3 Nefi 23

Kërkimi me Zell i Shkrimeve të Shenjta

Si po ecën me studimin vetjak të shkrimeve të shenjta? Çfarë ndryshimi sjell kjo në jetën tënde? Tek 3 Nefi 23, Jezusi theksoi rëndësinë e ruajtjes dhe studimit të shkrimeve të shenjta dhe fjalëve të profetëve. Ky mësim ka për qëllim të të ndihmojë t’i studiosh më me zell fjalët e Zotit.

Studimi yt i përditshëm vetjak i shkrimeve të shenjta

Në minutën e ardhshme, shiko se sa nga pikat vijuese mund t’i kërkosh dhe gjesh në dhomën ose shtëpinë tënde: një telefon, një libër, një figurë, një kupë, një jastëk dhe një këpucë.

• Çfarë do të thotë të kërkosh?

• Çfarë ka interesante ose emocionuese kërkimi?

• Çfarë mund të ketë të vështirë ose shkurajuese tek ai?

Ftesa e Shpëtimtarit

Lexo tek 3 Nefi 23:1–5, duke kërkuar se çfarë na urdhëroi Shpëtimtari të kërkojmë dhe pse.

Në kapitujt e mëparshëm, Shpëtimtari citoi një pjesë të mirë të Isaias për t’i ndihmuar dhe bekuar nefitët. (Shih te 3 Nefi 16:18–20; 20:32, 34–45; 21:8; 22:1–17.)

• Çfarë arsyesh na dha Zoti për t’i kërkuar fjalët e Isaias? (shih te 3 Nefi 23:1–3).

• Sipas vargut tek 3 Nefi 23:5, përse duhet t’ua vëmë veshin fjalëve të Zotit dhe fjalëve të profetëve?

Një nga parimet e rëndësishme që mësojmë në këtë mësim është se Shpëtimtari na urdhëron t’ua vëmë veshin fjalëve të Tij dhe t’i kërkojmë me zell fjalët e profetëve.

• Si mendon, çfarë do të thotë të kërkosh me zell në shkrimet e shenjta?

Ndalu një çast për të reflektuar mbi studimin e shkrimeve të shenjta. Kjo mund të përfshijë studimin vetjak ose familjar, si edhe studimin në kishë dhe seminar. A e ndien se kërkon me zell në shkrimet e shenjta? Përse po ose përse jo?

1. Përgjigju për pyetjet vijuese:

   • Cilat janë disa arsye përse mund të jetë e vështirë të kërkosh me zell në shkrimet e shenjta?

   • Pavarësisht këtyre vështirësive, cilat janë disa gjëra që ti i ke bërë ose mund t’i bësh, për të pasur një përvojë kuptimplotë të studimit të shkrimeve të shenjta?

Ja disa shembuj:

• Lutu përpara se të studiosh.

• Shenjoji fjalët dhe frazat e rëndësishme, sidomos ato që të ndihmojnë ta njohësh Shpëtimtarin më mirë.

• Kërkoji fjalët ose frazat që janë të vështira për t’u kuptuar.

• Ndalo dhe përmblidhe atë që ke lexuar.

• Përdor referenca-kryq për ta kuptuar më mirë një temë ose doktrinë.

Për t’i ushtruar dy prej këtyre aftësive, lexo te 3 Nefi 23:6–14 dhe bëje sa vijon:

• Përmblidhe me fjalët e tua atë që lexon.

• Shenjoje çdo fjalë ose frazë që të ndihmon ta kuptosh më mirë Shpëtimtarin.

• Cilat fjalë e bëjnë të qartë se Shpëtimtari kujdeset për atë që është e shënuar në shkrimin e shenjtë?

• Si mund të ndikojë dijenia e kësaj rreth Shpëtimtarit në mënyrën se si ti i studion shkrimet e shenjta?

Ushtrimi i studimit të efektshëm të shkrimeve të shenjta

Shpenzo disa minuta për ta ushtruar kërkimin me zell në shkrimet e shenjta. Mund të zgjedhësh ta studiosh një kapitull ose t’i kërkosh vargjet rreth një teme për të cilën dëshiron të dish më shumë. Përdor të paktën një aftësi të shkrimit të shenjtë që të erdhi ndërmend ose e zbulove në listën më sipër.

2. Përgjigju për pyetjet vijuese:

   • Çfarë qasje studimi përdore? Përse mund të të ndihmojë kjo të studiosh më me zell?

   • Çfarë mësove rreth Shpëtimtarit që nuk e kishe kuptuar më parë?

   • Cilat nga këto aftësi mund t’i zbatosh në studimin tënd të ardhshëm të shkrimeve të shenjta? Si do ta bësh këtë?

Gjatë javës së ardhshme, reflekto mbi atë që ke mësuar sot. Zgjidh një mënyrë se si mund të përpiqesh të kërkosh në shkrimet e shenjta më me zell. Merre parasysh se si kjo mund të të ndihmojë në jetën tënde.

Fakultative: Dëshiron të Mësosh më Shumë?

Cilat janë disa bekime që mund të vijnë nga studimi i shkrimeve të shenjta?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

“Meditimi mbi një varg të shkrimeve të shenjta mund të jetë kyçi për të hapur zbulesën dhe drejtimin e frymëzimin nga Fryma e Shenjtë. Shkrimet e shenjta mund të qetësojnë një shpirt të trazuar, duke i dhënë paqe, shpresë dhe rivendosje të besimit në aftësinë e njeriut për të kapërcyer sfidat e jetës. Ato kanë fuqinë e madhe të shërojnë sfidat emocionale kur ka besim te Shpëtimtari. Ato mund të përshpejtojnë shërimin fizik.” (Riçard G. Skot, “Fuqia e Shkrimeve të Shenjta”, Liahona, nëntor 2011, f. 6)

Si mund ta ndihmojë leximi i Librit të Mormonit familjen time?

Presidenti Henri B. Ajring, i Presidencës së Parë, dha mësim:

“Nëpërmjet Librit të Mormonit, Zoti mund të na mësojë gjithashtu rreth të qenit me njerëzit dhe shërbimit ndaj tyre. Ky libër e zbulon vullnetin e Zotit për jetën familjare në një mënyrë që shkrimet e tjera të shenjta as nuk e trajtojnë. Unë besoj se kjo është më së shumti për shkak të strukturës së tij interesante. Ka të bëjë me familjet; ka të bëjë me marrëdhëniet e njerëzve. Fillon me familjet, përfundon me familjet dhe ne arrijmë t’i duam këto familje.” (Henry B. Eyring, “A Discussion on Scripture Study”, Liahona, korrik 2005, f. 22)

Si mund ta përmirësoj studimin vetjak të shkrimeve të shenjta?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Një nga mënyrat më të mira për t’iu afruar Atij, si edhe për të mësuar mbi Të e për t’u bërë më shumë si Zoti Jezu Krisht, është që të studiojmë në mënyrë të vazhdueshme shkrimet e shenjta, të ‘ushqehemi me bollëk [çdo ditë] me fjalët e Krishtit’ (2 Nefi 32:3).

Ju lutem, vini re që përdora fjalën studiojmë dhe jo fjalën lexojmë. Studimi dhe të ushqyerit sugjeron një përqendrim dhe një forcë që shkojnë përtej leximit të zakonshëm ose shqyrtimit të shpejtë. Studimi dhe të ushqyerit, të pasuar nga lutja e sinqertë dhe zbatimi i palëkundur i të vërtetave dhe parimeve që mësojmë, çojnë në vendim vetjak, zotim shpirtëror dhe një dritë të fortë dëshmie. Studimi, mësimi, lutja dhe zbatimi i përafërt i të vërtetave të ungjillit janë të gjitha elemente kyç në procesin e ardhjes te Shpëtimtari.” (David A. Bednar, “Because We Have Them before Our Eyes”, New Era, prill 2006, f. 4)