3 Nephi 17

“Ako ay Nahahabag sa Inyo”

Mahaba na ang naging araw para sa maraming Nephita nang ibalita ng Tagapagligtas na panahon na para umalis Siya. Gayunpaman, ang mga luha at pananabik ng maraming tao na mananatili Siya nang mas matagal ay umantig sa Kanyang puso. Sa kagila-gilalas na pagpapakita ng habag, pinagaling Niya sila, nanalangin Siya kasama nila, at isa-isa Niyang binasbasan ang kanilang mga anak. Ang lesson na ito ay makatutulong sa iyo na madama ang pagkahabag ni Jesucristo para sa iyo.

Ang pananaw ng Tagapagligtas

Ipagpalagay na nakasama mo ang Tagapagligtas nang buong araw at sinabi Niya na oras na para umalis Siya.

Maaari mong panoorin ang “Naglingkod si Jesucristo at ang mga Anghel nang may Habag” mula sa time code na 0:12 hanggang 1:30, matatagpuan sa ChurchofJesusChrist.org.

• Ano kaya ang mararamdaman mo sa sitwasyong ito?

Nitong nakaraang dalawang linggo, pinag-aralan mo ang mga ginawa at itinuro ng Tagapagligtas sa mga Nephita nang una Siyang magpakita sa kanila sa 3 Nephi 11–16. Isipin kung ano ang ginawa ni Jesucristo sa mga Nephita para ipakita ang Kanyang pagmamahal. Maaaring makatulong sa iyong makaalala ang pagrerebyu ng isinulat mo sa iyong study journal sa ilalim ng “Pag-aaral ng tungkol kay Jesucristo sa 3 Nephi.”

• Paano ipinakita ng mga ginawa ng Tagapagligtas ang Kanyang pagmamahal sa mga Nephita?

Ngayon ay mas marami ka pang mababasa tungkol sa kung paano ipinakita ng Tagapagligtas ang Kanyang pagkahabag na puno ng pagmamahal sa mga Nephita. Habang nag-aaral ka, isipin kung ano ang itinuturo ng Kanyang mga ginawa tungkol sa Kanyang pagkatao. Bigyang-pansin ang nadarama mo tungkol sa Kanya.

Maaaring makatulong na malaman na lahat ng pangyayaring nakatala sa 3 Nephi 11–17 ay nangyari sa isang araw.

Basahin ang 3 Nephi 17:1–6, at alamin kung ano ang matututuhan mo tungkol kay Jesucristo mula sa Kanyang mga salita at ginawa.

• Ano ang nalaman mo sa mga talatang ito?

Maaaring may natukoy kang katotohanan na tulad ng sumusunod: Si Jesucristo ay puspos ng pagkahabag sa akin. Maaari mong isulat ang katotohanang ito malapit sa talata 6.

Itinuro ni Elder Ulisses Soares ng Korum ng Labindalawang Apostol:

Mahalagang pansinin na ang pagpapakita ni Jesus ng habag ay hindi paminsan-minsan o kinailangang ipakita batay sa listahan ng mga gawaing dapat tapusin kundi mga araw-araw na pagpapakita ng Kanyang dalisay na pagmamahal sa Diyos at sa Kanyang mga anak at ng Kanyang walang-maliw na hangaring tulungan sila. (Ulisses Soares, “Ang Walang-Maliw na Pagkahabag ng Tagapagligtas,” Liahona, Nob. 2021, 14)

• Sa sarili mong mga salita, ano ang itinuturo ni Elder Soares tungkol sa pagkahabag ng Tagapagligtas?

Ang pagkahabag ng Tagapagligtas

Ipinapakita ng natitirang bahagi ng 3 Nephi 17 ang mahabaging katangian ng Tagapagligtas. Alalahanin na ang ginawa ni Jesucristo sa 3 Nephi 17 ay nangyari dahil nahiwatigan Niya ang mabubuting hangarin ng mga Nephita at talagang gusto Niyang makasama sila at pagpalain sila.

Pag-aralan nang mabuti ang bawat isa sa mga sumusunod na passage at isipin kung ano kaya ang pakiramdam kung naroon ka. Anyayahan ang Espiritu Santo na turuan ka habang nagbabasa at nagbubulay-bulay ka. Isulat ang mga naiisip at nadarama mo sa iyong study journal sa ilalim ng “Pag-aaral ng tungkol kay Jesucristo sa 3 Nephi.”

• 3 Nephi 17:7–10: Pagpapagaling sa kanilang mga maysakit at nahihirapan

• 3 Nephi 17:13–20: Pagdarasal nang kasama sila at pagdarasal para sa kanila

• 3 Nephi 17:11–12, 21–25: Pagbabasbas sa mga bata

Upang matulungan ang mga estudyante na mailarawan sa isipan at madama ang Espiritu Santo na nagpapatotoo sa natutuhan nila sa 3 Nephi 17, maaari mong ipapanood ang video na “Naglingkod si Jesucristo at ang mga Anghel nang may Habag” mula sa time code na 1:30 hanggang 11:45.

Upang matulungan kang mailarawan sa isipan ang natutuhan mo sa 3 Nephi 17, maaari mong panoorin ang “Naglingkod si Jesucristo at ang mga Anghel nang may Habag” mula sa time code na 1:30 hanggang 11:45.

1. Sagutin ang kahit dalawa sa mga sumusunod na tanong:

   • Kung naroon ka, paano maiimpluwensyahan ng karanasang ito ang iyong ugnayan sa iyong Tagapagligtas na si Jesucristo?

   • Sa iyong palagay, paano nagpapakita ng pagkahabag si Jesucristo sa atin ngayon?

   • Ano ang nahihikayat kang gawin upang maipahayag ang iyong pagmamahal kay Jesucristo?

Opsiyonal: Gusto Mo Bang May Matutuhan Pa?

Mula sa anong mga uri ng mga paghihirap pinagaling ng Tagapagligtas ang mga tao?

Itinuro ni Pangulong Dallin H. Oaks ng Unang Panguluhan:

Nang magpakita ang Tagapagligtas sa mabubuting tao sa lupain ng Amerika, pinalapit Niya ang mga taong lumpo o bulag o may iba pang mga karamdaman. Inanyayahan Niya ang “mga nahihirapan sa anumang dahilan” (3 Nephi 17:7). “Dalhin sila rito,” wika Niya, “at akin silang pagagalingin,” (talata 7). Ikinuwento sa Aklat ni Mormon kung paano dinala ng mga tao “ang lahat sa kanila na nahihirapan sa anumang dahilan” (talata 9). Maaaring kasama rito ang mga taong may iba’t ibang uri ng pisikal o emosyonal o mental na paghihirap, at nagpapatotoo ang mga banal na kasulatan na “pinagaling [ni Jesus] ang bawat isa sa kanila” (talata 9). (Dallin H. Oaks, “Pinagpapahinga Niya ang Nangabibigatang Lubha,” Liahona, Nob. 2006, 6)

Itinuro rin ni Sister Bonnie H. Cordon, Young Women General President, sa sumusunod na video ang tungkol sa kakayahan at kahandaan ng Tagapagligtas na magpagaling.

Paano ako mas magkakaroon ng pagkahabag na tulad ng kay Cristo?

Ibinahagi ni Elder Ulisses Soares ng Korum ng Labindalawang Apostol:

Ang mahabaging pag-uugali ni Jesus ay nagmumula sa pag-ibig sa kapwa-tao, sa Kanyang dalisay at ganap na pagmamahal, na siyang diwa ng Kanyang nagbabayad-salang sakripisyo. Ang pagiging mahabagin ay pangunahing katangian ng mga taong naghahangad ng kabanalan at ang banal na katangiang ito ay kasama ng iba pang katangiang Kristiyano tulad ng pakikidalamhati sa mga nagdadalamhati at pagkakaroon ng habag, awa, at kabaitan. Ang pagpapakita ng habag sa iba ay, sa katunayan, ang diwa ng ebanghelyo ni Jesucristo at tanda ng ating espirituwal at emosyonal na pagiging malapit sa Tagapagligtas. Dagdag pa rito, ipinapakita nito ang antas ng impluwensya Niya sa paraan ng ating pamumuhay at ipinapakita ang kadakilaan ng ating mga espiritu. (Ulisses Soares, “Ang Walang-Maliw na Pagkahabag ng Tagapagligtas,” Liahona, Nob. 2021, 13–14)