Mormoni 8:27–41; 9:1–6, 27–37

Shkruar për Kohën Tonë

Imagjino sikur të jetoje qindra vite më parë, por duke e ditur se si do të ishte të jetoje në kohën tonë. Moroni e përjetoi këtë; Zoti i tregoi atij kohën tonë. Moroni përshkroi mëkatet dhe qëndrimet që do të mbizotëronin në ditët e fundit. Ai na ftoi të “ktheh[emi] te Zoti” (Mormoni 9:6) dhe dha këshillë tjetër për të na ndihmuar ta ndjekim Jezu Krishtin. Ky mësim mund të të ndihmojë të kuptosh se Libri i Mormonit është shkruar për të na ndihmuar ne, në ditët e mëvonshme, që të drejtohemi te Zoti.

Moroni na shkroi neve

Imagjino sikur jetove shumë kohë më parë dhe t’u kërkua të shkruash një mesazh që do të vendosej në një kapsulë kohe që do të hapej në kohën tonë.

• Çfarë paralajmërimi, këshille ose nxitjeje do të jepje për ta ndihmuar dikë të orientohet në sfidat e sotme?

Para se të vdiste Mormoni, ia besoi birit të tij, Moronit, fletët e arta (shih te Mormoni 8:1). Moroni përshkroi një mënyrë se si Zoti e ndihmoi atë të dinte se çfarë të shkruante për njerëzit në kohën tonë. Lexo te Mormoni 8:34–35; 9:30, duke kërkuar mënyrat se si Zoti e bekoi Moronin në përgjegjësinë e tij të shenjtë.

• Çfarë i tregoi Zoti Moronit?

• Çfarë të vërtetash mund të mësojmë nga kjo?

Një e vërtetë që mund ta mësojmë, është se Jezu Krishti i frymëzoi profetët e Librit të Mormonit që të shkruanin duke pasur në mendje kohën tonë.

• Si mund të ndikojë njohuria se profetët e Librit të Mormonit e panë kohën tonë, në mënyrën se si e lexojmë Librin e Mormonit?

Lexoje thënien vijuese nga Presidenti Ezra Taft Benson (1899–1994) rreth profetëve të Librit të Mormonit:

“Nëse ata e panë kohën tonë dhe zgjodhën ato gjëra që do të ishin me vlerën më të madhe për ne, a nuk është ajo mënyra se si duhet ta studiojmë ne Librin e Mormonit? Ne duhet ta pyetim veten tonë vazhdimisht: ‘Përse Zoti e frymëzoi Mormonin (ose Moronin apo Almën) që ta përfshijë atë në analin e tij? Çfarë mësimi mund të mësoj nga kjo që të më ndihmojë të jetoj në këtë kohë dhe epokë?’” (Ezra Taft Benson, “The Book of Mormon—Keystone of Our Religion”, Ensign, nëntor 1986, f. 6; Mësime të Presidentëve të Kishës: Ezra Taft Benson, f. 147)

Bërja e pyetjeve për veten tënde si ato të sugjeruara nga Presidenti Benson është një aftësi e efektshme e studimit të shkrimeve të shenjta që mund të të ndihmojë të gjesh më shumë kuptim dhe lidhje në studimin tënd të Librit të Mormonit. Nëse dëshiron, mund t’i mbash shënim këto pyetje që t’u referohesh kur studion.

• Si mendon se bërja e këtyre pyetjeve mund ta përmirësojë studimin tënd të shkrimeve të shenjta?

Lexo te Mormoni 8:27–33 ose Mormoni 8:36–41, duke kërkuar se si e përshkroi Moroni gjendjen shpirtërore të popullit në kohën tonë.

• Cilën prej gjendjeve të përshkruara nga Moroni e sheh në shoqërinë tonë?

• Si mund të ndikojnë këto qëndrime dhe sjellje në besimin tonë në Jezu Krishtin?

Zgjidhjet shpirtërore në kohën tonë

Lexo te Mormoni 9:6, 27–31, duke kërkuar se çfarë e frymëzoi Zoti Moronin të shkruante për të na ndihmuar t’i kapërcejmë gjendjet shpirtërore negative.

1. Përgjigju për dy prej pyetjeve vijuese:

   • Çfarë dha mësim Moroni që mund të na ndihmojë t’i mposhtim mëkatet dhe qëndrimet e përhapura në kohën tonë?

   • Cili prej këtyre mësimeve mund t’i ndihmojë më mirë të rinjtë e këtij brezi të mbështeten më shumë te Jezu Krishti?

   • Cili prej këtyre mësimeve mendon se mund të të ndihmojë më së shumti pikërisht tani? Përse?

Mësime nga Libri i Mormonit

Libri i Mormonit u shkrua për të na ndihmuar të besojmë dhe të drejtohemi te Jezu Krishti (shih te 1 Nefi 6:4; Mormoni 7:5; Moroni 10:30, 32).

2. Plotësoje sa vijon:

   Gjej një ose më shumë fragmente të Librit të Mormonit që japin mësim rreth Jezu Krishtit. Përshkruaje se si fragmenti mund të të ndihmojë të besosh te Jezu Krishti dhe të drejtohesh tek Ai (shih te Mormoni 9:6).

   Ndërsa vazhdon ta studiosh Librin e Mormonit, kije parasysh të bësh pyetje si ato që u nxitën nga Presidenti Benson. Kushtoji vëmendje mënyrës se si bërja e atyre pyetjeve ndikon në aftësinë tënde për ta dëgjuar zërin e Zotit ndërsa i studion shkrimet e shenjta.

Fakultative: Dëshiron të Mësosh më Shumë?

Për kë u shkrua Libri i Mormonit?

Plaku Geri E. Stivenson, i Kuorumit të Dymbëdhjetë Apostujve, tregoi:

“A e kuptoni se Libri i Mormonit u shkrua për ju – dhe për kohën tuaj? Ky libër është një nga bekimet e të jetuarit në atë që ne e quajmë periudha ungjillore e plotësisë së kohëve. Edhe pse Libri i Mormonit u shkrua nga autorë të frymëzuar të lashtë – shumë nga të cilët qenë profetë – ata dhe njerëzit e kohës së tyre nuk e kishin përfitimin e pasjes së të gjithë librit. Ju tani e keni lehtësisht të arritshëm analin e shenjtë që profetët, priftërinjtë dhe mbretërit e mbajtën si thesar, e përqafuan dhe e ruajtën! Ju keni përfitimin që ta mbani të plotë në duart tuaja Librin e Mormonit. Është interesante, një nga profetët e Librit të Mormonit, Moroni, e pa kohën tonë – kohën tuaj. Ai madje ju pa ju, në vegim, shumë qindra vite më parë!” (Geri E. Stivenson, “Shihni te Libri, Shihni te Zoti”, Liahona, nëntor 2016, f. 46)

Si i përshkroi Moroni ditët e fundit?

Motra Boni L. Oskarson, ish‑Presidente e Përgjithshme e Të Rejave, dha mësim:

“Moroni thotë se ka parë ditët tona dhe ato përfshijnë luftëra dhe zhurma luftërash, ndotje të madhe, vrasje, grabitje dhe njerëz që na thonë se nuk ka gjëra të drejta ose të gabuara në sytë e Perëndisë. Ai përshkruan njerëz që janë të mbushur me krenari, që i janë dhënë veshjes me rroba të shtrenjta dhe që tallen me fenë. Atij iu treguan njerëz që janë kaq të varur ndaj gjërave të botës, saqë lejojnë që ‘nevojtari dhe i zhveshuri, dhe i sëmuri, dhe fatkeqi t’[i]u kalojnë pranë’ [Mormoni 8:39] pa i vënë re.

Moroni na bën një pyetje që përshkon shpirtin – neve që po jetojmë në këto kohë. Ai thotë: ‘Përse keni turp të merrni mbi vete emrin e Krishtit?’ [Mormoni 8:38.] Kjo akuzë e përshkruan saktësisht gjendjen laike në rritje, në botën tonë.” (Boni L. Oskarson, “Rrituni në Forcë, Motra në Sion”, Liahona, nëntor 2016, f. 12)

Në çfarë gjuhe u shkrua Libri i Mormonit?

Moroni deklaroi se ai kishte aftësinë për të shkruar në të paktën dy gjuhë: gjuhën hebraike dhe gjuhën egjiptiane të reformuar. Ai vuri në dukje se, “po të kishin qenë fletët … mjaft të mëdha”, ai do të kishte shkruar në hebraisht; megjithatë, ata që e mbajtën analin, përdorën gjuhën “egjiptiane të reformuar” për shkak të mungesës së hapësirës (Mormoni 9:32–33). Më parë në Librin e Mormonit, si Nefi, edhe mbreti Beniamin, e pranuan përdorimin e gjuhës egjiptiane nga ana e tyre. Nefi shpalli se ai shkroi në “gjuh[ën] e Egjiptianëve” kur gdhendi fletët e vogla (1 Nefi 1:2).

Megjithatë, Moroni pranoi se ai shkroi në gjuhën “egjiptiane të reformuar” që kishte qenë “pasua[r] dhe … ndryshua[r] …, sipas mënyrës [së tyre] të të folurit” (Mormoni 9:32), duke treguar se kishin ndodhur disa përshtatje në gjuhë gjatë një mijë viteve që nga koha e Lehit. Kjo mund të shpjegojë arsyen përse Moroni përfundoi me komentin se “asnjë popull tjetër nuk e di gjuhën tonë”, por që Perëndia kishte “përgatitur mjetet për” interpretimin dhe përkthimin përfundimtar të analit (Mormoni 9:34).