3 Nephi 18:15–39; 19:19–29

“Laging Manalangin”

Maraming tao ang nagdarasal araw-araw. Ang ilang panalangin ay maaaring mas makabuluhan kaysa sa iba. Hindi lamang itinuro ni Jesucristo sa Kanyang mga tagasunod na “lagi kayong manalangin sa Ama” (3 Nephi 18:19), kundi ipinakita rin Niya sa kanila kung paano manalangin. Ang lesson na ito ay makatutulong sa iyo na masunod ang mga turo at halimbawa ni Jesucristo na laging manalangin at magkaroon ng mas makabuluhang mga panalangin.

Mga Halimbawa

Mag-isip ng isang talento, kasanayan, o katangian na gusto mong taglayin. Tukuyin ang mga taong kilala mo na may ganoong talento, kasanayan, o katangian. Gamit ang mga naisip mo, punan ang mga sumusunod na patlang sa ilang iba’t ibang paraan:

• Kung gusto kong matutuhan ang tungkol sa , tutularan ko ang halimbawa ni dahil .

Ulitin ang aktibidad sa pamamagitan ng pagpunan sa unang patlang ng sumusunod na pangungusap ng isang bagay na gusto mong matutuhan mula sa Tagapagligtas at ilagay ang dahilan sa huling patlang.

• Kung gusto kong matutuhan ang tungkol sa , tutularan ko ang halimbawa ni Jesucristo dahil .

Sa panahon ng Kanyang ministeryo sa lupain ng Amerika, tinuruan ng Tagapagligtas ang mga tao sa pamamagitan ng salita at halimbawa.

Basahin ang 3 Nephi 18:16, 24, at alamin ang isang halimbawa na ipinakita ni Jesus.

• Ano ang nais ng Tagapagligtas na matutuhan ng mga tao mula sa Kanyang halimbawa?

Bago tingnan ang mga turo at halimbawa ng Tagapagligtas, suriin ang iyong mga personal na panalangin.

I-rate ang mga sumusunod gamit ang scale na mula 1 hanggang 5, kung saan ang 5 ang pinakamataas:

• Nagnanalangin ako araw-araw.

• Nakikipag-ugnayan ako at napapalapit ako sa Ama sa Langit kapag nagdarasal ako.

• Nais kong mas maging taimtim ang aking mga personal na panalangin.

Habang patuloy mong pinag-aaralan ang 3 Nephi 18, hangarin ang inspirasyon ng Espiritu Santo para tulungan kang malaman kung ano ang magagawa mo para mas mapataimtim ang iyong mga personal na panalangin. Sundin ang mga turo at halimbawa ni Jesucristo habang sinisikap mong magpakabuti pa.

Ang mga turo ng Tagapagligtas tungkol sa panalangin

Basahin ang 3 Nephi 18:15, 18–23, at alamin kung ano ang itinuro ng Tagapagligtas tungkol sa panalangin. Maaari mo ring basahin ang tagubilin ng Tagapagligtas tungkol sa panalangin mula sa Kanyang sermon sa templo sa 3 Nephi 13:5–13.

1. Sagutin ang mga sumusunod na tanong:

   • Alin sa mga turo ni Jesus tungkol sa panalangin ang sa palagay mo ay makatutulong nang lubos sa iyo? Bakit?

Ang halimbawa ng Tagapagligtas sa panalangin

Isipin kung ano ang mararamdaman mo kapag narinig mong ipinagdarasal ka ng Tagapagligtas. Ano sa palagay mo ang ipagdarasal Niya para sa iyo? Isipin kung ano ang maaaring madama mo at kung paano makakaapekto ang mga ito sa sarili mong mga panalangin.

Basahin ang dalawang sumusunod na passage mula sa 3 Nephi 19 at ang isa pang passage na pipiliin mo. Alamin kung ano ang matututuhan mo mula sa halimbawa ng Tagapagligtas sa panalangin.

Maaari mo ring panoorin ang video na “Naglingkod ang mga Disipulo at Nagdasal si Jesucristo para sa mga Tao” mula sa time code na 3:05 hanggang 7:18, na matatagpuan sa ChurchofJesusChrist.org, at sumabay sa pagbabasa ng mga talata sa 3 Nephi 19.

• 3 Nephi 17:14–17

• 3 Nephi 19:19–23

• 3 Nephi 19:27–29

• Mateo 26:39–42

• Juan 17:1, 4, 8–9

• Doktrina at mga Tipan 45:3–5

2. Sagutin ang mga sumusunod na tanong:

   • Ano ang natutuhan mo tungkol sa panalangin mula sa halimbawa ng Tagapagligtas?

   • Ano ang natutuhan mo tungkol sa nadarama ng Tagapagligtas tungkol sa iyo?

   • Sa iyong palagay, paano makagagawa ng kaibhan sa iyong mga panalangin ang tularan ang Kanyang halimbawa?

Ang ating mga personal na panalangin

Pumili ng kahit isa sa mga turo ng Tagapagligtas o isang bagay na ipinakita Niya sa panalangin na maaari mong isama sa iyong mga personal na panalangin. Gumawa ng isang paalala at simulang gawin ito ngayon. Habang ginagawa mo ito, pansinin kung paano ito nakatutulong para maging mas makabuluhan ang iyong mga panalangin at kung paano nito naiimpluwensyahan ang iyong ugnayan sa Ama sa Langit.

Maaari mong idagdag ang ilan sa natutuhan mo ngayon sa iyong journal entry na “Pag-aaral ng tungkol kay Jesucristo sa 3 Nephi.”

Opsiyonal: Gusto Mo Bang May Matutuhan Pa?

Paano pinagpapala ng panalangin ang mga pamilya?

Ibinahagi ni Pangulong Henry B. Eyring ng Unang Panguluhan:

Kapag nagdarasal kayo ng inyong pamilya o ipinagdarasal ninyo sila, madarama ninyo ang pagmamahal ninyo at ng Tagapagligtas para sa kanila. Lalo itong magiging espirituwal na kaloob ninyo kapag hinangad ninyo ito. Madarama ito ng inyong mga kapamilya kapag nagdasal kayo nang may higit na pananampalataya. (Henry B. Eyring, “Ang Kababaihan at ang Pag-aaral ng Ebanghelyo sa Tahanan,” Liahona, Nob. 2018, 60)

Ano ang maaari kong ipanalangin?

Itinuro ni Pangulong M. Russell Ballard ng Korum ng Labindalawang Apostol:

Inaanyayahan ko kayong manalangin sa tuwina. Manalangin para sa inyong pamilya. Manalangin para sa mga pinuno ng mga bansa. Manalangin para sa matatapang na taong nangunguna sa kasalukuyang mga labanan laban sa mga salot sa lipunan, kalikasan, pulitika, at buhay na may epekto sa lahat ng tao sa buong mundo: sa mayaman at sa mahirap, sa bata at sa matanda.

Itinuro sa atin ng Tagapagligtas na huwag nating limitahan kung para kanino tayo mananalangin. Sabi niya, “Ibigin ninyo ang inyong mga kaaway, pagpalain ninyo sila na sumusumpa sa inyo, gawan ninyo ng mabuti sila na napopoot sa inyo, at ipanalangin ninyo sila na may masamang hangarin sa paggamit sa inyo at umuusig sa inyo” [Mateo 5:44]. (M. Russell Ballard, “Subalit Maging Handa Kayo sa Bawat Panahon, na Nananalangin,” Liahona, Nob. 2020, 78)

Ipinahayag ni Elder David A. Bednar ng Korum ng Labindalawang Apostol:

Ang pagsamo sa Ama sa Langit para sa mga pagpapalang nais natin sa ating sariling buhay ay mabuti at tama. Gayunman, ang taimtim na panalangin para sa iba, kapwa yaong mga mahal natin at yaong mga gumagamit sa atin na may masamang hangarin, ay mahalaga ring sangkap sa makahulugan nating panalangin. Tulad ng mas madalas na pasasalamat sa ating mga dalangin ay nagbubuhos ng paghahayag, gayundin ang pagdarasal para sa iba nang buong lakas ng ating kaluluwa ay nagpapalakas sa ating kakayahan na pakinggan at sundin ang tinig ng Panginoon. (David A. Bednar, “Laging Manalangin,” Liahona, Nob. 2008, 43)

Bakit tayo nagdarasal sa Ama sa Langit?

Itinuro sa atin na manalangin tayo sa Ama sa Langit. Hindi tayo nananalangin kay Jesucristo o sa sinumang tao. Para madamang malapit tayo sa ating mga magulang sa langit, maaaring makadama ang ilang tao ng hangaring manalangin sa Ina sa Langit. Tinalakay ito ng mga lider ng Simbahan sa pamamagitan ng pagtuturo sa halimbawa ni Jesucristo.

Itinuro ni Elder Dale G. Renlund ng Korum ng Labindalawang Apostol:

Itinuro ng Tagapagligtas sa Kanyang mga disipulo, “Kinakailangan na lagi kayong manalangin sa Ama sa aking pangalan” [3 Nephi 18:19]. Sinusundan natin ang huwarang ito at itinutuon ang ating pagsamba sa ating Ama sa Langit sa pangalan ni Jesucristo at hindi tayo nagdarasal sa Ina sa Langit. (Dale G. Renlund, “Ang Inyong Banal na Katangian at Walang Hanggang Tadhana,” Liahona, Mayo 2022, 70)

3 Nephi 19:18, 22. Bakit nanalangin ang mga disipulo kay Jesus?

Ipinaliwanag ni Elder Bruce R. McConkie (1915-1985) ng Korum ng Labindalawang Apostol:

Nagkaroon ng espesyal na dahilan kung bakit naganap ito sa pagkakataong ito at nang minsan lang. Itinuro na sa kanila ni Jesus na manalangin sa Ama sa kanyang pangalan, na siyang una nilang ginawa. … Nasa harapan nila si Jesus bilang simbolo ng Ama…. Sa pagkakita sa kanya, tila nakita na rin nila ang Ama; sa pagdarasal sa kanya, tila nanalangin na rin sila sa Ama. Ito ay isang espesyal at natatanging sitwasyon. (Bruce R. McConkie, The Promised Messiah: The First Coming of Christ [1978], 560–61)