Moroni 7:44–48

“Dashuria e Pastër e Krishtit”

Mendo për rastet kur ke ndier dashuri si të Krishtit. Çfarë ndryshimi ka bërë dashuria si e Krishtit në jetën tënde? Moroni e shënoi përfundimin e predikimit që ati i tij, Mormoni, pati bërë në një sinagogë vite përpara. Mormoni dha mësim se si “të mbështete[m]i në çdo gjë të mirë” (Moroni 7:20, 25), sidomos te dashuria hyjnore, “dashuria e pastër e Krishtit” (Moroni 7:47). Ky mësim ka për qëllim të të ndihmojë ta kuptosh dhe kërkosh dashurinë hyjnore në jetën tënde.

Dashuria si e Krishtit

Nëse është e mundur, fillo duke parë ose lexuar të paktën njërën prej historive vijuese të dikujt që ndihmon me dashuri. Përsiat se çfarë ndryshimi mund të bëjë dashuria si e Krishtit.

• Një djalë i ri i dhuron në mënyrë vetëmohuese një fëmije tjetër në nevojë. Shikoje “The Coat” [“Palltoja”] (2:07), në dispozicion në ChurchofJesusChrist.org.

• Në vend që t’i bënin një shaka një të huaji, dy djem vendosën ta ndihmojnë atë. Shiko materialin filmik “Gordon Hinckley: Lessons I Learned as a Boy” [“Gordon B. Hinkli: Mësimet që Mësova kur Isha Djalosh”] (4:04), në dispozicion në ChurchofJesusChrist.org.

• Një grup të rejash ndihmojnë me dashamirësi dhe dashuri hyjnore një nxënës me një aftësi të kufizuar. Shiko materialin filmik “Charity: An Example of the Believers” [“Dashuria Hyjnore: Një Shembull për Besimtarët”] (4:50), në dispozicion në ChurchofJesusChrist.org.

• Si mendon, përse dashuria si e Krishtit mund të jetë një ndikim kaq i fuqishëm në jetën tonë?

• Kush ka qenë një shembull i dashurisë si e Krishtit në jetën tënde?

Edhe Mormoni, edhe Apostulli Pal dhanë mësim se zhvillimi i dashurisë si e Krishtit është thelbësor për përparimin tonë (shih te Moroni 7:44; 1 Korintasve 13:2). Për të të ndihmuar ta vlerësosh se sa mirë po e zhvillon dashurinë si e Krishtit, përsiat se sa të vërteta janë thëniet vijuese për ty në një shkallë nga 1 te 5 (1 = asnjëherë e vërtetë; 5 = gjithnjë e vërtetë):

• Unë përpiqem t’i ndihmoj dhe t’u shërbej të tjerëve, sidomos kur ata po hasin vështirësi ose shkurajim.

• Unë përpiqem të jem dashamirës, i duruar dhe falës me të tjerët, edhe kur është e vështirë të shkosh mirë me ta.

• Kur është e përshtatshme, ua them të tjerëve se i dua ata dhe kujdesem për ta.

Ndërsa studion te Moroni 7, kërkoji Zotit të të ndihmojë ta kuptosh dhe kërkosh dashurinë hyjnore.

Predikimi i Mormonit mbi dashurinë hyjnore

Afër fundit të analit të tij, Moroni përfshiu një predikim që i ati, Mormoni, ua pati dhënë “pasuesve paqësorë të Krishtit” (Moroni 7:3). Mormoni dha mësim parimet e dashurisë që, nëse do t’ua vinin veshin, mund ta kishin parandaluar shkatërrimin e nefitëve. Këto mësime do të ishin të rëndësishme edhe për Moronin, i cili dëshmoi shkatërrimin brutal të nefitëve nga lamanitët dhe u end për vite i vetëm.

Lexo te Moroni 7:47 dhe shenjoje frazën që e përshkruan dashurinë për të cilën dha mësim Mormoni.

Jezu Krishti dha shembullin e përsosur për ne se si t’i duam të tjerët. Lexo te Moroni 7:45–48, duke kërkuar frazat që 1) e përshkruajnë më tej dashurinë hyjnore, ose se si të duam si Shpëtimtari dhe 2) të shtojnë dëshirën për ta zhvilluar dashurinë hyjnore në jetën tënde.

Moroni 7:45–48 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh një mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

Përkufizimet vijuese mund të jenë të dobishme:

• “është e duruar” = i duron sprovat me durim

• “nuk ka smirë” = nuk është xheloze për të tjerët

• “nuk krekoset” = e përulur

• “nuk kërkon të mirën e vet” = vendos Perëndinë dhe nevojat e të tjerëve përpara vetes

• “nuk nxitet lehtë në zemërim” = nuk inatoset me lehtësi

• “beson të gjitha gjërat” = pranon të gjithë të vërtetën

Merre parasysh të shenjosh nga fraza “dashuria hyjnore nuk dështon kurrë” te vargu 46 deri te fraza “nuk ka mbarim” te vargu 47. Plaku Xhefri R. Holland, i Kuorumit të Dymbëdhjetë Apostujve, dha mësim:

“Jeta ka pjesën e vet të frikës dhe dështimeve. Ndonjëherë gjërat nuk i përmbushin pritshmëritë. Ndonjëherë njerëzit na lënë në baltë, ose ekonomitë apo bizneset, apo qeveritë na lënë në baltë. Por një gjë në kohë apo në përjetësi nuk na lë në baltë – dashuria e pastër e Krishtit.” (Jeffrey R. Holland, Christ and the New Covenant: The Messianic Message of the Book of Mormon [1997], f. 337)

• Pse mendon se dashuria e pastër e Krishtit nuk do të na lërë kurrë në baltë?

• Si mund të na ndihmojë dashuria e Shpëtimtarit në mënyra që asgjë tjetër nuk mundet?

Presidenti Tomas S. Monson (1927–2018) dha mësim rreth dashurisë hyjnore me hollësi. Nëse është e mundur, shikoje “Charity Never Faileth” [“Dashuria Hyjnore Nuk Ligështohet Kurrë”], në dispozicion në ChurchofJesusChrist.org, nga kodi kohor 15:05 deri në 17:22. Ose lexoje fjalimin, duke filluar nga “Unë e konsideroj dashurinë hyjnore” dhe duke përfunduar me “t’i rezistosh impulsit për të klasifikuar të tjerët” (“Dashuria Nuk Ligështohet Kurrë”, Liahona, nëntor 2010, f. 124). Kërko fraza shtesë që Presidenti Monson i përdori për ta përshkruar dashurinë e pastër të Krishtit.

Pyetjet e tua rreth dashurisë hyjnore

Çfarë pyetjesh ke rreth asaj që është dashuria hyjnore ose se si të mbushesh me këtë dashuri?

1. Për të ndihmuar të merren përgjigje për pyetjet e tua, bëj sa vijon:

   1. Studioji mësimet vijuese të Shpëtimtarit rreth dashurisë ose dashurisë hyjnore: Mateu 5:43–44; Mateu 22:37–40; Gjoni 15:12.

   2. Mendo për një tregim nga shkrimi i shenjtë kur Shpëtimtari e ilustroi dashurinë hyjnore. Gjeje dhe lexoje shembullin që të erdhi në mendje, ose përdore njërin nga sa vijon:

      1. Shpëtimtari hëngri me tagrambledhësit dhe mëkatarët (shih te Mateu 9:10–13). (Tagrambledhësi ishte një mbledhës i taksave për romakët, që e kishin pushtuar Izraelin në atë kohë.)

      2. Shpëtimtari e shpëtoi dhe i dha mësim gruas që u kap duke shkelur kurorën (shih te Gjoni 8:1–11).

      3. Shpëtimtari vuajti, shleu dhe vdiq për të gjithë njerëzimin (shih te Lluka 22:41–44; 23:33–34; 1 Nefi 19:9; Doktrina e Besëlidhje 19:16–19).

      4. Shpëtimtari i shëroi dhe i bekoi njerëzit e kontinenteve amerikane (shih te 3 Nefi 17:5–12, 21–24).

   3. Mendo për përvojat kur e ndjeve dashurinë e pastër që kanë Ati Qiellor dhe Jezu Krishti për ty ose kur ndjeve dashuri hyjnore ndaj dikujt tjetër.

Si të fitosh dhe tregosh dashuri hyjnore

Merre parasysh ta shenjosh nxitjen e Mormonit për t’iu “lut[ur] Atit me gjithë fuqinë e zemrës [sate], që të mbushe[sh] me këtë dashuri” (Moroni 7:48).

• Si mendon se lutja ndaj Atit Qiellor mund të na ndihmojë të mbushemi me dashuri hyjnore?

2. Krijo një skenar realist në të cilin përgjigjja e një adoleshenti mund të demonstrojë a është ai i mbushur me dashuri hyjnore ose jo. Përgjigju për pyetjet vijuese sikur të ishe në atë situatë:

   • Sipas asaj që ke mësuar nga Moroni 7:45, 47–48 dhe shembulli i Shpëtimtarit, si mund të tregosh dashuri si e Krishtit në këtë situatë?

   • Si mund të të ndihmojë lutja e çiltër të përgjigjesh me dashuri në këtë situatë?

   • Me çfarë sfidash mund të përballësh ndërsa përpiqesh ta zbatosh atë që ke mësuar? Si mund të veprosh me besim pavarësisht nga këto sfida?

Ndalu një çast për të shkruar atë që do të doje të bëje për ta kuptuar dhe zhvilluar më mirë cilësinë e dashurisë hyjnore.

Fakultative: Dëshiron të Mësosh më Shumë?

Si mund ta dimë a kemi dashuri hyjnore?

Plaku Marvin J. Ashton (1915–1994), i Kuorumit të Dymbëdhjetë Apostujve, dha mësim:

“Ndoshta dashuria hyjnore më e madhe vjen kur jemi të sjellshëm me njëri-tjetrin, kur nuk e gjykojmë apo kategorizojmë dikë tjetër, kur thjesht i besojmë për mirë njëri-tjetrit apo qëndrojmë të heshtur. Dashuria hyjnore është pranimi i ndryshimeve, dobësive dhe mangësive të dikujt; të qenit i duruar me dikë që na ka zhgënjyer; ose qëndresa ndaj shtysave për t’u ndier të fyer kur dikush nuk e trajton diçka ashtu si mund të kishim shpresuar. Dashuria hyjnore është të mos pranosh të përfitosh nga dobësia e një tjetri dhe të qenit të gatshëm për ta falur dikë që na ka prekur. Dashuri hyjnore do të thotë të shpresojmë më të mirën për njëri-tjetrin.” (Marvin J. Ashton, “The Tongue Can Be a Sharp Sword”, Ensign, maj 1992, f. 19)

Cilët janë shembujt e tjerë se si të tregohet dashuria hyjnore?

Plaku Nil L. Andersen tregoi dy shembuj të dashurisë hyjnore. Shiko materialin filmik “Two Examples of Charity” [“Dy Shembuj të Dashurisë Hyjnore”] (2:11).

Plaku D. Tod Kristoferson tregoi për një burrë i cili i shërbeu një familjeje refugjatësh. Lexo bisedën “Ejani në Sion”, duke filluar nga “Më kujtohet historia” dhe duke mbaruar me “dhënies së vërtetë” (Liahona, nëntor 2008, f. 40). Ose shikoje materialin filmik nga kodi kohor 13:58 deri në 15:59.

Presidenti Gordon B. Hinkli (1910–2008) tregoi për një të ri ndaj të cilit anëtarët e Kishës nuk treguan dashuri hyjnore, por që më vonë zuri një mik të vërtetë që mishëronte dashuri si të Krishtit. Shikoje materialin filmik “The Need for Greater Kindness” [“Nevoja për Dashamirësi më të Madhe”] nga kodi kohor 6:32 deri në 11:34.

Presidentja Suzan W. Taner, ish-Presidente e Përgjithshme e Të Rejave, tregoi historinë e Rei Hintonit, një burrë i dënuar gabimisht me vdekje, që i ndihmonte të tjerët me dashuri. Shikoje materialin filmik “The Greatest of These Is Charity” [“Më e Madhja nga Këto Është Dashuria Hyjnore”] (36:41) nga kodi kohor 17:28 deri në 21:50.

Plaku Xhefri R. Holland, i Kuorumit të Dymbëdhjetë Apostujve, dha këtë këndvështrim të thellë:

“Dashuria hyjnore e vërtetë është njohur vetëm një herë. Ajo shfaqet përsosurisht dhe tërësisht te dashuria e pashtershme, themelore dhe shlyese e Krishtit për ne. … Është ashtu siç demonstrohet te Krishti që ‘dashuria hyjnore nuk dështon kurrë’. Është ajo dashuri hyjnore – dashuria e Tij e pastër për ne – pa të cilën ne nuk do të ishim asgjë, të pashpresë, me të gjithë burrat dhe gratë tepër të mjeruar. Vërtet, për ata që do të gjenden me bekimet e dashurisë së Tij në ditën e fundit – Shlyerjen, Ringjalljen, jetën e përjetshme, premtimin e përjetshëm – sigurisht që do të jetë mirë për ta.” (Jeffrey R. Holland, Christ and the New Covenant: The Messianic Message of the Book of Mormon [1997], f. 336.)