Алма 40

Сүнсний дэлхий ба Амилуулалт

Христ Сүнсний дэлхийд

Кориантоныг эцэг нь наманчлахад урьсны дараа түүнд Бурханы төлөвлөгөөний талаар, тэр дундаа биднийг нас барсны дараа юу болох талаар зарим асуулт гарч иржээ. Түүний эцэг Алма түүний асуултад хариулж, Тэнгэрлэг Эцэгийн төлөвлөгөөнд Есүс Христ гол үүрэг гүйцэтгэснийг гэрчилсэн юм. Энэ хичээл Аврагчийн таны төлөө хийсэн зүйлд талархах сэтгэлийг тань гүнзгийрүүлж, биднийг нас барсны дараа юу болохыг тайлбарлах боломжийг танд олгоход тусалж чадна.

Асуулт

Халамжийн нийгэмлэгийн ерөнхий ерөнхийлөгчийн зөвлөлийн зөвлөх Рэйна И.Абурто эгч биднийг нас барсны дараа юу болох талаарх асуултуудад хувийн туршлагаа хуваалцан ийн хариулсан. ChurchofJesusChrist.org дээрх “Булшинд ялалт гэж үгүй” видеог цагийн код 4:21-ээс 5:13 хүртэл үзэж эсвэл дараах мэдэгдлийг унш.

Рэйна И.Абурто эгч

Би 9 настай байхдаа аймшигт газар хөдлөлтийн үеэр ахыгаа алдсан. Энэ бүхэн гэнэт болсон тул энэ явдлын бодит байдлыг ойлгоход надад цаг хугацаа хэрэгтэй байлаа. Би уй гашууд автаж, “Ахад минь юу тохиолдов?” Тэр хаана байгаа вэ? Тэр хаашаа явсан бэ? Би түүнтэй дахин уулзах болов уу?” гэж өөрөөсөө асуудаг байсан.

Би тэр үед Бурханы авралын төлөвлөгөөний талаар хараахан мэдээгүй байсан юм. Би бид хаанаас ирсэн, бидний амьдралын зорилго юу болох, нас барсны дараа бидэнд юу тохиолдох зэргийг мэдэж авахыг хүсэж байв. Хайртай хүнээ алдах юм уу амьдралдаа хэцүү зүйлстэй тулгарах үед бид бүгдэд ийм хүсэл төрдөггүй гэж үү? (Рэйна И.Абурто, “Булшинд ялалт гэж үгүй,” 2021 оны 4-р сарын Ерөнхий чуулган, 86)

Алмагийн хүү Кориантон мөн үхлийн дараах амьдралын талаар санаа зовж байсан.

Алма 40:1-ийг уншаад, Кориантоны санааг юу зовоож байсныг олж мэд.

• Тэр яагаад ийм зүйлд санаа зовсон гэж та бодож байна вэ?

Кориантон Бурханы зарлигуудыг, тэр дундаа ариун явдлын хуулийг зөрчсөн гэдгийг эргэн сана. Тэрээр сонголтоосоо болоод энэ амьдралынхаа дараах нөхцөл байдалд санаа зовсон байж болзошгүй. Кориантоны санаа зовнилыг шийдэж, наманчлахад нь туслахын тулд Алма түүнд сургаалыг заав. Кориантоны санаа зовнилд үзүүлсэн Алмагийн хариу үйлдэл Абурто эгчийнхтэй адил асуулттай байгаа хүмүүст тусалж чадна.

Дараа нь Абурто эгчийг асуултынхаа хариултыг олоход нь номлогчид тусалжээ. Та тэдгээр номлогчийн нэг бөгөөд түүнд заахаар бэлдэж байна гэж төсөөлөөд үз. Абурто эгчийн асуултад хариулахад туслах богино тайлбарыг бэлтгэхийн тулд дараах эх сурвалжуудыг ашигла.

Сүнсний дэлхий

Алма 40:6–7, 11–14-ийг уншаад, Алма Кориантонд юу заасныг үз. Дараа нь юу заахаа бэлдэхэд тань туслах дараах эх сурвалжуудыг ашигла.

Сургаал ба Гэрээ 138:11–13, 18–22, 57

Судруудын удирдамж, “Диваажин,” scriptures.ChurchofJesusChrist.org

Тэргүүн зөвлөлийн ерөнхийлөгч Даллин Х.Өүкс ийн заасан.

Ерөнхийлөгч Даллин Х.Өүкс

Бие махбод маань үхсэний дараа ч гэсэн бид сүнсний дэлхийд сүнс болж, үргэлжлүүлэн амьдарна гэдгийг бид судраас мэддэг. Сүнсний дэлхий нь амьдралынхаа туршид “зохистой” буюу “зөв шударга” байсан хүмүүс ба ёс бус байсан хүмүүсийн хооронд хуваагдсан байдаг гэж судрууд бидэнд заадаг. Мөн зарим итгэлтэй сүнс сайн мэдээг ёс бусчуудад, мөн дуулгаваргүй байсан хүмүүст заана гэдгийг тайлбарладаг (1 Петр 3:19; Сургаал ба Гэрээ 138:19–20, 29, 32, 37-г үзнэ үү). (Даллин Х.Өүкс, “Эзэнд итгэ,” 2019 оны 10-р сарын Ерөнхий чуулган, 27)

Дараах асуултуудын хариултыг хэрхэн тайлбарлахаа бэлд.

• Биднийг нас барахад бидний сүнсэнд юу тохиолдох вэ?

• Диваажинд ямар байх вэ? Алмагийн “гадаад харанхуй” гэж нэрлэдэг сүнсний шорон (1 Петр 3:19) эсвэл там (2 Нифай 9:12) гэдэг газар ямар байдаг вэ?

• Диваажин, шорон хоёрын талаар суралцах нь бидний Аврагчид талархах талархлыг хэрхэн нэмэгдүүлэх вэ?

• Бидний сүнсний дэлхийн мэдлэг мөнх бус амьдралын туршид хэрхэн биднийг адислах вэ?

Заахдаа үхэл, амилуулалт хоёрын хооронд зөв шударга сүнснүүд диваажинд, ёс бус сүнснүүд сүнсний шоронд байх болно гэдгийг ойлгомжтой байхад анхаар. Энэхүү үнэний тухай ойлголт тань энэ амьдралд хийсэн сонголтуудад тань хэрхэн нөлөөлсөн тухай хуваалц.

Амилуулалт

Алма 40:2–5, 23–24-ийг уншаад, Алмагийн Кориантонд заасныг үз. Дараа нь юу заахаа бэлдэхэд тань туслах дараах эх сурвалжуудыг ашигла.

Алма 11:42–45

Судруудын удирдамж, “Амилуулалт,” scriptures.ChurchofJesusChrist.org

Тэргүүн зөвлөлийн ерөнхийлөгч Даллин Х.Өүкс ийн заасан.

Ерөнхийлөгч Даллин Х.Өүкс

Амилуулалт бодитойг бид Христийн амилсны баярын өдрүүдэд тэмдэглэдэг. Энэ нь төрөхдөө юм уу мөнх бус амьдралынхаа явцад олж авдаг бие махбод, сэтгэц эсвэл сэтгэл санааны дутмаг байдал зэрэг бидэнд болон бидний хайртай хүн болгонд тохиолддог мөнх бус байдлын сорилт бэрхшээлийг даван туулах хүч чадал, ойлголтыг бидэнд өгдөг юм. Амилуулалтын ачаар эдгээр мөнх бус амьдралын дутмаг байдал зөвхөн түр зуурынх гэдгийг бид мэднэ! (Даллин Х.Өүкс, “Агуу төлөвлөгөө,” 2020 оны 4-р сарын Ерөнхий чуулган, 51)?

Дараах асуултуудын хариултыг хэрхэн тайлбарлахаа бэлд.

• Амилуулалт гэж юу вэ? Ямар хүмүүс амилуулагдах вэ?

• Алма 40:2–3-т цэдэглэснээр Амилуулалтыг юу боломжтой болгосон бэ?

• Бидний Амилуулалтын мэдлэг мөнх бус амьдралын маань туршид биднийг хэрхэн адислах вэ?

Заахдаа Есүс Христ амилсан учраас бид бүгд амилуулагдах болно гэдгийг ойлгомжтой байхад анхаар. Амилуулалтын амлалтад талархаж буй нэг шалтгаанаа хуваалц.

ChurchofJesusChrist.org 

Хариулт

дүрс, тэмдэглэх

1. Абурто эгчид заах зүйлийнхээ товч тайлбарыг бич. Олж мэдсэн үнэнүүдээ оруулаад, Есүс Христийн сүнсний дэлхий дэх болон амилуулалт дахь үүргийн талаарх гэрчлэлээ хуваалц. Мөн та бичсэн зүйлээ хэн нэгэнд хуваалцаж болно.

2. Дараах асуултуудын дор хаяж хоёрт нь хариул.

• Таны хувьд сүнсний дэлхий, амилуулалт хоёрын талаар сурч мэдсэн зүйл тань яагаад чухал вэ?

• Энэ мэдлэг Тэнгэрлэг Эцэг, Есүс Христ хоёрын тухай таны бодол санаанд хэрхэн нөлөөлж байна вэ?

• Өнөөдөр та ямар ямар асуултад хариултаа авсан бэ?

• Та ямар асуултын хариултыг үргэлжлүүлэн хайхыг хүсэж байна вэ?

Нэмэлт: Нэмэлт мэдээлэл авахыг хүсэж байна уу?

Алма 40:16–20. Эхний Амилуулалт гэж юу вэ?

Арван хоёр төлөөлөгчийн чуулгын ахлагч Брүс Р.Макконки (1915–1985) ийн заасан.

Ахлагч Брүс Р.Макконки

Энэ амилуулалтын өглөө гарч ирэх хүмүүс селестиел биестэй, селестиел алдар сууг өвлөх болно; Эдгээр нь Христийн анхны үр жимс юм. Энэ амилуулалтын үдээс хойш гарч ирэх хүмүүс террестриел биестэй, улмаар тэрхүү хаант улсыг өвлөн авах болно; тэднийг ирэх үед нь Христийнх гэж дүрсэлнэ. Эдүгээг хүртэл амилсан бүх хүн селестиел бие хүлээн авсан; террестриел биесийн ирэлт нь Хоёр дахь ирэлтийн дараа эхэлдэг. (Сургаал ба Гэрээ 76:50–80; 88:95–99.) (Bruce R. McConkie, Doctrinal New Testament Commentary [1965], 1:196)

Алма 40:21–22. “Мөн Бурханы өмнө зогсохоор авчрагдан” гэдэг нь юу гэсэн утгатай вэ?

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Ахлагч Д.Тодд Кристоффэрсон

Есүс Христ Цагаатгал ба Амилалтаараа уналтын бүх талыг ялсан юм. Бие махбодын үхэл нь түр зуурынх бөгөөд бүр сүнсний үхэлд хүртэл төгсгөл ирж, бид бүгд наанадаж л шүүгдэхээр түр хугацаагаар ч болов Бурханы дэргэд буцаж очих болно. Бидэнд бусад бүх зүйлийг ялах хүчийг болон үүрдийн амьдралыг өгдөг Түүний хүчинд бид бүрэн итгэж, найдаж болно. (Д.Тодд Кристоффэрсон, “Есүс Христийн амилалт,” 2014 оны 4-р сарын Ерөнхий чуулган, 133)

Алма 40:23. Амилсан бие ямар байх вэ?

Далын ахлагч Пол В.Жонсон ийн заасан.

Ахлагч Пол В.Жонсон

Амилалт нь хүний сүнсэнд бие махбодтойгоо дахин нэгдэх боломжийг олгодог бөгөөд харин энэ удаа бие нь үхэшгүй, төгс хэлбэртэй байх бөгөөд өвдөлт, өвчин, бусад асуудалд захирагдахгүй байх болно [Алма 11:43-ыг үзнэ үү]. …

Хүн бүрд биеийн, оюун санааны, сэтгэл хөдлөлийн хязгаарлалт, сул тал гэж байдаг. Хэдийгээр эдгээр саад бэрхшээлийн зарим нь одоо хэцүү байж болох ч эцсийн эцэст шийдвэрлэгдэх болно. Биднийг амилуулагдсаны дараа эдгээр асуудлын аль нь ч бидэнд саад болж чадахгүй. (Пол В.Жонсон, “Тэнд цаашид үхэл үгүй болно,” 2016 оны 4-р сарын Ерөнхий чуулган, 111)