1 Nifae 11

“Faauta i le Faamaualalo o le Atua!”

Ua aoao mai i tatou e tusitusiga paia i mea e “silisili ona manaomia” ma “silisili ona olioli i le agaga” i mea uma tatou te olioli ai i lenei olaga (1 Nifae 11:22–23). A o talanoa Nifae ma avefeau faalelagi, sa ia maua se faaaliga o le Faaola o le lalolagi ma maua lona lava malamalama i mea e aumaia ai le olioli sili: o le alofa o le Atua. E mafai ona fesoasoani lenei lesona e te lagona ai le alofa o le Tama Faalelagi ma Iesu Keriso mo oe.

Alofa ia i latou e te aoaoina. O mea uma na faia e le Faaola i Lana galuega i le lalolagi sa faaosofia e le alofa. A o e mulimuli i Lana faataitaiga, o le a avea le alofa ma mafuaaga ma uunaiga mo au aoaoga. O le alofa o le a tosinaina ai mea e te faia ma le auala e te fegalegaleai ai ma tamaiti aoga.

Sauniuniga a le tamaitiiti aoga: Valaaulia tamaiti aoga e aumai se mea i le vasega e faapupula mai ai se auala se tasi e faaalia ai e le Atua Lona alofa mo i latou.

Gaoioiga e Ono Mafai Ona Aoao Ai

O le taua o le alofa o le Atua

Na saunoa Sister Susan H. Porter o le Au Peresitene Aoao o le Peraimeri:

A e iloa ma malamalama i le atoatoa o le alofagia o oe o se atalii/afafine o le Atua, e suia ai mea uma. (Susan H. Porter, “O Le Alofa o le Atua: E Silisili Ona Olioli i le Agaga,” Liahona, Nov. 2021, 33)

• O le a se mea e ono suia pe a iloa ma malamalama se tasi i le alofa o le Atua mo i latou?

• E mafai faapefea e le lagonaina o le alofagia o oe e le Atua ona tosina ai lou olaga?

Mafaufau e tuu atu i tamaiti aoga se taimi e mafaufau loloto ai i le tele o lo latou lagonaina o le alofa o le Atua ma le faamaoniga ua latou vaaia e uiga i Lona alofa i o latou olaga. Valaaulia tamaiti aoga, a o latou suesueina le 1 Nifae 11, e vaavaai mo le faamaoniga o le alofa o le Tama Faalelagi ma Iesu Keriso mo i latou.

Faaaliga a Nifae

Valaaulia tamaiti aoga e toe mafaufau i faailoga autu mai le miti a Liae o loo tusia i le 1 Nifae 8. Afai e manaomia e tamaiti aoga se fesoasoani, valaaulia i latou e iloilo puupuu lena mataupu.

• O a faailoga autu e mafai ona e manatua mai le miti a Liae o loo faamaumauina i le 1 Nifae 8?

Sa matuai manao lava Nifae ia malamalama i le uiga o le miti a lona tama ma talitonu o le a faailoa atu e le Alii ia te ia. A o ia mafaufau loloto i lona loto, sa faaali mai le Agaga o le Alii ma faaali atu ia te ia le laau o le ola. Ina ua fesili atu Nifae ia iloa le faauigaina o le laau, sa faaali mai se agelu e fesoasoani ia te ia e aoao atili e uiga i mea sa ia vaaia i se faaaliga (tagai 1 Nifae 11:1–14).

O se vaega o le fesoasoani ia Nifae ia malamalama i le uiga o le laau, na fesili atu ai le agelu ia Nifae i se fesili. Faitau le 1 Nifae 11:16 e vaai po o le a le fesili na fai atu.

Mafaufau e vaevae le vasega i ni paga ma fai i ai e fesili le tasi i le isi ma tali mai i le fesili i le fuaiupu 16 ae latou te lei faitauina le fuaiupu 17.

• E faapefea ona e tali atu i le fesili o loo i le fuaiupu 16?

Faitau le fuaiupu 17 e vaai ai pe na faapefea ona tali atu Nifae.

• O le a se mea e tulaga ese ia te oe e uiga i le tali a Nifae i le fuaiupu 17?

“Faamaualalo” o lona uiga o le alu ifo ma le lotofuatiaifo mai se tulaga maualuga po o se tulaga mamalu. Mo se faataitaiga, o le faatinoga a le Faaola o le mulumuluina o vae o Ona soo e mafai ona manatu i ai o se faatinoga o le faamaualalo (tagai Ioane 13:3–17). E ui o le faamaualalo o le Atua o loo faamatalaina i nei fuaiupu e mafai foi ona aoao mai ai e uiga i le faamaualalo o le Tama Faalelagi, ae o lenei lesona e taulai tonu lava i le faamaualalo o Iesu Keriso.

Faitau le mea na vaai i ai Nifae i le 1 Nifae 11:13–23, ma vaavaai mo faamaoniga o le faamaualalo o le Atua.

• O le a se faamaoniga na e maua i le faamaualalo o le Atua?

• O a upumoni ua e aoaoina e uiga i le faamaualalo o le Atua?

O se tasi o upumoni e mafai ona tatou aoaoina o le faamaualalo o le Atua e faaalia ai Lona alofa mo i tatou.

• O le a sou manatu e faapefea ona faaalia i le soifua mai o le Faaola lenei upumoni?

Faitau le 1 Nifae 11:26–33, ma vaavaai mo ni auala faaopoopo na faamaualalo ai Iesu e faaalia ai Lona alofa mo tagata.

Mafaufau e vaevae tamaiti aoga i ni vaega po o ni paga ma atofa atu ia i latou ni vaega laiti o le 1 Nifae 11:26–33. A uma ona faitauina a latou fuaiupu atofaina, e mafai ona latou talanoaina fesili nei ma a latou vaega po o paga.

O le isi manatu o le faaali atu lea o ata o vaega o le soifuaga o le Faaola o loo taua i nei fuaiupu. Ona valaaulia lea o tamaiti aoga e sue ia tala o le Feagaiga Fou o loo faamatala ai le mea na tupu o loo faaalia i ata taitasi.

E mafai foi e tamaiti aoga ona maimoa i se ata, sue le tala o le Feagaiga Fou e o faatasi ai, ma faamatala pe faapefea ona faapupula mai e le tala le faamaualalo o le Atua.

• O le a se faamaoniga o le faamaualalo o le Faaola na e mauaina?

• E faapefea ona faaalia e nei faatinoga Lona alofa?

• O a isi faataitaiga mai le soifuaga o Iesu Keriso e te lagona e faaalia ai Lona alofa ma le faamaualalo?

Faitau le saunoaga a Elder Quentin L. Cook o le Korama a Aposetolo e Toasefululua e uiga i le ala e fesoasoani ai nei mea na tutupu ia i tatou e iloa ai le alofa o le Faaola mo i tatou. Pe atonu e te manao e maimoa le vitio “O Le Faavavau o Aso Uma” mai le taimi 4:01 i le 4:43, o loo maua i le ChurchofJesusChrist.org.

O le faataitaiga a le Faaola o le lotomaualalo ma le ositaulaga mo tagata uma, o le mea aupito maoae lea na tupu i le talafaasolopito. Sa naunau le Faaola, e ui o se tasi o le Aiga Atua, e sau i le lalolagi o se pepemeamea faatauvaa ma amata ai se soifuaga lea na aofia ai le aoao atu ma le faamalologa o Ona uso ma tuafafine ma taualuga ai i tiga e le mafaamatalaina i Ketesemane ma luga o le satauro ina ia faaatoatoa ai Lana Togiola. O lenei faatinoga o le alofa ma le lotomaualalo e Keriso ua lauiloa faapea o Lona faamaualalo. Na Ia faia lenei mea mo alii ma tamaitai uma ua foafoaina ma o le a foafoaina e le Atua. (Quentin L. Cook, “O le Faavavau o Aso Uma,” Ensign po o le Liahona, Nov. 2017, 52)

• E faapefea ona fesoasoani le saunoaga a Elder Cook e te malamalama atili ai i le faamaualalo o le Atua?

O faamanuiaga faifai pea o le faamaualalo o le Faaola

O le faamaualalo o le Faaola o loo faaauau pea ona avea ma faamaoniga o Lona alofa mo i tatou i aso nei.

Mafaufau e faasoa atu pe na faapefea ona faamanuiaina oe i le faamaualalo o le Faaola. E mafai ona fesoasoani lenei mea i tamaiti aoga e lagona ai le alofa o le Tama Faalelagi ma Iesu Keriso mo i latou.

Maimoa le vitio “Le Alofa o Lou Faaola” (3:39), o loo maua i le ChurchofJesusChrist.org, ma vaavaai mo auala e faasoa mai e tamaiti i le vitio o latou lagona i Lona alofa.

E ono aoga mo tagata aoga le tali o fesili nei i totonu o a latou api faamaumau o suesuega.

• Ua faapefea ona faaalia e le Tama Faalelagi ma Iesu Keriso lo Laua alofa mo oe?

• E faapefea e mea ua La faia ona aafia ai ou lagona e uiga ia i Laua?

• O le a se mea ua musuia oe e fai e faaali ai lou alofa mo le Tama Faalelagi ma Iesu Keriso?

A uma ua lava se taimi e tusitusi ai tamaiti aoga, mafaufau e valaaulia tamaiti aoga e faasoa mai o latou manatu ma lagona. Afai na faia e tamaiti aoga sauniuniga mo le vasega, e mafai ona latou faasoa atu le mea na latou aumaia ma faamatala mai pe faapefea ona fesoasoani lena mea ia i latou e lagona ai le alofa o le Atua mo i latou.

Manatu ma Talaaga o Faamatalaga

O ai le Agaga o loo fetalai mai ia Nifae i le amataga o lenei faaaliga?

Na aoao mai Elder James E. Talmage (1862–1933) o le Korama a Aposetolo e Toasefululua:

O le Agaga o le Alii e mafai ona faaali mai o Ia lava i faatusa ma foliga o se tagata, ua faailoa mai i le faatalanoaga matagofie i le va o le Agaga ma Nifae, lea na Ia faaali mai ai o Ia lava i le perofeta, ma fesiligia o ia e uiga i ona manaoga ma talitonuga, na faatonuina ai o ia i mea a le Atua, ma talanoa faafesagai ma le tagata.” (James E. Talmage, The Articles of Faith [1968], 159–60; tagai foi Marion G. Romney, “The Holy Ghost,” Ensign, May 1974, 90–92)

O a mea ua aoao mai e taitai o le Ekalesia e uiga i le faamaualalo o le Atua?

Na saunoa le Perofeta o Iosefa Samita (1805–44):

A tatou tomanatu i le paia ma tulaga atoatoa o lo tatou Matai sili, o le ua tatalaina se ala e mafai ai ona tatou o mai ia te ia, e oo lava i le ositaulaga o ia lava, e liu suavai ai o tatou loto i totonu ia i tatou ona o lona faamaualalo. Aoaoga a Peresitene o le Ekalesia: Iosefa Samita [2011], 53–54)

Na faamalamalama mai e Elder D. Todd Christofferson o le Korama a Aposetolo e Toasefululua:

O Iesu o le Ulumatua i agaga ma le Alo e Toatasi na Fanaua o le Atua i la le tino. E ui lava e leʻi fanauina i tatou e le Atua i la le tino, ae ua pei i tatou o Iesu, o le fanau agaga a le Atua. O lea la, o lo tatou fanau mai i le olaga faitino o se mea foi e faamaualalo, ma e pei o Keriso, e i ai se faamoemoega mamalu. E pei lava o Iesu, sa tatou o ifo i lalo mai le lagi e faia le finagalo o Ia na auina mai i tatou ma ia ausia, faatasi ai ma le alofa tunoa o Keriso, i le tino ola pea ma le ola e faavavau. Faamata e taua mo i tatou, a o tatou saili e “a’e i luga,” ia o ifo foi i lalo ia le itiiti ifo i nisi o mea e mafai ona tatou malamalama atoatoa i ai ma avea atili ai faapei o Keriso? Afai e manaomia e Iesu ni aafiaga patino, e mafai foi ona tatou manaomia nisi o luitau ma tofotofoga, “ina ia mafai ona faatumuina [o tatou] loto i le alofa mutimutivale, e tusa ma la le tino, ina ia mafai ona [tatou] iloa e tusa ai ma la le tino, le ala e fesoasoani ai [le tasi i le isi] e tusa ma o [tatou] vaivaiga” [Alema 7:12]? (D. Todd christofferson, “The Condescension of God and of Man” [Faigalotu o le Kerisimasi a le Au Peresitene Sili, Tes. 7, 2014], ChurchofJesusChrist.org

Mo nisi faamatalaga e uiga i le faamaualalo o le Atua, e mafai ona e faitauina se tusiga mai ia Epikopo Richard C. Edgley o le Au Epikopo Pulefaamalumalu, “ O le Faamaualalo o le Atua,” Liahona, Tes. 2001, 16–21.

Gaoioiga Faaopoopo e Aoao Ai

1 Nifae 11:34–36. “O le fale tele ma le ateatea”

Mafaufau e valaaulia tamaiti aoga e manatua faamatalaga e uiga i le fale tele ma le o loo taua i le miti a Liae. Valaaulia i latou e iloilo puupuu le 1 Nifae 8:26–28, 31–34, pe a manaomia.

Valaaulia tamaiti aoga e faitau le 1 Nifae 11:34–36, ma vaavaai mo le uiga o le fale tele ma le ateatea. Fesili atu po o le a le uiga o lena mea ia i latou ma mea ua latou aoaoina mai le faatusa o le pau o le fale. Fesili atu pe aisea latou te manatu ai o i latou o i le fale “e faasagatau i aposetolo e toasefululua a le Tamai Mamoe” (fuaiupu 35), ma valaaulia i latou e faasoa mai pe mafai faapefea ona tupu lena mea i o tatou aso.

Valaaulia tamaiti aoga e faasoa mai ni auala e mafai ona latou tutu faatasi ai ma Aposetolo po o aafiaga na latou maua lea na faamalosia ai a latou molimau faapea o Aposetolo o “aposetolo a le Tamai Mamoe.” Valaaulia tamaiti aoga e faatu se sini e tutu i tafatafa o le Faaola ma Ana Aposetolo filifilia.

1 Nifae 11. “Vaai!”

I lo latou taimi faatasi ma Nifae, na ta’u atu ai e le Agaga ma se agelu a le Alii ia Nifae i le tele o taimi e vaai. Valaaulia tamaiti aoga e sailiili i le 1 Nifae 11 mo le upu vaai ma matau mea na faaalia ia Nifae.

Faamanatu i tamaiti o se tasi o faamoemoega autu o le Agaga Paia o le molimau atu lea i le Tama Faalelagi ma Iesu Keriso (tagai 3 Nifae 28:11).

Fai i le vasega e faasoa mai pe na faapefea ona faasino atu e le Agaga Paia o latou mafaufau ia Iesu Keriso ma fesoasoani ia i latou e aoao e uiga ia te Ia.

Valaaulia tamaiti aoga e ole atu i le Tama Faalelagi e faasino atu i latou i le Faaola a o latou suesueina le Tusi a Mamona. Faamanatu atu i tamaiti aoga e gauai atu i uunaiga a le Agaga lea o le a taiala ai i latou e vaai ma faauta i le Tamai Mamoe a le Atua (tagai 1 Nifae 11:31).