Zotërimi Doktrinor: Moroni 7:45–48

“Dashuria Hyjnore Është Dashuria e Pastër e Krishtit”

Në studimin tënd të vargjeve te Moroni 7:44–48, ti mësove se si të përpiqesh ta zhvillosh dashurinë hyjnore, dashurinë e pastër të Jezu Krishtit. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargjet te Moroni 7:45–48, ta shpjegosh doktrinën që jepet mësim në këtë fragment, dhe t’i zbatosh në situata nga jeta reale parimet e marrjes së njohurisë shpirtërore.

Shpjego dhe mëso përmendsh

Merre parasysh skenarin vijues për të të ndihmuar të ushtrosh shpjegimin e cilësisë së shenjtë të dashurisë hyjnore.

Imagjino sikur gjatë diskutimit Eja, Më Ndiq me familjen tënde, ndërsa flisni rreth kuptimit të dashurisë hyjnore, vëllai yt më i vogël thotë diçka të ngjashme me “A nuk është dashuria hyjnore thjesht të bësh gjëra të mira për njerëzit?” Ti i thua vëllait tënd se sjellja e mirë është pjesë e dashurisë hyjnore, por që ti mësove më shumë rreth saj në seminar.

• Çfarë hollësish të tjera rreth dashurisë hyjnore do t’i tregoje vëllait tënd?

1. Shpjegoje në dy ose tri fjali kuptimin e dashurisë hyjnore duke përdorur fjalët e tua dhe mësimet që gjenden te Moroni 7:45–48.

Përdore idenë vijuese për të të ndihmuar ta mësosh përmendsh referencën e shkrimit të shenjtë dhe frazën kyç të shkrimit të shenjtë. Ose zgjidh një metodë të ndryshme që të ndihmon më mirë të mësosh përmendsh.

Vizato një zemër të madhe në ditarin tënd të studimit. Shikoje figurën vijuese dhe brenda skicës së zemrës shkruaj referencën e shkrimit të shenjtë dhe frazën kyç të shkrimit të shenjtë në rendin e saktë.

Thuaje përmendsh referencën e shkrimit të shenjtë dhe frazën kyç të shkrimit të shenjtë disa herë derisa t’i kesh mësuar përmendsh. Merre parasysh ta presësh skicën dhe ta vendosësh atë aty ku do ta shohësh shpesh.

Ushtroje vënien në zbatim

Për të të ndihmuar t’i shqyrtosh parimet e marrjes së njohurisë shpirtërore, korrigjoji tri frazat vijuese dhe shpjegoje se çfarë kuptimi kanë ato. Nëse të nevojitet ndihmë, studioji paragrafët 5–12 në pjesën “Marrja e Njohurisë Shpirtërore” te materiali Dokumenti Bazë i Zotërimit Doktrinor (2023).

1. Shqyrto me besim.

2. Kërko kuptueshmëri të mëtejshme nëpërmjet këndvështrimit të caktuar në mënyrë hyjnore.

3. Vëri në zbatim konceptet dhe pyetjet me një burim të përjetshëm.

Lexoji skenarët vijues:

• Olsi mërzitet shpejt nga vëllezërit dhe motrat e tij më të vogla. Ata shpesh i përgjërohen Olsit që të luajë me ta ose t’i ndihmojë për detyrat e shtëpisë. Olsi do vetëm që vëllezërit dhe motrat e tij ta lënë rehat që ai të bëjë punën e vet.

• Hera mësoi se një vajzë tjetër në klasën e saj të Të Rejave ka përhapur thashetheme për të. Hera ndihet e pështjelluar dhe e lënduar nga kjo dhe nuk është e sigurt se si të reagojë.

• Klodi dëshiron të gëzojë popullaritet në shkollë dhe shfaqet si i patrembur para shokëve të tij. Ai shpesh i përçmon shokët e tjerë të klasës dhe ua merr gjërat pa i pyetur.

2.  Zgjidh të paktën njërin prej skenarëve të mëparshëm. Imagjino sikur po përpiqesh ta ndihmosh personin në atë skenar. Përgjigju për të paktën një pyetje nga secili prej krerëve vijues:

Kërko kuptueshmëri të mëtejshme nëpërmjet burimeve të caktuara në mënyrë hyjnore

• Çfarë mund të tregosh nga Moroni 7:45–48 që mund t’i japë shtysë këtij personi të reagojë me më shumë dashuri hyjnore në situatën e tij?

• Cilat janë disa shkrime të shenjta ose thënie të tjera nga udhëheqësit e Kishës që mund të ndihmojnë?

Vepro me besim

• Me çfarë sfidash mund të përballet ky person ndërsa përpiqet ta zbatojë atë që ti i thua?

• Si mund të veprojë ai me besim pavarësisht këtyre sfidave?

Shqyrtoji konceptet dhe pyetjet me një këndvështrim të përjetshëm

• Si mund ta ndihmojë atë shikimi i situatës me një këndvështrim të përjetshëm që të ndiejë më shumë dashuri hyjnore për të tjerët?

• Si mund ta ndihmojë këtë person shqyrtimi i mënyrës se si Jezu Krishti i trajtoi të tjerët, që të jetë më i dashur?