Etera 4–5

“Famelabelarana aminy ny fanambarako rehetra”

ireo takela-bolamena

Mahatsapa ho vonona hianatra misimisy kokoa avy amin’ny Tompo ve ianao? Raha tsia, inona no azonao atao? Ny Tompo dia nandidy an’i Môrônia hamehy ilay fahitan’ny rahalahin’i Jareda voarakitra an-tsoratra ary koa nanazava fa ho ambara ireo rakitsoratra ireo rehefa manana finoana tahaka ny nananan’ny rahalahin’i Jareda ny vahoaka. Ity lesona ity dia natao hanampiana anao hahatakatra ny zavatra azonao atao mba hahazoana fanambarana misimisy kokoa.

Rehefa vonona isika

Mieritrereta zavatra iray izay sarobidy manokana aminao na ny fianakavianao.

• Na dia mety ho tianao aza ny mizara io zavatra io amin’ny hafa, nahoana no mety ho tena hitandrina be ianao amin’ny famelana ny ankizy kely iray hitazona azy?

• Inona no zavatra mila ianaran’ny ankizy iray na ataony izay vao atokisanao amin’izany zavatra izany izy?

Tahaka izany koa, ny Tompo dia tia manambara fahamarinana amintsika, saingy miandry Izy mandra-pahavonona antsika handray izany (jereo ny Almà 12:9–11).

Ilay ampahany nofehezina amin’ny Bokin’i Môrmôna

Ohatra iray amin’ny fiandrasan’ny Tompo mandra-pahavononantsika izay vao manambara fahamarinana ny ampahany nofehezina amin’ny Bokin’i Môrmôna. Nodidina tsy hanokatra na handika izany ampahany izany i Joseph Smith (jereo ny Etera 5:1). Izy io dia mirakitra ny rakitsoratra momba ny fahitana nomena ny rahalahin’i Jareda.

Mba hanampiana anao hianatra momba ilay ampahany nofehezina amin’ny Bokin’i Môrmôna, dia ampiasao ireo soratra masina voatanisa anatina fononteny mba hamaliana ireto fanontaniana marina sa diso ireto.

1. Naneho ny Tenany tamin’ny rahalahin’i Jareda ny Mpamonjy ary nanompo azy (Etera 3:20).

2. Ny Tompo dia naneho tamin’ny rahalahin’i Jareda ny mponina rehetra tamin’ny tany, izay efa nisy sy izay hisy, tsy nisy na inona na inona nohazoniny tsy ho hitany (Etera 3:25; 4:4).

3. Nandidy ny rahalahin’i Jarèda ny Tompo mba hanoratra ireo zavatra izay hitany sy hamehy ny rakitsorany. Izany dia tamina fiteny iray izay nokorokoroin’ny Tompo ary tsy hay vakina raha tsy misy mpandika teny avy amin’ Andriamanitra (Etera 3:21–22, 24, 27; 4:1).

4. Nomen’ny Tompo vato telo izay azo ampiasaina handikana ilay rakitsoratra ny rahalahin’i Jareda (Etera 3:23–24, 28).

5. Tsy misy olona efa namaky ny rakitsoratry ny rahalahin’i Jareda (Etera 4:2–5).

Nampidirina any amin’ny fiafaran’ny lesona ny valiny marina.

Mahazo fanambarana misimisy kokoa

Tamin’ny alalan’i Môrônia, ny Tompo dia nanambara ny zavatra tsy maintsy ataontsika mba hanatonana Azy, handraisana fanambarana, ary hiomanana handray fanambarana misimisy kokoa voarakitra ao amin’ilay ampahany voafehy amin’ny Bokin’i Môrmôna.

Vakio tsara ny Etera 4:5–15, hitadiavana fomba hamenoana ity fahamarinana manaraka ity. Ny andian-teny hoe “ireny zavatra ireny” ao amin’ny andininy 8 sy 11 dia manondro ny Bokin’i Môrmôna. Ny voaly, tahaka ny ohatra nomena ao amin’ny andininy 15, dia lamba izay ampiasaina handrakofana na hanafenana zavatra iray.

• Hitahy antsika amina fanambarana misimisy kokoa ny Tompo rehefa … isika

Ireto andian-teny manaraka ireto dia mety ho fomba namenoanao ny fahamarinana eo ambony. Hevero ny hanisy marika azy ireo ao amin’ny soratra masinao na hanoratra azy ireo ao amin’ny diary fandalinanao:

• “mibebaka … ary tonga madio eo anoloan’ny Tompo” (Etera 4:6)

• “mampihatra finoana” (Etera 4:7)

• “[mino] ireny zavatra ireny” (manondro ny zavatra efa nambaran’ny Tompo, indrindra fa ny Bokin’i Môrmôna) (Etera 4:8, 11)

• “tonga ao [amin’ny Mpamonjy]” (Etera 4:13–15)

• mivavaka “amin’ny fo torotoro sy ny fanahy manenina” (Etera 4:15)

Raha toa izany ka hanampy anao hahatakatra tsara kokoa ny tsirairay amin’ireo andian-teny ireo, dia jereo ao amin’ny Torolalana ho an’ny Soratra Masina, na ny Application Médiathèque de l’Évangile ny andian-teny manan-danja. Ohatra, mety hanampy ny fijerena ny hoe “fo torotoro” ao amin’ny Torolalana ho an’ny Soratra Masina.

sary famantarana, raketo an-tsoratra

1. Mba hanampiana anao hahatakatra sy hahatsapa ny maha-zava-dehibe ireo asa ireo, dia ataovy ny iray farafahakeliny amin’ireto manaraka ireto:

   1. Mieritrereta ohatra avy ao amin’ny soratra masina na amin’izao androntsika izao amin’ny olona iray manao ny iray na maromaro amin’ireo asa ireo. Soraty ny fomba nitondran’ireo asa ireo tamina fanampiana sy fanambarana avy amin’ny Tompo.

   2. Mieritrereta fotoana iray nitondran’ny fanaovana ny iray na maromaro tamin’ireo asa ireo tamina valiny na fitarihana avy amin’ny Tompo teo amin’ny fiainanao. (Ohatra iray amin’izany ny fisaintsainana ny zavatra nianaranao avy amin’ny fandalinanao hatramin’izao ny Bokin’i Môrmôna sy inoanao amin’ny alalan’izany ary ny fomba nitondran’izany tamina fanambarana teo amin’ny fiainanao.)

2. Valio ireto fanontaniana manaraka ireto:

   • Nahoana, araka ny eritreritrao, no hitahy antsika amina fanambarana misimisy kokoa ny Tompo rehefa miaina amin’ilay fomba faritany ao amin’ny andininy 5–15 isika?

   • Nahoana no mety hahatonga antsika ho tsy voaomana ho amina fanambarana misimisy kokoa ny tsy fahatongavantsika ho ilay karazan’olona nofaritan’ny Tompo?

   • Inona no ampianarin’izany anao momba ny Tompo sy ny karazan’olona tiany hahatongavantsika?

Ny Tompo dia hamoaka ilay ampahany nofehezina amin’ny Bokin’i Môrmôna amin’ny “fotoana mahamety izany” (2 Nefia 27:21) rehefa mampihatra ilay finoana toy ny an’ny rahalahin’i Jareda isika (jereo ny Etera 4:7). Mitovitovy amin’izany, mety misy fanambarana misimisy kokoa izay mbola miandry ny hanomezan’ny Tompo azy anao. Hamaranana ity lesona ity, dia ataovy ity manaraka ity:

• Avereno jerena ny famaritana ao amin’ireo andininy ireo momba ireo izay mampihatra finoana sy hamasinina, saintsaino ny lafiny itovianao amin’izy ireo ary inona no lafiny mety ilainao hatsaraina.

• Misaintsaina ary mivavaha mba hahalala ny zavatra hampanaovin’ny Tompo anao mba handraisana fanambarana misimisy kokoa avy Aminy. Soraty ao amin’ny diary fandalinanao ny eritreritrao sy ny fahatsapanao.

Valin’ny andiam-panontaniana marina sa diso: Marina ny valiny telo voalohany raha toa ka diso kosa ny roa farany.

Tsy voatery hatao: Te hianatra bebe kokoa ve ianao?

Etera 3:23–24. Inona ireo vato roa voaresaka?

Ny vato roa izay nomen’ny Tompo ny rahalahin’i Jareda dia ampahany amin’ny zavatra nantsoina hoe Orima sy Tomima. “I Joseph Smith dia nampiasa azy io tamin’ny fandikana ny Bokin’i Môrmôna sy tamin’ny fahazoana fanambarana hafa” (“Urim and Thummim,” Bible Dictionary).

Inona ihany koa no azoko atao mba hahazoana fanambarana misimisy kokoa avy amin’ny Tompo?

Nampianatra toy izao ny Filoha Russell M. Nelson:

Filoha Russell M. Nelson

Tsy misy na inona na inona manokatra ny lanitra tahaka ny fitambaran’ny fahadiovana lehibe, ny fankatoavana marina, ny fikatsahana amin-kitsim-po, ny fivokisana isan’andro amin’ny tenin’i Kristy ao amin’ny Bokin’i Môrmôna, ary ny fanokanana fotoana matetika hanaovana asa any amin’ny tempoly sy tantaram-pianakaviana. …

… Mampanantena aho anefa fa rehefa manohy mankatò ianao, sy maneho fankasitrahana noho ireo fitahiana rehetra omen’ny Tompo anao, ary rehefa manaja amim-paharetana ny fotoan’ny Tompo ianao, dia homena ny fahalalana sy ny fahatakarana izay katsahinao. (Russell M. Nelson, “Fanambarana ho an’ny Fiangonana, fanambarana ho an’ny fiainantsika,” Liahona, mey 2018, 95–96)

Nampianatra toy izao ny Loholona David A. Bednar ao amin’ny Kôlejin’ny Apôstôly Roambinifolo:

Loholona David A. Bednar

Ny fanahin’ny fanambarana dia omena ny olona rehetra izay mandray amin’ny alalan’ny fahefan’ny fisoronana marina ny ôrdônansin’ny batisa asitrika ho famelan-keloka sy ny fametrahana tànana ho fanomezana ny Fanahy Masina—ary miasa amim-pinoana ho fanatanterahana ilay fandidian’ny fisoronana manao hoe “raiso ny Fanahy Masina. ” … Ny faniriana an-kitsim-po sy ny fahamendrehana dia manasa ny fanahin’ny fanambarana ho eo amin’ny fiainantsika. (David A. Bednar, “Ny Fanahin’ny Fanambarana,” Liahona, mey 2011, 87)