« ចំណេះចំណានខាងគោលលទ្ធិ ៖ មរ៉ូណៃ ៧:៤៥–៤៨—‹ សេចក្ដីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ចំណេះចំណានខាងគោលលទ្ធិ ៖ មរ៉ូណៃ ៧:៤៥–៤៨ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ចំណេះចំណានខាងគោលលទ្ធិ ៖ មរ៉ូណៃ ៧:៤៥–៤៨
« សេចក្តីសប្បុរសគឺជា សេចក្ដីស្រឡាញ់ដ៏សុទ្ធសាធនៃព្រះគ្រីស្ទ »
នៅក្នុងការសិក្សារបស់អ្នក អំពី មរ៉ូណៃ ៧:៤៤–៤៨ អ្នកបានរៀនអំពីរបៀបស្វែងរកការអភិវឌ្ឍសេចក្ដីសប្បុរស ដែលជាសេចក្ដីស្រឡាញ់ដ៏សុទ្ធសាធរបស់ព្រះយេស៊ូវគ្រីស្ទ ។ មេរៀននេះអាចជួយអ្នកឲ្យទន្ទេញសេចក្តីយោងនៃចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ មរ៉ូណៃ ៧:៤៤–៤៨ ពន្យល់អំពីគោលលទ្ធិដែលបានបង្រៀននៅក្នុងវគ្គបទគម្ពីរនេះ ហើយអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្តែង ។
ពន្យល់ និងទន្ទេញ
សូមពិចារណាអំពីសាច់រឿងខាងក្រោម ដើម្បីជួយអ្នកអនុវត្តទៅលើការពន្យល់អំពីគុណលក្ខណៈដ៏ទេវភាពនៃសេចក្តីសប្បុរស ។
សូមស្រមៃគិតនៅក្នុងអំឡុងពេលពិភាក្សាអំពី ចូរមកតាមខ្ញុំ ជាមួយគ្រួសាររបស់អ្នក ខណៈពេលដែលកំពុងនិយាយអំពីអត្ថន័យនៃសេចក្តីសប្បុរស ប្អូនប្រុសរបស់អ្នកនិយាយអ្វីមួយដូចជា « តើសេចក្តីសប្បុរសមិនមែនគ្រាន់តែជាការធ្វើរឿងល្អៗទៅដល់មនុស្សមែនទេ ? » អ្នកប្រាប់ទៅប្អូនប្រុសរបស់អ្នកថា ការធ្វើល្អគឺជាផ្នែកមួយនៃសេចក្ដីសប្បុរស ប៉ុន្តែថា អ្នកបានស្វែងយល់បន្ថែមអំពីសេចក្ដីសប្បុរសនៅក្នុងថ្នាក់សិក្ខាសាលា ។
-
តើព័ត៌មានលម្អិតអ្វីខ្លះទៀតអំពីសេចក្ដីសប្បុរសដែលអ្នកនឹងប្រាប់ទៅដល់ប្អូនប្រុសរបស់អ្នក ?
សូមប្រើប្រាស់គំនិតខាងក្រោមនេះ ដើម្បីជួយអ្នកឲ្យទន្ទេញសេចក្តីយោងបទគម្ពីរ និងឃ្លាបទគម្ពីរគន្លឹះ ។ ឬជ្រើសរើសវិធីផ្សេងដែលជួយអ្នកឲ្យទន្ទេញចាំបានល្អបំផុត ។
សូមគូររូបបេះដូងធំមួយនៅក្នុងសៀវភៅកំណត់ហេតុការសិក្សារបស់អ្នក ។ សូមមើលរូបភាពខាងក្រោម ហើយនៅខាងក្នុងរូបបេះដូងរបស់អ្នកសូមសរសេរសេចក្តីយោងបទគម្ពីរ និងឃ្លាបទគម្ពីរគន្លឹះតាមលំដាប់លំដោយឲ្យបានត្រឹមត្រូវ ។
សូមសូត្រសេចក្ដីយោងបទគម្ពីរ និងឃ្លាបទគម្ពីរគន្លឹះចំនួនពីរបីដងរហូតដល់អ្នកទន្ទេញវាចាំ ។ សូមពិចារណាកាត់គំនូរដែលបានគូ ហើយយកវាទៅដាក់នៅកន្លែងដែលអ្នកនឹងមើលឃើញវាញឹកញាប់ ។
ការអនុវត្តជាក់ស្តែង
ដើម្បីជួយអ្នករំឭកគោលការណ៍នៃការទទួលបានចំណេះដឹងខាងវិញ្ញាណ សូមកែឃ្លាទាំងបីខាងក្រោម ហើយពន្យល់អំពីអត្ថន័យរបស់វា ។ ប្រសិនបើអ្នកត្រូវការជំនួយក្នុងការសិក្សា កថាខណ្ឌ ទី ៥–១២ នៅក្នុងផ្នែក « ការទទួលបានចំណេះដឹងខាងវិញ្ញាណ» នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ ) ។
-
ត្រួតពិនិត្យដោយសេចក្ដីជំនឿ ។
-
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។
-
ធ្វើតាមគោលគំនិត និងសំណួរទាំងឡាយដោយប្រភពដ៏នៅអស់កល្បជានិច្ច ។
សូមអានសាច់រឿងខាងក្រោម ៖
-
អូស្កាងាយនឹងត្រូវប្អូនៗរបស់គាត់រំខានជាខ្លាំង ។ ពួកគេតែងតែសុំឲ្យអូស្កាលេងជាមួយពួកគេ ឬជួយពួកគេធ្វើកិច្ចការផ្ទះរបស់ពួកគេ ។ អូស្កាគ្រាន់តែមិនចង់ឲ្យប្អូនៗរបស់គាត់មករំខានគាត់ គាត់ចង់នៅម្នាក់ឯង ដើម្បីឲ្យគាត់អាចធ្វើរឿងផ្ទាល់ខ្លួនរបស់គាត់ ។
-
ហេ-វ៉ុនបានដឹងថា ក្មេងស្រីម្នាក់ទៀតនៅក្នុងថ្នាក់យុវនារីរបស់នាងកំពុងតែនិយាយដើមនាង ។ ហេ-វ៉ុនមានអារម្មណ៍មិនល្អ និងឈឺចាប់ដោយសាររឿងនេះ ហើយមិនដឹងថា ត្រូវឆ្លើយតបបែបណាវិញ ។
-
កាប៉ូចង់ធ្វើជាអ្នកល្បីនៅក្នុងសាលា ហើយបង្ហាញភាពក្លាហាននៅចំពោះមុខមិត្តភក្តិរបស់គាត់ ។ ជារឿយៗ គាត់មើលងាយមិត្តរួមថ្នាក់ផ្សេងទៀតហើយយកសម្ភាររបស់ពួកគេដោយមិនចាំបាច់សួរ ។
-
ជ្រើសរើសយកយ៉ាងហោចណាស់សាច់រឿងមួយនៅក្នុងចំណោមសាច់រឿងពីមុន ។ សូមគិតស្រមៃថា អ្នកកំពុងព្យាយាមជួយបុគ្គលនៅក្នុងសាច់រឿងនោះ ។ សូមឆ្លើយយ៉ាងហោចណាស់សំណួរមួយ ចេញពីចំណងជើងនីមួយៗខាងក្រោមនេះ ៖
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
-
តើអ្នកអាចចែកចាយអ្វីចេញពី មរ៉ូណៃ ៧:៤៥–៤៨ ដែលអាចលើកទឹកចិត្តបុគ្គលនេះឲ្យឆ្លើយតបដោយសេចក្ដីសប្បុរសបន្ថែមទៀតនៅក្នុងស្ថានភាពរបស់ពួកគេ ?
-
តើមានបទគម្ពីរ ឬសេចក្ដីថ្លែងការណ៍អ្វីខ្លះទៀតមកពីថ្នាក់ដឹកនាំសាសនាចក្រដែលអាចជួយបាន ?
ធ្វើសកម្មភាពដោយសេចក្ដីជំនឿ
-
តើបុគ្គលនេះអាចប្រឈមមុខនឹងបញ្ហាអ្វីខ្លះ នៅពេលដែលពួកគេព្យាយាមអនុវត្តអ្វី ដែលអ្នកចែកចាយជាមួយពួកគេ ?
-
តើពួកគេអាចធ្វើសកម្មភាពដោយសេចក្ដីជំនឿបានដោយរបៀបណា ទោះបីជាស្ថិតនៅក្នុងស្ថានភាពលំបាកទាំងនេះក្តី ?
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
-
តើការពិនិត្យមើលស្ថានការណ៍ដោយទស្សនដ៏អស់កល្បមួយអាចជួយគាត់ ឬនាងឲ្យមានអារម្មណ៍កាន់តែមានសេចក្ដីសប្បុរសបន្ថែមទៀតចំពោះអ្នកដទៃយ៉ាងដូចម្ដេច ?
-
តើការពិនិត្យមើលអំពីរបៀបដែលព្រះយេស៊ូវគ្រីស្ទបានប្រព្រឹត្តចំពោះអ្នកដទៃអាចជួយដល់បុគ្គលនេះឲ្យកាន់តែមានសេចក្ដីសប្បុរសដោយរបៀបណា ?