Etera 3

“Finoana nihoa-pampana tokoa”

Efa tena noheverinao marina ve ny fahasamihafana azon’ny finoana an’i Jesoa Kristy entina eo amin’ny fiainantsika? Ohatra iray lehibe ny rahalahin’i Jareda izay nanatona ny Tompo niaraka tamina drafitra hamahana ny olany sy nivavaka tamim-panetren-tena niaraka tamin’ny “finoana nihoa-pampana tokoa” (Etera 3:9) ka “ny voaly dia nesorina hiala tamin’ny maso[ny]” (Etera 3:6) ary nahita sy niresaka tamin’ny Tompo izy. Ity lesona ity dia natao hanampiana anao hampihatra finoana an’i Jesoa Kristy amim-panetren-tena.

Ahoana no anehoanao finoana?

Manaova lisitr’olona telo derainao avy ao amin’ny tantaran’ny Fiangonana na soratra masina.

• Inona avy no fomba sasantsasany nanehoan’ireo olona ireo finoana an’i Jesoa Kristy?

• Ahoana no ahafahanao milaza fa mampihatra finoana an’i Jesoa Kristy eo amin’ny fiainanao ianao?

• Nahoana no te hampihatra finoana ianao?

Mba hanampiana anao hisaintsaina ny finoanao an’i Jesoa Kristy, dia soraty ny fahamarinan’ireto fanambarana manaraka ireto, amina ambaratonga 1–5 (1 = tsy … mihitsy; 2 = indraindray; 3 = matetika; 4 = saika mandrakariva; 5 = mandrakariva):

• Mino an’i Kristy aho ary manaiky Azy ho Mpamonjy ahy.

• Amin’ny alalan’ny vavaka amin-kitsimpo amin’ny Ray any An-danitra, izaho dia mikatsaka fanampiana avy amin’ Andriamanitra sy i Jesoa Kristy amin’ny olako ary matoky ny fitarihana sy fanampian’Izy Ireo.

• Manao asa aho ary matoky ny Tompo hanampy ahy.

Rehefa mandalina ity lesona ity ianao, dia mikatsaha ny hianatra misimisy kokoa momba ny fomba ahafahanao mampihatra finoana an’i Jesoa Kristy amim-panetren-tena sy ny antony mety hanaovanao izany.

Mampihatra finoana

Tao amin’ny lesona teo aloha dia nianatra ianao fa nandidy ny rahalahin’i Jareda hanamboatra sambo sy hita ny ranomasimbe ho any amin’ilay tany nampanantenaina ny Tompo; saingy, tsy nisy hazavana ilay sambo. Nangataka ny rahalahin’i Jareda handroso vahaolana ny Tompo (jereo ny Etera 2:23). Rehefa nanao asa tamim-pinoana an’i Jesoa Kristy ny rahalahin’i Jareda, dia nanampy tamin’ny famahana ny olany sy nitahy azy tamin’ny fomba nihoatra izay nangatahiny ny Tompo.

Ny finoan’ny rahalahin’i Jareda

Boky torolalana ho an’ny mpampianatra ny Bokin’i Môrmôna (2024)—“Etera 3: ‘Finoana nihoa-pampana tokoa’”

Vakio ireo andininy eo ambanin’ny tsirairay amin’ireo sary manaraka ireo ary soraty ny zavatra nataon’ny rahalahin’i Jareda na nolazainy mba hanehoana finoana. (Mba hahatakarana ny Etera 3:2–3, dia zava-dehibe ny hahatakarana fa noho ny Fahalavoan’i Adama sy i Eva dia miaina amina tontolo isarahantsika ara-batana amin’ Andriamanitra isika, ary isika rehetra dia manota sy mampisaraka ara-panahy ny tenantsika amin’ Andriamanitra.)

Etera 3:1

Etera 3:2–5

Etera 3:6–10

Etera 3:11–16, 19–20

1. Valio ity fanontaniana manaraka ity:

   • Inona no nianaranao tamin’ny zavatra niainan’ny rahalahin’i Jareda?

Fitsipika iray azontsika ianarana ny hoe rehefa mampihatra finoana ny Tompo amim-panetren-tena isika, dia hanakaiky kokoa Azy.

2. Mba hanampiana anao hahatakatra tsara kokoa ny finoan’ny rahalahin’i Jareda, dia ataovy ny roa amin’ireto sahanasa manaraka ireto:

   1. Ny rahalahin’i Jareda dia “nandrendrika vato kely enina ambin’ny folo avy tamin’ny vatolampy iray,” nitondra ireny teo “an-tampon-tendrombohitra ary nihiaka ny Tompo” (Etera 3:1). Soraty ny antony ahatsapanao fa ampahany manan-danja amin’ny finoantsika ny Tompo ny fahavononana hanao asa sy hanao izay azontsika atao hamahana ny olana.

   2. Rehefa nivavaka ny rahalahin’i Jareda, dia niresaka momba “ny fahalemeny eo anoloan’ [Andriamanitra]” (Etera 3:2) ary nangataka fanampiana tamim-panetren-tena. Soraty ny fomba ahafahan’ny fahatakarana ny fahalementsika sy ny fiankinantsika tanteraka amin’ny Tompo miantraika amin’ny vavaka ataontsika sy ny finoantsika Azy.

   3. Rehefa nangataka ny Tompo hikasika ireo vato mba hampamirapiratra izany ny rahalahin’i Jareda, dia nijoro ho vavolombelona toy izao: “fantatro, Tompo ô, fa manana ny hery rehetra Ianao, ary afaka manao izay rehetra sitrakao ho tombon-tsoan’ny olona” (Etera 3:4). Soraty ny fomba nahatongavanao tamin’ny fahalalana na nahafahanao ho tonga amin’ny fahalalana fa manana ny hery hanampiana antsika amin’ny olantsika ny Tompo. Mety ho azonao ampidirina ny fomba ahafahan’izany fahalalana izany miantraika amin’ny finoantsika Azy.

   4. Ny rahalahin’i Jareda dia nampanantena fa hino ireo teny holazain’ny Tompo any amin’ny hoavy (jereo ny Etera 3:11–12). Soraty hoe nahoana, araka ny eritreritrao, no natoky be ny Tompo ny rahalahin’i Jareda ka nanaiky izany.

Manakaiky kokoa ny Tompo

• Inona avy no fomba samy hafa nitahian’ny Tompo ny rahalahin’i Jareda noho ny finoany?

• Tamin’ny fomba ahoana no nanatonan’ny rahalahin’i Jareda akaiky kokoa ny Tompo tamin’ny alalan’io zavatra niainana io?

Mety hanampy raha asiana marika ny tenin’ny Tompo tamin’ny rahalahin’i Jareda: “avotana amin’ny fahalavoana ianao; noho izany ianao dia entina miverina eo anatrehako” (Etera 3:13). Rehefa mampihatra finoana ny Tompo amin’ny olantsika manokana isika, dia afaka mandray ihany koa ny fanampiany amin’ny tanjontsika mandrakizay handresy ny fisarahantsika Aminy ary hiverina hiaina miaraka Aminy.

Jereo na vakio ny iray amin’ireto ohatra manaraka mombana zatovo mampihatra ny finoan’izy ireo ireto.

• Jereo ny “Faith and the Goal (Finoana sy ny tanjona)” (4:40). Milaza ny fomba ampiharany finoana ny Tompo ny tanora mpilalao baolina kitra matihanina iray.

• Jereo ny “Rebuilding My Faith When I Felt Lost (Nanorina inray ny finoako rehefa nahatsiaro ho very aho)” (6:25). Rehefa niverina aloha avy any amin’ny asa fitoriana ny zatovolahy iray, dia nanorina indray ny finoany an’i Jesoa Kristy.

• Vakio ny tantaran’i Jan Roothoff, zazalahy kely tany Pays-Bas izay nikatsaka ny mpaminany Joseph F. Smith hanasitrana ny masony narary (Saints: The Story of the Church of Jesus Christ in the Latter Days, bok. 3, Boldly, Nobly, and Independent, 1893–1955 [2022], 123–25).

3. Valio ity fanontaniana manaraka ity:

   • Inona no zavatra niainanao na niainan’ny olona fantatrao ka nanamafy ny finoanao an’i Jesoa Kristy?

   Farano amin’ny alalan’ny fanoratana fomba iray tianao hampiharana finoana misimisy kokoa an’i Jesoa Kristy sy ny anton’izany ny lesona. Ireto manaraka ireto dia hevitra ankapobeny hanampiana anao hamita io sahanasa io. Mila mampiditra antsipiriany izay mihatra aminao ianao.

   • Manaova asa manokana hamahana olana iray sy hikatsahana ny fanampian’ny Tompo.

   • Manaova tanjona hivavaka am-panetren-tena kokoa sy hatoky ny Tompo.

   • Manaova zavatra iray amim-pahavitrihana mba hampanakaiky anao amin’ny Tompo.

Mitadiava fomba ahatsapanao ho akaiky kokoa ny Tompo rehefa manao asa amim-pinoana ianao.

Tsy voatery hatao: Te hianatra bebe kokoa ve ianao?

Etera 3:7, 9. Nahoana no mametraka fanontaniana amintsika ny Tompo na dia fantany aza ny valiny?

Nampianatra toy izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Andriamanitra dia “mahafantatra ny zavatra rehetra ary tsy misy na inona na inona izay tsy fantany” [2 Nefia 9:20]. … Na izany na tsy izany, matetika Andriamanitra no nametraka fanontaniana araka ny olona mety maty, izay matetika hitsapana ny finoan’izy ireo, handrefesana ny fahitsian’izy ireo, na hampivelarana ny fahalalan’izy ireo. (Jeffrey R. Holland, Christ and the New Covenant: The Messianic Message of the Book of Mormon [1997], 19–20)

Etera 3:15. Tsy mbola nampiseho ny Tenany tamin’olona mihitsy ve ny Tompo talohan’ny rahalahin’i Jareda?

Ny andininy 15 dia andininy sarotra satria fantatsika fa Andriamanitra dia niseho tamin’i Adama (jereo ny Fotopampianarana sy Fanekempihavanana 107:53–55), i Enoka (jereo ny Moses 7:4), ary i Noa (jereo ny Genesisy 6:8–9), ireo rehetra ireo dia niaina talohan’ny rahalahin’i Jareda. Ny Loholona Jeffrey R. Holland ao amin’ny Kôlejin’ny Apôstôly Roambinifolo dia nanome heviny mety hitombina maro: (1) ny Tompo dia milaza fa tsy mbola niseho tamina Jaredita mihitsy Izy taloha; (2) ny fampiasana ilay teny hoe “olona” dia mety hidika fa tsy mbola naneho ny tenany tamin’olona tsy voavotra na tsy voamasina mihitsy ny Tompo; (3) tsy mbola nahita ny Tompo naneho ny tenany tamina fomba feno toy izany, tahaka ny nataony tamin’ny rahalahin’i Jareda; (4) mety ho io no fotoana voalohany nisehoan’ny Tompo sy nanehoany ny tenany ho Jesoa Kristy, ilay Zanak’ Andriamanitra; ary ny hoe (5) tsy hoe ny rantsantanan’ny Tompo fotsiny no hitan’ny rahalahin’i Jareda fa ny “endrika maneho kokoa ny vatana nofo sy rà ary taolan’’i Kristy amin’ny fomba mazava” ihany koa (Jereo ny Christ and the New Covenant: The Messianic Message of the Book of Mormon [1997], 21–22).