob “sa Panginoon” sa halip na sa isang missionary o sa isang partikular na turo?

Isipin ang nalalaman mo tungkol sa Tagapagligtas at pagnilayan kung bakit gusto mong magbalik-loob at manatiling nagbalik-loob sa Kanya habambuhay. Maaari mong basahin ang ilan sa mga sumusunod na talata para matulungan ka:

• Juan 14:6

• Omni 1:26

• Helaman 5:12

• Eter 12:27

2. Sagutin ang sumusunod na tanong:

   • Ano ang nakatulong sa iyo at sa iba pang kakilala mo na mas magbalik-loob sa Panginoon?

Pagbababa ng ating mga sandata ng paghihimagsik

Upang tunay na magbalik-loob sa Panginoon at hindi kailanman tumalikod, dapat handa tayong ibaba ang ating mga sandata ng paghihimagsik. Ang mga sandata ng paghihimagsik ng mga Lamanita ay kapwa literal at simboliko. Ngunit para sa atin, ang mga sandatang ito ay malamang na simbolo lamang.

Itinuro ni Elder David A. Bednar ng Korum ng Labindalawang Apostol na ang ating mga sandata ng paghihimagsik ay maaaring “kasakiman, kapalaluan, at pagsuway” (“Nagbalik-loob sa Panginoon,” Liahona, Nob. 2012, 108). Itinuro ni Elder Dale G. Renlund ng Korum ng Labindalawang Apostol na ang ating mga sandata ay maaaring “mga personal na hangarin na taliwas sa pagiging nakaangkla sa Tagapagligtas at pagsunod sa landas ng tipan” (“Hindi Natitinag na Katapatan kay Jesucristo,” Liahona, Nob. 2019, 22).

3. Gawin ang sumusunod na aktibidad at sagutin ang mga nauugnay na tanong.

   Magdrowing ng dalawang simpleng sandata (mga espada, sibat, o iba pang mga sandata) sa iyong study journal o sa isang papel. Sa tabi ng bawat sandata o sa mismong sandata, sumulat ng isang partikular at makatotohanang halimbawa ng pag-uugali o gawain na salungat sa ebanghelyo ni Jesucristo na maaaring mayroon ang isang tinedyer sa ating panahon. Halimbawa, ang isang taong may kapalaluan ay maaaring hindi makinig sa payo ng kanyang mga magulang, o maaaring madama niya na ang mga propeta ay matanda na at walang alam. O maaaring makagawa ng ilang kasalanan ang isang tao dahil iniisip niya na masyadong mahigpit ang mga kautusan ng Diyos.

   • Paano maaaring makaapekto ang mga pag-uugali o gawaing ito sa pagbabalik-loob ng taong ito sa Panginoon?

   • Paano makatutulong sa isang tao ang pagbababa o pagtalikod sa mga pag-uugali o gawaing ito upang lalong siyang magbalik-loob sa Panginoon?

Ang iyong mga sandata ng paghihimagsik

Para tapusin ang lesson na ito, hingin ang tulong ng Ama sa Langit sa pamamagitan ng Espiritu Santo para matukoy ang mga sandata ng paghihimagsik na maaaring mayroon ka. Kung may matutukoy ka, maaari mong isulat ito sa iyong study journal at magdrowing ng sandata sa tabi nito.

Pagnilayan kung ano ang maaari mong gawin upang maibaba ang iyong mga sandata ng paghihimagsik at kung paano makatutulong sa iyo ang pangakong iyon na magbalik-loob sa Panginoon at hindi kailanman tumalikod.

Opsiyonal: Gusto Mo Bang May Matutuhan Pa?

Alma 23:6. Ano ang ibig sabihin ng nagbalik-loob sa Panginoon?

Panoorin ang “Nagbalik-loob sa Panginoon” mula sa time code na 10:43 hanggang 11:41 para makitang nagpapaliwanag si Elder David A. Bednar ng Korum ng Labindalawang Apostol.

Panoorin ang “Magbalik-loob Kayo” mula sa time code na 0:48 hanggang 3:21 at “Kayo’y Magiging Malaya” mula sa time code na 6:43 hanggang 8:52 para makakita ng mga halimbawa ng pagbabalik-loob.

Anong mga pagpapala ang maaaring dumating kapag ibinaba natin ang ating mga sandata ng paghihimagsik?

Itinuro ni Elder Patrick Kearon ng Pitumpu:

Makakamtan lang natin ang paggaling at ginhawa kapag dinala natin ang ating sarili sa paanan ng Dakilang Manggagamot, ang ating Tagapagligtas na si Jesucristo. Kailangan nating ibaba ang ating mga sandata ng paghihimagsik (at alam ng bawat isa sa atin kung ano ang mga ito). Kailangan nating pagsisihan ang ating kasalanan, kaluhuan, at kapalaluan. Dapat nating talikuran ang ating mga hangaring sundin ang sanlibutan at maigalang at mapapurihan ng mundo. Dapat tayong tumigil sa paglaban sa Diyos at sa halip ay ibigay ang ating buong puso sa kanya, nang lubusan. Pagkatapos ay Kanya tayong mapapagaling. At malilinis Niya tayo mula sa nakamamatay na kamandag ng kasalanan. (Patrick Kearon, “Lumapit sa Akin nang May Buong Layunin ng Puso, at Pagagalingin Ko Kayo,” Liahona, Nob. 2010, 51–52)

Ano ang ibig sabihin ng pangalang Anti-Nephi-Lehi?

Ang pangalang Anti-Nephi-Lehi ay maaaring magpahiwatig ng pagsasama-sama ng mga inapo ni Nephi at ng mga sumunod sa kanya kasama ang iba pang mga inapo ni Lehi: “Ang pangalang ‘Anti’ sa ‘Anti-Nephi-Lehi’ ay maaaring nanggaling sa Egyptian na nty na ang ibig sabihin ay ‘siya na mula sa, kaisa ni.’ Samakatuwid, sa halip na mangahulugang ‘laban sa,’ ito ay may kahulugang ‘kaisa nina Nephi at Lehi’” (Stephen D. Ricks, “Anti-Nephi-Lehi,” sa Dennis L. Largey, ed., Book of Mormon Reference Companion [2003], 67).