« វាយតម្លៃការរៀនសូត្ររបស់អ្នកទី ៩ ៖ មរមន ៧–អេធើរ ១៥ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« វាយតម្លៃការរៀនសូត្ររបស់អ្នកទី ៩ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
វាយតម្លៃការរៀនសូត្ររបស់អ្នកទី ៩
ការជញ្ជឹងគិត និងការវាយតម្លៃទៅលើការរៀនសូត្រខាងវិញ្ញាណរបស់អ្នក អាចជួយអ្នកឲ្យខិតទៅកាន់តែជិតព្រះអង្គសង្គ្រោះ ។ មេរៀននេះអាចជួយអ្នកឲ្យចងចាំ និងវាយតម្លៃអំពីបទពិសោធន៍របស់អ្នកជាមួយ មរមន ៧–អេធើរ ១៥ ដែលបានជួយអ្នកឲ្យរីកចម្រើនខាងវិញ្ញាណ ។
ក្រយៅដើមឈើ
ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយបានបង្រៀន ៖
វាអស្ចារ្យណាស់ដែលយើងអាចរៀនសូត្របានច្រើនអំពីជីវិតដោយការសិក្សាពីធម្មជាតិ ។ ឧទាហរណ៍ អ្នកវិទ្យាសាស្ត្រអាចមើលក្រយៅដើមឈើ និងធ្វើការទស្សន៍ទាយផ្នែកអប់រំអំពីអាកាសធាតុ និងលក្ខខណ្ឌលូតលាស់រាប់រយ និងរាប់ពាន់ឆ្នាំមុន ។ រឿងមួយដែលយើងរៀនសូត្របានពីការសិក្សាអំពីការលូតលាស់របស់ដើមឈើ គឺថា ក្នុងរដូវកាលដែលលក្ខខណ្ឌអំណោយផល ដើមឈើលូតលាស់ក្នុងកម្រិតធម្មតា ។ ទោះជាយ៉ាងណាក៏ដោយ ក្នុងរដូវនៅពេលដែលលក្ខខណ្ឌលូតលាស់មិនអំណោយផល ដើមឈើបន្ថយការលូតលាស់របស់វា ហើយប្រើថាមពលរបស់ពួកគេសម្រាប់អ្វីៗជាមូលដ្ឋាន ដែលពួកគេត្រូវការដើម្បីរស់ ។ ( ឌៀថើរ អេហ្វ អុជដូហ្វ « Of Things That Matter Most » Liahona ខែ វិច្ឆិកា ឆ្នាំ ២០១០ ទំព័រ ១៩ )
ដូចដើមឈើដែរ យើងមានពេលលូតលាស់ និងពេលវេលាដែលយើងអាចមានអារម្មណ៍ថា យើងកំពុងព្យាយាមដើម្បីគ្រាន់តែបានមួយរស់ប៉ុណ្ណោះ ។ ពួកយើងម្នាក់ៗជួបប្រទះនឹងការរីកចម្រើនតាមវិធីផ្សេងៗគ្នា និងក្នុងកម្រិតផ្សេងៗគ្នា ។ សូមគិតអំពីពេលវេលាក្នុងជីវិតរបស់អ្នក នៅពេលដែលអ្នកអាចមានបទពិសោធន៍រីកចម្រើនខាងវិញ្ញាណ ។
-
តើលក្ខខណ្ឌអ្វីខ្លះ ដែលជួយអ្នកឲ្យរីកចម្រើនខាងវិញ្ញាណ ? តើអ្នកបានជួបប្រទះការរីកចម្រើនបែបណាខ្លះ ?
-
តើមានវិធីណាខ្លះ ដែលយើងអាចវាយតម្លៃពីការរីកចម្រើនខាងវិញ្ញាណរបស់យើងជាទៀងទាត់ ?
នៅក្នុងមេរៀននេះ អ្នកនឹងមានឱកាសពន្យល់ពីអ្វីដែលអ្នកបានរៀនសូត្រ ហើយវាយតម្លៃគោលដៅដែលអ្នកអាចនឹងបានកំណត់ ពេលដែលកំពុងសិក្សា មរមន ៧–អេធើរ ១៥ ។
ពន្យល់ពីសារៈសំខាន់នៃព្រះគម្ពីរមរមន
សូមស្រមៃថា អ្នកគឺជាអ្នកផ្សព្វផ្សាយសាសនាដែលកំពុងពន្យល់ពីសារៈសំខាន់នៃព្រះគម្ពីរមរមននៅក្នុងការស្ដារឡើងវិញនៃដំណឹងល្អ ។ អ្នករៀបនឹងហុចព្រះគម្ពីរមរមនមួយក្បាលឲ្យនរណាម្នាក់ដើម្បីអាន ។
សូមរៀបចំអ្វីដែលអ្នកនឹងនិយាយដោយប្រើប្រាស់វគ្គបទគម្ពីរមួយ ឬច្រើននៅក្នុង មរមន ៨ ។ អ្នកក៏អាចប្រើប្រាស់ ទំព័រចំណងជើងនៃព្រះគម្ពីរមរមន បានផងដែរ ។ សូមរកមើលឱកាសពន្យល់ពីរបៀបដែលព្រះគម្ពីរមរមនជួយយើងឲ្យជឿលើព្រះយេស៊ូវគ្រីស្ទ ។
អ្នកអាចមើលវគ្គបទគម្ពីរ ដែលអ្នកអាចបានគូសចំណាំនៅក្នុង មរមន ៨ និងកំណត់ចំណាំដែលអ្នកបានសរសេរនៅក្នុងសៀវភៅកំណត់ហេតុការសិក្សារបស់អ្នក ។ ប្រសិនបើអ្នកត្រូវការជំនួយ អ្នកអាចមើលក្នុង មរមន ៨:១៤–១៦, ២៥–២៦, ៣៤–៣៥ បាន ។ អ្នកក៏អាចប្រើវគ្គបទគម្ពីរផ្សេងទៀត ដែលអ្នកបានរកឃើញនៅក្នុងព្រះគម្ពីរមរមនក្នុងអំឡុងពេលសិក្សារបស់អ្នកនៅឆ្នាំនេះផងដែរ ។
-
សូមសរសេរពីអ្វីដែលអ្នកនឹងនិយាយ ប្រសិនបើអ្នកកំពុងពន្យល់ពីតួនាទីរបស់ព្រះគម្ពីរមរមននៅក្នុងការស្ដារឡើងវិញនៃដំណឹងល្អដោយប្រើប្រាស់គម្ពីរ មរមន ៨ និង ទំព័រចំណងជើងនៃព្រះគម្ពីរមរមន ។
ជញ្ជឹងគិតអំពីផែនការដើម្បីអនុវត្តសេចក្ដីជំនឿលើព្រះយេស៊ូវគ្រីស្ទ
-
តើមានគ្រឿងផ្សំអ្វីខ្លះក្នុងនំប៉័ង ?
-
ក្រៅពីផ្សំគ្រឿងផ្សំ តើអ្នកត្រូវធ្វើអ្វីទៀត ដើម្បីធ្វើនំប៉័ង ?
គ្រឿងផ្សំនៅក្នុងនំប៉័ងមួយដុំអាចមានម្សៅ ដំបែ អំបិល និងទឹក ។ អ្នកក៏ប្រហែលជាត្រូវការពេលវេលាដើម្បីឲ្យនំប៉័ងឡើង ហើយអ្នកត្រូវដុតវាផងដែរ ។
ការដុតនំប៉័ងអាចប្រៀបធៀបនឹងការអនុវត្តសេចក្ដីជំនឿលើព្រះយេស៊ូវគ្រីស្ទបាន ។ លទ្ធផល សាក្សី ឬអព្ភូតហេតុដែលអ្នកស្វែងរក គឺដូចជានំប៉័ងដែលបានដុតរួចអ៊ីចឹង ។ ការខិតខំរបស់អ្នកដើម្បីអនុវត្តសេចក្តីជំនឿលើព្រះយេស៊ូវគ្រីស្ទអាចប្រៀបធៀបទៅនឹងគ្រឿងផ្សំ ពេលវេលាដែលម្សៅឡើង និងការដុតនំប៉័ងដែរ ។ នៅក្នុងមេរៀនថ្មីៗនេះ អ្នកបានសិក្សាដំណើររឿងអំពីបុគ្គលដែលបានអនុវត្តសេចក្តីជំនឿលើព្រះយេស៊ូវគ្រីស្ទ ( សូមមើល អេធើរ ៣:១–១៦; ១២:៦–២២ ) ។ អ្នកក៏បានសិក្សាពាក្យសម្ដីរបស់ព្យាការី ដែលអញ្ជើញអ្នកឲ្យអនុវត្តសេចក្តីជំនឿលើព្រះអម្ចាស់ និងស្វែងរកអព្ភូតហេតុផងដែរ ( សូមមើល មរមន ៩:១៥–២៧; អេធើរ ១២:៦–៩ ) ។
សូមអាន មរមន ៩:១៩–២១; អេធើរ ៣:៩; ១២:៦–៩ ដើម្បីជួយអ្នកឲ្យចងចាំអ្វីដែលអ្នកបានសិក្សាអំពីសេចក្តីជំនឿលើព្រះយេស៊ូវគ្រីស្ទ និងផែនការដែលអ្នកប្រហែលជាបានធ្វើរួចហើយ ។
-
សូមគិតអំពីលទ្ធផល សាក្សី ឬអព្ភូតហេតុដែលអ្នកស្វែងរក ហើយឆ្លើយសំណួរបីខាងក្រោមនេះ ៖
-
តើអ្នកបានធ្វើអ្វីខ្លះ ដើម្បីអនុវត្តសេចក្ដីជំនឿលើព្រះយេស៊ូវគ្រីស្ទ ?
-
ប្រសិនបើការអនុវត្តសេចក្តីជំនឿលើព្រះយេស៊ូវគ្រីស្ទ គឺដូចជាការដុតនំប៉័ង តើអ្នកកំពុងស្ថិតនៅដំណាក់កាលណានៃដំណើរការនោះនាពេលបច្ចុប្បន្ន ? តើអ្នកកំពុងប្រមូល ឬលាយគ្រឿងផ្សំនៅឡើយឬ ? តើអ្នករង់ចាំឲ្យមេឡើងឬ ? តើកំពុងដុតនំប៉័ងឬ ? ឬតើអ្នកបានញ៉ាំនំបុ័ងរួចហើយ ? សូមពន្យល់ពីមូលហេតុ ។
-
តើមានបញ្ហាប្រឈមអ្វីខ្លះដែលអ្នកធ្លាប់មាន ឬនៅតែត្រូវយកឈ្នះនៅឡើយ ? តើមានចំណុចអ្វីខ្លះដែលបានជួយ ឬអាចជួយអ្នកឲ្យយកឈ្នះលើវាបាន ?
-
តើអ្នកមានអារម្មណ៍យ៉ាងណាដែរ កាលអ្នកមានអារម្មណ៍ថាបានទទួលពរជ័យសម្រាប់ការខិតខំ ដែលអ្នកបានធ្វើដើម្បីអនុវត្តសេចក្ដីជំនឿលើព្រះយេស៊ូវគ្រីស្ទ ?
-