Mormon 8:27–41; 9:1–6, 27–37

Isinulat para sa Ating Panahon

si Moroni na nagsusulat sa mga lamina

Ipagpalagay na nabuhay ka daan-daang taon na ang nakalipas ngunit alam mo kung ano ang pakiramdam ng mabuhay sa ating panahon. Naranasan ito ni Moroni; ipinakita sa kanya ng Panginoon ang ating panahon. Inilarawan ni Moroni ang mga kasalanan at pag-uugali na magiging laganap sa mga huling araw. Inanyayahan niya tayong “bumaling … sa Panginoon” (Mormon 9:6) at nagbigay siya ng iba pang payo na tutulong sa atin na sundin si Jesucristo. Ang lesson na ito ay makatutulong sa iyo na maunawaan na ang Aklat ni Mormon ay isinulat upang tulungan tayo, sa mga huling araw, na bumaling sa Panginoon.

Sumulat si Moroni sa atin

Ipagpalagay na nabuhay ka noong unang panahon at hiniling sa iyong sumulat ng mensaheng ilalagay sa isang time capsule na bubuksan sa ating panahon.

• Anong babala, payo, o panghihikayat ang ibibigay mo para tulungan ang isang tao na harapin ang mga hamon ngayon?

Bago namatay si Mormon, ipinagkatiwala niya sa kanyang anak na si Moroni ang mga laminang ginto (tingnan sa Mormon 8:1). Inilarawan ni Moroni ang isang paraan na tinulungan siya ng Panginoon na malaman kung ano ang isusulat sa mga tao sa ating panahon. Basahin ang Mormon 8:34–35; 9:30, at alamin ang mga paraan na pinagpala ng Panginoon si Moroni sa kanyang sagradong responsibilidad.

• Ano ang ipinakita ng Panginoon kay Moroni?

• Anong mga katotohanan ang matututuhan natin mula rito?

Ang isang katotohanan na natutuhan natin ay binigyang-inspirasyon ni Jesucristo ang mga propeta sa Aklat ni Mormon na magsulat na isinasaisip ang ating panahon.

• Paano maaaring makaimpluwensya sa paraan ng pagbabasa natin ng Aklat ni Mormon ang kaalamang nakita ng mga propeta sa Aklat ni Mormon ang ating panahon?

Basahin ang sumusunod na pahayag ni Pangulong Ezra Taft Benson (1899–1994) tungkol sa mga propeta sa Aklat ni Mormon:

Pangulong Ezra Taft Benson

Kung nakita nila ang ating panahon, at pinili ang mga bagay na iyon na magiging malaki ang kahalagahan sa atin, hindi ba iyon ang dapat na paraan ng pag-aaral natin ng Aklat ni Mormon? Dapat nating palaging itanong sa ating sarili, “Bakit binigyang-inspirasyon ng Panginoon si Mormon (o si Moroni o si Alma) na isama iyon sa kanyang talaan? Anong aral ang matututuhan ko mula roon na tutulong sa akin na mamuhay sa panahong ito?” (Ezra Taft Benson, “The Book of Mormon—Keystone of Our Religion,” Ensign, Nob. 1986, 6)

Ang pagtatanong sa iyong sarili ng tulad ng mga iminungkahi ni Pangulong Benson ay isang epektibong kasanayan sa pag-aaral ng mga banal na kasulatan na makatutulong sa iyo na makahanap ng higit na kahulugan at kaugnayan sa iyong pag-aaral ng Aklat ni Mormon. Maaari mong isulat ang mga tanong na ito para magamit mo sa iyong pag-aaral.

• Sa iyong palagay, paano mapahuhusay ang pag-aaral mo ng mga banal na kasulatan ng pagtatanong ng mga ito?

Basahin ang Mormon 8:27–33 o Mormon 8:36–41, at alamin kung paano inilarawan ni Moroni ang espirituwal na kalagayan ng mga tao sa ating panahon.

• Alin sa mga kalagayang inilarawan ni Moroni ang nakikita mo sa ating lipunan?

• Paano nakakaapekto ang mga pag-uugali at gawing ito sa ating paniniwala kay Jesucristo?

Mga espirituwal na solusyon sa ating panahon

Basahin ang Mormon 9:6, 27–31, at alamin ang isinulat ni Moroni na binigyang-inspirasyon ng Panginoon para tulungan tayong madaig ang mga negatibong espirituwal na kalagayan.

icon, isulat

1. Sagutin ang dalawa sa mga sumusunod na tanong:

   • Ano ang itinuro ni Moroni na makatutulong sa atin na madaig ang mga kasalanan at pag-uugali na karaniwan sa ating panahon?

   • Alin sa mga turong ito ang pinakamahusay na makatutulong sa mga kabataan ng henerasyong ito na mas umasa kay Jesucristo?

   • Sa palagay mo, alin sa mga turong ito ang makatutulong sa iyo nang lubos ngayon? Bakit?

Mga turo sa Aklat ni Mormon

Ang Aklat ni Mormon ay isinulat upang tulungan tayong maniwala at bumaling kay Jesucristo (tingnan sa 1 Nephi 6:4; Mormon 7:5; Moroni 10:30, 32).

icon, isulat

2. Gawin ang sumusunod:

   Maghanap ng isa o mahigit pang passage sa Aklat ni Mormon na nagtuturo tungkol kay Jesucristo. Ilarawan kung paano makatutulong sa iyo ang passage na maniwala kay Jesucristo at bumaling sa Kanya (tingnan sa Mormon 9:6).

   Habang patuloy mong pinag-aaralan ang Aklat ni Mormon, alalahaning magtanong tulad ng hinikayat ni Pangulong Benson na itanong natin. Bigyang-pansin kung paano nakakaapekto ang pagtatanong na iyon sa kakayahan mong marinig ang tinig ng Panginoon habang pinag-aaralan mo ang mga banal na kasulatan.

Opsiyonal: Gusto Mo Bang May Matutuhan Pa?

Para kanino isinulat ang Aklat ni Mormon?

Ibinahagi ni Elder Gary E. Stevenson ng Korum ng Labindalawang Apostol:

Elder Gary E. Stevenson

Alam ba ninyo na ang Aklat ni Mormon ay isinulat para sa inyo—at para sa inyong panahon? Ang aklat na ito ay isa sa mga pagpapala ng mabuhay sa tinatawag nating dispensasyon ng kaganapan ng mga panahon. Bagama’t ang Aklat ni Mormon ay isinulat ng inspiradong sinaunang mga awtor—na karamihan ay mga propeta—sila at ang mga tao sa kanilang panahon ay hindi nagkaroon ng buong aklat na ito. Ngayo’y abot-kamay na ninyo ang sagradong talaang pinakaingatan, tinanggap, at pinangalagaan ng mga propeta, saserdote, at hari! Pribilehiyo ninyong mahawakan ang buong Aklat ni Mormon. Ang nakakatuwa, nakita ng isa sa mga propeta sa Aklat ni Mormon, si Moroni, ang ating panahon—ang inyong panahon. Nakita pa nga niya kayo, sa pangitain, daan-daang taon na ang nakararaan! (Gary E. Stevenson, “Basahin ang Aklat, Umasa sa Panginoon,” Liahona, Nob. 2016, 46)

Paano inilarawan ni Moroni ang mga huling araw?

Itinuro ni Sister Bonnie L. Oscarson, dating Young Women General President:

Pangulong Bonnie L. Oscarson

Sinabi ni Moroni na nakita niya ang ating panahon, at kasama roon ang mga digmaan at mga balita tungkol sa digmaan, polusyon, patayan, nakawan, at mga taong nagsasabi sa atin na walang tama o mali sa mata ng Diyos. Inilarawan niya ang mga taong palalo, na ang inaalala ay ang isusuot na mamahaling damit, at pinagtatawanan ang relihiyon. Ipinakita sa kanya ang mga taong nahuhumaling sa mga makamundong bagay kaya “ang mga nangangailangan, at ang hubad, at ang may karamdaman at ang naghihirap na dumaraan” [Mormon 8:39] ay hindi napapansin.

Malalim ang tanong ni Moroni sa atin—tayo na nabubuhay sa mga panahong ito. Sabi niya, “Bakit kayo nahihiyang taglayin sa inyong sarili ang pangalan ni Cristo?” [Mormon 8:38]. Tumpak na inilalarawan ng paratang na ito ang lumalalang sekular na kalagayan ng ating mundo. (Bonnie L. Oscarson, “Tumanggap ng Responsibilidad nang May Lakas, Kababaihan ng Sion,” Liahona, Nob. 2016, 12)

Sa anong wika isinulat ang Aklat ni Mormon?

Ipinahayag ni Moroni na may kakayahan siyang makapagsulat sa kahit dalawang wika: Hebreo at ang binagong wikang Egipto. Sinabi niya na kung ang “mga lamina ay naging sapat ang laki,” isinulat niya sana ito sa wikang Hebreo; gayunman, ang mga nag-ingat ng talaan ay gumamit ng “binagong wikang Egipto” dahil sa kakulangan ng espasyong pagsusulatan (Mormon 9:32–33). Sa unang bahagi ng Aklat ni Mormon, kapwa sinabi nina Nephi at Haring Benjamin na wikang Egipto ang gamit nila. Sinabi ni Nephi na nagsulat siya sa “wika ng mga taga-Egipto” nang inukit niya ang maliliit na lamina (1 Nephi 1:2).

Gayunpaman, sinabi ni Moroni na sumulat siya gamit ang “binagong wikang Egipto” na “ipinasa at … binago, alinsunod sa paraan ng [kanilang] pagsasalita” (Mormon 9:32), na ipinahihiwatig na nagkaroon ng ilang pag-aakma sa paggamit ng wika sa nakalipas na libu-libong taon simula noong panahon ni Lehi. Maaaring ipinaliliwanag nito kung bakit nagtapos si Moroni sa pagsasabing “walang ibang taong nakaaalam ng aming wika” ngunit ang Diyos ay “naghanda ng mga paraan” para sa pagpapaliwanag at pagsasalin ng talaan (Mormon 9:34).